Read Aramaic Peshita Song of Solomon 3 Bible Online

Song of Solomon 3 - Aramaic Peshita bible

Song of Solomon 3

¹ܥܲܠ ܡܲܫܟܲܒ̣ܝ ܒܠܲܝܠܵـ̈ـܘܵܬ̣ܵܐ ܒܥܹ̇ܝܬ̣ ܠܲܕ݂ܪܸܚܡܲܬ̣ ܢܲܦ̮ܫܝ: ܒܥܹ̇ܝܬܹܗ ܘܠܵܐ ܐܸܫܟܲܚ̇ܬܹ̇ܗ.

²ܐܸܩܘܼܡ ܢܹܐ: ܐܸܬ̣ܟ̇ܪܸܟ݂ ܒܲܡܕ݂ܝܼܢ̄ܬܵܐ ܒܫܘܼܩܹ̈ܐ ܘܒܲܦܠܵܛܵـ̈ـܘܵܬ̣ܵܐ: ܐܸܒ̣ܥܸܐ ܠܲܕ݂ܪܸܚܡܲܬ̤ ܢܲܦ̮ܫܝ. ܒܥܹ̇ܝܬܹܗ ܘܠܵܐ ܐܸܫܟܲܚܬܹ̇ܗ.

³ܐܸܫ̣ܟ̇ܚܘܿܢܲܝ ܢܵܛ̇ܘܿܪܹ̈ܐ ܕܡܸܬ̣ܟܲܪܟ̇ܝܼܢ ܒܲܡܕ݂ܝܼܢ̄ܬܵܐ. ܠܡܵܐ ܠܲܕ݂ܪܸܚܡܲܬ̤ ܢܲܦ̮ܫܝ ܚ̣ܙܲܝܬ̇ܘܿܢ.

⁴ܟܲܕ݂ ܩܲܠܝܼܠ ܥܸܒ̣ܪܹܬ̣ ܡܸܢܗܘܿܢ: ܥܕܲܡܵܐ ܕܐܸܫܟ̇ܚܹ̇ܬ̣ ܝܵܬ̣ ܕܪܸܚܡܲܬ̤ ܢܲܦ̮ܫܝ. ܐܸܚܲܕ̇ܬܹ̇ܗ ܘܠܵܐ ܐܲܪܦܝܼܬܹ̇ܗ: ܥܕܲܡܵܐ ܕܐܲܥܸܠ̇ܬܹܗ ܠܒܹܝܬ̣ ܐܹܡܝ: ܘܲܠܩܲܝܛܘܿܢܵܗ̇ ܕܝܵܠܹܕ̇ܬ̇ܝ.

⁵ܐܵܘ ܡܝܲܬ̇ܟܹܝܢ ܒ̈ܢܵܬ̣ ܐܘܿܪܸܫܠܸܡ: ܒܲܛ̈ܒܲܝܵܐ ܐܵܘ ܒܥܘܼܙܲܝ̈ܠܹܐ ܕܚܲܩܠܵܐ: ܐܸܢ ܬܥܝܼܪ̈ܵܢ ܘܐܸܢ ܬܥܲܝܪ̈ܵܢ: ܝܵܬ̣ ܪܸܚ̱ܡܬ̣ܵܐ ܥܕܲܡܵܐ ܕܬܸܨܒܸܐ.

⁶ܡܲܢ ܗ̄ܝܼ ܗܵܕܹܐ ܕܣܵܠܩܵܐ ܡ̣ܢ ܡܲܕ݂ܒ̇ܪܵܐ: ܐܲܝܟ݂ ܥܸܛܪܵܐ ܕܬܸܢܵܢܵܐ ܡܒܲܣܡܵܐ ܒܡܘܼܪܵܐ ܘܒܲܠܒ̣ܘܿܢ̄ܬܵܐ: ܡ̣ܢ ܟܠ ܚܸܠܵܐ ܕܒܸܣܡܹ̈ܐ.

⁷ܗܵܐ ܥܲܪܣܹܗ ܕܲܫܠܹܝܡܘܿܢ: ܫܬ̇ܝܼܢ ܓܲܢ̄ܒܵܪ̈ܝܼܢ ܟܪܝܼܟ݂ܝܼܢ ܠܵܗ̇ ܡ̣ܢ ܓܲܢ̄ܒܵܪܹ̈ܐ ܕܝܼܣܪܵܝܹܠ.

⁸ܟܠܗܘܿܢ ܐܲܚܝܼܕܲܝ̈ ܚܲܪܒܵܐ ܘܡܲܠܦܲܝ̈ ܩܪܵܒ̣ܵܐ ܓܒܲܪ ܚܲܪܒܹ̇ܗ ܥܲܠ ܥܲܛܡܹܗ: ܡ̣ܢ ܕܸܚ̱ܠܬ̣ܵܐ ܕܠܲܝܠܵـ̈ـܘܵܬ̣ܵܐ.

⁹ܡܲܓܕ̇ܠܵܐ ܥ̣ܒܲܕ݂ ܠܹܗ ܡܲܠܟܵܐ ܫܠܹܝܡܘܿܢ ܡ̣ܢ ܩܲܝܣܹ̈ܐ ܕܠܸܒ̣ܢܵܢ.

¹⁰ܥܲܡܘܼܕ݂ܵܘ̈ܗܝ ܥ̣ܒܲܕ݂ ܕܣܹܐܡܵܐ: ܬܸܫܘܝܼܬܹܗ ܕܕܲܗܒ̣ܵܐ. ܬܲܟ݂ܣܝܬܹܗ ܕܐܲܪܓ̇ܙܵܢܵܐ. ܓܵܘܹܗ ܪܨܝܼܦ ܪܸܚ̱ܡܬ̣ܵܐ ܡܢ ܒ̈ܢܵܬ̣ ܐܘܿܪܸܫܠܸܡ.

¹¹ܦܘܿܩܹ̈ܝܢ ܘܲܚ̈ܙܵܝܑܹܝܢ ܒ̈ܢܵܬ̣ ܨܸܗܝܘܿܢ ܒܡܲܠܟܵܐ ܫܠܹܝܡܘܿܢ: ܒܲܟ݂ܠܝܼܠܵܐ ܕܟܲܠܸ: ܐܵܠܹܦ ܣܲܟ̇ܪ̈ܝܼܢ ܬܲܠ̈ܝܵܢ ܥܠܵܘܗܝ: ܟܠ ܫܵܠܛܹ̈ܐ ܕܓܲܢ̄ܒܵܪܹ̈ܐ.