Read Aramaic Peshita Ecclesiastes 8 Bible Online

Ecclesiastes 8 - Aramaic Peshita bible

Ecclesiastes 8

¹ܡܲܢ̣ܘܼ ܐܲܝܟ ܚܲܟ̇ܝܼܡܵܐ: ܘܡ̇ܢ ܝܵܕܲܥ ܦܫܵܪܵܗ̇ ܕܡܸܠܬ̣ܵܐ. ܚܸܟ̣ܡ̱ܬܹܗ ܕܓܲܒ̣ܪܵܐ ܬܲܢܗܲܪ ܐܲܦܵܘ̈ܗܝ. ܘܲܕܼܚܲܨ̈ܝܼܦܵܢ ܐܲܦܵܘ̈ܗܝ ܢܸܣܬ̇ܢܸܐ.

²ܦܘܼܡܹܗ ܕܡܲܠܟܵܐ ܛܲܪ. ܘܥܲܠ ܡܸܠܲܬ̣ ܡܵܘܡܵܬ̣ܵܐ ܕܐܲܠܵܗܵܐ ܠܵܐ ܬܸܣܬܲܪܗܲܒ̣.

³ܡ̣ܢ ܩܕܼܵܡܵܘܗܝ ܙܸܠ. ܘܠܵܐ ܬܩܘܼܡ ܒܦܸܬ̣ܓ̣ܵܡ ܒܝܼܫ. ܡܸܛܠ ܕܟ̣ܠ ܕܢܸܨܒܸ̇ܐ ܢܸܥܒܸ̇ܕܼ.

⁴ܐܲܝܟܲܢܵܐ ܕܲܢܡܲܠܸܠ ܡܲܠܟܵܐ ܫܲܠܝܼܛ. ܘܡܲܢ̣ܘܼ ܕܢܹܐܡܲܪ ܠܹܗ: ܡܵܢܵܐ ܥܵܒܹ̇ܕܼ ܐܲܢ̄ܬ̇.

⁵ܕܢܵܛܲܪ ܦܘܼܩܕܵܢܵܐ ܠܵܐ ܝܵܕܲܥ ܡܸܠܬ̣ܵܐ ܒܝܼܫܬܵܐ. ܘܙܲܒ̣ܢܵܐ ܘܕܼܝܼܢܵܐ ܝܵܕܲܥ ܕܚܲܟ̇ܝܼܡܵܐ.

⁶ܡܸܛܠ ܕܲܠܟ̣ܠ ܨܒ̣ܘܼ ܐܝܼܬ̣ ܙܲܒ̣ܢܵܐ ܘܕܼܝܼܢܵܐ. ܡܸܛܠ ܕܒ̣ܝܼܫܬܹ̇ܗ ܕܒܲܪܢܵܫܵܐ ܣܲܓ̇ܝܼܐܵܐ ܥܠܵܘܗܝ.

⁷ܡܸܛܠ ܕܠܲܝܬ̇ ܕܝܵܕܲܥ ܠܡܵܐ ܕܲܗܘ̤ܵܐ. ܘܡܵܢܵܐ ܢܸܗܘܹܐ ܡ̣ܢ ܒܵܬ̣ܪܹܗ ܡܲܢ̣ܘܼ ܡܚܵܘܸܐ ܠܹܗ.

⁸ܠܲܝܬ̇ ܐܢܵܫ ܕܫܲܠܝܼܛ ܒܪܘܼܚܵܐ ܠܡܸܟ̣ܠܵܐ ܪܘܼܚܵܐ. ܘܠܲܝܬ ܫܘܼܠܛܵܢܵܐ ܒܝܵܘܡܵܐ ܕܡܵܘܬܵܐ. ܘܠܲܝܬ̇ ܦܘܼܠܵܛܵܐ ܒܝܵܘܡܵܐ ܕܲܩܪܵܒ̣ܵܐ. ܘܠܵܐ ܡܫܵܘܙܸܒ̣ ܪܘܼܫܥܵܐ ܠܡܵܪ̈ܵܘܗܝ.

⁹ܘܝܵܬ̣ ܟܠ ܗܵܢܵܐ ܚܙܹ̇ܝܬ̣. ܘܝܸܗ̄ܒܹ̇ܬ̣ ܠܹܒ̇ܝ ܠܡܸܕܲܥ ܟܠ ܥܒ̣ܵܕܼ ܕܡܸܬ̣ܥ̱ܒܸܕܼ ܬܚܹܝܬ̣ ܫܸܡܫܵܐ: ܘܙܲܒ̣ܢܵܐ ܕܐܸܫܬܲܠܲܛ ܒܲܪܢܵܫܵܐ ܒܒܲܪܢܵܫܵܐ ܠܡܲܒ̣ܐܵܫܘܼ ܠܹܗ.

¹⁰ܘܗܵܝܕܹ̇ܝܢ ܚܙܹ̇ܝܬ̣ ܪ̈ܲܫܝܼܥܹܐ ܕܲܩܒ̣ܝܼܪܝܼܢ ܘܐܵܬܹ̇ܝܢ. ܘܡ̣ܢ ܐܲܬ̣ܪܵܐ ܕܩܘܼܕܼܫܵܐ ܐܸܙܲܠ̣ܘ. ܘܐܸܬ̇ܛܥܝܼܘ ܒܲܡܕܼܝܼܢ̄ܬܵܐ ܕܗܵܟܲܢܵܐ ܥ̣ܒܲܕܼܘ. ܘܐܵܦ ܗܵܢܵܐ ܗܸܒ̣ܠܵܐ.

¹¹ܡܸܛܠ ܕܠܵܐ ܡܸܬ̣ܥܲܒ̣ܕܵܐ ܬܒܲܥܬ̣ܵܐ ܡ̣ܢ ܥܵܒ̣ܕܲܝ̈ ܒܝܼ̈ܫܵܬ̣ܵܐ ܒܲܥܓܲܠ. ܡܸܛܠ ܗܵܢܵܐ ܐܸܬ̣ܡ̱ܠܝܼ ܠܸܒܵܐ ܕܲܒ̣ܢܲܝ̈ܢܵܫܵܐ ܒܗܘܿܢ ܠܡܸܥܒܲܕܼ ܕܒ̣ܝܼܫ.

¹²ܡ̇ܢ ܕܚܵܛܹ̇ܐ ܥܵܒܹ̇ܕܼ ܒܝܼ̈ܫܵܬ̣ܵܐ ܡܵܐܐ: ܘܡܲܓܲܪ ܠܹܗ. ܘܝܵܕܲܥ ܐ̄ܢܵܐ ܕܢܸܗܘܹܐ ܛܵܒ̣ ܠܕܼܵܚ̇ܠܵܘ̈ܗܝ ܕܡܵܪܝܵܐ: ܕܢܸܕܼܚ̄ܠܘܼܢ ܡ̣ܢ ܩܕܼܵܡܵܘܗܝ.

¹³ܘܛܵܒ̣ܬ̣ܵܐ ܠܵܐ ܬܸܗܘܹܐ ܠܪܲܫܝܼܥܵܐ ܘܠܵܐ ܢܲܓ̇ܝܼܪ ܝܵܘ̈ܡܵܬ̣ܵܐ ܐܲܝܟ ܛܸܠܵܠܵܐ. ܡܸܛܠ ܕܠܵܐ ܐܝܼܬ̣ܵܘܗܝ ܕܵܚܹ̇ܠ ܡ̣ܢ ܩܕܼܵܡ ܐܲܠܵܗܵܐ.

¹⁴ܐܝܼܬ̣ ܗܸܒ̣ܠܵܐ ܕܲܥܒ̣ܝܼܕܼ ܥܲܠ ܐܲܪܥܵܐ. ܡܸܛܠ ܕܐܝܼܬ̣ ܙܲܕ̇ܝܼܩܹ̈ܐ ܕܡܵܛܹ̇ܐ ܠܘܵܬ̣ܗܘܿܢ ܐܲܝܟ ܥܒ̣ܵܕܼܵܐ ܕܪ̈ܲܫܝܼܥܹܐ. ܘܐܝܼܬ̣ ܪܲܫܝܼܥܹܐ ܕܡܵܛܹ̇ܐ ܠܘܵܬ̣ܗܘܿܢ ܐܲܝܟ ܥܒ̣ܵܕܼܵܐ ܕܙܲܕ̇ܝܼܩܹ̈ܐ. ܘܐܸܡ̇ܪܹܬ̣ ܕܐܵܦ ܗܵܢܵܐ ܗܸܒ̣ܠܵܐ.

¹⁵ܘܫܲܒ̇ܚܹ̇ܬ̣ ܐܸܢܵܐ ܝܵܬ̣ ܚܲܕܼܘܼܬ̣ܵܐ. ܕܠܲܝܬ̇ ܕܛܵܒ̣ ܠܒܲܪܢܵܫܵܐ ܬܚܹܝܬ̣ ܫܸܡܫܵܐ: ܐܸܠܵܐ ܠܡܹܐܟܲܠ ܘܲܠܡܸܫܬܵܐ ܘܲܠܡܸܚܕܵܐ: ܘܗ̤ܘ ܠܵܘܹ̇ܐ ܠܹܗ ܒܥܲܡܠܹܗ: ܟܠ ܝܵܘ̈ܡܲܝ ܚܲܝܵܘ̈ܗܝ ܕܝܲܗ̄ܒ̣ ܠܹܗ ܐܲܠܵܗܵܐ ܬܚܹܝܬ̣ ܫܸܡܫܵܐ.

¹⁶ܡܸܛܠ ܗܵܢܵܐ ܝܸܗ̄ܒܹ̇ܬ̣ ܠܹܒ̇ܝ ܠܡܸܕܲܥ ܚܸܟ̣ܡ̱ܬ̣ܵܐ: ܘܲܠܡܸܚܙܵܐ ܥܸܢܝܵܢܵܐ ܕܐܸܬ̣ܥ̱ܒܸܕܼ ܥܲܠ ܐܲܪܥܵܐ. ܡܸܛܠ ܕܒ̣ܐܝܼܡܵܡܵܐ ܘܲܒ̣ܠܸܠܝܵܐ ܫܸܢܬ̣ܵܐ ܒܥܲܝܢܵܘ̈ܗܝ ܠܵܐ ܚܵܙܹ̇ܐ.

¹⁷ܘܲܚܙܹ̇ܝܬ̣ ܐܸܢܵܐ ܟܠ ܥܒ̣ܵܕܼܵܐ ܕܐܲܠܵܗܵܐ. ܡܸܛܠ ܕܠܵܐ ܢܸܬ̣̱ܡܨܹܐ ܒܲܪܢܵܫܵܐܝܵܬ̣ ܥܒ̣ܵܕܼܵܐ ܕܲܥܒ̣ܝܼܕܼ ܬܚܹܝܬ̣ ܫܸܡܫܵܐ. ܟܠ ܕܥܵܡܹ̇ܠ ܒܲܪܢܵܫܵܐ ܕܢܸܒ̣ܥܸܐ: ܠܵܐ ܢܸܫܟܲܚ. ܘܟ̣ܠ ܕܢܹܐܡܲܪ ܚܲܟ̇ܝܼܡܵܐ ܠܡܸܕܲܥ: ܠܵܐ ܢܸܬ̣ܡ̱ܨܹܐ ܠܡܸܫܟܵܚܘܼ.