Read Aramaic Peshita Ecclesiastes 3 Bible Online

Ecclesiastes 3 - Aramaic Peshita bible

Ecclesiastes 3

¹ܠܟ̣ܠܡܸܕܹ̇ܡ ܙܲܒ̣ܢܵܐ. ܘܙܲܒ̣ܢܵܐ ܠܟ̣ܠ ܨܒ̣ܘܼ ܬܚܹܝܬ̣ ܫܸܡܫܵܐ.

²ܙܲܒ̣ܢܵܐ ܠܡܹܐܠܲܕܼ: ܘܙܲܒ̣ܢܵܐ ܠܲܡܡܵܬ̣. ܙܲܒ̣ܢܵܐ ܠܡܸܨܒ̣: ܘܙܲܒ̣ܢܵܐ ܠܡܸܥܩܲܪ ܢܨܝܼܒ̣ܵܐ.

³ܙܲܒ̣ܢܵܐ ܠܡܸܩܛܲܠ: ܘܙܲܒ̣ܢܵܐ ܠܡܲܚܵܝܘܼ ܙܲܒ̣ܢܵܐ ܠܡܸܣܬܲܪ: ܘܙܲܒ̣ܢܵܐ ܠܡܸܒ̣ܢܵܐ.

⁴ܙܲܒ̣ܢܵܐ ܠܡܸܒ̣ܟܵܐ: ܘܙܲܒ̣ܢܵܐ ܠܡܸܓܚܲܟ. ܙܲܒ̣ܢܵܐ ܠܡܲܪܩܵܕܼܘ: ܘܙܲܒ̣ܢܵܐ ܠܲܡܪܲܩܵܕܼܘܼ.

⁵ܙܲܒ̣ܢܵܐ ܠܡܲܪܡܵܝܘܼ ܟܹܐܦܹ̈ܐ: ܘܙܲܒ̣ܢܵܐ ܠܲܡܟܲܢܵܫܘܼ ܟܹܐܦܹ̈ܐ. ܙܲܒ̣ܢܵܐ ܠܡܸܥܦܲܩ: ܘܙܲܒ̣ܢܵܐ ܠܡܸܬ̣ܪܲܚܵܩܘܼ ܡ̣ܢ ܥܦܘܼܩܝܵܐ.

⁶ܙܲܒ̣ܢܵܐ ܠܡܵܘܒܵܕܼܘܼ: ܘܙܲܒ̣ܢܵܐ ܠܡܸܒ̣ܥܵܐ. ܙܲܒ̣ܢܵܐ ܠܡܸܩܛܲܪ: ܘܙܲܒ̣ܢܵܐ ܠܡܸܫܪܵܐ.

⁷ܙܲܒ̣ܢܵܐ ܠܡܸܨܪܵܐ: ܘܙܲܒ̣ܢܵܐ ܠܲܡܚܵܛ. ܙܲܒ̣ܢܵܐ ܠܡܸܫܬܲܩ: ܘܙܲܒ̣ܢܵܐ ܠܲܡܡܲܠܵܠܘܼ.

⁸ܙܲܒ̣ܢܵܐ ܠܡܸܪܚܲܡ: ܘܙܲܒ̣ܢܵܐ ܠܡܸܣܢܵܐ. ܙܲܒ̣ܢܵܐ ܕܲܩܪܵܒ̣ܵܐ: ܘܙܲܒ̣ܢܵܐ ܕܲܫܠܵܡܵܐ.

⁹ܘܡܵܢܵܐ ܝܘܼܬ̣ܪܵܢ ܒܲܥܒ̣ܵܕܼܵܐ ܕܗ̤ܘ ܥܵܡܹ̇ܠ.

¹⁰ܚܙܹ̇ܝܬ̣ ܥܸܢܝܵܢܵܐ ܕܝܲܗ̄ܒ̣ ܡܵܪܝܵܐ ܠܲܒ̣ܢܲܝ̈ܢܵܫܵܐ ܠܡܸܬ̣ܥ̱ܢܵܝܘܼ ܒܹܗ.

¹¹ܟܠ ܕܥܵܒܹ̇ܕܼ ܕܫܲܦܝܼܪ ܒܙܲܒ̣ܢܹܗ. ܘܝܵܬ̣ ܥܵܠܡܵܐ ܝܲܗ̄ܒ̣ ܒܠܸܒ̇ܗܘܿܢ: ܐܲܝܟ ܕܠܵܐ ܢܸܫܟ̇ܚ ܐ̄ܢܵܫܵܐ ܥܒ̣ܵܕܼܵܐ ܕܲܥ̣ܒܲܕܼ ܡܵܪܝܵܐ ܪܹܫܝܼܬ̣ܵܐ ܥܕܲܡܵܐ ܠܐܲܚܪܵܝܬܵܐ.

¹²ܘܝܸܕܼܥܹ̇ܬ̣ ܕܠܲܝܬ̇ ܛܵܒ̣ ܒܗܘܿܢ: ܐܸܠܵܐ ܠܡܸܚܕܵܐ ܘܲܠܡܸܥܒܲܕܼ ܕܛܵܒ̣ ܒܚܲܝܲܝ̈ܗܘܿܢ.

¹³ܘܐܵܦ ܟܠ ܐ̄ܢܵܫ ܕܢܹܐܟ̣ܘܿܠ ܘܢܸܫܬܸ̇ܐ: ܘܢܸܚܙܹܐ ܛܵܒ̣ܬ̣ܵܐ ܒܟ̣ܠ ܥܲܡܠܹܗ: ܡܵܘܗܲܒ̣ܬ̣ܵܐ ܗ̄ܝܼ ܕܡܵܪܝܵܐ.

¹⁴ܝܼܕܼܥܹ̇ܬ̣ ܕܟ̣ܠ ܕܲܥܒܲܕܼ ܡܵܪܝܵܐ: ܗ̤ܘ ܢܸܗܘܹܐ ܠܥܵܠܲܡ. ܥܠܵܘܗܝ ܠܲܝܬ̇ ܠܡܵܘܣܵܦܘܼ: ܘܡܸܢܹܗ ܠܲܝܬ̇ ܠܡܸܒ̣ܨܲܪ. ܘܡܵܪܝܵܐ ܥ̣ܒܲܕܼ ܕܢܸܕܼܚ̄ܠܘܼܢ ܡܸܢܹܗ.

¹⁵ܡܵܐ ܕܲܗܘ̤ܵܐ ܡ̣ܢ ܟܲܕ̇ܘܼ: ܐܝܼܬ̣ܵܘܗܝ. ܘܟ̣ܠ ܡܵܐ ܕܢܸܗܘܹܐ: ܡ̣ܢ ܣܲܓ̇ܝܼ ܗܘ̤ܵܐ. ܘܐܲܠܵܗܵܐ ܢܸܒ̣ܥܸܐ ܠܲܪܕܼܝܼܦܵܐ ܕܡܸܬ̣ܪܕܸܦ.

¹⁶ܘܬ̣ܘܼܒ̣ ܚܙܹ̇ܝܬ̣ ܬܚܹܝܬ̣ ܫܸܡܫܵܐ: ܐܲܬܲܪ ܕܕܼܝܼܢܵܐ: ܬܲܡܵܢ ܪܘܼܫܥܵܐ. ܘܐܲܬܲܪ ܕܙܸܕܼܩܵܐ: ܬܲܡܵܢ ܥܵܘܼܠܵܐ.

¹⁷ܘܐܸܡ̇ܪܹܬ̣ ܐܸܢܵܐ ܒܠܹܒ̇ܝ: ܝܵܬ̣ ܙܲܕ̇ܝܼܩܵܐ ܘܝܵܬ̣ ܪܲܫܝܼܥܵܐ ܐܲܠܵܗܵܐ ܕܐܹ̇ܝܢ. ܡܸܛܠ ܕܙܲܒ̣ܢܵܐ ܠܟ̣ܠ ܨܒ̣ܘܼ. ܘܲܠܟ̣ܠ ܥܒ̣ܵܕܼ ܬܲܡܵܢ.

¹⁸ܐܸܡ̇ܪܹܬ̣ ܐܸܢܵܐ ܒܠܹܒ̇ܝ ܥܲܠ ܡܲܡܠܠܵܐ ܕܲܒ̣ܢܲܝ̈ܢܵܫܵܐ ܕܲܒ̣ܪܵܐ ܐܸܢܘܿܢ ܐܲܠܵܗܵܐ: ܘܠܲܡܚܵܘܵܝܘܼ ܕܗܸܢܘܿܢ ܐܲܝܟ ܒܥܝܼܪܵܐ ܐܸܢܘܿܢ

¹⁹ܠܗܘܿܢ ܡܵܛܹ̇ܐ ܓܸܕܼܫܵܐ ܕܲܒ̣ܢܲܝ̈ܢܵܫܵܐ ܘܓܸܕܼܫܵܐ ܕܲܒ̣ܥܝܼܪܵܐ. ܘܓܸܕܼܫܵܐ ܚܲܕܼ ܓܵܕܹ̇ܫ ܠܟ̣ܠܗܘܿܢ. ܐܲܝܟ ܡܵܘܬܹ̇ܗ ܕܗܵܢܵܐ: ܗܵܟܲܢܵܐ ܡܵܐܹ̇ܬ̣ ܗܵܢܵܐ. ܘܲܚܕܼܵܐ ܪܘܼܚܵܐ ܠܟ̣ܠܗܘܿܢ. ܘܲܡܝܲܬ̇ܪܘܼܬܹܗ ܕܒܲܪܢܵܫܵܐ ܡ̣ܢ ܒܥܝܼܪܵܐ ܠܲܝܬ̇. ܡܸܛܠ ܕܟ̣ܠ ܡܸܕܹ̇ܡ ܗܸܒ̣ܠܵܐ.

²⁰ܟܠ ܐܵܙܹ̇ܠ ܠܐܲܬ̣ܪܵܐ ܚܲܕܼ. ܟܠ ܗܘ̤ܵܐ ܡ̣ܢ ܥܲܦܪܵܐ. ܘܟ̣ܠ ܗܵܦܹ̇ܝܟ ܠܥܲܦܪܵܐ.

²¹ܘܡܲܢ̣ܘܼ ܝܵܕܲܥ ܐܸܢ ܪܘܼܚ ܒܢܲܝ̈ܢܵܫܵܐ ܣܵܠܩܵܐ ܠܥܸܠ: ܘܪܘܼܚ ܒܥܝܼܪܵܐ ܢܵܚ̇ܬܵܐ ܗ̤ܝ ܠܬܲܚܬ̇ ܠܐܲܪܥܵܐ.

²²ܘܲܚܙܹ̇ܝܬ̣ ܕܠܲܝܬ̇ ܕܛܵܒ̣ ܒܗܘܿܢ: ܐܸܠܵܐ ܕܢܸܚܕܹ̇ܐ ܐ̄ܢܵܫ ܒܲܥܒ̣ܵܕܼܵܘ̈ܗܝ. ܡܸܛܠ ܕܗ̤ܝ ܗ̄ܝܼ ܡܢܵܬܹܗ. ܡܸܛܠ ܕܡܲܢ̣ܘܼ ܢܲܝܬܹ̇ܝܘܗܝ ܠܡܸܚܙܵܐ ܒܟ̣ܠ ܕܢܸܗܘܸܐ ܡ̣ܢ ܒܵܬ̣ܪܹܗ.