Read Aramaic Peshita Isaiah 19 Bible Online

Isaiah 19 - Aramaic Peshita bible

Isaiah 19

¹ܡܲܫܩ̄ܠܵܐ ܕܡܸܨܪܹܝܢ. ܗܵܐ ܡܵܪܝܵܐ ܪܟ݂ܝܼܒ̣ ܥܲܠ ܥܢܵܢܹ̈ܐ ܩܲܠܝܼ̈ܠܵܬ̣ܵܐ: ܘܥܵܐܹ̇ܠ ܠܡܸܨܪܹܝܢ. ܘܲܢܙܘܼܥܘܼܢ ܦܬܲܟ݂ܪܹ̈ܐ ܕܡܸܨܪܹܝܢ ܡ̣ܢ ܩܕ݂ܵܡܵܘܗܝ. ܘܠܸܒܹ̇ܗ ܕܡܸܨܪܵܝܵܐ ܢܸܬ̣ܡ̱ܣܸܐ ܒܓ̣ܵܘܹܗ.

²ܘܐܲܓܲܪܸܐ ܡܸܨܪܵܝܵܐ ܒܡܸܨܪܵܝܵܐ. ܘܢܸܬ̣ܟܲܬܲܫ ܓܲܒ̣ܪܵܐ ܥܲܡ ܐܲܚܘܼܗܝ: ܘܓܲܒ̣ܪܵܐ ܥܲܡ ܚܲܒ̣ܪܹܗ: ܡܕ݂ܝܼܢ̄ܬܵܐ ܥܲܡ ܡܕ݂ܝܼܢ̄ܬܵܐ: ܘܡܲܠܟ̇ܘܼܬ̣ܵܐ ܥܲܡ ܡܲܠܟ̇ܘܼܬ̣ܵܐ.

³ܘܬܸܬ̣ܦܣܸܩ ܪܘܼܚܹܗ ܕܡܸܨܪܵܝܵܐ ܒܓܵܘܹܗ: ܘܬܲܪܥܝܼܬܹܗ ܐܸܛܲܒܲܥ. ܘܢܸܫ̱ܐܠܘܼܢ ܡ̣ܢ ܦܬܲܟ݂ܪܹ̈ܐ ܘܡ̣ܢ ܡܓ̣ܘܼܫܹ̈ܐ: ܘܡ̣ܢ ܙܲܟ̇ܘܼܪܹ̈ܐ ܘܡ̣ܢ ܝܲܕ̇ܘܼ̈ܥܹܐ.

⁴ܘܐܲܫܠܸܡ ܠܡܸܨܪ̈ܵܝܹܐ ܒܐܝܼܕ݂ܵܐ ܕܡܵܪ̈ܲܝܵܐ ܩܫܲܝܵـ̈ـܐ. ܘܡܲܠܟܵܐ ܥܲܫܝܼܢܵܐ ܢܸܫܬܲܠܲܛ ܒܗܘܿܢ: ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

⁵ܘܲܢܓܘܼܙܘܼܢ ܡܲـ̈ـܝܵܐ ܡ̣ܢ ܝܲܡܵܐ. ܘܢܲܗܪܵܐ ܢܸܚܪܲܒ̣ ܘܢܹܐܒܲܫ.

⁶ܘܲܢܓܘܼܙܘܼܢ ܢܲܗܪ̈ܵܘܵܬ̣ܵܐ: ܘܢܸܬ̣ܡܲܣܟ̇ܢܘܼܢ. ܘܢܸܚܪ̱ܒ̣ܘܼܢ ܢܲܗܪ̈ܵܘܵܬ̣ܵܐ ܥܲܫܝܼܢܹ̈ܐ. ܩܲܢܝܵܐ ܘܐܲܪܒܵܢܵܐ ܘܦܵܦܹܪܘܿܢ ܢܹܐܒ̣ܫܘܼܢ.

⁷ܘܠܘܿܥܵܐ ܕܥܲܠ ܢܲܗܪܵܐ: ܘܥܲܠ ܦܘܼܡܹܗ ܕܢܲܗܪܵܐ: ܘܟ݂ܠ ܕܡܸܙܕܲܪܲܥ ܥܲܠ ܓܲܒܹ̇ܗ ܕܢܲܗܪܵܐ ܢܹܐܒܲܫ. ܘܢܸܫܬ̇ܩܸܦ ܘܠܵܐ ܢܸܫܬ̇ܟܲܚ.

⁸ܘܢܹܐܠܘܿܢ ܨܲܝܵܕܹ̈ܐ. ܘܢܸܬ̇ܒ̣ܘܼܢ ܒܐܸܒ̣ܠܵܐ ܕܪܵܡܹ̇ܝܢ ܨܸܢܵܪ̈ܝܵܬ̣ܵܐ ܒܢܲܗܪܵܐ. ܘܲܕ݂ܦܲܪܣܝܼܢ ܡܨܝܼ̈ܕ݂ܵܬ̣ܵܐ ܥܲܠ ܐܲܦܲܝ̈ ܡܲـ̈ـܝܵܐ ܐܸܬ̣ܟ̇ܪܲܗܘ.

⁹ܘܢܸܒ̣ܗ̱ܬ̣ܘܼܢ ܥܵܒ̣̈ܕܲܝ ܟܸܬܵܢܵܐ: ܕܣܵܪܩܝܼܢ ܘܙܵܩܪܝܼܢ ܠܚܲܕ݂ܘܼܬ̣ܵܐ.

¹⁰ܘܢܸܬ̣ܡܲܟ̇ܟ݂ܘܼܢ ܟܠ ܕܥܵܒ̣ܕ̇ܝܼܢ ܫܲܟ݂ܪܵܐ: ܠܡܲܫܬ̇ܝܵܐ ܕܢܲܦ̮ܫܵܐ.

¹¹ܫܛܵܘ ܪܵܘ̱ܪ̈ܒ̣ܵܢܹܐ ܕܨܵܥܵܢ: ܘܚܲܟ̇ܝܼܡܹ̈ܐ ܕܡܵܠܟ̇ܝܼܢ ܠܦܸܪܥܘܼܢ ܡܲܠܟܵܐ ܡܸܠ̈ܟܹ̇ܐ ܫܵܛܲـ̈ـܝܵܐ. ܐܲܝܟܲܢܵܐ ܬܹܐܡܪܘܼܢ ܠܦܸܪܥܘܿܢ ܕܚܲܟ̇ܝܼܡܹ̈ܐ ܚܢܲܢ: ܘܲܒ̣ܢܲܝ̈ ܡܲܠ̈ܟܹ̇ܐ ܩܲܕ݂ܡܵܝܹ̈ܐ.

¹²ܐܲܝܟܵܐ ܐܸܢܘܿܢ ܚܲܟ̇ܝܼܡܲܝ̈ܟ: ܢܚܵܘܘܿܢܵܟ݂: ܘܢܸܕ̇ܥܘܼܢ ܡܵܢܵܐ ܐܸܬ̣ܪܲܥܝܼ ܡܵܪܝܵܐ ܚܲܝܠܬ̣ܵܢܵܐ ܥܲܠ ܡܸܨܪܹܝܢ.

¹³ܫܛ̣ܵܘ ܪܵܘ̱ܪ̈ܒ̣ܵܢܹܐ ܕܨܵܥܵܢ. ܐܸܬ̇ܬ̇ܪܝܼܡܘ ܪܵܘ̱ܪ̈ܒ̣ܵܢܹܐ ܕܡܲܦܵܣ: ܘܐܲܛܥܝܼܘ ܠܡܸܨܪܹܝܢ ܒܙܵܘ̈ܝܵܬ̣ܵܐ ܕܫܲܪ̈ܒ̣ܵܬ̣ܵܗ̇.

¹⁴ܡܵܪܝܵܐ ܡ̣ܙܲܓ̣ ܒܓ̣ܵܘܵܗ̇ ܪܘܼܚܵܐ ܛܵܥܝܼܬ̣ܵܐ: ܘܐܲܛܥ̱ܝܹܗ ܠܡܸܨܪܵܝܵܐ ܒܟ݂ܠܗܘܿܢ ܥܒ̣ܵܕ݂ܵܘ̈ܗܝ: ܐܲܝܟ݂ ܕܛܵܥܹ̇ܐ ܪܵܘܝܵܐ ܒܲܬ̣ܝܵܒ̣ܬܹ̇ܗ.

¹⁵ܘܠܵܐ ܢܸܗܘܹܐ ܠܡܸܨܪܵܝܵܐ ܓܲܒ̣ܪܵܐ ܕܢܸܥܒܸ̇ܕ݂ ܪܹܫܵܐ ܘܕ݂ܘܼܢܒ̇ܬ̣ܵܐ: ܘܕ݂ܘܼܢܒܬ̣ܵܐ ܘܪܹܫܵܐ.

¹⁶ܒܝܵܘܡܵܐ ܗܵܘܿ: ܢܸܗܘܹܐ ܡܸܨܪܵܝܵܐ ܐܲܝܟ݂ ܢܸܫܹ̈ܐ. ܘܢܸܕ݂ܚܲܠ ܘܲܢܙܘܼܥ ܡ̣ܢ ܩܕ݂ܵܡ ܪܵܘܡܵܐ ܕܐܝܼܕܹܗ ܕܡܵܪܝܵܐ ܚܲܝܠܬ̣ܵܢܵܐ ܕܲܡܪܝܼܡ ܥܠܵܘܗܝ.

¹⁷ܘܬܸܗܘܹܐ ܐܲܪܥܵܐ ܕܲܝܗܘܼܕ݂ܵܐ ܠܡܸܨܪܵܝܵܐ ܠܣܘܼܪܵܕ݂ܵܐ. ܘܟ݂ܠ ܕܢܲܕ݂ܟ̇ܪܝܼܗ̇ ܠܹܗ: ܢܸܬ̣ܪ̱ܗܸܒ̣: ܡ̣ܢ ܩܕ݂ܵܡ ܬܲܪܥܝܼܬܹܗ ܕܡܵܪܝܵܐ ܚܲܝܠܬ̣ܵܢܵܐ ܕܐܸܬ̣ܪܲܥܝܼ ܥܠܵܘܗܝ.

¹⁸ܒܝܵܘܡܵܐ ܗܵܘܿ: ܢܸܗ̱ܘ̈ܝܵܢ ܚܲܡܸܫ ܩܘܼܪ̈ܝܵܐ ܒܐܲܪܥܵܐ ܕܡܸܨܪܹܝܢ: ܕܲܡܡܲܠ̈ܠܵܢ ܒܠܸܫܵܢܵܐ ܟܢܲܥܢܵܝܵܐ. ܘܝܵܡ̈ܝܵܢ ܒܡܵܪܝܵܐ ܚܲܝܠܬ̣ܵܢܵܐ. ܘܲܚܕ݂ܵܐ ܡܸܢܗܹܝܢ ܗܲܪܸܣ ܬܸܬ̣ܩ̄ܪܸܐ.

¹⁹ܒܝܵܘܡܵܐ ܗܵܘܿ: ܢܸܗܘܹܐ ܡܲܕ݂ܒ̇ܚܵܐ ܠܡܵܪܝܵܐ ܚܲܝܠܬ̣ܵܢܵܐ ܒܓ̣ܵܘܵܗ̇ ܕܐܲܪܥܵܐ ܕܡܸܨܪܹܝܢ: ܘܩܵܝܑܹܡܬ̣ܵܐ ܠܡܵܪܝܵܐ ܥܲܠ ܓܸܢ̄ܒ̣ ܬܚܘܼܡܹ̈ܝܗ̇.

²⁰ܘܬܸܗܘܹܐ ܠܐܵܬ̤ܵܐ ܘܲܠܣܵܗܕ̇ܘܼܬ̣ܵܐ ܠܡܵܪܝܵܐ ܚܲܝܠܬ̣ܵܢܵܐ ܒܐܲܪܥܵܐ ܕܡܸܨܪܹܝܢ: ܡܸܛܠ ܕܢܸܓ̣ܥܘܿܢ ܩܕ݂ܵܡ ܡܵܪܝܵܐ ܡ̣ܢ ܩܕ݂ܵܡ ܐܵܠܘܿܨܵܐ. ܘܲܢܫܲܕܲܪ ܠܗܘܿܢ ܦܵܪܘܿܩܵܐ: ܘܕܲܝܵܢܵܐ: ܘܲܢܦܲܨܹܐ ܐܸܢܘܿܢ.

²¹ܘܢܸܬ̣̱ܝܼܕܲܥ ܡܵܪܝܵܐ ܠܡܸܨܪ̈ܵܝܹܐ: ܘܢܸܕ̇ܥܘܼܢܹܗ ܡܸܨܪ̈ܵܝܹܐ ܠܡܵܪܝܵܐ ܒܝܵܘܡܵܐ ܗܵܘܿ. ܘܲܢܩܲܪܒ̣ܘܼܢ ܕܸܒ̣ܚܹ̈ܐ ܘܲܣܡܝܼܕ݂ܵܐ. ܘܢܸܕ̇ܪܘܼܢ ܢܸܕ݂ܪܹ̈ܐ ܠܡܵܪܝܵܐ: ܘܲܢܫܲܠܡܘܼܢ.

²²ܘܢܸܡܚܸܐ ܡܵܪܝܵܐ ܠܡܸܨܪ̈ܵܝܹܐ ܡܚܘܿܬ̣ܵܐ: ܘܢܲܐܣܸܐ ܐܸܢܘܿܢ. ܘܢܸܬ̣ܦ̄ܢܘܿܢ ܠܘܵܬ̣ ܡܵܪܝܵܐ: ܘܢܸܥܢܸܐ ܐܸܢܘܿܢ: ܘܢܲܐܣܹܐ ܐܸܢܘܿܢ.

²³ܒܝܵܘܡܵܐ ܗܵܘܿ: ܢܸܗܘܹܐ ܫܒ̣ܝܼܥܵܐ ܡ̣ܢ ܡܸܨܪܹܝܢ ܐܵܬ̣ܘܿܪ: ܘܡ̣ܢ ܐܵܬ̣ܘܿܪ ܠܡܸܨܪܹܝܢ. ܘܢܸܥܘܿܠ ܐܵܬ̣ܘܿܪܵܝܵܐ ܠܡܸܨܪܹܝܢ: ܘܡܸܨܪܵܝܵܐ ܠܐܵܬ̣ܘܿܪ. ܘܢܸܦ̱ܠܚܘܼܢ ܡܸܨܪ̈ܵܝܹܐ ܠܐܵܬ̣ܘܿܪ̈ܵܝܹܐ.

²⁴ܒܝܵܘܡܵܐ ܗܵܘܿ ܢܸܗܘܹܐ ܝܼܣܪܵܝܹܠ ܚܲܕ݂ ܡ̣ܢ ܬܠܵܬ̣ܵܐ: ܠܡܸܨܪ̈ܵܝܹܐ ܘܠܵܐܬ̣ܘܿܪ̈ܵܝܹܐ ܒܘܼܪܟ̇ܬ̣ܵܐ ܒܓ̣ܵܘ ܐܲܪܥܵܐ.

²⁵ܕܠܹܗ ܒܲܪܸܟ݂ ܡܵܪܝܵܐ ܚܲܝܠܬ̣ܵܢܵܐ: ܘܐܸܡܲܪ ܒܪܝܼܟ݂ ܥܲܡܝ ܕܲܒ̣ܡܸܨܪܹܝܢ: ܘܲܥܒ̣ܵܕ݂ ܐܝܼ̈ܕܲܝ ܕܒ̣ܵܐܬ̣ܘܿܪ. ܘܝܘܼܪܬܵܢܝ ܝܼܣܪܵܝܹܠ.