Read Aramaic Peshita Ecclesiastes 5 Bible Online

Ecclesiastes 5 - Aramaic Peshita bible

Ecclesiastes 5

¹ܠܵܐ ܬܸܣܬܲܪܗܲܒ̣ ܒܦܘܼܡܵܟ. ܘܠܸܒܵܟ ܠܵܐ ܢܸܣܬܲܪܗܲܒ̣ ܠܡܲܦܵܩܘܼ ܡܸܠܬ̣ܵܐ ܩܕܼܵܡ ܐܲܠܵܗܵܐ. ܡܸܛܠ ܕܐܲܠܵܗܵܐ ܒܲܫܡܲܝܵܐ: ܘܐܲܢ̄ܬ̇ ܒܐܲܪܥܵܐ. ܡܸܛܠ ܗܵܢܵܐ ܢܸܗܘܘܿܢ ܦܸܬ̣ܓ̣ܵܡܲܝ̈ܟ ܙܥܘܿܪܝܼܢ.

²ܡܸܛܠ ܕܐܵܬܹ̇ܐ ܚܸܠܡܵܐ ܒܣܘܿܓܲܐܬ̣ ܥܸܢܝܵܢܵܐ. ܘܩܵܠܹܗ ܕܣܲܟ̣ܠܵܐ ܒܣܘܿܓܲܐܬ̣ ܦܸܬ̣ܓ̣ܵܡܹ̈ܐ.

³ܐܸܡܲܬ̣ܝ ܕܢܵܕܲܪ ܐܲܢ̄ܬ̇ ܢܸܕܼܪܵܐ ܠܐܲܠܵܗܵܐ: ܠܵܐ ܬܸܫܬܵܘܚܲܪ ܠܲܡܫܲܠܵܡܘܼܬܹܗ. ܡܸܛܠ ܕܠܲܝܬ̇ ܨܸܒ̣ܝܵܢܵܐ ܒܣܲܟ̣̈ܠܹܐ. ܐܲܢ̄ܬ̇ ܕܹܝܢ ܡܸܕܹ̇ܡ ܕܢܵܕܲܪ ܐܲܢ̄ܬ̇ ܦܪܘܿܥ.

⁴ܛܵܒ̣ ܗ̄ܘܼ ܕܠܵܐ ܬܸܕ̇ܘܿܪ: ܡ̣ܢ ܕܬܸܕ̇ܘܪ ܘܠܵܐ ܬܫܲܠܸܡ.

⁵ܘܠܵܐ ܬܸܬܸ̇ܠ ܦܘܼܡܵܟ ܠܡܲܚܛܵܝܘܼ ܒܸܣܪܵܟ. ܘܠܵܐ ܬܹܐܡܲܪ ܩܕܼܵܡ ܐܲܠܗܵܐ ܕܛܘܼܥܝܲܝ ܗ̄ܝܼ. ܕܲܠܡܵܐ ܒܸܪܓܲܙ ܐܲܠܵܗܵܐ ܥܲܠ ܩܵܠܵܟ: ܘܲܢܚܲܒܸ̇ܠ ܥܒ̣ܵܕܼܵܐ ܕܐܝܼܕܲܝ̈ܟ.

⁶ܡܸܛܠ ܕܲܒ̣ܣܘܿܓܲܐܬ̣ ܚܸܠܡܹ̈ܐ ܘܗܸܒ̣ܠܹ̈ܐ ܘܦܸܬ̣ܓ̣ܵܡܹ̈ܐ ܣܲܓ̇ܝܼ̈ܐܹܐ ܕܛܘܼܥܝܲܝ. ܐܲܢ̄ܬ̇ ܠܐܲܠܵܗܵܐ ܕܚܲܠ.

⁷ܘܐܸܢ ܥܘܼܠܒܵܢܵܐ ܕܡܸܣܟܹ̇ܢܹ̈ܐ ܘܲܚܛܘܼܦܝܵܐ ܘܕܼܝܼܢܵܐ ܬܸܚܙܹܐ ܒܲܡܕܼܝܼܢ̄ܬܵܐ: ܠܵܐ ܬܸܬ̣ܡܲܗ ܒܵܗ̇ ܒܲܨܒ̣ܘܼܬ̣ܵܐ. ܡܸܛܠ ܕܪܵܡܵܐ ܠܥܸܠ ܡ̣ܢ ܪܵܡܵܐ ܢܵܛܲܪ. ܘܪܵܡܝܼܢ ܥܠܲܝܗܘܿܢ.

⁸ܝܘܼܪܬܵܢܵܐ ܕܐܲܪܥܵܐ ܒܟ̣ܠ ܗ̄ܘܼ: ܡܲܠܟܵܐ ܠܚܲܩܠܵܐ ܡܲܦܠܲܚ.

⁹ܕܪܵܚܹ̇ܡ ܟܸܣܦܵܐ: ܠܵܐ ܢܸܣܒܲܥ ܟܸܣܦܵܐ. ܘܲܕܼܪܵܚܹ̇ܡ ܡܵܡܘܿܢܵܐ: ܠܵܐ ܢܩܲܕܹ̇ܝܘܗܝ. ܘܐܵܦ ܗܵܢܵܐ ܗܸܒ̣ܠܵܐ.

¹⁰ܒܣܘܿܓ̣ܵܐܐ ܕܛܵܒ̣ܬ̣ܵܐ ܣܓ̣ܝܼܘ ܐܵܟ̣ܘܿܠܹ̈ܝܗ̇. ܘܡܵܢܵܐ ܗܘ̤ܵܬ̣ ܟܲܫܝܼܪܵܐ ܠܩܲܢܵܝܹܗ̇: ܐܸܠܵܐ ܐܸܢ ܚܙܵܬ̣ܵܐ ܕܥܲܝܢܵܘ̈ܗܝ.

¹¹ܚܲܠܝܵܐ ܫܸܢܬ̣ܵܐ ܠܦܲܠܵܚܵܐ. ܐܸܢ ܙܥܘܿܪ ܘܐܸܢ ܣܲܓ̇ܝܼ ܐܵܟܹ̇ܠ. ܘܣܲܒ̣ܥܵܐ ܠܥܲܬܝܼܪܵܐ ܠܵܐ ܫܵܒܹ̇ܩ ܠܹܗ ܠܡܸܕܼܡܲܟ.

¹²ܐܝܼܬ̣ ܟܘܼܪܗܵܢܵܐ ܕܒ̣ܝܼܫܬܵܐ ܕܲܚܙܹ̇ܝܬ̣ ܬܚܹܝܬ̣ ܫܸܡܫܵܐ: ܥܘܼܬ̣ܪܵܐ ܕܡܸܬ̣ܢ̱ܛܲܪ ܠܡܵܪܹܗ ܠܒ̣ܝܼܫܬܹ̇ܗ.

¹³ܘܐܵܒܹ̇ܕܼ ܥܘܼܬ̣ܪܵܐ ܗܵܘܿ ܒܥܸܢܝܵܢܵܐ ܒܝܼܫܵܐ. ܕܐܵܘܠܸܕܼ ܒܪܵܐ: ܘܠܵܐ ܐܝܼܬ̣ ܒܐܝܼܕܹܗ ܡܸܕܹ̇ܡ.

¹⁴ܐܲܝܟܲܢܵܐ ܕܲܢܦܲܩ̣ ܡ̣ܢ ܟܲܪܣܵܗ̇ ܕܐܸܡܹܗ: ܥܲܪܛܸܠ ܢܸܗܦܘܿܟ ܠܡܹܐܙܲܠ ܐܲܝܟ ܕܐܸܬ̣ܵܐ. ܘܡܸܕܹ̇ܡ ܠܵܐ ܢܵܣܹ̇ܒ̣ ܒܥܲܡܠܹܗ ܕܢܹܐܙܲܠ ܒܐܝܼܕܹܗ.

¹⁵ܘܐܵܦ ܗܵܢܵܐ ܟܘܼܪܗܵܢܵܐ ܒܝܼܫܵܐ. ܐܲܝܟܲܢܵܐ ܓܹܝܪ ܕܐܸܬ̣ܵܐ: ܗܵܟܲܢܵܐ ܐܸܙܲܠ. ܘܡܵܢܵܐ ܝܘܼܬ̣ܪܵܢܵܐ ܒܟ̣ܠ ܕܲܥ̣ܡܲܠ ܠܪܘܼܚܵܐ.

¹⁶ܘܐܵܦ ܟܠ ܝܵܘܡܵܘ̈ܗܝ ܒܚܸܫܘܿܟ̣ܵܐ ܐܵܟܹ̇ܠ: ܘܲܒ̣ܪܘܼܓ̣ܙܵܐ ܣܲܓ̇ܝܼܐܵܐ: ܘܲܒ̣ܚܸܡܬ̣ܵܐ: ܘܒ̣ܐܒ̣ܠܵܐ: ܘܲܒ̣ܟ̣ܘܼܪܗܵܢܵܐ.

¹⁷ܗܵܢܵܐ ܡܸܕܹ̇ܡ ܕܲܚܙܹ̇ܝܬ̣ ܐܸܢܵܐ ܩܘܿܗܠܲܬ̣. ܛܵܒ̣ ܗ̄ܘܼ ܘܫܲܦܝܼܪ ܠܡܹܐܟܲܠ ܘܲܠܡܸܫܬܵܐ: ܘܲܠܡܸܚܙܵܐ ܛܵܒ̣ܬ̣ܵܐ ܒܟ̣ܠ ܥܲܡܠܹܗ ܕܥܵܡܹ̇ܠ ܬܚܹܝܬ̣ ܫܸܡܫܵܐ: ܡܸܢܝܵܢ ܝܵܘ̈ܡܵܬ̣ܵܐ ܕܚܲܝܵܘ̈ܗܝ ܕܝܲܗ̄ܒ̣ ܠܹܗ ܡܵܪܝܵܐ. ܡܸܛܠ ܕܗ̤ܘܝܘܼ ܡܢܵܬܹܗ.

¹⁸ܘܐܵܦ ܟܠ ܐ̄ܢܵܫ ܕܝܲܗ̄ܒ̣ ܠܹܗ ܡܵܪܝܵܐ ܥܘܼܬ̣ܪܵܐ ܘܢܸܟ̣ܣܹ̈ܐ. ܘܐܲܫ̱ܠܛܹܗ ܠܡܹܐܟܲܠ ܡܸܢܗܘܿܢ: ܘܲܠܡܸܣܲܒ̣ ܡܢܵܬܹܗ: ܘܲܠܡܸܚܕܵܐ ܒܥܲܡܠܹܗ. ܗܵܕܹܐ ܡܵܘܗܲܒ̣ܬ̣ܵܐ ܗ̄ܝܼ ܕܐܲܠܵܗܵܐ.

¹⁹ܡܸܛܠ ܕܠܵܘ ܣܲܓ̇ܝܼ ܢܸܥܗܲܕܼ ܝܵܘ̈ܡܵܬ̣ܵܐ ܕܚܲܝܵܘ̈ܗܝ ܡܸܛܠ ܕܐܲܠܵܗܵܐ ܡܲܥܢܹܐ ܠܹܗ ܒܚܲܕܼܘܼܬ̣ܵܐ ܕܠܸܒܹ̇ܗ.