Read Aramaic Peshita Isaiah 15 Bible Online

Isaiah 15 - Aramaic Peshita bible

Isaiah 15

¹ܡܲܫܩ̄ܠܵܐ ܕܡܘܼܐܵܒ̣ ܒܠܸܠܝܵܐ ܐܸܬ̣ܒܲܙܙܲܬ̤ ܩܪܝܼܬ̣ܵܐ ܕܡܘܼܐܵܒ̣ ܘܲܬ̣ܡܲܗ̣ܘ ܒܠܸܠܝܵܐ ܐܸܬ̣ܒ̇ܙܸܙܘ ܫܘܼܪܹ̈ܝܗ̇ ܕܡܘܼܐܵܒ̣: ܘܲܬ̣ܘܲܪܘ.

²ܣܠܸܩ̣ܘ ܠܒܲܝܬܵܐ ܕܪܝܼܒ̣ܘܿܢ: ܥܲܠ ܥܠܵـ̈ـܘܵܬ̣ܵܐ ܠܡܸܒ̣ܟܵܐ: ܥܲܠ ܢܒ̣ܘܿ ܘܥܲܠ ܡܹܐܕ݂ܒ̣ܵܐ. ܡܘܼܐܵܒ̣ ܡܲܝܠܸܠ: ܘܲܒ̣ܟ݂ܠ ܪܹ̈ܫܵܘܗܝ ܩܘܼܕܹ̈ܚܵܬ̣ܵܐ: ܘܟ݂ܠ ܕܩܲܢ ܓܙܝܼܙ.

³ܒܫܘܼܩܵܘ̈ܗܝ ܐܸܬ̣ܟ̇ܢܸܫܘ ܣܲܩܹ̈ܐ. ܘܥܲܠ ܐܸܓܵܪܹ̈ܐ ܘܲܒ̣ܫܘܼܩܹ̈ܐ: ܟܠ ܐ̄ܢܵܫ ܡܲܝܠܸܠ: ܘܢܵܚܹ̇ـܬ̣ ܒܲܒ̣ܟ݂ܵܬ̣ܵܐ.

⁴ܬܲܝܠܸܠ ܚܸܫܒ̇ܘܿܢ ܘܐܲܠܥܵܠܵܐ: ܘܲܥܕܲܡܵܐ ܠܝܵܨܘܿܬ̣ ܢܸܫܬ̇ܡܲܥ ܩܵܠܗܹܝܢ ܡܸܛܠ ܗܵܢܵܐ ܡܲܚ̄ܣܢܵܘ̈ܗܝ ܕܡܘܼܐܵܒ̣ ܢܸܩܥܘܿܢ: ܘܢܲܦ̮ܫܹܗ ܬܸܩܥܹܐ ܠܹܗ.

⁵ܘܠܹܒ̇ܝ ܥܲܠ ܡܘܼܐܵܒ̣: ܢܸܝܠܸܠ ܒܪܘܼܚܹܗ ܥܕܲܡܵܐ ܠܨܵܥܵܪ ܥܓܸܠܬܵܐ ܬܘܼܠܬܵܐ. ܡܸܛܠ ܕܲܒ̣ܡܲܣܲܩܬܵܐ ܕܠܘܼܚܝܲܬ̣ ܟܲܕ݂ ܒܵܟܹ̇ܝܢ: ܢܸܣܩܘܿܢ ܒܵܗ̇. ܘܒ̣ܐܘܼܪܚܵܐ ܕܚܘܿܪܢܝܡ ܓܥܵܬ̣ܵܐ ܕܲܬ̣ܒ̣ܵܪܵܐ ܢܸܥܒ̇ܕ݂ܘܼܢ.

⁶ܡܸܛܠ ܕܡܲـ̈ـܝܵܐ ܕܢܲܡܪܝܼܡ ܢܓ̣ܘܼܙܘܼܢ. ܡܸܛܠ ܕܝܼܒܸܫ̣ ܥܡܝܼܪܵܐ: ܘܲܚ̣ܡܵܐ ܬܸܕ݂ܐܵܐ: ܘܝܘܼܪܵܩܵܐ ܠܵܐ ܗܘ̤ܵܐ.

⁷ܡܸܛܠ ܗܵܢܵܐ ܡܸܕܸ̇ܡ ܕܐܸܫܬ̇ܚܲܪ ܥ̣ܒܲܪ. ܘܣܘܼܥܪܵܢܗܘܿܢ ܥܲܠ ܢܲܚܠܵܐ ܕܥܲܪ̈ܒ̣ܝܼܢ ܢܸܫܩ̄ܠܘܼܢ.

⁸ܡܸܛܠ ܕܚܸܕ݂ܪܲܬ̤ ܝܑܼܠܲܠܬܵܐ ܠܲܬ̣ܚܘܼܡܵܐ ܕܡܘܼܐܵܒ̣: ܘܲܥܕܲܡܵܐ ܠܓܸܠܥܵܡ ܝܑܼܠܲܠܬܹ̇ܗ: ܘܲܠܒܹܪܵܐ ܕܐܵܠܝܼܡ ܝܑܼܠܲܠܬܹ̇ܗ.

⁹ܡܸܛܠ ܕܡܲـ̈ـܝܵܐ ܕܪܝܼܒ̣ܘܿܢ ܐܸܬ̣ܡ̱ܠܝܼܘ ܕܡܵܐ: ܡܸܛܠ ܕܐܹܣܝܼܡ ܥܲܠ ܪܝܼܒ̣ܘܿܢ ܬܵܘܣܲܦܬܵܐ. ܘܐܸܪܢܹܐ ܥܲܠ ܐܲܝܠܹܝܢ ܕܡܸܬ̣ܦܲܨܹܝܢ ܡ̣ܢ ܡܘܼܐܵܒ̣.