Read Aramaic Peshita Isaiah 14 Bible Online

Isaiah 14 - Aramaic Peshita bible

Isaiah 14

¹ܡܸܛܠ ܕܲܡܪܲܚܸܡ ܡܵܪܝܵܐ ܥܲܠ ܝܲܥܩܘܿܒ̣: ܘܡܸܨܛܒܸܐ ܬܘܼܒ̣ ܒܝܼܣܪܵܝܹܠ ܘܢܸܫܒ̇ܘܿܩ ܐܸܢܘܿܢ ܒܐܲܪܥ̱ܗܘܿܢ. ܘܢܸܬ̣ܠܵܘܘܿܢ ܥܠܲܝܗܘܿܢ ܥܵܡܘܿܪܹ̈ܐ. ܘܢܸܬ̇ܬܵܘܣܦܘܼܢ ܥܲܠ ܕܒܹܝܬ̣ ܝܲܥܩܘܿܒ̣.

²ܘܢܸܕ݂ܒ̇ܪܘܼܢ ܐܸܢܘܿܢ ܥܲܡܡܹ̈ܐ. ܘܢܲܝܬ̇ܘܿܢ ܐܸܢܘܿܢ ܠܐܲܪܥ̱ܗܘܿܢ ܘܢܹܐܪܬ̇ܘܿܢ ܐܸܢܘܿܢ ܕܒܹܝܬ̣ ܝܼܣܪܵܝܹܠ: ܒܐܲܪܥܹܗ ܕܡܵܪܝܵܐ: ܠܥܲܒ̣̈ܕܹ̇ܐ ܘܠܲܐܡ̈ܗܵܬ̣ܵܐ. ܘܢܸܗܘܘܿܢ ܫܵܒܹ̇ܝܢ ܠܫܵܒܲܝ̈ܗܘܿܢ: ܘܢܸܫܬܲܠܛܘܼܢ ܒܲܡܫܲܥܒ̇ܕ݂ܵܢܲܝ̈ܗܘܿܢ.

³ܘܢܸܗܘܹܐ ܒܝܵܘܡܵܐ ܕܲܢܢܝܼܚܵܟ݂ ܡܵܪܝܵܐ ܡ̣ܢ ܟܲܪܝܘܼܬ̣ܵܟ݂: ܘܡ̣ܢ ܪܘܼܓ̣ܙܵܟ݂: ܘܡ̣ܢ ܫܘܼܥܒܵܕ݂ܵܐ ܩܲܫܝܵܐ ܕܐܸܫܬܲܥܒܲܕ̇ܬ̇.

⁴ܬܸܫܩܘܿܠ ܡܲܬ̣ܠܵܐ ܗܵܢܵܐ ܥܲܠ ܡܲܠܟܵܐ ܕܒ̣ܵܒܹܠ: ܘܬܹܐܡܲܪ. ܐܲܝܟܲܢܵܐ ܒܛܸܠ̣ ܫܲܠܝܼܛܵܐ: ܘܲܒ̣ܛܸܠ ܡܚܲܦܛܵܢܵܐ.

⁵ܬܒܲܪ ܡܵܪܝܵܐ ܚܘܼܛܪܵܐ ܕܪܲܫܝܼܥܵܐ: ܘܫܲܒ̣ܛܵܐ ܕܫܲܠܝܼܛܵܐ.

⁶ܕܡܵܚܹ̇ܐ ܗ̄ܘܼܵܐ ܥܲܡܡܹ̈ܐ ܒܐܲܟ̇ܬ̣ܵܐ: ܡܚܘܿܬ̣ܵܐ ܕܠܵܐ ܡܲܪܕ̇ܘܼ. ܘܪܵܕܹܐ ܗ̄ܘܼܵܐ ܒܪܘܼܓ̣ܙܵܐ ܥܲܡܡܹ̈ܐ. ܘܪܵܕܸܦ ܠܗܘܿܢ ܕܠܵܐ ܚܵܘܣܵܢ.

⁷ܐܸܬ̇ܬ̇ܢܝܼܚܲܬ̤ ܘܫܸܠܝܲܬ̤ ܟܠܵܗ̇ ܐܲܪܥܵܐ: ܘܕ݂ܵܨܲܬ̤ ܒܬܸܫܒ̇ܘܿܚܬܵܐ.

⁸ܐܵܦ ܒܪܘܿܬ̣ܵܐ ܘܐܲܪ̈ܙܹܐ ܕܠܸܒ̣ܢܵܢ ܚܕ݂ܝܼܘ ܠܵܟ݂. ܡ̣ܢ ܙܲܒ̣ܢܵܐ ܕܲܫܟ݂ܒ̣ܬ̇: ܠܵܐ ܣܠܸܩ̣ܘ ܥܠܲܝܢ ܠܡܸܦܣܲܩ.

⁹ܫܝܘܿܠ ܡ̣ܢ ܠܬܲܚܬ̇ ܐܸܬ̣ܡܲܪܡܪܲܬ̤ ܠܘܼܩܒܲܠ ܡܲܥܠܵܟ݂. ܐܲܥܝܼܪܲܬ̤ ܥܠܲܝܟ ܓܲܢ̄ܒܵܪܹ̈ܐ: ܘܟ݂ܠܗܘܿܢ ܫܲܠܝܼܛܵܢܹ̈ܐ ܕܐܲܪܥܵܐ ܕܐܲܩܝܼܡܬ̇ ܡ̣ܢ ܟܘܼܪ̈ܣܵܘܵܬ̣ܗܘܿܢ.

¹⁰ܟܠܗܘܿܢ ܡܲܠ̈ܟܹ̇ܐ ܕܥܲܡܡܹ̈ܐ ܢܸܥܢܘܿܢ ܘܢܹܐܡܪܘܼܢ ܠܵܟ݂: ܐܵܦ ܐܲܢ̄ܬ̇ ܐܸܬ̣ܟ̇ܪܲܗܬ̇ ܐܲܟ݂ܘܵܬܲܢ: ܘܲܠܘܵܬܲܢ ܐܸܫܬܲܠܸܡܬ̇.

¹¹ܘܐܝܼܩܵܪܵܟ݂ ܢ̣ܚܸܬ̣ ܠܲܫܝܘܿܠ: ܘܡ̣ܝܼܬ̣ ܟܸܢܵܪܵܟ݂ ܬܚܘܿܬܲܝܟ ܬܸܬ̣ܡ̱ܟܸܟ݂ ܪܸܡܬ̣ܵܐ: ܘܲܬ̣ܟܲܣܹܝܟ݂ ܬܵܘܠܥܵܐ.

¹²ܐܲܝܟܲܢܵܐ ܢܦܲܠ̣ܬ̇ ܡ̣ܢ ܫܡܲܝܵܐ. ܐܲܝܠܸܠ ܒܨܲܦܪܵܐ ܢܦܲܠܬ̇ ܒܐܲܪܥܵܐ ܡܨܲܥܪܵܝܵܐ ܕܥܲܡܡܹ̈ܐ.

¹³ܐܲܢ̄ܬ̇ ܐܸܡܲܪܬ̇ ܒܠܵܒܵܟ݂. ܕܐܸܣܲܩ ܠܲܫܡܲܝܵܐ: ܘܲܠܥܸܠ ܡ̣ܢ ܟܵܘܟ̇ܒ̣ܵܘ̈ܗܝ ܕܐܹܝܠ ܐܲܪܝܼܡ ܟܘܼܪܣܲܝ: ܘܐܸܬܸ̇ܒ̣ ܒܛܘܼܪܹ̈ܐ ܪ̈ܵܡܹܐ ܕܒܲܫܦܘܿܠܲܝ̈ ܓܲܪܒ̇ܝܵܐ.

¹⁴ܘܐܸܣܲܩ ܥܲܠ ܪܵܘܡܵܐ ܕܲܥܢܵܢܹ̈ܐ: ܘܐܸܬ̇ܕܲܡܸܐ ܠܥܸܠܝܵܐ.

¹⁵ܡܸܟܹ̇ܝܠ ܠܲܫܝܘܿܠ ܬܸܚܘܿܬ̣: ܘܠܐܸܫܬܹ̇ܗ ܕܓ̣ܘܼܒܵܐ.

¹⁶ܟܠ ܚܵܙ̈ܝܲܝܟ ܥܠܲܝܟ ܢܕ݂ܝܼܩܘܼܢ ܘܒܵܟ݂ ܢܸܣܬܲܟ̇ܠܘܼܢ: ܘܢܹܐܡܪܘܼܢ: ܗܵܢܵܘ ܓܲܒ̣ܪܵܐ ܕܡܲܪܡܲܪ ܗ̄ܘܼܵܐ ܐܲܪܥܵܐ: ܘܐܲܙܝܼܥ ܡܲܠܟ̇ـ̈ـܘܵܬ̣ܵܐ.

¹⁷ܘܐܲܚܪܸܒ̣ ܬܹܒܹܝܠ ܐܲܝܟ݂ ܡܲܕ݂ܒ̇ܪܵܐ. ܘܩܘܼܪ̈ܝܵܐ ܣܲܚܸܦ̣: ܘܐܲܣܝܪ̈ܵܘܗܝ ܠܵܐ ܫ̣ܪܵܐ.

¹⁸ܟܠܗܘܿܢ ܡܲܠ̈ܟܹ̇ܐ ܕܥܲܡܡܹ̈ܐ: ܫܟܸܒ̣ܘ ܒܐܝܼܩܵܪܵܐ: ܐ̄ܢܵܫ ܒܒܲܝܬܹ̇ܗ.

¹⁹ܘܐܲܢ̄ܬ̇ ܐܸܫܬܲܕ݂ܝܼܬ̇ ܡ̣ܢ ܩܲܒ̣ܪܵܟ݂: ܐܲܝܟ݂ ܢܘܼܪܒܵܐ ܡܲܣ̱ܠܝܵܐ: ܠܒ̣ܘܼܫܵܐ ܕܲܩܛܝܼ̈ܠܹܐ ܕܲܩܛܝܼܠܝܼܢ ܒܣܲܝܦܵܐ: ܕܢܵܚ̇ܬܝܼܢ ܒܟܹܐܦܹ̈ܐ ܕܓ̣ܘܼܒܵܐ ܐܲܝܟ݂ ܫܠܲܕܹ̇ܐ ܕܝܼܫܵـ̈ـܬ̣ܵܐ.

²⁰ܘܠܵܐ ܬܸܚܕܹ̇ܐ ܥܲܡܗܘܿܢ ܒܩܲܒ̣ܪܵܐ: ܡܸܛܠ ܕܐܲܪܥܵܟ݂ ܚܲܒܸ̇ܠܬ̇: ܘܥܲܡܵܟ݂ ܩܛܲܠ̣ܬ̇. ܠܵܐ ܢܩܘܼܡ ܠܥܵܠܲܡ ܙܲܪܥܵܐ ܒܝܼܫܵܐ.

²¹ܛܲܝܸܒ̣ ܠܲܒ̣ܢܵܘ̈ܗܝ ܩܸܛܠܵܐ ܒܥܵܘܼܠܵܐ ܕܐܲܒ̣ܘܼܗܘܿܢ. ܕܠܵܐ ܢܩܘܼܡܘܼܢ ܘܢܹܐܪܬ̇ܘܿܢ ܐܲܪܥܵܐ: ܘܢܸܡܠܘܿܢ ܐܲܦܲܝ̈ ܬܹܒܹܝܠ ܩܪܵܒ̣ܵܐ.

²²ܐܹܩܘܼܡ ܥܠܲܝܗܘܿܢ: ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ. ܘܐܵܘܒܸ̇ܕ݂ ܫܡܵܗ̇ ܕܒ̣ܵܒܹܠ: ܘܙܲܪܥܵܗ̇ ܘܛܘܼܗܡܵܗ̇ ܘܫܲܪܒ̇ܬ̣ܵܗ̇: ܐܵܡܲܪ ܡܵܪܝܵܐ.

²³ܘܐܸܥܒ̇ܕ݂ܝܼܗ̇ ܝܵܪܬ̇ܘܼܬ̣ܵܐ ܠܩܘܹ̈ܦܕܹ̇ܐ: ܘܐܵܓ̣ܡܹ̈ܐ ܕܡܲـ̈ـܝܵܐ ܘܐܸܟ݂ܢ̱ܫܝܼܗ̇ ܒܡܲܟ݂ܢܲܫܬܵܐ ܕܐܲܒ̣ܕܵܢܵܐ: ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

²⁴ܝܑܼܡܵܐ ܡܵܪܝܵܐ ܚܲܝܠܬ̣ܵܢܵܐ ܘܐܸܡܲܪ: ܕܐܲܝܟ݂ ܕܐܸܬ̣ܚܲܫܒܹ̇ܬ̣: ܗܵܟܲܢܵܐ ܢܸܗܘܹܐ. ܘܐܲܝܟ݂ ܕܐܸܬ̣ܪܲܥܝܼܬ̇: ܢܸܬ̣ܩܲܝܲܡ.

²⁵ܕܐܸܬ̣ܒܲܪ ܠܐܵܬ̣ܘܿܪܵܝܵܐ ܒܐܲܪܥܝ: ܘܥܲܠ ܛܘܼܪ̈ܲܝ ܐܹܕ̇ܘܼܫܝܼܘܗܝ. ܘܢܸܥܒܲܪ ܢܝܼܪܹܗ ܡܸܢܗܘܿܢ: ܘܫܘܼܥܒܵܕܹܗ ܡ̣ܢ ܟܲܬ̣ܦܗܘܿܢ ܢܸܥܒܲܪ.

²⁶ܗܵܕܲܐ ܗ̄ܝܼ ܬܲܪܥܝܼܬ̣ܵܐ ܕܐܸܬ̣ܪܲܥܝܼܬ̣ ܥܲܠ ܐܲܪܥܵܐ ܟܠܵܗ̇. ܘܗܵܕܲܐ ܗ̄ܝܼ ܐܝܼܕ݂ܵܐ ܕܐܸܬ̇ܬ̇ܪܝܼܡܲܬ̤ ܥܲܠ ܟܠܗܘܿܢ ܥܲܡܡܹ̈ܐ.

²⁷ܡܵܪܝܵܐ ܚܲܝܠܬ̣ܵܢܵܐ ܐܸܬ̣ܪܲܥܝܼ: ܡܲܢ̣ܘܼ ܢܒܲܛܸܠ ܘܠܐܝܼܕܹܗ ܪܵܡܬ̣ܵܐ ܡܲܢ̣ܘܼ ܢܲܗܦܸܟ݂.

²⁸ܡܲܫܩ̄ܠܵܐ ܕܲܦܠܸܫܬ̇: ܒܫܲܢ̄ܬܵܐ ܕܡܝܼܬ̣ ܐܵܚܵܙ ܡܲܠܟܵܐ ܗܘ̤ܵܐ ܡܲܫܩ̄ܠܵܐ ܗܵܢܵܐ.

²⁹ܠܵܐ ܬܸܚܕܹ̇ܝܢ ܟܠܹܟ݂ܝ ܦܠܸܫܬ̇: ܡܸܛܠ ܕܐܸܬ̇ܬ̇ܒܲܪ ܫܲܒ̣ܛܵܐ ܕܲܡܫܲܥܒ̇ܕ݂ܵܢܹܟ݂ܝ. ܡܸܛܠ ܕܡ̣ܢ ܥܸܩܵܪܹܗ ܕܚܸܘܝܵܐ ܢܵܦܹ̇ܩ ܓܵܪܣܵܐ: ܘܦܹܐܪ̈ܵܘܗܝ ܚܲܪܡܵܢܵܐ ܕܦܵܪܲܚ.

³⁰ܘܢܸܪܥܘܿܢ ܒܘܼܟ݂ܪ̈ܲܝ ܡܸܣܟܹ̇ܢܹ̈ܐ. ܘܒ̣ܵܝܫܹ̈ܐ ܒܫܸܠܝܵܐ ܢܸܪܒ̇ܥܘܿܢ ܘܐܲܡܝܼܬ̣ ܥܸܩܵܪܹܟ݂ܝ ܒܟܲܦܢܵܐ. ܘܲܕ݂ܡܸܫܬ̇ܚܲܪ ܡܸܢܹܟ݂ܝ ܢܸܬ̣ܩܛܸܠ.

³¹ܐܲܝܠܸܠܝ ܩܪܝܼܬ̣ܵܐ: ܒܲܓܸ̇ܢܝ ܩܪܝܼܬ̣ܵܐ ܐܸܬ̇ܕܲܠܚܲܬ̤ ܦܠܸܫܬ̇ ܟܠܵܗ̇. ܡܸܛܠ ܕܡ̣ܢ ܓܲܪܒ̇ܝܵܐ ܐܵܬܹ̇ܐ ܬܸܢܵܢܵܐ: ܘܠܲܝܬ̇ ܕܝܼܚܝܼܕ݂ܵܝ ܒܥܲܕ݂ܥܹܕ݂ܵܘ̈ܗܝ.

³²ܘܡܵܢܵܐ ܢܸܥܢܹܐ ܠܡܲܠܲܐܟ݂ܵܐ ܕܥܲܡܡܹ̈ܐ: ܕܡܵܪܝܵܐ ܡܲܬ̣ܩܸܢ ܫܲܬ̣ܐ̱ܣܹ̈ܝܗ̇ ܕܨܸܗܝܘܿܢ ܘܒ̣ܵܗ̇ ܢܸܣܬܲܬ̇ܪܘܿܢ ܒܵܝܫܹ̈ܐ ܕܥܲܡܹܗ.