Read Aramaic Peshita Ecclesiastes 9 Bible Online

Ecclesiastes 9 - Aramaic Peshita bible

Ecclesiastes 9

¹ܡܸܛܠ ܕܝܵܬ̣ ܟܠܗܹܝܢ ܗܵܠܹܝܢ ܝܸܗ̄ܒܹ̇ܬ̣ ܒܠܹܒ̇ܝ. ܘܠܹܒ̇ܝ ܚܙ̣ܵܐ ܝܵܬ̣ ܟܠ ܗܵܢܵܐ. ܕܙܲܕ̇ܝܼܩܹ̈ܐ ܘܚܲܟ̇ܝܼܡܹ̈ܐ ܘܲܥܒ̣ܵܕܲܝ̈ܗܘܿܢ ܒܐܝܼܕܼܵܐ ܕܐܲܠܵܗܵܐ. ܐܵܦ ܪܸܚ̱ܡܬ̣ܵܐ ܐܵܦ ܣܸܢܐ̱ܬ̣ܵܐ ܠܵܐ ܝܵܕܲܥ ܒܲܪܢܵܫܵܐ. ܟܠ ܕܲܩܕܼܵܡܵܘܗܝ ܗܸܒ̣ܠܵܐ.

²ܟܠ ܐܲܝܟ ܕܲܠܟ̣ܠ. ܓܸܕܼܫܵܐ ܚܲܕܼ ܠܙܲܕ̇ܝܼܩܹ̈ܐ ܘܲܠܪ̈ܲܫܝܼܥܹܐ: ܠܛܵܒܹ̈ܐ ܘܲܠܒ̣ܝܼܫܹ̈ܐ: ܠܲܕܼܟܲـ̈ـܝܵܐ ܘܲܠܛܲܡܹ̈ܐܐ: ܠܕܲܡܕܲܒܲܚ ܘܠܲܕܼܠܵܐ ܡܕܲܒܲܚ. ܐܲܝܟ ܛܵܒ̣ܵܐ: ܐܵܦ ܚܲܛܵܝܵܐ. ܐܲܝܟ ܝܲܡܵܝܵܐ: ܐܵܦ ܗܵܘܿ ܕܡ̣ܢ ܡܵܘ̈ܡܵܬ̣ܵܐ ܕܵܚܹ̇ܠ.

³ܗܵܕܹܐ ܒܝܼܫܵܐ ܒܟ̣ܠ ܡܵܐ ܕܐܸܬ̣ܥ̱ܒܸܕܼ ܬܚܹܝܬ̣ ܫܸܡܫܵܐ. ܡܸܛܠ ܕܓܸܕܼܫܵܐ ܚܲܕܼ ܠܟ̣ܠܗܘܿܢ. ܘܐܵܦ ܠܸܒܵܐ ܕܒܲܪܢܵܫܵܐ ܐܸܬ̣ܡ̱ܠܝܼ ܒܝܼܫܬܵܐ: ܘܦܵܗܝܘܼܬ̣ܵܐ ܒܝܼܫܬܵܐ ܒܠܸܒ̇ܗܘܿܢ ܘܲܒ̣ܚܲܝܲܝ̈ܗܘܿܢ. ܘܚܲܪܬ̣ܗܘܿܢ ܠܘܵܬ̣ ܡܝܼ̈ܬܹܐ.

⁴ܟܠ ܕܢܸܫܬܵܘܬܲܦ ܠܟ̣ܠ ܚܲܝܹ̈ܐ ܐܝܼܬ̣ ܬܘܼܟ̣ܠܵܢܵܐ. ܡܸܛܠ ܕܟܲܠܒܵܐ ܕܚܲܝ ܛܵܒ̣ ܗ̄ܘܼ ܡ̣ܢ ܐܲܪܝܵܐ ܕܡܲܝܝܼܬ̣.

⁵ܡܸܛܠ ܕܚܲܝܹ̈ܐ ܝܵܕ̇ܥܝܼܢ ܕܡܵܝ̇ܬ̇ܝܼܢ. ܘܡܝܼܬܹ̈ܐ ܠܵܐ ܝܵܕ̇ܥܝܼܢ ܡܸܕܹ̇ܡ. ܘܠܲܝܬ̇ ܠܗܘܿܢ ܬܘܼܒ̣ ܐܲܓ̣ܪܵܐ. ܡܸܛܠ ܕܐܸܬ̣ܥ̱ܛܝܼ ܕܘܼܟ̣ܪܵܢܗܘܿܢ.

⁶ܐܵܦ ܪܸܚܡܲܬ̣ܗܘܿܢ ܐܵܦ ܣܸܢܲܐܬ̣ܗܘܿܢ: ܐܵܦ ܩܸܢܲܐܬ̣ܗܘܿܢ ܡ̣ܢ ܟܲܕ̇ܘܼ ܐܸܒ̣ܕܲܬ̤. ܘܲܡܢܵܬ̣ܵܐ ܠܲܝܬ̇ ܠܗܘܿܢ ܬܘܼܒ̣ ܠܥܵܠܲܡ: ܒܟ̣ܠܡܵܐ ܕܡܸܬ̣ܥ̱ܒܸܕܼ ܬܚܹܝܬ̣ ܫܸܡܫܵܐ.

⁷ܬܵܐ ܐܲܟ̣ܘܿܠ ܠܲܚܡܵܟ. ܘܐܸܫܬܲܝ ܒܠܸܒܵܐ ܛܵܒ̣ܵܐ ܚܲܡܪܵܟ ܡܸܛܠ ܕܐܸܨܛܒ̣ܝܼ ܐܲܠܵܗܵܐ ܒܲܥܒ̣ܵܕܲܝ̈ܟ.

⁸ܒܟ̣ܠ ܥܸܕܵܢ ܢܲܚ̈ܬܲܝܟ ܢܸܗܘܘܿܢ ܚܸܘܵܪ̈ܝܼܢ: ܘܡܸܫܚܵܐ ܡ̣ܢ ܪܹܫܵܟ ܠܵܐ ܢܸܚܣܲܪ.

⁹ܘܲܚܙܝܼ ܚܲܝܹ̈ܐ ܥܲܡ ܐܲܢ̄ܬ̇ܬ̣ܵܐ ܕܲܪܚܸܡܬ̇ ܟܠ ܝܵܘܡܲܝ ܚܲܝܲܝ̈ ܗܸܒ̣ܠܵܟ. ܡܸܛܠ ܕܗ̤ܝ ܗ̄ܝܼ ܡܢܵܬ̣ܵܟ ܒܚܲܝܹ̈ܐ ܘܲܒ̣ܥܲܡܠܵܟ ܕܐܲܢ̄ܬ̇ ܥܵܡܹ̇ܠ ܬܚܹܝܬ̣ ܫܸܡܫܵܐ.

¹⁰ܟܠ ܕܬܸܫܟܲܚ ܐܝܼܕܼܵܟ ܠܡܸܥܒܲܕܼ ܒܚܲܝܠܵܟ: ܥܒܸܕܼ. ܡܸܛܠ ܕܠܲܝܬ̇ ܥܒ̣ܵܕܼܵܐ ܘܡܲܚܫܲܒ̣ܬ̣ܵܐ ܘܝܼܕܲܥܬ̣ܵܐ ܘܚܸܟ̣ܡ̱ܬ̣ܵܐ: ܒܲܫܝܘܿܠ ܕܐܲܢ̄ܬ̇ ܐܵܙܹ̇ܠ ܐܲܢ̄ܬ̇ ܠܬܲܡܵܢ.

¹¹ܘܗܸܦ̇ܟܹ̇ܬ̣ ܘܲܚܙܹ̇ܝܬ̣ ܬܚܹܝܬ̣ ܫܸܡܫܵܐ: ܕܠܵܐ ܠܩܲܠܝܼܠܹ̈ܐ ܪܲܗܛܵܐ: ܘܠܵܐ ܠܓܲܢ̄ܒܵܪܹ̈ܐ ܩܪܵܒ̣ܵܐ: ܘܠܵܐ ܠܚܲܟ̇ܝܼܡܹ̈ܐ ܠܲܚܡܵܐ: ܘܠܵܐ ܠܣܲܟ̇ܘܼܠܬ̣ܵܢܹ̈ܐ ܥܘܼܬ̣ܪܵܐ: ܘܠܵܐ ܠܝܲܕ̇ܘܼܥܬ̣ܵܢܹ̈ܐ ܫܘܼܒ̣ܚܵܐ. ܡܸܛܠ ܕܙܲܒ̣ܢܵܐ ܘܦܸܓܥܵܐ ܓܵܕܹ̇ܫ ܠܟ̣ܠܗܘܿܢ.

¹²ܡܸܛܠ ܕܠܵܐ ܝܵܕܲܥ ܒܲܪܢܵܫܵܐ ܙܲܒ̣ܢܹܗ: ܐܲܝܟ ܢܘܼܢܹ̈ܐ ܕܡܸܬ̇ܬܲܚܕ̇ܝܼܢ ܒܲܡܨܝܼܕ̇ܬܵܐ ܒܝܼܫܬܵܐ: ܘܐܲܝܟ ܨܸܦܪܹ̈ܐ ܕܡܸܬ̇ܬܲܚ̈ܕܵܢ ܒܦܲܚܵܐ. ܗܵܟܲܢܵܐ ܡܸܬ̇ܬܲܚܕ̇ܝܼܢ ܒܢܲܝ̈ܢܵܫܵܐ ܒܙܲܒ̣ܢܵܐ ܒܝܼܫܵܐ ܕܢܵܦܹ̇ܠ ܥܠܲܝܗܘܿܢ ܡ̣ܢ ܫܹܠܝ.

¹³ܘܐܵܦ ܗܵܕܹܐ ܚܙܹ̇ܝܬ̣ ܚܸܟ̣ܡ̱ܬ̣ܵܐ ܬܚܹܝܬ̣ ܫܸܡܫܵܐ. ܘܪܲܒܵܐ ܗ̄ܝܼ ܠܘܵܬ̣ܝ.

¹⁴ܡܕܼܝܼܢ̄ܬܵܐ ܙܥܘܿܪܬܵܐ: ܘܲܒ̣ܢܲܝ̈ܢܵܫܵܐ ܕܒ̣ܵܗ̇ ܙܥܘܿܪܝܼܢ. ܘܐܸܬ̣ܵܐ ܥܠܹܝܗ̇ ܡܲܠܟܵܐ ܪܲܒܵܐ ܘܚܲܕܼܪܵܗ̇. ܘܲܒ̣ܢܵܐ ܥܠܹܝܗ̇ ܩܲܠܩܘܼܡܹ̈ܐ.

¹⁵ܘܐܸܫܬ̇ܟܲܚ ܒܵܗ̇ ܓܲܒ̣ܪܵܐ ܡܸܣܟܹ̇ܢܵܐ ܚܲܟ̇ܝܼܡܵܐ. ܘܫܵܘܙܸܒ̣ ܗܵܘܿ ܡܸܣܟܹ̇ܢܵܐ ܡܕܼܝܼܢ̄ܬܵܐ ܒܚܲܟ̇ܝܼܡܘܼܬܹܗ. ܘܐ̄ܢܵܫ ܠܵܐ ܥܗܲܕܼ ܠܓܲܒ̣ܪܵܐ ܗܵܘܿ ܡܸܣܟܹ̇ܢܵܐ.

¹⁶ܘܐܸܡ̇ܪܹܬ̣ ܐܸܢܵܐ. ܛܵܒܲܐ ܗ̄ܝܼ ܚܸܟ̣ܡ̱ܬ̣ܵܐ ܡ̣ܢ ܓܲܢ̄ܒܵܪܘܼܬ̣ܵܐ. ܘܚܸܟ̣ܡ̱ܬܹܗ ܕܡܸܣܟܹ̇ܢܵܐ ܡܲܣ̱ܠܝܵܐ ܗ̄ܝܼ. ܘܦܸܬ̣ܓ̣ܵܡܵܘ̈ܗܝ ܠܵܐ ܡܸܫܬܲܡܠܹܝܢ.

¹⁷ܘܡܸܠܲܝ̈ ܚܲܟ̇ܝܼܡܹܐ ܒܲܢܝܵܚܵܐ ܡܸܫܬܲܡ̈ܥܵܢ: ܡ̣ܢ ܙܥܵܩܬ̣ܵܐ ܕܫܲܠܝܼܛܵܐ ܣܲܟ̣ܠܵܐ.

¹⁸ܛܵܒ̣ܵܐ ܗ̄ܝܼ ܚܸܟ̣ܡ̱ܬ̣ܵܐ ܡ̣ܢ ܡܵܐܢܲܝ̈ ܩܪܵܒ̣ܵܐ. ܘܲܚܛܝܼܬ̣ܵܐ ܚܕܼܵܐ ܡܵܘܒ̇ܕܼܵܐ ܛܵـ̈ـܒ̣ܵܬ̣ܵܐ ܣܲܓ̇ܝܼ̈ܐܵܬ̣ܵܐ.