Read Aramaic Peshita Song of Solomon 7 Bible Online

Song of Solomon 7 - Aramaic Peshita bible

Song of Solomon 7

¹ܡܵܢܵܐ ܬܸܚܙܘܿܢ ܒܫܝܼܠܘܿܡܵܝܬܵܐ ܕܢܵܚܬܵܐ ܐܲܝܟ݂ ܚܲܕ݂ܘܼܬ̣ܵܐ: ܘܐܲܝܟ݂ ܚܲܕ݂ܘܼܬ̣ܵܐ ܕܡܲܫ̱ܪ̈ܝܵܬ̣ܵܐ ܡܵܐ ܫܲܦܝܼܪ̈ܵܢ ܪܸܓ̣ܠܹ̇ܟ̇ܝ ܒܲܡܣܵܢܹ̈ܐ ܒܲܪܬ̣ ܡܛܲܝܒ̣ܵܐ ܘܨܘܼܪܲܬ̣ ܥܲܛܡܵܬܹ̈ܟ݂ܝ ܐܲܝܟ݂ ܚܸܪ̈ܩܹܐ: ܥܒ̣ܵܕ݂ ܐܝܼܕܲܝ̈ ܐܘܼܡܵܢܵܐ.

²ܫܸܪܹܟ݂ܝ ܐܲܓܵܢܵܐ ܕܲܟ݂ܪܝܼܟ݂ܵܐ: ܕܠܵܐ ܚܵܣܲܪ ܒܵܗ̇ ܡܙܵܓ̣ܵܐ. ܟܲܪܣܹܟ݂ܝ ܥܪܲܡܬ̣ܵܐ ܕܚܸܛܹ̈ܐ ܕܣܝܼܓ̣ܵܐ ܒܫܘܿܫܲܢܹ̈ܐ.

³ܬܪܹܝܢ ܬܕܲܝ̈ܟ̇ܝ ܐܲܝܟ݂ ܬܪܹܝܢ ܥܘܼܙܲܝ̈ܠܹܐ ܬܐܵܡܹ̈ܐ ܕܲܛ̈ܒܲܝܵܐ: ܕܪܵܥܹ̇ܝܢ ܒܫܘܿܫܲܢܹ̈ܐ.

⁴ܨܵܘܪܹܟ݂ܝ ܐܲܝܟ݂ ܡܲܓܕ̇ܠܵܐ ܕܫܸܢܵܐ ܥܲܝܢܲܝ̈ܟ̇ܝ ܐܲܝܟ݂ ܝܲܡ̈ܡܵܬ̣ܵܐ ܕܚܸܫܒ̇ܘܿܢ ܥܲܠ ܬܲܪܥܵܐ ܕܒܲܪܬ̣ ܣܲܓ̇ܝܼ̈ܐܹܐ. ܢܚܝܼܪܹܟ݂ܝ ܐܲܝܟ݂ ܡܲܓ̇ܕܠܵܐ ܕܠܸܒ̣ܢܵܢ: ܕܚܵܐܲܪ ܠܐܦܲܝ̈ ܕܲܪܡܣܘܿܩ.

⁵ܪܹܫܹܟ݂ܝ ܥܠܲܝܟ̇ܝ ܐܲܝܟ݂ ܟܲܪܡܠܵܐ. ܘܲܓ̣ܕ݂ܘܿܠܹ̈ܐ ܕܪܹܫܹܟ݂ܝ ܐܲܝܟ݂ ܐܲܪܓ̇ܘܵܢܵܐ ܕܡܲܠܟܵܐ: ܕܐܲܣܝܼܪ ܒܪ̈ܲܗܛܹܐ.

⁶ܡܵܐ ܫܲܦܝܼܪܲܬ̇ܝ: ܘܡܵܐ ܒܲܣܝܼܡܲܬ̇ܝ ܐܘܿ ܪܚܝܼܡܬܵܐ: ܒܲܪܬ̣ ܦܘܼܢܵܩܹ̈ܐ.

⁷ܘܗܵܕܹܐ ܩܵܘܡܬܹܟ݂ܝ ܕܵܡ̇ܝܵܐ ܠܕܸܩܠܵܐ: ܘܲܬ̇ܕܲܝ̈ܟ̇ܝ ܠܲܣܓ̣ܘܼܠܹ̈ܐ.

⁸ܐܸܡ̇ܪܹܬ̣ ܐܸܣܲܩ ܒܕܸܩܠܵܐ: ܘܐܹܚܘܿܕ݂ ܒܣܵܘܟܵܘ̈ܗܝ. ܘܢܸܗܘܘܿܢ ܬܕܲܝ̈ܟ̇ܝ ܐܲܝܟ݂ ܣܓ̣ܘܼܠܲܝ̈ ܓܘܼܦܢܹ̈ܐ ܘܪܹܝܚ ܐܲܦܲܝ̈ܟ̇ܝ ܐܲܝܟ݂ ܚܲܙܘܼܪܹ̈ܐ.

⁹ܘܚܸܟܹ̇ܟ݂ܝ ܐܲܝܟ݂ ܚܲܡܪܵܐ ܛܵܒ̣ܵܐ: ܕܐܵܙܹ̇ܠ ܠܕ݂ܵܕ݂ܝ ܠܲܬ̣ܪܝܼܨܘܼܬ̣ܵܐ ܘܕܲܡܙܝܼܥ ܣܸܦ̈ܘܵܬ̣ܝ ܘܫܸܢܲܝ̈.

¹⁰ܐܸܢܵܐ ܠܕ݂ܵܕ݂ܝ: ܘܲܥܠܲܝ ܦܲܢܝܼܬܹ̇ܗ.

¹¹ܬܵܐ ܕܵܕ݂ܝ: ܢܸܦܘܿܩ ܠܚܲܩܠܵܐ ܢܒ̣ܘܼܬ̣ ܒܟܲܦܪܵܐ.

¹²ܘܲܢܩܲܕܸ̇ܡ ܠܟܲܪܡܵܐ: ܘܢܸܚܙܹܐ ܐܸܢ ܦܸܪܥܲܬ̤ ܓܦܸܬܵܐ: ܘܲܢܦܲܩ̣ܘ ܣܡܵܕ݂ܪܹ̈ܐ: ܘܲܒ̣ܠܲܨܘ ܪ̈ܘܼܡܵܢܹܐ. ܬܲܡܵܢ ܐܸܬܸ̇ܠ ܠܵܟ݂ ܬܕܲܝ̈.

¹³ܝܲܒ̣ܪ̈ܘܼܚܹܐ ܝܲܗ̄ܒ̣ܘ ܪܹܝܚܵܐ ܘܥܲܠ ܬܲܪ̈ܥܝܼܢ ܟܠ ܐܲܒܵܢ̈ܝܼܢ ܚܲܕ݂ܬ̣ܝܼܢ ܘܥܲܬ̇ܝܼܩܝܼܢ: ܕܵܕ݂ܝ: ܢܸܛܪܹܬ̣ ܠܵܟ݂.