Read Aramaic Peshita Isaiah 20 Bible Online

Isaiah 20 - Aramaic Peshita bible

Isaiah 20

¹ܐ: ܒܫܲܢ̄ܬܵܐ ܕܐܸܬ̣ܵܐ ܬܹܐܪܬܵܢ ܠܐܲܫܕ̇ܘܿܕ݂: ܟܲܕ݂ ܫܲܕ̇ܪܹܗ ܣܲܪܓ̣ܘܿܢ ܡܲܠܟܵܐ ܕܐܵܬ̣ܘܿܪ: ܘܐܸܬ̣ܟܲܬܲܫ ܥܲܡ ܐܲܫܕ̇ܘܿܕ݂ ܘܟܲܒ̣ܫܵܗ̇.

²ܒܹܗ ܒܙܲܒ̣ܢܵܐ ܗܵܘܿ: ܡܲܠܸܠ̣ ܡܵܪܝܵܐ ܒܝܲܕ݂ ܐܹܫܲܥܝܵܐ ܢܒ̣ܝܼܵܐ ܒܲܪ ܐܵܡܘܿܨ: ܘܐܸܡܲܪ ܠܹܗ: ܙܸܠ ܫܪܝܼ ܣܲܩܵܐ ܡ̣ܢ ܚܲܨܲܝ̈ܟ: ܘܲܡܣܵܢܲܝ̈ܟ ܡ̣ܢ ܪܸ̈ܓ̣ܠܲܝܟ. ܘܲܥܒܲܕ݂ ܗܵܟܲܢܵܐ: ܘܗܲܠܸܟ݂ ܥܲܪܛܸܠ ܘܚܸܦܝܵܝ.

³ܘܐܸܡܲܪ ܡܵܪܝܵܐ: ܐܲܝܟܲܢܵܐ ܕܗܲܠܸܟ݂ ܥܲܒ̣ܕܲܝ ܐܹܫܲܥܝܵܐ ܥܲܪܛܸܠ ܘܚܸܦܝܵܝ: ܗܵܟܲܢܵܐ ܢܸܗܘ̈ܝܵܢ ܐܵܬ̣̈ܘܵܬ̣ܵܐ ܘܬܸܕ݂ܡܪ̈ܵܬ̣ܵܐ ܬܠܵܬ̣ ܫܢ̈ܝܼܢ ܥܲܠ ܡܨܪܹܝܢ ܘܥܲܠ ܟܘܼܫ.

⁴ܗܵܟܲܢܵܐ ܢܸܕ݂ܒܲܪ ܡܲܠܟܵܐ ܕܐܵܬ̣ܘܿܪ ܫܟ݂ܝܼܬ̣ܵܐ ܕܡܸܨܪܹܝܢ: ܘܲܫܒ̣ܝܼܬ̣ܵܐ ܕܟ݂ܘܼܫ: ܥܠܲܝܡܹ̈ܐ ܘܣܵܒܹ̈ܐ ܥܲܪܛܸܠ ܘܚܸܦܝܵܝ ܘܢܸܬ̣ܓ̇ܠܹܐ ܦܘܼܪܣܵܝܵܗ̇ ܕܡܸܨܪܹܝܢ.

⁵ܘܢܸܬ̇ܬܲܒ̣ܪܘܿܢ ܘܢܸܒ̣ܗ̱ܬ̣ܘܼܢ: ܡ̣ܢ ܟܘܼܫ ܬܘܼܟ݂ܠܵܢܗܘܿܢ: ܘܡ̣ܢ ܡܸܨܪܹܝܢ ܬܸܫܒ̇ܘܿܚܬ̇ܗܘܿܢ.

⁶ܘܢܹܐܡܲܪ ܥܵܡ̇ܘܿܪܵܐ ܕܓ̣ܵܙܲܪܬܵܐ ܗܵܕܹܐ ܒܝܵܘܡܵܐ ܗܵܘܿ: ܗܵܪܟܵܐ ܗ̄ܘܼ ܬܘܼܟ݂ܠܵܢܲܢ: ܕܲܥܪܲܩܢ ܠܡܸܬ̣ܥܲܕܵܪܘܼ ܘܲܠܡܸܬ̣ܦܲܨܵܝܘܼ ܡ̣ܢ ܡܲܠܟܵܐ ܕܐܵܬ̣ܘܿܪ. ܘܲܚܢܲܢ ܐܲܝܟܲܢܵܐ ܢܸܬ̣ܦܲܨܹܐ.