Read Aramaic Peshita Isaiah 12 Bible Online

Isaiah 12 - Aramaic Peshita bible

Isaiah 12

¹ܘܬܹܐܡܲܪ ܒܝܵܘܡܵܐ ܗܵܘܿ: ܐܵܘܕܸ̇ܐ ܠܵܟ݂ ܡܵܪܝܵܐ ܕܲܪܓܸܙܬ̇ ܥܠܲܝ: ܘܐܲܗܦܸܟ݂ܬ̇ ܪܘܼܓ̣ܙܵܟ݂ ܘܒܲܝܲܐܬܵܢܝ.

²ܗܵܐ ܥܲܠ ܐܲܠܵܗܵܐ ܦܵܪܘܿܩܝ ܬܟ݂ܝܼܠ ܐ̄ܢܵܐ: ܘܠܵܐ ܐܹܙܘܿܥ. ܡܸܛܠ ܕܬ̣ܘܼܩܦ̄ܝ ܘܫܘܼܒ̣ܚ̄ܝ ܡܵܪܝܵܐ ܗ̄ܘܼ: ܘܢܸܗܘܹܐ ܠܝܼ ܠܦܘܼܪܩܵܢܵܐ.

³ܘܬܸܡܠܘܿܢ ܡܲـ̈ـܝܵܐ ܒܚܲܕ݂ܘܼܬ̣ܵܐ ܡ̣ܢ ܡܲܒ̇ܘܼܥܵܐ ܕܦܘܼܪܩܵܢܵܐ.

⁴ܘܬܹܐܡܪܘܿܢ ܒܝܵܘܡܵܐ ܗܵܘܿ: ܐܵܘܕܵܘ ܠܡܵܪܝܵܐ ܘܲܩܪܵܘ ܫܡܹܗ: ܘܚܵܘܵܘ ܒܥܲܡܡܹ̈ܐ ܨܸܢ̈ܥܵܬܹܗ. ܐܸܬ̇ܕܲܟ݂ܪܘ ܕܥܲܫܝܼܢ ܗ̄ܘܼ ܫܡܹܗ.

⁵ܙܡܲܪܘ ܠܡܵܪܝܵܐ ܡܸܛܠ ܕܓܲܐܝܘܼܬ̣ܵܐ ܥ̣ܒܲܕ݂. ܝܼܕ݂ܝܼܥܵܐ ܗ̄ܝܼ ܗܵܕܹܐ ܒܟ݂ܠܵܗ̇ ܐܲܪܥܵܐ.

⁶ܕܘܼܨܝ ܘܫܲܒܲܚܝ ܥܵܡ̇ܘܿܪܬܵܐ ܕܨܸܗܝܘܿܢ. ܡܸܛܠ ܕܪܲܒ̇ ܗ̄ܘܼ ܕܲܒ̣ܓ̣ܵܘܹܟ݂ܝ: ܩܲܕ̇ܝܼܫܵܐ ܕܝܼܣܪܵܝܹܠ.