Read Aramaic Peshita Ecclesiastes 7 Bible Online

Ecclesiastes 7 - Aramaic Peshita bible

Ecclesiastes 7

¹ܡܸܛܠ ܕܡܲܢ̣ܘܼ ܝܵـ̇ـܕܲܥ ܡܵܢܵܐ ܛܵܒ̣ ܠܒܲܪܢܵܫܵܐ ܒܚܲܝܵܘ̈ܗܝ: ܡܸܢܝܵܢ ܝܵܘ̈ܡܲܝ ܚܲܝܲܝ̈ ܗܸܒ̣ܠܹܗ. ܘܲܥ̣ܒܲܪ ܐܸܢܘܿܢ ܐܲܝܟ ܛܸܠܵܠܵܐ. ܡܲܢ̣ܘܼ ܢܚܵܘܸܐ ܠܒܲܪܢܵܫܵܐ ܡܵܢܵܐ ܢܸܗܘܹܐ ܡ̣ܢ ܒܵܬ̣ܪܹܗ ܬܚܹܝܬ̣ ܫܸܡܫܵܐ.

²ܛܵܒ̣ ܫܡܵܐ ܡ̣ܢ ܡܸܫܚܵܐ ܛܵܒ̣ܵܐ. ܘܝܵܘܡܵܐ ܕܡܵܘܬܵܐ ܛܵܒ̣ ܡ̣ܢ ܝܵܘܡܵܐ ܕܝܼܠܝܼܕܼܘܼܬ̣ܵܐ.

³ܛܵܒ̣ ܠܡܹܐܙܲܠ ܠܒܹܝܬ̣ ܒܵܟܹ̇ܐ: ܡ̣ܢ ܕܲܠܡܸܐܙܲܠ ܠܒܹܝܬ̣ ܡܸܫܬ̇ܘܼܬ̣ܵܐ. ܡܸܛܠ ܕܗܵܕܲܐ ܗ̄ܝܼ ܚܲܪܬ̣ܵܐ ܕܟ̣ܠܗܘܿܢ ܒܢܲܝ̈ܢܵܫܵܐ. ܘܲܕܼܚܲܝ ܝܵܗܹ̇ܒ̣ ܛܵܒ̣ܬ̣ܵܐ ܠܠܸܒܹ̇ܗ.

⁴ܛܵܒ̣ ܪܘܼܓ̣ܙܵܐ ܡ̣ܢ ܓܘܼܚܟܵܐ. ܡܸܛܠ ܕܲܒ̣ܒ̣ܝܼܫܘܼܬ̣ ܐܵܦܹ̈ܐ ܢܸܛܐܲܒ̣ ܠܸܒܵܐ.

⁵ܠܸܒܵܐ ܕܚܲܟ̇ܝܼܡܹ̈ܐ ܒܒܹܝܬ̣ ܐܸܒ̣ܠܵܐ. ܘܠܸܒܵܐ ܕܣܲܟ̣̈ܠܹܐ ܒܹܝܬ̣ ܚܲܕܼܘܼܬ̣ܵܐ.

⁶ܛܵܒ̣ ܠܡܸܫܡܲܥ ܟܐܵܬ̣ܵܐ ܕܚܲܟ̇ܝܼܡܹ̈ܐ: ܡ̣ܢ ܓܲܒ̣ܪܵܐ ܕܫܵܡܲܥ ܙܡܵܪܵܐ ܕܣܲܟ̣̈ܠܹܐ.

⁷ܐܲܝܟ ܩܵܠܵܐ ܕܟ̣ܘܼ̈ܒܹ̇ܐ ܬܚܹܝܬ̣ ܩܲܕܼܣܵܐ: ܗܵܟܲܢܵܐ ܓܘܼܚܟ̇ܗܘܿܢ ܕܣܲܟ̣̈ܠܹܐ. ܘܐܵܦ ܗܵܢܵܐ ܗܸܒ̣ܠܵܐ.

⁸ܡܸܛܠ ܕܲܥܫܘܼܩܝܵܐ ܡܵܘܒܸ̇ܕܼ ܠܚܲܟ̇ܝܼܡܵܐ. ܘܡܵܘܒ̇ܕܼܵܐ ܠܠܸܒܵܐ ܡܵܘܗܲܒ̣ܬ̣ܵܐ.

⁹ܛܵܒ̣ܵܐ ܗ̄ܝܼ ܐ̄ܚܪܵܝܬܹܗ ܕܦܸܬ̣ܓ̣ܵܡܵܐ ܡ̣ܢ ܩܲܕܼܡܵܝܬܹ̇ܗ. ܘܛܵܒ̣ܵܐ ܢܲܓ̇ܝܼܪܘܼܬ̣ ܪܘܼܚܵܐ ܡ̣ܢ ܪܲܡܘܼܬ̣ ܪܘܼܚܵܐ.

¹⁰ܠܵܐ ܬܸܣܬܲܪܗܲܒ̣ ܒܪܘܼܚܵܟ ܠܡܸܪܓܲܙ. ܡܸܛܠ ܕܪܘܼܓ̣ܙܵܐ ܒܥܘܼܒܵܐ ܕܣܲܟ̣̈ܠܹܐ ܢܸܬ̇ܬ̇ܢܝܼܚ.

¹¹ܠܵܐ ܬܸܐܡܲܪ ܡܵܢܵܐ ܗܘ̤ܵܐ: ܕܝܵܘ̈ܡܵܬ̣ܵܐ ܩܲܕܼܡܵܝܹ̈ܐ ܛܵܒ̣ܝܼܢ ܗ̄ܘܼܵܘ ܡ̣ܢ ܗܵܠܹܝܢ. ܡܸܛܠ ܕܠܵܐ ܗ̄ܘܼܵܐ ܒܚܸܟ̣ܡ̱ܬ̣ܵܐ ܫܵܐܹ̇ܠ ܥܲܠ ܗܵܠܹܝܢ.

¹²ܛܵܒܲܐ ܗ̄ܝܼ ܚܸܟ̣ܡ̱ܬ̣ܵܐ ܡ̣ܢ ܡܵܐܢܲܝ̈ ܙܲܝܢܵܐ: ܘܝܲܬ̇ܝܼܪ ܠܚܵܙ̇ܝܲܝ̈ ܫܸܡܫܵܐ.

¹³ܡܸܛܠ ܕܛܸܠܵܠܵܐ ܕܚܸܟ̣ܡ̱ܬ̣ܵܐ ܐܲܝܟ ܛܸܠܵܠܵܐ ܕܟܸܣܦܵܐ. ܘܝܲܬ̇ܝܼܪܘܼܬ̣ܵܐ ܕܝܼܕܲܥܬ̣ܵܐ ܕܚܸܟ̣ܡ̱ܬ̣ܵܐ ܬܲܚܸܐ ܡܵܪܵܗ̇.

¹⁴ܚܙܝܼ ܥܒ̣ܵܕܼܵܐ ܕܐܲܠܵܗܵܐ. ܡܸܛܠ ܕܡܲܢ̣ܘܼ ܡܸܫܟܲܚ ܠܡܲܬ̣ܩܵܢܘܼ ܠܡ̇ܢ ܕܲܡܕܼܵܘܲܕܼ ܗ̄ܘܼ.

¹⁵ܒܝܵܘܡܵܐ ܕܛܵܒ̣ܬ̣ܵܐ ܗ̤ܘܝܼ ܒܛܵܒ̣. ܘܲܒ̣ܝܵܘܡܵܐ ܕܒ̣ܝܼܫܬܵܐ ܚܙܝܼ ܢܲܦ̮ܫܵܟ. ܐܵܦ ܗܵܢܵܐ ܠܘܼܩܒܲܠ ܗܵܢܵܐ ܥ̣ܒܲܕܼ ܐܲܠܵܗܵܐ: ܥܲܠ ܡܲܡܠܠܵܐ ܕܠܵܐ ܡܸܫܟܲܚ ܒܲܪܢܵܫܵܐ ܡܸܕܹ̇ܡ ܒܵܬ̣ܪܹܗ.

¹⁶ܟܠ ܡܸܕܹ̇ܡ ܚܙܹ̇ܝܬ̣ ܒܝܵܘ̈ܡܲܝ ܗܸܒ̣ܠܝ.ܐܝܼܬ̣ ܙܲܕ̇ܝܼܩܵܐ ܕܐܸܒܲܕܼ ܒܙܲܕ̇ܝܼܩܘܼܬܹܗ. ܘܐܝܼܬ̣ ܪܲܫܝܼܥܵܐ ܕܐܲܓܲܪ ܒܒ̣ܝܼܫܘܼܬܹܗ.

¹⁷ܠܵܐ ܬܸܗܘܹܐ ܙܲܕ̇ܝܼܩ ܣܲܓ̇ܝܼ ܘܠܵܐ ܬܸܬ̣ܚܲܟܲܡ ܝܲܬܝܼܪ ܕܠܵܐ ܬܸܬ̣ܡܲܗ.

¹⁸ܠܵܐ ܬܲܪܫܲܥ ܣܲܓ̇ܝܼ ܕܠܵܐ ܬܸܣܬ̇ܢܹܐ ܣܲܓ̇ܝܼ. ܠܵܐ ܬܸܗܘܹܐ ܣܟܲܠ. ܕܲܠܡܵܐ ܬܡܘܼܬ̣ ܕܠܵܐ ܒܙܲܒ̣ܢܵܟ.

¹⁹ܛܵܒ̣ ܕܬܹܐܚܘܿܕܼ ܒܗܵܢܵܐ. ܘܐܵܦ ܡ̣ܢ ܗܵܘܿ ܠܵܐ ܬܲܪܦܸܐ ܐܝܼܕܼܵܟ. ܡܸܛܠ ܕܡ̇ܢ ܕܕܼܵܚܹ̇ܠ ܠܐܲܠܵܗܵܐ: ܢܵܩܹ̇ܦ ܠܟ̣ܠܗܹܝܢ.

²⁰ܚܸܟ̣ܡ̱ܬ̣ܵܐ ܡܲܥܫ̄ܢܵܐ ܠܚܲܟ̇ܝܼܡܵܐ: ܛܵܒ̣ ܡ̣ܢ ܥܸܣܪܵܐ ܫܲܠܝܼܛܵܢ̈ܝܼܢ ܕܐܝܼܬ̣ ܒܲܡܕܼܝܼܢ̄ܬܵܐ.

²¹ܡܸܛܠ ܕܠܲܝܬ̇ ܐ̄ܢܵܫ ܕܙܲܕ̇ܝܼܩ ܒܐܲܪܥܵܐ: ܕܢܸܥܒܸ̇ܕܼ ܕܛܵܒ̣ ܘܠܵܐ ܢܸܚܛܹܐ.

²²ܘܐܵܦ ܠܟ̣ܠ ܦܸܬ̣ܓ̣ܵܡܹ̈ܐ ܕܲܢܡܲܠܠܘܼܢ ܪ̈ܲܫܝܼܥܹܐ ܠܵܐ ܬܸܬܸ̇ܠ ܠܸܒܵܟ. ܠܵܐ ܬܸܫܡܲܥ ܠܥܲܒ̣ܕܵܟ ܕܲܡܨܲܚܸܐ ܠܵܟ.

²³ܡܸܛܠ ܕܙܲܒ̣ܢ̈ܝܼܢ ܣܲܓ̇ܝܼ̈ܐܵܢ ܝܵܕܲܥ ܠܸܒܵܟ: ܕܐܵܦ ܐܲܢ̄ܬ̇ ܨܲܚܝܲܬ̇ ܠܐܲܚܪ̈ܵܢܝܼܢ.

²⁴ܟܠܗܹܝܢ ܗܵܠܹܝܢ ܢܲܣ̇ܝܼܬ̣ ܒܚܸܟ̣ܡ̱ܬ̣ܵܐ ܐܸܡ̇ܪܹܬ̣ ܕܐܸܬ̣ܚܲܟܲܡ. ܘܗ̤ܝ ܪܲܚܝܼܩܵܐ ܡܹܢܝ.

²⁵ܝܲܬ̇ܝܼܪ ܡ̣ܢ ܕܲܗܘ̤ܵܐ ܪܘܼܚܩܵܐ. ܘܥܘܼܡܩܵܐ ܕܥܘܼܡܩܹ̈ܐ ܡ̇ܢ ܢܸܫܟ̇ܚܝܼܘܗܝ.

²⁶ܐܸܬ̣ܟܲܪܟܹ̇ܬ̣ ܐܸܢܵܐ ܘܠܹܒ̇ܝ ܠܡܸܕܲܥ ܘܲܠܡܸܣܥܲܪ: ܘܲܠܡܸܒ̣ܥܵܐ ܚܸܟ̣ܡ̱ܬ̣ܵܐ ܘܚܘܼܫܒܵܢܵܐ: ܘܲܠܡܸܕܲܥ ܪܲܫܝܼܥܘܼܬܹܗ ܕܣܲܟ̣ܠܵܐ: ܘܣܲܟ̣ܠܘܼܬ̣ܵܐ ܘܡܸܬ̣ܥܲܒ̣ܪܵܢܘܼܬ̣ܵܐ.

²⁷ܘܐܸܫܟ̇ܚܹ̇ܬ̣ ܕܡܲܪܝܼܪܵܐ ܡ̣ܢ ܡܵܘܬܵܐ: ܐܲܢ̄ܬ̇ܬ̣ܵܐ. ܕܗ̤ܝ ܐܝܼܬܹܝܗ̇ ܦܲܚܵܐ: ܘܲܡܨܝܼܕ̇ܬܵܐ ܠܸܒܵܗ̇. ܐܲܣܵܪܹ̈ܐ ܐܝܼܕܹܝ̈ܗ̇. ܡ̇ܢ ܕܛܵܒ̣ ܩܕܼܵܡ ܐܲܠܵܗܵܐ: ܡܸܫܬܵܘܙܲܒ̣ ܡܸܢܵܗ̇. ܘܡ̇ܢ ܕܚܵܛܹ̈ܐ: ܡܸܬ̇ܬܲܚܸܕܼ ܒܵܗ̇.

²⁸ܚܙܝܼ ܗܵܢܵܐ ܕܐܸܫܟ̇ܚܹ̇ܬ̣: ܐܵܡܲܪ ܩܘܿܗܠܲܬ̣. ܚܕܼܵܐ ܠܲܚܕܼܵܐ ܠܡܸܫܟܵܚܘܼ ܡܲܚܫ̈ܒ̣ܵܬ̣ܵܐ.

²⁹ܘܬ̣ܘܼܒ̣ ܒܥܵܬ̤ ܢܲܦ̮ܫܝ: ܘܠܵܐ ܐܸܫܟ̇ܚܹ̇ܬ̣. ܐ̄ܢܵܫܵܐ ܚܲܕܼ ܡ̣ܢ ܐܲܠܦܵܐ ܐܸܫܟ̇ܚܹ̇ܬ̣. ܘܐܲܢ̄ܬ̇ܬ̣ܵܐ ܒܟ̣ܠܗܹܝܢ ܠܵܐ ܐܸܫܟ̇ܚܹ̇ܬ̣.

³⁰ܒܪܲܡ ܚܙܝܼ ܗܵܢܵܐ ܕܐܸܫܟ̇ܚܹ̇ܬ̣: ܕܲܥܒܲܕܼ ܐܲܠܵܗܵܐ ܠܐ̄ܢܵܫܵܐ ܬܪ̈ܝܼܨܐ. ܘܗܸܢ̣ܘܿܢ ܒܥ̣ܵܘ ܡܲܚܫ̈ܒ̣ܵܬ̣ܵܐ ܣܲܓܝܼ̈ܐܵܬ̣ܵܐ.