Read Aramaic Peshita Isaiah 16 Bible Online

Isaiah 16 - Aramaic Peshita bible

Isaiah 16

¹ܘܥܲܠ ܫܲܪܟܵܐ ܕܐܲܪܥܵܐ: ܐܹܫܲܕܲܪ ܠܒܲܪ ܫܲܠܝܼܛܵܐ ܕܐܲܪܥܵܐ: ܡ̣ܢ ܟܹܐܦܵܐ ܕܡܲܕ݂ܒ̇ܪܵܐ ܠܛܘܼܪܵܐ ܕܒܲܪܬ̣ ܨܸܗܝܘܿܢ.

²ܘܢܸܗܘܹܐ ܐܲܝܟ݂ ܦܵܪܲܚܬ̣ܵܐ ܕܲܡܫܲܢܝܵܐ ܩܸܢܵܗ̇. ܘܲܒ̣̈ܢܵܬ̣ ܡܘܼܐܵܒ̣: ܫܒ̣ܝܼ̈ܩܵܬ̣ܵܐ ܢܸܗ̱ܘ̈ܝܵܢ ܒܡܲܥܒܲܪܬܵܐ ܕܐܲܪܢܘܿܢ.

³ܐܲܝܬܵܝ ܬܲܪܥܝܼܬ̣ܵܐ: ܘܲܥܒܸܕ݂ܝ ܬܵܘܓܵܢܵܐ. ܣܝܼܡܝ ܐܲܝܟ݂ ܠܸܠܝܵܐ ܛܸܠܵܠܹܟ݂ܝ ܡܸܨܥܲܬ̣ ܛܲܗܪܵܐ. ܛܲܫܵܝ ܠܲܕ̇ܛܵܥܹ̇ܝܢ ܘܲܠܕܲܡܒܲܕ̇ܪܝܼܢ ܠܵܐ ܬܸܓ̣ܠܹܝܢ.

⁴ܢܸܥܡ̄ܪܘܿܢ ܒܹܟ݂ܝ ܡܒܲܕ̇ܪܹ̈ܐ ܕܡܘܼܐܵܒ̣ ܗܘ̤ܵܝ ܠܗܘܿܢ ܣܸܬܵܪܵܐ ܡ̣ܢ ܩܕ݂ܵܡ ܒܵܙܘܿܙܵܐ. ܡܸܛܠ ܕܲܓ̣ܡܲܪ ܕܲܚܝܼܚܵܐ: ܘܣܵܦ̣ ܒܵܙ̇ܘܿܙܵܐ: ܘܲܓ̣ܡܲܪ ܕܵܝܘܿܫܵܐ ܡ̣ܢ ܐܲܪܥܵܐ.

⁵ܘܢܸܬ̣ܩܲܢ ܟܘܼܪܣܝܵܐ ܒܛܲܝܒ̇ܘܼܬ̣ܵܐ. ܘܢܸܬܸ̇ܒ̣ ܥܠܵܘܗܝ ܒܩܘܼܫܬܵܐ ܒܡܲܫܟ̇ܢܹܗ ܕܕ݂ܵܘܝܼܕ݂: ܕܲܝܵܢܵܐ ܘܲܡܥܲܩܸܒ̣ ܕܝܼܢܵܐ: ܘܲܡܣܲܪܗܸܒ̣ ܙܲܕ̇ܝܼܩܘܼܬ̣ܵܐ.

⁶ܫ̣ܡܲܥ̄ܢ ܓܲܐܝܘܼܬܹܗ ܕܡܘܼܐܵܒ̣: ܕܛܵܒ̣ ܐܸܬ̣ܓܲܐܝܼ ܓܲܐܝܘܼܬܹܗ ܘܪܵܡܘܼܬܹܗ ܘܐܸܠܡܹܗ. ܠܵܐ ܗ̄ܘܼܵܐ ܗܵܟܲܢܵܐ ܒܲܕܸ̇ܩ̣ܘ ܥܠܵܘܗܝ ܩܵܨܘܿܡܵܘ̈ܗܝ.

⁷ܡܸܛܠ ܗܵܢܵܐ ܢܲܝܠܸܠ ܡܘܼܐܵܒ̣ ܘܥܲܠ ܡܘܼܐܵܒ̣ ܟܠܹܗ ܢܲܝܠܸܠ: ܥܲܠ ܐܵܫ̈ܝܵܬ̣ܵܐ ܕܫܘܼܪܹ̈ܐ ܕܡܸܬ̣ܗܲܓ̣̈ܡܵܢ. ܬܢܲܗܡܘܼܢ ܐܲܝܟ݂ ܟܪ̈ܝܼܗܹܐ.

⁸ܡܸܛܠ ܕܚܲܩ̈ܠܵܬ̣ܵܐ ܕܚܸܫܒ̇ܘܿܢ ܚܪܸܒ̣ ܓܦܸܬܵܐ ܕܣܲܒ̣ܡܵܐ: ܓܲܢ̄ܒܵܪܹ̈ܐ ܕܥܲܡܡܹ̈ܐ ܓܲܡ̣ܘ ܫܲܒ̇ܘܼܩܹ̈ܝܗ̇: ܘܲܥܕܲܡܵܐ ܠܝܲܥܙܝܼܪ ܡ̣ܛܵܘ ܘܲܛܥܵܘ ܒܡܲܕ݂ܒ̇ܪܵܐ ܥܢܵܩܹ̈ܝܗ̇ ܢܓܲܕ݂ܘ ܘܲܥ̣ܒܲܪܘ ܝܲܡܵܐ.

⁹ܡܸܛܠ ܗܵܢܵܐ ܐܹܒܲܟܹ̇ܝܟ݂ܝ ܒܲܒ̣ܟ݂ܵܬ̣ܵܐ ܕܝܲܥܙܝܼܪ ܓܦܸܬܵܐ ܕܣܲܒ̣ܡܵܐ. ܐܲܪܘܹܝܟ݂ܝ ܡ̣ܢ ܕܸܡܥ̱ܬܹܟ݂ܝ ܚܸܫܒ̇ܘܿܢ: ܘܐܲܠܥܵܠܵܐ: ܡܸܛܠ ܕܥܲܠ ܚܨܵܕܹܟ݂ܝ ܘܥܲܠ ܩܛܵܦܹܟ݂ܝ ܕܵܝܘܿܫܵܐ ܢ̣ܦܲܠ.

¹⁰ܘܬܸܥܒܲܪ ܚܲܕ݂ܘܼܬ̣ܵܐ ܘܲܕ݂ܝܵܨܵܐ ܡ̣ܢ ܟܲܪܡ̄ܠܵܐ. ܘܲܒ̣ܟܪܡ̄ܠܵܐ ܠܵܐ ܢܸܚܕ̇ܘܿܢ. ܘܠܵܐ ܢܸܥܨܪܘܼܢ ܚܲܡܪܵܐ ܒܡܲܥܨܲܪܬܵܐ. ܘܠܵܐ ܢܕ݂ܘܼܫ ܕܵܝܘܿܫܵܐ: ܡܸܛܠ ܕܲܠܕ݂ܵܝܘܿܫܵܐ ܐܹܒܲܛܸܠ.

¹¹ܡܸܛܠ ܗܵܢܵܐ ܟܲܪܣܝ ܥܲܠ ܡܘܼܐܵܒ̣: ܐܲܝܟ݂ ܟܸܢܵܪܵܐ ܬܡܲܠܸܠ. ܘܓ̣ܵܘܝ ܥܲܠ ܫܘܼܪܵܐ ܕܡܸܬ̣ܗ̱ܓܸܡ.

¹²ܘܡܵܐ ܕܲܚܙ̣ܵܐ ܕܲܠܐܝܼ ܡܘܼܐܵܒ̣ ܥܲܠ ܥܠܵـ̈ـܘܵܬ̣ܵܐ: ܢܹܐܬܹܐ ܠܡܲܩ̄ܕ̇ܫܵܐ ܠܲܡܨܲܠܵܝܘܼ: ܘܠܵܐ ܢܸܫܟܲܚ.

¹³ܗܵܢܵܐ ܦܸܬ̣ܓ̣ܵܡܵܐ ܡܲܠܸܠ̣ ܡܵܪܝܵܐ ܥܵܠ ܡܘܼܐܵܒ̣ ܡ̣ܢ ܗܵܝܕܹ̇ܝܢ.

¹⁴ܘܗܵܫܵܐ ܡܲܠܸܠ̣ ܡܵܪܝܵܐ ܘܐܸܡܲܪ: ܒܲܬ̣ܠܵܬ̣ ܫܢ̈ܝܼܢ ܐܲܝܟ݂ ܫܢܲـ̈ـܝܵܐ ܕܐܲܓ̣ܝܼܪܵܐ: ܢܸܨܛܲܥܲܪ ܐܝܼܩܵܪܹܗ ܕܡܘܼܐܵܒ̣: ܥܲܠ ܣܘܿܓ̣ܵܐܐ ܕܥܲܡܹܗ. ܘܢܸܫܬܲܚܲܪ ܩܲܠܝܼܠ ܙܥܘܿܪ: ܘܠܵܐ ܣܲܓ̇ܝܼ.