Read Aramaic Peshita Isaiah 21 Bible Online

Isaiah 21 - Aramaic Peshita bible

Isaiah 21

¹ܡܲܫܩ̄ܠܵܐ ܕܡܲܕ݂ܒ̇ܪܵܐ ܕܝܲܡܵܐ. ܐܲܝܟ݂ ܥܲܠܥܵܠܵܐ ܡ̣ܢ ܬܝܡ̄ܢܵܐ ܬܸܪܗܲܛ ܡ̣ܢ ܡܲܕ݂ܒ̇ܪܵܐ: ܘܬܹܐܬܹܐ ܡ̣ܢ ܐܲܪܥܵܐ ܪܲܚܝܼܩܬܵܐ.

²ܚܸܙܘܵܐ ܩܲܫܝܵܐ ܐܸܬ̣ܚ̄ܙܝܼ ܠܲܢ. ܛܵܠܘܿܡܵܐ ܛܵܠܹ̇ܡ: ܘܒ̣ܵܙܘܿܙܵܐ ܒܐܹ̈ܙ ܣܲܩܝ ܥܝܼܠܵܡ ܘܛܘܼܪ̈ܲܝ ܡܵܕܲܝ: ܘܟ݂ܠܗܹܝܢ ܬܸܢ̈ܚܵܬ̣ܵܗ̇ ܒܲܛܠܹ̇ܬ̣.

³ܡܸܛܠ ܗܵܢܵܐ ܐܸܬ̣ܡ̱ܠܝܼ ܚܲܨܝ ܙܵܘܥܬ̣ܵܐ ܘܐܲܚܕ̇ܘܢܝ ܨܵܘܪ̈ܵܢܹܐ ܐܲܝܟ݂ ܨܵܘܪ̈ܵܢܹܐ ܕܝܵܠܹܕ̇ܬܵܐ. ܙܵܥܹ̇ܬ̣ ܕܠܵܐ ܐܸܫܡܲܥ. ܘܐܸܬ̇ܕܲܠܚܹ̇ܬ̣ ܕܠܵܐ ܐܸܚܙܹܐ.

⁴ܛܥ̣ܵܐ ܠܹܒ̇ܝ: ܘܨܵܘܪ̈ܵܢܹܐ ܐܲܙܝܼܥܘܼܢܝ ܘܫܘܼܦܪܹ̈ܐ ܕܨܸܒ̣ܝܵܢܝ ܣܵܡ̣ܘ ܠܝܼ ܠܣܘܼܪܵܕ݂ܵܐ.

⁵ܛܲܝܸܒ̣ܘ ܦܵܬ̣ܘܿܪܹ̈ܐ: ܕܘܼܩܘ ܕܵܘܩܹ̈ܐ. ܐܲܟ݂ܘܿܠܘ ܘܐܸܫܬܵܘ. ܩܘܼܡܘ ܪܵܘ̱ܪ̈ܒ̣ܵܢܹܐ: ܡܫܘܿܚܘ ܣܲܟ̇ܪܹ̈ܐ.

⁶ܡܸܛܠ ܕܗܵܟܲܢܵܐ ܐܸܡܲܪ ܠܝܼ ܡܵܪܝܵܐ: ܙܸܠ ܐܲܩܝܼܡ ܕܵܘܩܵܐ: ܕܡܸܕܸ̇ܡ ܕܚܵܙܹ̇ܐ: ܢܚܵܘܹܐ.

⁷ܘܲܚܙ̣ܵܐ ܪܟ݂ܘܿܒ̣ܵܐ ܕܲܬ̣ܪܹܝܢ ܦܲܪ̈ܵܫܝܼܢ: ܕܲܪܟ݂ܝܼܒ̣ ܚܡܵܪܵܐ: ܘܕܲܪܟ݂ܝܼܒ̣ ܓܲܡܠܵܐ: ܘܨܵܬ̣ ܫܸܡܥܵܐ ܣܲܓ̇ܝܼܵܐܐ.

⁸ܘܲܩܪܵܐ ܕܵܘܩܵܐ ܒܐܸܕ݂ܢܲܝ̈: ܘܐܸܡܲܪ: ܐܸܢܵܐ ܡܵܪܝܵܐ ܩܵܐܹ̇ܡ ܐ̄ܢܵܐ ܐܲܡܝܼܢܵܐܝܼܬ̣ ܒܐܝܼܡܵܡܵܐ: ܘܥܲܠ ܡܲܛ̇ܪܬ̇ܝ ܩܵܐܹ̇ܡ ܐ̄ܢܵܐ ܟܠܗܘܿܢ ܠܲܝܠܵـ̈ـܘܵܬ̣ܵܐ.

⁹ܘܗܐ ܐܸܬ̣ܵܐ ܓܲܒ̣ܪܵܐ ܡ̣ܢ ܪ̈ܵܟ݂ܒܹ̇ܐ ܕܦܲܪ̈ܵܫܹܐ: ܘܲܥ̣ܢܵܐ ܘܐܸܡܲܪ: ܢܸܦܠܲܬ̤: ܢܸܦܠܲܬ̤: ܒܵܒܹܠ. ܘܟ݂ܠܗܘܿܢ ܐܲܠܵܗܹ̈ܝܗ̇ ܓܠܝܼܦܹ̈ܐ ܐܸܬ̇ܬܲܒܲܪܘ ܒܐܲܪܥܵܐ: ܡ̣ܢ ܚܨܵܕ݂ ܘܡ̣ܢ ܒܠܲܝ ܐܸܕܲܪ.

¹⁰ܡܸܕܸ̇ܡ ܕܫܸܡ̇ܥܹܬ̣ ܡ̣ܢ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܚܵܘܝܼܬ̇ܟ݂ܘܿܢ.

¹¹ܡܲܫܩ̄ܠܵܐ ܕܕ݂ܘܿܡܵܐ. ܠܝܼ ܩܪܵܐ ܡ̣ܢ ܣܵܥܝܼܪ ܢܵܛ̇ܘܿܪܵܐ ܕܲܒ̣ܠܸܠܝܵܐ.

¹²ܐܸܡܲܪ ܢܵܛ̇ܘܿܪܵܐ: ܐܸܬ̣ܵܐ ܨܲܦܪܵܐ ܐܵܦ ܠܸܠܝܵܐ. ܐܸܢ ܒܵܥܹ̇ܝܢ ܐܲܢ̄ܬ̇ܘܿܢ ܒܥܵܘ: ܬܘܼܒ̣ ܐܵܬܹ̇ܝܢ ܐܲܢ̄ܬ̇ܘܿܢ.

¹³ܡܲܫܩ̄ܠܵܐ ܕܥܵܪܵܒ̣ܵܐ ܒܪܲܡܫܵܐ ܒܥܵܒܵܐ ܬܒ̣ܘܼܬ̣ܘܼܢ: ܒܲܫܒ̣ܝܼܠܵܐ ܕܕ݂ܘܼܪܢܝܼܡ.

¹⁴ܠܐܘܼܪܲܥ ܨܗܲܝܵܐ ܐܲܝܬܵܘ ܡܲـ̈ـܝܵܐ: ܥܵܡ̇ܘܿܪܹ̈ܐ ܕܐܲܪܥܵܐ ܕܬܲܝܡ̄ܢܵܐ. ܒܠܲܚܡܟ݂ܘܿܢ ܐܲܪܘܿܥܘ ܠܲܡܒܲܕܵܪܹ̈ܐ.

¹⁵ܡܸܛܠ ܕܡ̣ܢ ܩܕ݂ܵܡ ܣܲܦ̮ܣܹܪܵܐ ܐܸܬ̣ܒܲܕܲܪܘ: ܘܡ̣ܢ ܩܕ݂ܵܡ ܚܲܪܒܵܐ ܕܲܠܛܝܼܫܵܐ: ܘܡ̣ܢ ܩܕ݂ܵܡ ܩܸܫܬܵܐ ܕܡܲܠܝܵܐ: ܘܡ̣ܢ ܩܕ݂ܵܡ ܥܘܼܫܢܵܐ ܕܲܩܪܵܒ̣ܵܐ.

¹⁶ܡܸܛܠ ܕܗܵܟܲܢܵܐ ܐܸܡܲܪ ܠܝܼ ܡܵܪܝܵܐ: ܒܡܫܠܲܡ ܫܲܢ̄ܬܵܐ ܐܲܝܟ݂ ܫܢܲـ̈ـܝܵܐ ܕܐܲܓ̣ܝܼܪܵܐ: ܢܣܘܼܦ ܟܠܹܗ ܐܝܼܩܵܪܵܐ ܕܩܸܕ݂ܵܪ.

¹⁷ܘܫܲܪܟܵܐ ܕܡܸܢܝܵܢܵܐ ܕܩܲـ̈ـܫܵܬܹܐ: ܓܲܒ̣ܪܹ̈ܐ ܕܲܒ̣ܢܲܝ̈ ܩܹܕܵܪ ܢܸܙܥ̱ܪܘܼܢ: ܡܸܛܠ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܡܲܠܸܠ.