Read Aramaic Peshita Song of Solomon 8 Bible Online

Song of Solomon 8 - Aramaic Peshita bible

Song of Solomon 8

¹ܡܲܢ ܢܸܬ̇ܠܵܟ݂ ܐܲܝܟ݂ ܐܲܚܵܐ ܠܝܼ: ܐܲܝܢܸܩ̣ܘ ܬܕܲܝ̈ ܐܸܡܪ̈ܲܝ. ܐܸܫܟ̇ܚܵܟ݂ ܒܫܘܼܩܵܐ. ܐܸܫܩܵܟ݂: ܘܠܵܐ ܢܸܒ̣ܣܪܘܼܢܵܢܝ.

²ܐܸܕ݂ܒ̇ܪܵܟ݂: ܘܐܲܥܠܵܟ݂ ܠܒܹܝܬ̣ ܐܹܡܝ: ܘܲܠܩܲܝܛܘܿܢܵܗ̇ ܕܝܵܠܹܕ̇ܬ̇ܝ ܐܲܫܩܹܝܟ݂ ܡ̣ܢ ܚܲܡܪܝ ܒܲܣܝܼܡܵܐ: ܘܡ̣ܢ ܚܲܠܝܘܼܬ̣ܵܐ ܕܪ̈ܘܼܡܵܢܲܝ.

³ܣܸܡܵܠܹܗ ܬܚܹܝܬ̣ ܪܹܫܝ: ܘܝܲܡܝܼܢܹܗ ܬܥܲܦܩܲܢܝ.

⁴ܐܵܘܡ̇ܝܼܬ̇ܟܹܝܢ ܒ̈ܢܵܬ̣ ܐܘܿܪܸܫܠܸܡ ܐܸܢ ܬܥܝܼܪ̈ܵܢ ܘܐܸܢ ܬܥܲܝܪ̈ܵܢ ܝܵܬ̣ ܪܸܚ̱ܡܬ̣ܵܐ ܥܕܲܡܵܐ ܕܬܸܨܒܸ̇ܐ.

⁵ܡܲܢ ܗ̄ܝܼ ܗܵܕܹܐ ܕܣܵܠܩܵܐ ܡ̣ܢ ܡܲܕ݂ܒ̇ܪܵܐ: ܘܡܸܣܬܲܡܟܵܐ ܥܲܠ ܕܵܕ݂ܵܗ̇ ܬܚܹܝܬ̣ ܚܲܙܘܼܪܵܐ ܥܲܝܲܪܬܹ̇ܟ݂ܝ: ܘܬܲܡܵܢ ܚܲܒܸ̇ܠܬܹܟ݂ܝ ܐܸܡܹܟ݂ܝ ܬܲܡܵܢ ܚܒ̇ܠܲܬ̤ ܝܵܠܹܕ̇ܬܹ̇ܟ݂ܝ.

⁶ܣܝܼܡܲܝܢܝ ܚܵܬ̣ܡܵܐ ܥܲܠ ܠܸܒܵܟ݂: ܘܐܲܝܟ݂ ܚܵܬ̣ܡܵܐ ܥܲܠ ܕܪܵܥܵܟ݂ ܡܸܛܠ ܕܬܲܩܝܼܦܵܐ ܐܲܝܟ݂ ܡܵܘܬܵܐ ܪܸܚ̱ܡܬ̣ܵܐ. ܘܲܩܫܸܐ ܐܲܝܟ݂ ܫܝܘܿܠ ܛܢܵܢܵܐ. ܙܲܠܝܼܩܹ̈ܝܗ̇ ܙܲܠܝܼܩܲܝ̈ ܢܘܼܪܵܐ ܘܫܲܠܗܹܒ̣ܝܼܬ̣ܵܐ.

⁷ܡܲـ̈ـܝܵܐ ܣܲܓ̇ܝܼ̈ܐܹܐ ܠܵܐ ܡܸܫܟ̇ܚܝܼܢ ܠܲܡܕܲܥܵܟ݂ܘܼ ܠܪܸܚ̱ܡܬ̣ܵܐ. ܘܢܲܗܪ̈ܵܘܵܬ̣ܵܐ ܠܵܐ ܓܵܪܦܝܼܢ ܠܵܗ̇ ܐܸܢ ܢܸܬܸ̇ܠ ܓܲܒ̣ܪܵܐ ܟܠ ܥܘܼܬ̣ܪܵܐ ܕܒܲܝܬܹ̇ܗ ܒܪܸܚ̱ܡܬ̣ܵܐ: ܡܡܲܝܵܩܘܼ ܢܡܲܝܩܘܼܢ ܒܹܗ.

⁸ܚܵܬ̣ܵܐ ܐܝܼܬ̣ ܠܲܢ ܙܥܘܿܪܬܵܐ ܘܲܬ̇ܕܲܝܵܐ ܠܲܝܬ̇ ܠܵܗ̇ ܡܵܢܵܐ ܢܸܥܒܸ̇ܕ݂ ܠܚܵܬܲܢ ܒܝܵܘܡܵܐ ܕܡܸܬ̣ܡܲܠܲܠ ܒܵܗ̇.

⁹ܐܸܢ ܫܘܼܪܵܐ ܗ̄ܝܼ: ܢܸܒ̣ܢܸܐ ܥܠܹܝܗ̇ ܥܸܠ̈ܝܵܢ ܕܲܟ݂ܣܸܦ ܘܐܸܢ ܬܲܪܥܵܐ ܗ̄ܝܼ: ܢܨܘܼܪ ܥܠܹܝܗ̇ ܠܘܼܚܹ̈ܐ ܕܐܲܪܙܵܐ.

¹⁰ܐܸܢܵܐ ܫܘܼܪܵܐ: ܘܲܬ̣ܕܲܝ̈ ܡܲܓ̣ܕ̇ܠܹ̈ܐ. ܗܵܝܕܹ̇ܝܢ ܐܝܼܬ̇ܝ ܗ̄ܘܹ̇ܝܬ̣ ܒܥܲܝܢܵܘ̈ܗܝ ܐܲܝܟ݂ ܡܸܫܟ̇ܚܲܬ̣ ܫܠܵܡܵܐ.

¹¹ܟܲܪܡܵܐ ܐܝܼܬ̣ ܗ̄ܘܼܵܐ ܠܲܫܠܝܼܡܘܿܢ: ܘܐܸܒܹ̇ܗ ܣܲܓ̇ܝܼ ܝܸܗ̄ܒܹ̇ܬ̣ ܟܲܪܡܵܐ ܠܢܵܛܘܿܪܹ̈ܐ ܓܲܒ̣ܪܵܐ ܝܲܗ̄ܒ̣ ܒܦܹܐܪ̈ܵܘܗܝ ܐܵܠܹܦ ܕܲܟ݂ܣܸܦ.

¹²ܟܲܪܡܵܐ ܕܝܼܠܝ ܩܕ݂ܵܡܲܝ ܐܵܠܹܦ ܠܵܟ݂ ܫܠܹܝܡܘܹܢ: ܘܡܲܐܬܹ̇ܝܢ ܠܢܵܛܪ̈ܲܝ ܦܹܐܪܹ̈ܐ.

¹³ܐܲܝܠܹܝܢ ܕܝܵܬ̣ܒ̇ܝܼܢ ܒܓܢܹ̈ܐ: ܘܨܵܝܬ̇ܝܼܢ ܠܩܵܠܵܟ݂: ܐܲܫܡܲܥܲܝܢܝ.

¹⁴ܐܸܬ̣ܗܲܦܲܟ݂ ܕܵܕ݂ܝ ܕܡܝܼ ܠܵܟ݂ ܠܛܲܒ̣ܝܵܐ ܘܲܠܥܘܼܙܲܝܠܵܐ ܕܐܲܝ̈ܠܹܐ ܥܲܠ ܛܘܼܪ̈ܲܝ ܒܸܣܡܵܢܹ̈ܐ.