Read Aramaic Peshita Song of Solomon 1 Bible Online

Song of Solomon 1 - Aramaic Peshita bible

Song of Solomon 1

¹ܢܢܲܫܩܲܢܝ ܡ̣ܢ ܢܘܼܫ̈ܩܵܬ̣ܵܐ ܕܦܘܼܡܹܗ. ܡ̣ܛܠ ܕܛܵܒ̣ܝܼܢ ܪ̈ܲܚܡܲܝܟ ܡ̣ܢ ܚܲܡܪܵܐ.

²ܠܪܹܝܚ ܒܸܣܡܵܢܲܝ̈ܟ ܛܵܒܹ̈ܐ. ܡܸܫܚܵܐ ܕܡܘܼܪܵܐ ܫܡܵܟ݂: ܡܸܛܠ ܗܵܢܵܐ ܥܠܲܝ̈ܡܵܬ̣ܵܐ ܪ̈ܲܚܡܵܟ݂.

³ܓܸܕܲܝܢܝ ܒܵܬ̣ܪܵܟ݂: ܢܸܪܗܲܛ̣ ܐܲܥܸܠܲܝܢܝ ܡܲܠܟܵܐ ܠܩܲܝܛܘܿܢܵܟ݂. ܢܸܚܕܹ̇ܐ ܘܲܢܕ݂ܘܼܨ ܒܵܟ݂. ܢܸܬ̇ܕ̇ܟܲܪ ܚܘܼܒܵܟ݂ ܡ̣ܢ ܚܲܡܪܵܐ. ܘܡ̣ܢ ܬܪ̈ܝܼܨܹܐ ܪܸܚ̱ܡܬ̣ܵܐ.

⁴ܐܘܼܟܵܡܵܐ ܐ̄ܢܵܐ: ܘܝܵܐܝܵܐ ܐ̄ܢܵܐ: ܒ̈ܢܵܬ̣ ܐܘܿܪܸܫܠܸܡ. ܐܲܝܟ݂ ܡܲܫܟ̇ܢܲܝ̈ ܩܹܕ݂ܵܪ: ܘܐܲܝܟ݂ ܝܵܪ̈ܝܼܥܵܬ̣ ܫܠܹܝܡܘܿܢ.

⁵ܠܵܐ ܬܸܚܙܘܿܢܵܢܝ ܕܐܘܼܟܡܵܐ ܐ̄ܢܵܐ: ܕܐܵܘܟ̇ܡܲܢܝ ܫܸܡܫܵܐ. ܒܢܲܝ̈ ܐܹܡܝ ܐܸܬ̣ܟܲܬܲܫܘ ܒܝܼ. ܣܵܡ̣ܘܼܢܝ ܢܵܛܪܲܬ̣ ܟܲܪ̈ܡܹܐ. ܘܟܲܪܡ̄ܝ ܕܝܼܠܝ ܠܵܐ ܢܸܛ̇ܪܹܬ̣.

⁶ܚܵܘܵܐܘܼܢܝ ܡܲܢ ܕܪܸܚܡܲܬ̤ ܢܲܦ̮ܫܝ. ܐܲܝܟܲܢܵܐ ܪܥܹ̇ܝܬ̣: ܘܐܲܝܟܲܢܵܐ ܪܸܒ̣ܥܹ̇ܬ̣ ܒܛܲܗܪܵܐ ܕܲܠܡܵܐ ܐܸܗܘܹܐ ܐܲܝܟ݂ ܛܵܥܝܼܬ̣ܵܐ ܒܲܓ̣ܙܵܪܵܐ ܕܥܸܪ̈ܒܲܝܟ.

⁷ܐܸܠܵܐ ܬܸܕ̇ܥܝܼܢ ܝܵܬܹܟ݂ܝ ܫܲܦܝܼܪܲܬ̣ ܒܢܸܫܹ̈ܐ. ܬܵܝ ܐܲܢ̄ܬ̇ܝ ܒܥܸܩܒ̣ܵܐ ܕܥܵـ̈ـܢܵܐ ܘܲܪܥܵܝ ܓܕܲܝ̈ܟ̇ܝ ܒܡܲܫܟ̇ܢܹ̈ܐ ܕܪ̈ܵܥܵܘܵܬ̣ܵܐ.

⁸ܠܣܘܼܣܬ̇ܝ ܒܡܲܪܟܲܒ̣ܬܹܗ ܕܦܸܪܥܘܿܢ ܕܲܡ̇ܝܼܬܸ̇ܟ݂ܝ ܩܲܪܝܼܒ̣ܬ̇ܝ.

⁹ܝܵܐܹ̇ܝܢ ܦܲܟ̇ܝ̈ܟ̇ܝ ܒܲܓܕ݂ܘܿܠܹ̈ܐ. ܘܨܵܘܪܹܟ݂ܝ ܒܥܸܩܹ̈ܐ.

¹⁰ܓܕ݂ܘܼܠܹ̈ܐ ܕܕܲܗܒ̣ܵܐ ܢܸܥܒܸ̇ܕ݂ ܠܹܟ݂ܝ. ܥܲܡ ܙܠܝܼܚܹ̈ܐ ܕܣܹܐܡܵܐ.

¹¹ܥܲܡ ܡܲܠܟܵܐ ܒܲܣܡܵܟܹܗ. ܢܵܪܕ̇ܝܼ ܝܲܗ̄ܒ̣ ܪܸܝܚܹܗ.

¹²ܨܪܵܪܵܐ ܕܡܘܼܪܵܐ ܕܲܪܚܸܡ ܠܝܼ ܒܹܝܬ̣ ܬܕܲܝ̈ ܢܒ̣ܘܼܬ̣.

¹³ܣܓ̣ܘܼܠܵܐ ܕܟ݂ܘܼܦܪܵܐ ܕܵܕ݂ܝ ܒܟܲܪܡܵܐ ܕܥܹܝܢ ܓܵܕ݂.

¹⁴ܗܵܐ ܫܲܦܝܼܪܲܬ̇ܝ ܩܲܪܝܼܒ̣ܬ̇ܝ ܗܵܐ ܫܲܦܝܼܪܲܬ̇ܝ. ܥܲܝܢܲܝ̈ܟܝ ܕܝܵܘܢܵܐ.

¹⁵ܗܵܐ ܫܲܦܝܼܪ ܐܲܢ̄ܬ̇ ܕܵܕ݂ܝ: ܐܵܦ ܒܲܣܝܼܡ ܐܲܢ̄ܬ̇ ܐܵܦ ܥܲܪܣܲܢ ܪܨܝܼܦ.

¹⁶ܩܵܪ̈ܝܵܬ̣ ܒܲܝܬܲܢ ܐܲܪ̈ܙܹܐ: ܥܲܪ̈ܩܹܐ ܕܩܵܛܲܪܩܵܐ.