Read Aramaic Peshita Isaiah 11 Bible Online

Isaiah 11 - Aramaic Peshita bible

Isaiah 11

¹ܘܢܸܦܘܿܩ ܚܘܼܛܪܵܐ ܡ̣ܢ ܓܘܼܙܥܹܗ ܕܐܝܼܫܲܝ. ܘܢܲܦܪܲܥ ܢܘܼܪܒܵܐ ܡ̣ܢ ܥܸܩܵܪܹܗ.

²ܘܬܸܬ̇ܢܝܼܚ ܘܬܸܫܪܹܐ ܥܠܵܘܗܝ ܪܘܼܚܵܐ ܕܐܲܠܵܗܵܐ: ܪܘܼܚܵܐ ܕܚܸܟ݂ܡ̱ܬ̣ܵܐ ܘܲܕ݂ܣܘܼܟܵܠܵܐ: ܪܘܼܚܵܐ ܕܬܲܪܥܝܼܬ̣ܵܐ ܘܲܕ݂ܓܲܢ̄ܒܲܪܘܼܬ̣ܵܐ: ܪܘܼܚܵܐ ܕܝܼܕܲܥܬ̣ܵܐ ܘܲܕ̇ܕܸܚ̱ܠܬܹܗ ܕܡܵܪܝܵܐ.

³ܘܢܸܕ݂ܢܲܚ ܒܕܸܚ̱ܠܬܹܗ ܕܡܵܪܝܵܐ. ܘܠܵܐ ܐܲܝܟ݂ ܕܚܵܙ̈ܝܵܢ ܥܲܝܢܵܘ̈ܗܝ ܢܕ݂ܘܼܢ: ܘܠܵܐ ܐܲܝܟ݂ ܕܫܵܡ̈ܥܵܢ ܐܸܕ݂ܢܵܘ̈ܗܝ ܢܲܟܸ̇ܣ.

⁴ܢܕ݂ܘܼܢ ܒܩܘܼܫܬܵܐ ܠܡܸܣܟܹ̇ܢܹ̈ܐ: ܘܢܲܟܸ̇ܣ ܒܲܬ̣ܪܝܼܨܘܼܬ̣ܵܐ ܠܒ̣ܝܼܫܹ̈ܝܗ̇ ܕܐܲܪܥܵܐ. ܢܸܡܚܸܐ ܠܐܲܪܥܵܐ ܒܫܲܒ̣ܛܵܐ ܕܦܘܼܡܹܗ. ܘܲܒ̣ܪܘܼܚܵܐ ܕܣܸܦ̈ܘܵܬܹܗ ܢܡܝܼܬ̣ ܠܪ̈ܲܫܝܼܥܹܐ.

⁵ܬܸܗܘܹܐ ܙܲܕ̇ܝܼܩܘܼܬ̣ܵܐ ܐܲܣܵܪ ܚܲܨܵܘ̈ܗܝ: ܘܗܲܝܡܵܢܘܼܬ̣ܵܐ ܚܙܵܩܵܐ ܕܕܲܦܢܵܬܹ̈ܗ.

⁶ܢܸܥܡܲܪ ܕܐܹܒ̣ܵܐ ܥܲܡ ܐܸܡܪܵܐ. ܘܢܸܡܪܵܐ ܥܲܡ ܓܲܕ݂ܝܵܐ ܢܸܘܒܲܥ. ܘܥܸܓ̣ܠܵܐ ܘܓ̣ܘܼܪܝܵܐ ܕܐܲܪܝܵܐ ܘܬ̣ܵܘܪܵܐ: ܐܲܟ݂ܚܕ݂ܵܐ ܢܸܪܥܘܿܢ. ܘܛܲܠܝܵܐ ܙܥܘܿܪܵܐ ܢܕܲܒܲܪ ܐܸܢܘܿܢ.

⁷ܬܘܿܪܬܵܐ ܘܕܸܒܵܐ ܐܲܟ݂ܚܕ݂ܵܐ ܢܸܪ̈ܥ̱ܝܵܢ ܘܲܒ̣ܢܲܝ̈ܗܹܝܢ ܐܲܟ݂ܚ̄ܕ݂ܵܐ ܢܸܪܒ̇ܥܘܼܢ ܐܲܪܝܵܐ ܐܲܝܟ݂ ܬܵܘܪܵܐ ܢܹܐܟ݂ܘܿܠ ܬܸܒ̣ܢܵܐ.

⁸ܘܢܸܫܬ̇ܥܹܐ ܝܲܠܘܼܕ݂ܵܐ ܒܚܲܪܡܵܢܵܐ. ܘܲܒ̣ܚܘܼܪܵܐ ܕܐܸܣܦܸܣ ܢܵܘܫܸܛ ܐܝܼܕܹܗ ܚܣܝܼܠܵܐ.

⁹ܘܠܵܐ ܢܲܒ̣ܐ̱ܫܘܼܢ: ܘܠܵܐ ܢܚܲܒ̇ܠܘܼܢ ܒܟ݂ܠܹܗ ܛܘܼܪܵܐ ܕܩܘܼܕ݂ܫܝ. ܡܸܛܠ ܕܬܸܬ̣̱ܡܠܸܐ ܐܲܪܥܵܐ ܝܼܕܲܥܬܹܗ ܕܡܵܪܝܵܐ: ܐܲܝܟ݂ ܡܲـ̈ـܝܵܐ ܕܲܡܟܲܣܹܝܢ ܠܝܲܡܵܐ.

¹⁰ܘܢܸܗܘܹܐ ܒܝܵܘܡܵܐ ܗܵܘܿ: ܥܸܩܵܪܹܗ ܕܐܝܼܫܲܝ ܕܩܵܐܹ̇ܡ: ܐܵܬ̤ܵܐ ܠܥܲܡܡܹ̈ܐ ܘܲܥܠܵܘܗܝ ܥܲܡܡܹ̈ܐ ܢܥܲܩܒ̣ܘܼܢ ܘܬܸܗܘܹܐ ܢܝܵܚܬܹ̇ܗ ܐܝܼܩܵܪܵܐ.

¹¹ܘܢܸܗܘܹܐ ܒܝܵܘܡܵܐ ܗܵܘܿ: ܢܵܘܣܸܦ ܡܵܪܝܵܐ ܬܸܢܝܵܐ ܕܐܝܼܕܹܗ: ܕܢܸܩܢܹܐ ܫܲܪܟܵܐ ܕܥܲܡܹܗ ܕܐܸܫܬ̇ܚܲܪܘ: ܡ̣ܢ ܐܵܬ̣ܘܿܪ: ܘܡ̣ܢ ܡܸܨܪܹܝܢ: ܘܡ̣ܢ ܦܲܬ̣ܪܘܿܣ: ܘܡ̣ܢ ܟܘܼܫ: ܘܡ̣ܢ ܥܝܼܠܵܡ: ܘܡ̣ܢ ܣܵܥܝܼܪ: ܘܡ̣ܢ ܚܡܵܬ̣: ܘܡܢ ܓܵܙܪ̈ܵܬ̣ܵܐ ܕܝܲܡܵܐ.

¹²ܘܢܸܫܩܘܿܠ ܐܵܬ̤ܵܐ ܠܥܲܡܡܹ̈ܐ: ܘܲܢܟܲܢܸܫ ܠܛܵܥܲـ̈ـܝܵܐ ܕܝܼܣܪܵܝܹܠ: ܘܠܲܡܒܲܕ̇ܪܹ̈ܐ ܕܲܝܗܘܼܕ݂ܵܐ ܢܟܲܢܸܫ ܡ̣ܢ ܐܲܪܒ̇ܥܲܬ̣ ܟܸܢܦܹܝܗ̇ ܕܐܲܪܥܵܐ.

¹³ܘܢܸܥܒܲܪ ܛܢܵܢܵܐ ܡ̣ܢ ܐܲܦܪܹܝܡ: ܘܐܵܠܘܿܨܵܘ̈ܗܝ ܕܲܝܗܘܼܕ݂ܵܐ ܢܹܐܒ̣ܕ̇ܘܿܢ. ܐܲܦܪܹܝܡ ܠܵܐ ܢܸܛܲܢ ܒܲܝܗܘܼܕ݂ܵܐ: ܘܲܝܗܘܼܕ݂ܵܐ ܠܵܐ ܢܹܐܠܘܿܨ ܠܐܲܦܪܹܝܡ.

¹⁴ܘܢܸܦ̱ܠܚܘܿܢ ܒܟܲܬ̣ܦܵܐ ܕܲܦܠܸܫܬܵܝܹ̈ܐ ܥܲܠ ܝܲܡܵܐ. ܘܐܲܟ݂ܚ̄ܕ݂ܵܐ ܢܸܒ̇ܙܘܿܢ ܠܲܒ̣ܢܲܝ̈ ܡܲܕ݂ܢ̱ܚܵܐ ܒܐܲܕ݂ܘܡ ܘܲܒ̣ܡܘܼܐܵܒ̣ ܢܵܘܫܛܘܼܢ ܐܝܼܕܲܝ̈ܗܘܿܢ ܘܲܒ̣ܢܲܝ̈ ܥܲܡܘܿܢ ܢܸܫܬܲܡܠܘܼܢ ܠܗܘܿܢ.

¹⁵ܘܢܲܚܪܸܒ̣ ܡܵܪܝܵܐ ܠܸܫܵܢ ܝܲܡܵܐ ܕܲܒ̣ܡܸܨܪܹܝܢ: ܘܲܢܪܝܼܡ ܐܝܼܕܹܗ ܥܲܠ ܢܲܗܪܵܐ ܒܐܘܼܚܕܵܢܵܐ ܕܪܘܼܚܹܗ: ܘܢܸܡܚܹܝܘܗܝ ܠܫܲܒ̣ܥܵܐ ܢܲܚ̈ܠܝܼܢ: ܕܢܸܬ̣ܥ̱ܒܲܪ ܒܲܡܣܵܢܹ̈ܐ.

¹⁶ܘܢܸܗܘܹܐ ܫܒ̣ܝܼܠܵܐ ܠܫܲܪܟܵܐ ܕܥܲܡܹܗ: ܕܐܸܫܬ̇ܚܲܪܘ ܡ̣ܢ ܐܵܬ̣ܘܿܪ: ܐܲܝܟ݂ ܕܲܗܘ̤ܵܬ̣ ܠܝܼܣܪܵܝܹܠ: ܒܝܵܘܡܵܐ ܕܲܣܠܸܩ̣ܘ ܡ̣ܢ ܐܲܪܥܵܐ ܕܡܸܨܪܹܝܢ.