Read Aramaic Peshita Ecclesiastes 2 Bible Online

Ecclesiastes 2 - Aramaic Peshita bible

Ecclesiastes 2

¹ܐܸܡ̇ܪܹܬ̣ ܐܸܢܵܐ ܠܠܹܒ̇ܝ: ܬܵܐ ܐܹܒ̣ܩܹܝܟ ܒܚܲܕܼܘܼܬ̣ܵܐ: ܘܲܚܙܝܼ ܛܵܒ̣ܬ̣ܵܐ. ܘܗܵܐ ܐܵܦ ܗܵܢܵܐ ܗܸܒ̣ܠܵܐ.

²ܠܓ̣ܘܼܚܟܵܐ ܐܸܡ̇ܪܹܬ̣ ܡܵܢܵܐ ܗܸܢܝܵܢ. ܘܲܠܚܲܕܼܘܼܬ̣ܵܐ ܡܵܢܵܐ ܗ̄ܘܼ ܥܵܒ̣ܕܲܬ̇ܝ.

³ܪܢܹܝ̇ܬ̣ ܒܠܹܒ̇ܝ ܠܲܡܒܲܣܵܡܘܼ ܒܚܲܡܪܵܐ ܒܸܣܪܝ. ܘܠܹܒ̇ܝ ܪܢ̣ܵܐ ܒܚܸܟ̣ܡ̱ܬ̣ܵܐ: ܘܐܹܚܝܼܕܼ ܒܣܲܟ̇ܘܼܠܬ̣ܵܢܘܼܬ̣ܵܐ. ܥܕܲܡܵܐ ܕܐܸܚܙܹܐ ܐܲܝܢܵܐ ܛܵܒ̣ ܠܲܒ̣ܢܲܝ̈ܢܵܫܵܐ ܕܢܸܥܒ̇ܕܼܘܼܢ ܬܚܹܝܬ̣ ܫܸܡܫܵܐ: ܡܸܢܝܵܢ ܝܵܘ̈ܡܲܝ ܚܲܝܲܝ̈ܗܘܿܢ.

⁴ܐܲܣܓ̇ܝܼܬ̣ ܠܝܼ ܥܲܒ̣̈ܕܹ̇ܐ: ܒܢܹ̇ܝܬ̣ ܠܝܼ ܒܵـ̈ـܬܹܐ. ܢܸܨܒܹ̇ܬ̣ ܠܝܼ ܟܲܪ̈ܡܹܐ.

⁵ܥܸܒ̣ܕܹ̇ܬ̣ ܠܝܼ ܓܲܢܹ̈ܐ ܘܦܲܪ̈ܕܲܝܣܹܐ. ܘܢܸܨܒܹ̇ܬ̣ ܒܗܘܿܢ ܐܝܼܠܵܢܝܼ̈ܢ ܕܟ̣ܠ ܦܹܐܪ̈ܝܼܢ.

⁶ܥܸܒ̣ܕܹ̇ܬ̣ ܠܝܼ ܝܲܡ̈ܡܵܬ̣ܵܐ ܕܡܲـ̈ـܝܵܐ: ܠܡܲܫܩܵܝܘܼ ܡܸܢܗܹܝܢ ܥܵܒ̣ܵܐ ܕܡܲܦܪܲܥ ܐܝܼܠܵܢܹ̈ܐ.

⁷ܩܢܹ̇ܝܬ̣ ܠܝܼ ܥܲܒ̣̈ܕܹ̇ܐ ܘܐܲܡ̈ܗܵܬ̣ܵܐ. ܘܲܒ̣ܢܲܝ̈ ܒܲܝܬܵܐ ܗܘ̤ܵܘ ܠܝܼ ܣܘܿܓ̣ܵܐܐ. ܘܐܵܦ ܩܸܢܝܵܢܵܐ ܕܬ̣ܵܘܪܹ̈ܐ ܘܲܕܼܥܵܢܹ̈ܐ: ܣܲܓ̇ܝܼ ܗܘ̤ܵܐ ܠܝܼ ܡ̣ܢ ܟܠ ܕܲܗܘ̤ܵܘ ܩܕܼܵܡܲܝ ܒܐܘܿܪܸܫܠܸܡ.

⁸ܟܲܢܫܹ̇ܬ̣ ܠܝܼ ܐܵܦ ܟܸܣܦܵܐ ܘܕܲܗܒ̣ܵܐ: ܘܩܸܢܝܵܢܵܐ ܕܡܲܠ̈ܟܹ̇ܐ ܕܲܡܕܼܝܼ̈ܢܵܬ̣ܵܐ. ܥܸܒ̣ܕܹ̇ܬ̣ ܠܝܼ ܡܫܲܒ̇ܚܵܢܹ̈ܐ ܘܲܡܫܲܒ̇ܚܵܢ̈ܝܵܬ̣ܵܐ: ܘܒܲܣܝܼܡܘܼܬ̣ܵܐ ܒܲܒ̣ܢܲܝ̈ܢܵܫܵܐ ܥܸܒ̣ܕܹ̇ܬ̣ ܠܝܼ ܫܵܩܵـ̈ـܘܵܬ̣ܵܐ ܘܫܵܩ̈ܝܵܬ̣ܵܐ.

⁹ܝܸܪܒܹ̇ܬ̣ ܘܐܵܘܣܦܹ̇ܬ̣: ܝܲܬ̇ܝܼܪ ܡ̣ܢ ܟܠ ܕܲܗܘ̤ܵܘ ܩܕܼܵܡܲܝ ܒܐܘܿܪܸܫܠܸܡ. ܘܐܵܦ ܚܸܟ̣ܡܲܬ̣ܝ ܩܵܡܲܬ̤ ܠܵܗ̇.

¹⁰ܘܟ̣ܠ ܕܲܫ̣ܐܸܠ ܥܲܝܢܲܝ̈ ܠܵܐ ܟܠܹ̇ܝܬ̣ ܡܸܢܗܹܝܢ. ܘܠܵܐ ܟܠܹܝܬ̣ ܠܹܒ̇ܝ ܡ̣ܢ ܟܠ ܚܲܕܼܘܵܐ. ܡܸܛܠ ܕܠܹܒ̇ܝ ܚܕܼܝܼ ܒܟ̣ܠ ܥܲܡ̄ܠܝ. ܘܗܵܕܹܐ ܗܘ̤ܵܬ̣ ܡܢܵܬ̣ܝ ܡ̣ܢ ܟܠܹܗ ܥܲܡ̄ܠܝ.

¹¹ܘܚܵܪܹܬ̣ ܐܸܢܵܐ ܒܟ̣ܠ ܥܒ̣ܵܕܼܵܐ ܕܲܥ̣ܒܲܕܼ ܐܝܼ̈ܕܲܝ: ܘܲܒ̣ܟ̣ܠ ܥܲܡܠܵܐ ܕܥܸܡܠܹ̇ܬ̣ ܠܡܸܥܒܲܕܼ. ܘܗܵܐ ܟܠܡܸܕܹ̇ܡ ܗܸܒ̣ܠܵܐ ܘܛܘܼܪܵܦܵܐ ܕܪܘܼܚܵܐ. ܘܠܲܝܬ̇ ܝܘܼܬ̣ܪܵܢ ܬܚܹܝܬ̣ ܫܸܡܫܵܐ.

¹²ܘܚܵܪܹܬ̣ ܐܸܢܵܐ ܠܡܸܚܙܵܐ ܚܸܟ̣ܡ̱ܬ̣ܵܐ: ܘܲܠܡܸܬ̣ܥܲܒ̣ܪܵܢܘܼܬ̣ܵܐ ܘܣܲܟ̣ܠܘܼܬ̣ܵܐ. ܡܸܛܠ ܕܡܲܢܘܼ ܓܲܒ̣ܪܵܐ ܕܢܸܥܘܿܠ ܒܵܬܲܪ ܡܲܠܟܵܐ ܒܕܼܝܼܢܵܐ: ܟܸܢ ܥܲܡ ܡ̇ܢ ܕܥܲܒ̣ܕܹ̇ܗ.

¹³ܘܲܚܙܹ̇ܝܬ̣ ܕܐܝܼܬ̣ ܝܘܼܬ̣ܪܵܢ ܒܚܸܟ̣ܡ̱ܬ̣ܵܐ ܝܲܬ̇ܝܼܪ ܡ̣ܢ ܣܲܟ̣ܠܘܼܬ̣ܵܐ: ܐܲܝܟ ܕܝܲܬ̇ܝܼܪ ܢܘܼܗܪܵܐ ܡ̣ܢ ܚܸܫܘܿܟ̣ܵܐ.

¹⁴ܚܲܟ̇ܝܼܡܵܐ ܥܲܝܢܵܘ̈ܗܝ ܒܪܹܫܹܗ. ܘܣܲܟ̣ܠܵܐ ܒܚܸܫܘܿܟ̣ܵܐ ܐܵܙܹ̇ܠ. ܘܝܼܕܼܥܹ̇ܬ̣ ܐܸܢܵܐ ܕܓܸܕܼܫܵܐ ܚܲܕܼ ܓܵܕܹ̇ܫ ܠܟ̣ܠܗܘܿܢ.

¹⁵ܘܐܸܡ̇ܪܹܬ̣ ܐܸܢܵܐ ܒܠܹܒ̇ܝ: ܐܸܢ ܓܸܕܼܫܵܐ ܕܣܲܟ̣ܠܵܐ ܐܵܦ ܠܝܼ ܢܸܓ̣ܕܲܫ: ܘܲܠܡܵܢܵܐ ܐܸܬ̣ܚܲܟ̇ܡܹ̇ܬ̣ ܐܸܢܵܐ ܝܲܬ̇ܝܼܪܵܐܝܼܬ̣. ܘܡܲܠܠܹ̇ܬ̣ ܒܠܹܒ̇ܝ ܕܐܵܦ ܗܵܢܵܐ ܗܸܒ̣ܠܵܐ ܗ̄ܘܼ.

¹⁶ܡܸܛܠ ܕܣܲܟ̣ܠܵܐ ܡ̣ܢ ܝܲܬ̇ܝܼܪ ܡܡܲܠܸܠ. ܡܸܛܠ ܕܠܲܝܬ̇ ܕܘܼܟ̣ܪܵܢܵܐ ܠܚܲܟ̇ܝܼܡܵܐ ܥܲܡ ܣܲܟ̣ܠܵܐ ܠܥܵܠܲܡ. ܐܲܝܟ ܕܡ̣ܢ ܟܲܕ̇ܘܼ ܐܵܬ̣ܝܢ. ܘܟ̣ܠ ܡܸܬ̇ܛܥܹܐ. ܘܐܲܝܟܲܢܵܐ ܢܡܘܼܬ̣ ܚܲܟ̇ܝܼܡܵܐ ܥܲܡ ܣܲܟ̣ܠܵܐ.

¹⁷ܘܲܣܢܹ̇ܝܬ̣ ܐܸܢܵܐ ܠܚܲܝܹ̈ܐ. ܡܸܛܠ ܕܒ̣ܝܼܫ ܥܠܲܝ ܥܒ̣ܵܕܼܵܐ ܕܐܸܬ̣ܥ̱ܒܸܕܼ ܬܚܹܝܬ̣ ܫܸܡܫܵܐ ܡܸܛܠ ܕܟ̣ܠܡܸܕܹ̇ܡ ܗܸܒ̣ܠܵܐ ܘܛܘܼܪܵܦܵܐ ܕܪܘܼܚܵܐ.

¹⁸ܘܲܣܢܹ̇ܝܬ̣ ܐܸܢܵܐ ܟܠ ܥܲܡ̄ܠܝ ܕܐܸܢܵܐ ܥܸܡܠܹ̇ܬ̣ ܬܚܹܝܬ̣ ܫܸܡܫܵܐ. ܡܸܛܠ ܕܫܵܒܹ̇ܩ ܐ̄ܢܵܐ ܠܹܗ ܠܓܲܒ̣ܪܵܐ ܕܗܵܘܹ̇ܐ ܒܵܬܲܪܝ.

¹⁹ܘܡ̇ܢ ܝܵܕܲܥ ܐܸܢ ܚܲܟ̇ܝܼܢ ܢܸܗܘܹܐ: ܘܐܸܢ ܣܟܲܠ. ܘܢܸܫܬܲܠܲܛ ܒܟ̣ܠ ܥܲܡ̄ܠܝ ܕܐܸܢܵܐ ܥܸܡܠܹ̇ܬ̣: ܘܐܸܬ̣ܚܲܟ̇ܡܹ̇ܬ̣ ܬܚܹܝܬ̣ ܫܸܡܫܵܐ. ܘܐܵܦ ܗܵܢܵܐ ܗܸܒ̣ܠܵܐ.

²⁰ܘܗܸܦܟܹ̇ܬ̣ ܐܸܢܵܐ ܕܐܹܫܲܝܸܫ ܝܵܬ̣ ܠܹܒ̇ܝ: ܥܲܠ ܟܠ ܥܲܡܠܵܐ ܕܥܸܡܠܹ̇ܬ̣ ܬܚܹܝܬ̣ ܫܸܡܫܵܐ.

²¹ܡܸܛܠ ܕܐܝܼܬ̣ ܓܲܒ̣ܪܵܐ ܕܥܲܡܠܹܗ ܒܚܸܟ̣ܡ̱ܬ̣ܵܐ ܘܒ̣ܝܼܕܲܥܬ̣ܵܐ ܘܲܒ̣ܟ̣ܫܝܼܪܘܼܬ̣ܵܐ. ܘܲܠܐ̄ܢܵܫܵܐ ܕܠܵܐ ܥܵܡܹ̇ܠ ܒܵܗ̇: ܝܵܗܹ̇ܒ̣ ܠܵܗ̇ ܡܢܵܬܹܗ. ܘܐܵܦ ܗܵܢܵܐ ܗܸܒ̣ܠܵܐ ܘܒ̣ܝܼܫܬܵܐ ܪܲܒ̇ܬ̣ܵܐ.

²²ܕܡܵܢܵܐ ܗܵܘܹ̇ܐ ܠܒܲܪܢܵܫܵܐ ܒܟ̣ܠ ܥܲܡܠܹܗ: ܘܲܒ̣ܨܸܒ̣ܝܵܢܵܐ ܕܠܸܒܹ̇ܗ ܕܗ̤ܘ ܥܵܡܹ̇ܠ ܬܚܹܝܬ̣ ܫܸܡܫܵܐ.

²³ܡܸܛܠ ܕܟ̣ܠ ܝܵܘܡܵܘ̈ܗܝ ܟܹܐܒ̣ܵܐ ܘܪܘܼܓ̣ܙܵܐ ܥܸܢܝܵܢܹܗ. ܘܐܵܦ ܒܠܸܠܝܵܐ ܠܵܐ ܫܵܟܹ̇ܒ̣ ܠܸܒܹ̇ܗ. ܘܐܵܦ ܗܵܢܵܐ ܗܸܒ̣ܠܵܐ.

²⁴ܠܲܝܬ̇ ܕܛܵܒ̣ ܠܓܲܒ̣ܪܵܐ ܐܸܠܵܐ ܕܢܹܐܟ̣ܘܿܠ ܘܲܕܼܢܸܫܬܸ̇ܐ: ܘܕܲܢܚܵܘܸܐ ܛܵܒ̣ܬ̣ܵܐ ܠܢܲܦ̮ܫܹܗ ܒܥܲܡܠܹܗ. ܘܐܵܦ ܗܵܕܹܐ ܚܙܹ̇ܝܬ̣ ܕܡ̣ܢ ܐܝܼܕܼܵܐ ܗ̄ܝܼ ܕܡܵܪܝܵܐ.

²⁵ܡܸܛܠ ܕܡܲܢ̣ܘܼ ܢܹܐܟ̣ܘܿܠ: ܘܡܲܢ̣ܘܼ ܢܸܫܬܹ̇ܐ: ܠܒܲܪ ܡܸܢܹܗ.

²⁶ܡܸܛܠ ܕܲܠܓܲܒ̣ܪܵܐ ܕܛܵܒ̣ ܩܕܼܵܡܵܘܗܝ: ܝܵܗܹ̇ܒ̣ ܚܸܟ̣ܡ̱ܬ̣ܵܐ ܘܝܼܕܲܥܬ̣ܵܐ ܘܚܲܕܼܘܼܬ̣ܵܐ. ܘܲܠܚܲܛܵܝܹ̈ܐ ܝܵܗܹ̇ܒ̣ ܥܸܢܝܵܢܵܐ ܠܡܵܘܣܵܦܘܼ ܘܠܲܡܟܲܢܵܫܘܼ: ܘܲܠܡܸܬܲܠ ܠܕܼܛܵܒ̣ ܡܵܪܝܵܐ. ܘܐܵܦ ܗܵܢܵܐ ܗܸܒ̣ܠܵܐ ܘܛܘܼܪܵܦܵܐ ܕܪܘܼܚܵܐ.