Read Aramaic Peshita Isaiah 17 Bible Online

Isaiah 17 - Aramaic Peshita bible

Isaiah 17

¹ܡܲܫܩ̄ܠܵܐ ܕܕܲܪܡܣܘܿܩ ܗܵܐ ܕܲܪܡܣܘܿܩ ܡܲܥܒ̇ܪܵܐ ܡ̣ܢ ܩܪܝܼܬ̣ܵܐ ܘܬܸܗܘܹܐ ܠܚܘܼܪܒܵܐ ܘܲܠܡܲܦܘܼܠܬܵܐ.

²ܘܢܸܗ̱ܘ̈ܝܵܢ ܫܒ̣ܝܼ̈ܩܵܬ̣ܵܐ ܩܘܼܪܝܵܐ ܕܥܲܕ݂ܘܵܥܝܼܪ ܘܢܸܗ̱ܘ̈ܝܵܢ ܠܲܓ̣ܙܵܪܹ̈ܐ ܕܢܸܪܒ̇ܥܘܼܢ ܒܗܹܝܢ. ܘܠܵܐ ܢܸܗܘܹܐ ܠܗܘܿܢ ܡܲܗܪܵܢܵܐ.

³ܘܢܸܬ̣ܒܲܛܲܠ ܥܘܼܫܢܵܐ ܡ̣ܢ ܐܲܦܪܹܝܡ: ܘܡܲܠܟ̇ܘܼܬ̣ܵܐ ܡ̣ܢ ܕܲܪܡܣܘܿܩ ܘܫܲܪܟܵܐ ܕܐܲܦܪܹܝܡ ܐܲܝܟ݂ ܐܝܼܩܵܪܵܐ ܕܲܒ̣ܢܲܝ̈ ܝܼܣܪܵܝܹܠ ܢܸܗܘܘܿܢ: ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

⁴ܢܸܗܘܹܐ ܒܝܵܘܡܵܐ ܗܵܘܿ: ܢܸܬ̣ܡܲܣܟܲܢ ܐܝܼܩܵܪܹܗ ܕܝܲܥܩܘܿܒ̣ ܘܫܘܼܡܢܵܐ ܕܒܸܣܪܹܗ ܢܸܬ̣ܪ̱ܙܹܐ.

⁵ܘܢܸܗܘܹܐ ܐܲܝܟ݂ ܗܵܘܿ ܕܟ݂ܵܢܹ̇ܫ ܚܨܵܕܵܐ ܕܩܵܝܑܹܡܬ̣ܵܐ: ܘܲܕ݂ܪܵܥܹܗ ܫܸܒ̇ܠܹ̈ܐ ܚܵܨܹ̇ܕ݂. ܘܢܸܗܘܹܐ ܐܲܝܟ݂ ܗܵܘܿ ܕܲܡܠܲܩܸܛ ܫܸܒ̇ܠܹ̈ܐ ܒܥܘܼܡܩܵܐ ܕܲܪܦܵܐܝܼܡ.

⁶ܘܢܸܫܬ̇ܚܲܪ ܒܹܗ ܒܘܼܥܵܪܵܐ ܐܲܝܟ݂ ܙܲܝܬܵܐ ܕܲܚܒ̣ܝܼܛ: ܘܲܬ̣ܪܹܝܢ ܬܠܵܬ̣ܵܐ ܙܲܝ̈ܬ̇ܝܼܢ ܒܪܹܫ ܟܲܢܵܐ ܒܣܵܘܟܵܘ̈ܗܝ: ܘܐܲܪܒ̇ܥܵܐ ܘܚܲܡܫܵܐ: ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

⁷ܒܹܗ ܒܝܵܘܡܵܐ ܗܵܘܿ: ܢܸܬ̇ܬ̇ܟܸܠ ܐ̄ܢܵܫ ܥܲܠ ܥܵܒ̣ܘܿܕܹܗ. ܘܥܲܝܢܵܘ̈ܗܝ ܢܚܘܼܪ̈ܵܢ ܠܩܲܕ̇ܝܼܫܵܐ ܕܝܼܣܪܵܝܹܠ.

⁸ܘܠܵܐ ܢܸܬ̇ܬ̇ܟܸܠ ܥܲܠ ܡܲܕ݂ܒ̇ܚܹ̈ܐ ܕܲܥܒܲܕ݂ ܐܝܼܕ݂ܵܘ̈ܗܝ ܘܲܥ̣ܒܲܪ ܨܸܒ̣̈ܥܵܬܹܗ. ܘܠܵܐ ܢܚܘܿܪ ܒܦܬܲܟ݂ܪܹ̈ܐ ܘܲܒ̣ܪܸܚ̈ܠܵܬ̣ܵܐ.

⁹ܒܝܵܘܡܵܐ ܗܵܘܿ: ܢܸܗ̱ܘ̈ܝܵܢ ܩܘܼܪ̈ܝܵܐ ܕܥܘܼܫܢܹܗ ܐܲܝܟ݂ ܓܘܼܒܵܐ ܕܲܚܪܸܫ: ܘܕܲܐܡܝܼܪ ܕܐܸܫܬ̇ܒܸܩ ܡ̣ܢ ܩܕ݂ܵܡ ܒܢܲܝ̈ ܝܼܣܪܵܝܹܠ ܘܲܗ̤ܘܲܝܬ̇ܝ ܠܲܚܒ̣ܵܠܵܐ.

¹⁰ܕܲܛܥܲܝܬ̇ܝ ܠܐܲܠܵܗܵܐ ܦܵܪܘܿܩܹܟ݂ܝ ܘܲܠܬܲܩܝܼܦܵܐ ܡܥܲܫܢܵܢܹܟ݂ܝ ܠܵܐ ܐܸܬ̇ܕܲܟ݂ܪܬ̇ܝ ܡܸܛܠ ܗܵܢܵܐ ܬܸܨܒ̣ܝܼܢ ܢܸܨܒ̇ܬ̣ܵܐ ܝܵܐܝܼܬ̣ܵܐ. ܒܫܲܒ̇ܘܼܩܹ̈ܐ ܢܘܼܟ݂ܪ̈ܵܝܹܐ ܬܸܙ̱ܪܥܝܼܢܵܗ̇.

¹¹ܒܝܵܘܡܵܐ ܕܬܸܨܒ̣ܝܼܢܵܗ̇: ܢܸܦܘܿܩ ܣܡܵܕ݂ܪܵܐ. ܘܲܒ̣ܨܲܦܪܵܐ ܙܲܪܥܹܟ݂ܝ ܬܲܦ̱ܪܥܝܼܢ: ܐܲܝܟ݂ ܢܝܼܪܵܐ ܕܲܩܛܵܦܵܐ ܒܝܵܘܡܵܐ ܟܲܪܝܵܐ: ܘܐܲܝܟ݂ ܟܹܐܒ̣ܵܐ ܕܐ̄ܢܵܫܵܐ.

¹²ܘܵܝ ܠܚܲܝܠܵܐ ܕܥܲܡܡܹ̈ܐ ܣܲܓ̇ܝܹ̈ܐܐ: ܕܐܵܙܹ̇ܠ ܩܵܠܗܘܿܢ ܐܲܝܟ݂ ܩܵܠܵܐ ܕܝܲܡܡܹ̈ܐ: ܘܲܪܓܘܼܫܝܵܐ ܕܐܹܡ̈ܘܵܬ̣ܵܐ.

¹³ܐܲܝܟ݂ ܩܵܠܵܐ ܕܡܲـ̈ـܝܵܐ ܣܲܓ̇ܝܹ̈ܐܐ: ܢܸܓ̣ܥܘܿܪ ܒܹܗ: ܘܢܸܥܪܘܿܩ ܠܪܘܼܚܩܵܐ. ܘܢܸܪܗܲܛ ܐܲܝܟ݂ ܕܲܚܝܼܚܵܐ ܕܛܘܼܪܹ̈ܐ ܩܕ݂ܵܡ ܪܘܼܚܵܐ: ܘܐܲܝܟ݂ ܓܸܠܵܐ ܩܕ݂ܵܡ ܥܲܠܥܵܠܵܐ.

¹⁴ܒܙܲܒ̣ܢܵܐ ܕܪܲܡܫܵܐ ܘܗܵܐ ܚܘܼܛܵܦܵܐ ܥܲܕ݂ܠܵܐ ܗܘ̤ܵܐ ܨܲܦܪܵܐ: ܘܠܵܐ ܢܸܫܬܲܚܲܪ. ܗܵܕܲܐ ܗ̄ܝܼ ܦܵܠܓ̇ܘܼܬ̣ܵܐ ܕܕ݂ܵܝܘܿܫܲܢ: ܘܲܡܢܵܬ̣ܵܐ ܕܒ̣ܵܙܘܿܙܲܢ.