Read Aramaic Peshita Song of Solomon 2 Bible Online

Song of Solomon 2 - Aramaic Peshita bible

Song of Solomon 2

¹ܐܲܝܟ݂ ܫܘܿܫܲܢܲܬ̣ ܫܲܪܘܲܝܢܵܐ: ܫܘܿܫܲܢܲܬ̣ ܥܘܼܡܩܵܐ.

²ܐܲܝܟ݂ ܫܘܿܫܲܢܹ̈ܐ ܒܲܝܢܵܬ̣ ܟܘܼ̈ܒܹ̇ܐ: ܗܵܟܲܢܵܐ ܩܲܪܝܼܒ̣ܬ̇ܝ ܒܲܝܢܵܬ̣ ܒ̈ܢܵܬ̣ܵܐ.

³ܐܲܝܟ݂ ܚܲܙܘܼܪܵܐ ܒܩܲܝ̈ܣܹܐ ܕܥܵܒ̣ܵܐ: ܗܵܟܲܢܵܐ ܕܵܕ݂ܝ ܒܝܢܵܬ̣ ܒ̈ܢܲܝܵܐ. ܒܛܸܠܵܠܹܗ ܐܸܬ̣ܪܲܓ̣ܪ̱ܓܹ̇ܬ̣ ܘܝܸܬ̣ܒܹ̇ܬ̣ ܘܐܸܒܹ̇ܗ ܚܠܸܐ ܠܚܹܟ̇ܝ.

⁴ܐܲܥ̣ܠܘܼܢܝ ܠܒܹܝܬ̣ ܚܲܡܪܵܐ. ܛܲܟܸ̇ܣ̣ܘ ܥܠܲܝ ܪܸܚ̱ܡܬ̣ܵܐ.

⁵ܣܵܡܘܼܢܝ ܒܦܘܼܢܵܩܹ̈ܐ. ܐܲܟ݂ܪ̱ܟ݂ܘܼܢܝ ܒܚܲܙܘܼܪܹ̈ܐ. ܡܸܛܠ ܕܲܟ݂ܪܝܼܗܲܬ̣ ܪܸܚ̱ܡܬ̣ܵܐ ܐ̄ܢܵܐ.

⁶ܣܸܡܵܠܹܗ ܬܚܹܝܬ̣ ܪܹܫܝ ܘܝܲܡܝܼܢܹܗ ܬܥܲܦܩܲܢܝ.

⁷ܐܵܘܡܝܼܬ̇ܟܹܝܢ ܐܘܿ ܒ̈ܢܵܬ̣ ܐܘܿܪܸܫܠܸܡ: ܒܲܛ̈ܒܲܝܵܐ ܐܵܘ ܒܥܘܼܙܲܝ̈ܠܹܐ ܕܚܲܩܠܵܐ. ܐܸܢ ܬܥܝܼܪ̈ܵܢ ܘܐܸܢ ܬܥܲܝܪ̈ܵܢ ܝܵܬ̣ ܪܸܚܡ̱ܬ̣ܵܐ: ܥܕܲܡܵܐ ܕܬܸܨܒܹ̇ܐ.

⁸ܩܵܠܹܗ ܕܕ݂ܵܕ݂ܝ ܗܵܐ ܗܵܢܵܐ ܕܐܵܬܹܐ. ܡܫܵܘܲܪ ܥܲܠ ܛܘܼܪܹ̈ܐ. ܡܩܲܝܸܙ ܥܲܠ ܪ̈ܵܡܵܬ̣ܵܐ.

⁹ܕܵܡܹ̇ܐ ܕܵܕ݂ܝ ܠܛܲܒ̣ܝܵܐ: ܐܵܘ ܠܥܘܿܙܲܝܠܵܐ ܕܐܲܝ̈ܠܹܐ. ܗܵܐ ܗ̤ܘ ܩܵܐܹ̇ܡ ܒܸܣܬܲܪ ܐܸܣܬܲܢ: ܡܕ݂ܝܼܩ ܡ̣ܢ ܟܵܘܹ̈ܐ: ܡܲܪܟܸ̇ܢ ܡ̣ܢ ܨܵܝܪ̈ܵܬ̣ܵܐ.

¹⁰ܥܢ̣ܵܐ ܕܵܕ݂ܝ ܘܐܸܡܲܪ ܠܝܼ: ܩܘܼܡܝ ܠܹܟ݂ܝ ܫܲܦܝܼܪܲܬܝ: ܩܲܪܝܼܒ̣ܬ̇ܝ: ܘܙܸܠܝ ܠܹܟ݂ܝ.

¹¹ܡܸܛܠ ܕܗܵܐ ܣܲܬ̣ܘܵܐ ܥ̣ܒܲܪ. ܘܡܸܛܪܵܐ ܥ̣ܒܲܪ ܘܐܸܙܲܠ̣ ܠܹܗ.

¹²ܗܲܒܵܒܹ̈ܐ ܐܸܬ̣ܚ̄ܙܝܼܘ ܒܐܲܪܥܵܐ. ܙܲܒ̣ܢܵܐ ܕܲܟ݂ܣܵܚܵܐ ܡܛ̣ܵܐ. ܘܩܵܠܵܐ ܕܫܘܿܦܢܝܼܢܵܐ ܐܸܫܬ̇ܡܲܥ ܒܐܲܪܥܲܢ.

¹³ܬܹܬܵܐ ܝܸܗ̄ܒܲܬ̤ ܦܲܩ̈ܘܼܥܹܝܗ̇ ܓܘܼܦܢܹ̈ܐ ܘܲܣܡܵܕ݂ܪܹ̈ܐ ܝܲܗ̄ܒ̣ܘ ܪܹܝܚܵܐ. ܩܘܼܡܝ ܠܹܟ݂ܝ ܫܲܦܝܼܪܲܬ̇ܝ ܩܲܪܝܼܒ̣ܘܼܬ̇ܝ: ܘܬ̣ܵܝ ܠܹܟ݂ܝ.

¹⁴ܝܵܘܢܵܝ ܒܚ̈ܘܼܠܵܢܹܐ ܕܫܘܿܥܵܐ: ܒܣܸܬ̇ܪܵܐ ܕܲܣܝܵܓ̣ܵܐ: ܚܵܘܵܐܝܼܢܝ ܚܸܙܘܹܟ݂ܝ: ܘܐܲܫ̱ܡܥܝܼܢܝ ܩܵܠܹܟ݂ܝ. ܡܸܛܠ ܕܩܵܠܹܟ݂ܝ ܒܲܣܝܼܡ: ܘܚܸܙܘܹܟ݂ܝ ܝܵܐܹ̇ܐ.

¹⁵ܐܲܚܘܿܕ݂ܘ ܠܲܢ ܬܲܥܠܹ̈ܐ: ܬܲܥܠܹ̈ܐ ܕܲܩܕ̇ܩܹ̈ܐ ܡܚܲܒ̇ܠܲܝ̈ ܟܲܪ̈ܡܹܐ. ܘܟܲܪ̈ܡܝܼܢ ܕܲܣܡܵܕ݂ܪ̈ܝܼܢ.

¹⁶ܕܵܕ݂ܝ ܠܝܼ ܘܐܸܢܵܐ ܠܹܗ: ܕܪܵܥܹ̇ܐ ܒܫܘܿܫܲܢܹ̈ܐ.

¹⁷ܥܲܕ݂ ܢܦܘܼܓ̣ ܝܵܘܡܵܐ: ܘܢܸܪܟ̇ܢܘܿܢ ܛܸܠܵܠܹ̈ܐ. ܐܸܬ̣ܗܲܦ̄ܟ݂ ܕܡܝܼ ܠܵܟ݂ ܕܵܕܝ: ܠܛܲܒ̣ܝܵܐ ܐܵܘ ܠܥܘܼܙܲܝܠܵܐ ܕܐܲܝܠܹ̈ܐ: ܥܲܠ ܛܘܼܪ̈ܲܝ ܒܸܣܡܵܢܹ̈ܐ.