Read Aramaic Peshita Isaiah 2 Bible Online

Isaiah 2 - Aramaic Peshita bible

Isaiah 2

¹ܦܸܬ̣ܓ̣ܵܡܵܐ ܕܲܚܙܵܐ ܐܹܫܲܥܝܵܐ ܒܲܪ ܐܵܡܘܿܨ: ܥܲܠ ܝܼܗܘܼܕ݂ܵܐ: ܘܥܲܠ ܐܘܿܪܸܫܠܸܡ.

²ܢܸܗܘܸܐ ܒܝܵܘ̈ܡܵܬ̣ܵܐ ܐ̄ܚܪ̈ܵܝܹܐ: ܛܘܼܪܒܲܝܬܹ̇ܗ ܕܡܵܪܝܵܐ. ܡܲܬ̣ܩܲܢ ܒܪܹܫ ܛܘܼܪܹ̈ܐ: ܘܪܵܡ ܡ̣ܢ ܪ̈ܵܡܵܬ̣ܵܐ. ܘܲܢܣܲܟ̇ܘܿܢ ܠܹܗ ܟܠܗܘܿܢ ܥܲܡܡܹ̈ܐ.

³ܘܢܹܐܙܠ̄ܘܿܢ ܥܲܡܡܹ̈ܐ ܣܲܓ̇ܝܹ̈ܐܐ: ܘܢܹܐܡܪܘܼܢ: ܬܵܘ ܢܸܣܲܩ ܠܛܘܼܪܹܗ ܕܡܵܪܝܵܐ: ܘܲܠܒܹܝܬ̣ ܐܲܠܵܗܹܗ ܕܝܲܥܩܘܿܒ̣. ܘܢܲܠܦܲܢ ܡ̣ܢ ܐܘܼܪ̈ܚܵܬܹܗ. ܘܲܢܗܲܠܸܟ݂ ܒܲܫܒ̣ܝܼܠܵܘ̈ܗܝ. ܡܸܛܠ ܕܡ̣ܢ ܨܸܗܝܘܿܢ ܢܵܦܹ̇ܩ ܢܵܡܘܿܣܵܐ: ܘܦܸܬ̣ܓ̣ܵܡܹܗ ܕܡܵܪܝܵܐ ܡ̣ܢ ܐܘܿܪܸܫܠܸܡ.

⁴ܘܲܢܕ݂ܘܿܢ ܒܹܝܬ̣ ܥܲܡܡܹ̈ܐ. ܘܢܲܟܸ̇ܣ ܠܥܲܡܡܹ̈ܐ ܣܲܓ̇ܝܹ̈ܐܐ ܕܲܒ̣ܪܘܼܚܩܵܐ. ܘܢܸܪܥܘܿܢ ܣܲܦ̮ܣܹܪ̈ܲܝܗܘܿܢ ܠܣܸܟܲܝ̈ ܦܲܕܵܢܹ̈ܐ: ܘܪ̈ܘܼܡܚܲܝܗܘܿܢ ܠܡܲܓ̇ܠܹ̈ܐ. ܘܠܵܐ ܢܸܫܩܘܿܠ ܥܵܡܵܐ ܥܲܠ ܥܲܡܵܐ ܣܲܝܦܵܐ. ܘܬ̣ܘܼܒ̣ ܠܵܐ ܢܹܐܠܦܘܼܢ ܩܪܵܒ̣ܵܐ.

⁵ܕܒܹܝܬ̣ ܝܲܥܩܘܿܒ̣: ܬܵܘ ܢܹܐܙܲܠ ܒܢܘܼܗܪܹܗ ܕܡܵܪܝܵܐ.

⁶ܡܸܛܠ ܕܲܫܒ̣ܩܬܵܝܗܝ ܠܥܲܡܵܟ݂ ܕܒܹܝܬ̣ ܝܲܥܩܘܿܒ̣. ܡܸܛܠ ܕܐܸܬ̣ܡ̱ܠܝܼܘ ܐܲܝܟ݂ ܕܡ̣ܢ ܩܕ݂ܝܼܡ. ܘܲܡܢܲܚܫܝܼܢ ܐܲܝܟ݂ ܦܠܸܫܬܵܝܹ̈ܐ. ܘܣܘܿܓ̣ܵܐܐ ܕܲܒ̣ܢܲـ̈ـܝܵܐ ܢܘܼܟ݂ܪ̈ܵܝܹܐ ܪܲܒ̇ܝܘܼ.

⁷ܘܐܸܬ̣ܡܲܠܝܲܬ̇ ܐܲܪ̱ܥܗܘܿܢ ܣܹܐܡܵܐ ܘܕܲܗܒ̣ܵܐ ܘܠܲܝܬ̇ ܣܵܟ݂ܵܐ ܠܓܲܙܲܝ̈ܗܘܿܢ ܘܐܸܬ̣ܡܲܠܝܲܬ̤ ܐܲܪ̱ܥܗܘܿܢ ܪ̈ܲܟ݂ܫܵܐ: ܘܠܲܝܬ̇ ܣܵܟ݂ܵܐ ܠܡܲܪ̈ܟ̇ܒ̣ܵܬ̣ܗܘܿܢ.

⁸ܘܐܸܬ̣ܡܲܠܝܲܬ̤ ܐܲܪ̱ܥܗܘܿܢ ܦܬܲܟ݂ܪܹ̈ܐ. ܠܲܥܒ̣ܵܕ݂ ܐܝܼܕܲܝ̈ܗܘܿܢ ܣܵܓ̇ܕ̇ܝܼܢ: ܠܕܲܥ̣ܒܲܕ݂ ܨܸܒ̣̈ܥܵܬ̣ܗܘܿܢ.

⁹ܘܐܸܬ̣ܡܲܟܸ̇ܟ݂ ܐ̄ܢܵܫܵܐ: ܘܐܸܫܬܲܦܲܠ ܓܲܒ̣ܪܵܐ ܘܠܵܐ ܬܸܫܒ̇ܘܿܩ ܠܗܘܿܢ.

¹⁰ܥܘܿܠܘ ܒܛܲܪ̈ܵܢܹܐ: ܘܐܸܬ̇ܛܲܡ̄ܪܘ ܒܥܲܦܪܵܐ: ܡ̣ܢ ܩܕ݂ܵܡ ܕܸܚ̱ܠܬܹܗ ܕܡܵܪܝܵܐ: ܘܡ̣ܢ ܗܸܕ݂ܪܵܐ ܕܥܘܼܫܢܹܗ.

¹¹ܥܲܝܢܹ̈ܐ ܪ̈ܵܡܵܬ̣ܵܐ ܕܐ̄ܢܵܫܵܐ ܢܡܲܟܸ̇ܟ݂. ܘܢܸܬ̣ܡܲܟܸ̇ܟ݂ ܪܵܘܡܵܐ ܕܓܲܒ̣ܪܵܐ. ܘܢܸܥܫܲܢ ܡܵܪܝܵܐ ܒܲܠܚܘܿܕ݂ܵܘܗܝ ܒܝܵܘܡܵܐ ܗܵܘܿ.

¹²ܡܸܛܠ ܕܝܵܘܡܹܗ ܕܡܵܪܝܵܐ: ܥܲܠ ܟܠ ܕܡܸܬ̣ܓܲܐܹܐ ܘܡܸܬ̇ܬ̇ܪܝܼܡ: ܘܥܲܠ ܟܠ ܕܡܸܫܬܲܩܲܠ ܕܢܸܬ̣ܡܲܟܲܟ݂.

¹³ܘܥܲܠ ܟܠܗܘܿܢ ܐܲܪ̈ܙܹܐ ܕܢܸܒ̣ܢܵܢ ܕܪܵܡܝܼܢ ܘܲܡܫܲܩܠܝܼܢ: ܘܥܲܠ ܟܠܗܘܿܢ ܒܲܠܘܼܛܹ̈ܐ ܕܒܲܝܫܵܢ.

¹⁴ܘܥܲܠ ܟܠܗܘܿܢ ܛܘܼܪܹ̈ܐ ܕܪܵܡܝܼܢ: ܘܥܲܠ ܟܠ ܪ̈ܵܡܵܬ̣ܵܐ ܕܪ̈ܵܡܵܢ.

¹⁵ܘܥܲܠ ܟܠ ܡܲܓܕ̇ܠܹ̈ܐ ܕܪܵܡܝܼܢ: ܘܥܲܠ ܟܠ ܫܘܼܪܹ̈ܐ ܕܥܲܫܝܼܢܝܼܢ.

¹⁶ܘܥܲܠ ܟܠܗܹܝܢ ܐܸܠܦܹ̈ܐ ܕܬܲܪܫܝܼܫ: ܘܥܲܠ ܟܠܗܘܿܢ ܕܵܘܩܹ̈ܐ ܕܪܸܓ̇ܬ̣ܵܐ.

¹⁷ܘܢܸܬ̣ܡܲܟܲܟ݂ ܪܵܘܡܵܐ ܕܐ̄ܢܵܫܵܐ: ܘܢܸܫܬܲܦܲܠ ܪܵܘܡܵܐ ܕܓܲܒ̣ܪܵܐ ܘܢܸܥܫܲܢ ܡܵܪܝܵܐ ܒܲܠܚܘܿܕ݂ܵܘܗܝ ܒܝܵܘܡܵܐ ܗܵܘܿ.

¹⁸ܘܲܦܬܲܟ݂ܪܹ̈ܐ ܓܡܝܼܪܵܐܝܼܬ̣ ܢܸܥܒ̇ܪܘܼܢ.

¹⁹ܘܢܸܥܠܘܿܢ ܒܲܡܥܲܪܹ̈ܐ ܕܟܹܐܦܵܐ: ܘܲܒ̣ܚܘܼܠܵܢܹ̈ܐ ܕܥܲܦܪܵܐ ܡ̣ܢ ܩܕ݂ܵܡ ܕܸܚ̱ܠܬܹܗ ܕܡܵܪܝܵܐ: ܘܡ̣ܢ ܗܸܕ݂ܪܵܐ ܕܥܘܼܫܢܹܗ: ܡܵܐ ܕܩܵܐܹ̇ܡ ܠܲܡܟܲܒܵܫܘܼ ܠܐܲܪܥܵܐ.

²⁰ܒܹܗ ܒܝܵܘܡܵܐ ܗܵܘܿ: ܢܸܫܕ̇ܘܿܢ ܐ̄ܢܵܫܵܐ ܦܬܲܟ݂ܪܹ̈ܐ ܕܕܲܗܒ̣ܵܐ ܘܲܕ݂ܣܹܐܡܵܐ: ܕܲܥ̣ܒܲܕ݂ܘ ܠܗܘܿܢ ܠܡܸܣܓܲܕ݂ ܠܲܣܪܝܼܩܘܼܬ̣ܵܐ: ܘܠܲܦܪ̈ܲܚܕ̇ܘܼܕܹܐ.

²¹ܠܡܸܥܲܠ ܒܲܡܥܲܪܹ̈ܐ ܕܛܲܪܵܢܵܐ: ܘܒܲܫܩܝܼܦܹ̈ܐ ܕܟܹܐܦܵܐ ܡ̣ܢ ܩܕ݂ܵܡ ܕܸܚ̱ܠܬܹܗ ܕܡܵܪܝܵܐ: ܘܡ̣ܢ ܗܸܕ݂ܪܵܐ ܕܥܘܼܫܢܹܗ: ܡܵܐ ܕܩܵܐܹ̇ܡ ܠܲܡܟܲܒܵܫܘܼ ܠܐܲܪܥܵܐ.

²²ܫܠܵܘ ܠܟ݂ܘܿܢ ܡ̣ܢ ܐ̄ܢܵܫܵܐ ܕܲܢܫܲܡܬ̣ܵܐ ܒܲܢܚܝܼܪ̈ܵܘܗܝ: ܡܸܛܠ ܕܐܲܝܟ݂ ܡܵܢܵܐ ܚܫܝܼܒ̣.