Read Aramaic Peshita Isaiah 22 Bible Online

Isaiah 22 - Aramaic Peshita bible

Isaiah 22

¹ܡܲܫܩ̄ܠܵܐ ܕܢܲܚܠܵܐ ܕܚܙܝܼܘܿܢ ܡܵܢܵܐ ܐܝܼܬ̣ ܠܹܟ݂ܝ ܗܵܪܟܵܐ: ܪܣܠܩܬ̇ܝ ܒܠܹܟ݂ܝ ܠܐܸܓܵܪܵܐ.

²ܕܠܘܼܚܝܵܐ ܐܸܡ̱ܠܝܼܬ̇ܝ ܩܪܝܼܬ̣ܵܐ ܩܵܠܵܐ ܐܸܡ̱ܠܝܼܬ̇ܝ ܩܪܝܼܬ̣ܵܐ ܥܫܝܼܢܬܵܐ ܩܛܝܼܠܲܝ̈ܟ̇ܝ ܠܵܐ ܗܘ̤ܵܘ ܩܛܝܼ̈ܠܹܐ ܕܣܲܝܦܵܐ: ܐܵܦܠܵܐ ܡܝܼ̈ܬܹܐ ܕܲܩܪܵܒ̣ܵܐ.

³ܟܠܗܘܿܢ ܫܲܠܝܼܛܵܢܲܝ̈ܟ̇ܝ ܢܵܘܘ ܐܲܟ݂ܚ̄ܕ݂ܵܐ ܡ̣ܢ ܩܸܫܬܵܐ ܐܸܬ̣ܐ̱ܣܲܪܘ. ܕܐܸܫܬܚܪܘܼ ܒܹܟ݂ܝ: ܐܲܟ݂ܚܕ݂ܵܐ ܐܸܬ̣ܐ̱ܣܲܪܘ: ܘܲܠܪܘܼܚܩܵܐ ܥܪܲܩ̣ܘ.

⁴ܡܸܛܠ ܗܵܢܵܐ ܐܸܡ̇ܪܹܬ̣: ܫܘܼܒ̣ܩܘܢܝ ܐܸܬ̣ܡܲܪܡܲܪ ܒܲܒ̣ܟ݂ܵܬ̣ܵܐ ܘܠܵܐ ܬܹܐܠܨܘܼܢ ܠܲܡܒܲܝܵܐܘܼܬܲܢܝ ܥܲܠ ܬܒ̣ܵܪܵܗ̇ ܕܒܲܪܬ̣ ܥܲܡܝ.

⁵ܡܸܛܠ ܕܝܵܘܡܵܐ ܕܲܕ݂ܠܘܼܚܝܵܐ ܘܕܲܕ݂ܝܵܫܵܐ ܘܕܲܒ̣ܟ݂ܵܬ̣ܵܐ: ܠܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ ܒܢܲܚܠܵܐ ܕܚܸܙܝܘܿܢ. ܒܨܵܐ ܫܘܼܪܹ̈ܐ: ܘܲܓ̣ܥ̣ܵܐ ܥܲܠ ܛܘܼܪܹ̈ܐ.

⁶ܘܥܝܼܠܵܡ ܫ̣ܩܲܠ ܩܛܸܪܩܵܐ: ܒܪ̈ܵܟ݂ܒܹ̇ܐ ܕܐ̄ܢܵܫܵܐ ܦܲܪ̈ܵܫܹܐ. ܘܫܘܼܪܵܐ ܓܠܵܐ ܣܲܟ̇ܪܹ̈ܐ.

⁷ܘܢܸܗܘܘܿܢ ܓܒܲـ̈ـܝܵܐ ܕܥܘܼܡܩܲܝ̈ܟ̇ܝ ܡܠܹܝܢ ܡܲܪ̈ܟ̇ܒ̣ܵܬ̣ܵܐ. ܘܦܲܪ̈ܵܫܹܐ ܢܸܣܬ̣ܕ݂ܪܘܼܢ ܥܲܠ ܬܲܪ̈ܥܹܐ.

⁸ܘܲܝܗܘܼܕ݂ܵܐ ܢܸܓ̣ܠܹܐ ܣܸܕ݂ܪܹ̈ܐ. ܘܬܸܚܙܹܐ ܒܝܵܘܡܵܐ ܗܵܘܿ ܙܲܝܢܵܐ ܕܒܹܝܬ̣ ܥܵܒ̣ܵܐ.

⁹ܘܬ̣ܘܼܪ̈ܥܵܬ̣ܵܐ ܕܲܩܪܝܼܬܹܗ ܕܕ݂ܵܘܝܼܕ݂ ܚܙܲܝܬ̇ܘܿܢ ܕܲܣܓܝܼ̈ ܘܲܟ݂ܢܲܫ̣ܬ̇ܘܿܢ ܡܲـ̈ـܝܵܐ ܕܝܲܡܬ̣ܵܐ ܬܲܚܬܵܝܬܵܐ.

¹⁰ܘܲܡ̣ܠܝܬ̇ܘܿܢ ܒܵـ̈ـܬܹ̇ܐ ܕܐܘܿܪܸܫܠܸܡ. ܘܲܥ̣ܩܲܪܬ̇ܘܿܢ ܒܵـ̈ـܬܹ̇ܐ: ܕܬܲܥܫ̄ܢܘܿܢ ܫܘܼܪܵܐ.

¹¹ܘܩܵܒ̣̈ܝܵܬ̣ܵܐ ܥ̣ܒܲܕ̇ܬ̇ܘܿܢ ܒܹܝܬ̣ ܫܘܼܪܵܐ ܠܡܲـ̈ـܝܵܐ ܕܝܲܡܬ̣ܵܐ ܥܲܬ̇ܝܼܩܬܵܐ. ܘܠܵܐ ܚܵܪܬ̇ܘܿܢ ܠܥܵܒ̣ܘܿܕ݂ܵܗ̇ ܘܲܠܓܵܒ̣ܘܿܠܵܗ̇ ܡ̣ܢ ܪܘܼܚܩܵܐ ܠܵܐ ܚ̣ܙܲܝܬ̇ܘܿܢ.

¹²ܘܲܩ̣ܪܵܐ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ ܒܝܵܘܡܵܐ ܗܵܘܿ: ܠܲܒ̣ܟ݂ܵܬ̣ܵܐ ܘܲܠܡܲܪ̈ܩܕ݂ܵܬ̣ܵܐ ܘܲܠܩܘܼ̈ܕ݂ܝܵܬ̣ܵܐ: ܘܠܲܟ݂ܒ̣ܵܢܵܐ ܕܣܲܩܹ̈ܐ.

¹³ܘܗܵܐ ܒܘܼܣܵܡܵܐ ܘܚܲܕ݂ܘܼܬ̣ܵܐ: ܢܸܟ݂ܣܬ̣ܵܐ ܕܬ̣ܵܘܪܹ̈ܐ: ܘܢܸܟ݂ܣܬ̣ܵܐ ܕܥܵـ̈ـܢܵܐ: ܘܡܹܐܟ݂ܘܼܠܬܵܐ ܕܒܣܪܵܐ: ܘܡܲܫܬܝܵܐ ܕܚܲܡܪܵܐ. ܢܹܐܟ݂ܘܿܠ ܘܢܸܫܬܹ̇ܐ: ܡܸܛܠ ܕܲܡܚܵܪ ܢܡܘܼܬ̣.

¹⁴ܓܲܠܝܵܐ ܗ̄ܝܼ ܒܐܸܕ݂ܢܲܝ̈ ܡܵܪܝܵܐ ܚܲܝܠܬ̣ܵܢܵܐ: ܘܐܸܡܲܪ: ܠܵܐ ܬܸܣܒ̣ܘܼܢ ܠܟ݂ܘܿܢ ܚܛܝܼܬ̣ܵܐ ܗܵܕܹܐ ܥܕܲܡܵܐ ܕܲܬ̣ܡܘܼܬ̣ܘܼܢ: ܐܵܡܲܪ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ.

¹⁵ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܙܸܠ ܠܘܵܬ̣ ܣܵܘܟܵܢ ܗܵܢܵܐ: ܠܘܵܬ̣ ܫܲܒ̣ܢܵܐ ܪܲܒ̇ܒܲܝܬܵܐ: ܘܐܸܡܲܪ ܠܹܗ.

¹⁶ܡܵܢܵܐ ܥܵܒܹ̇ܕ݂ ܐܲܢ̄ܬ̇ ܗܵܪܟܵܐ: ܘܡܵܢܵܐ ܐܝܼܬ̣ ܠܵܟ݂ ܗܵܪܟܵܐ. ܕܲܢܩܲܪܬ̇ ܠܵܟ݂ ܗܵܪܟܵܐ ܩܲܒܪܵܐ. ܢܵܩܲܪ ܒܪܘܡܵܐ ܩܲܒ̣ܪܹܗ: ܘܪܵܫܸܡ ܒܟܹܐܦܵܐ ܡܲܫ̱ܪܝܹܗ.

¹⁷ܗܵܐ ܡܵܪܝܵܐ ܡܸܫܕܹ̇ܐ ܠܵܟ݂ ܓܒ̣ܪܵܐ: ܘܡܸܛܥܵܐ ܛܵܥܹ̇ܐ ܠܵܟ݂.

¹⁸ܢܹܐܠܨܵܟ݂ ܒܐܘܼܠܨܵܢܵܐ ܐܲܝܟ݂ ܐܘܼܠܨܵܢܵܐ ܕܐܸܣܦܹܝܪܵܐ: ܒܐܲܪܥܵܐ: ܪܘܲܚܬ̣ܵܐ ܕܐܝܼܕܲܝܵܐ ܬܲܡܵܢ ܬܡܘܼܬ̣: ܘܬܲܡܵܢ ܡܲܪܟܲܒ̣ܬ̣ܵܐ ܕܐܝܼܩܵܪܵܟ݂: ܨܲܥܪܵܐ ܕܒܹܝܬ̣ ܡܵܪܵܟ݂.

¹⁹ܘܐܹܗܲܓ̇ܡܵܟ݂ ܡ̣ܢ ܐܝܼܩܵܪܵܟ݂: ܘܐܸܣܲܚܦܵܟ݂ ܡ̣ܢ ܩܝܵܡܵܟ݂.

²⁰ܘܢܸܗܘܹܐ ܒܝܵܘܡܵܐ ܗܵܘܿ: ܐܵܡܲܪ ܡܵܪܝܵܐ: ܐܸܩܪܸܐ ܠܥܲܒ̣ܕ̇ܝ ܐܹܠܝܵܩܝܼܡ ܒܲܪ ܚܹܠܲܩܝܵܐ.

²¹ܘܐܲܠܒ̇ܫܝܼܘܗܝ ܟܘܿܬ̇ܝܼܢܵܟ݂. ܘܲܒ̣ܗܸܡܝܵܢܵܟ݂ ܐܸܚܙ̄ܩܝܼܘܗܝ. ܘܫܘܼܠܛܵܢܵܟ݂ ܐܸܬܸ̇ܠ ܒܐܝܼܕ݂ܵܘ̈ܗܝ ܘܢܸܗܘܹܐ ܐܲܒ̣ܵܐ ܠܥܵܡܘܿܪܹ̈ܐ ܕܐܘܿܪܸܫܠܸܡ: ܘܲܠܓܲܒ̣ܪܹ̈ܐ ܕܒܹܝܬ̣ ܝܼܗܘܼܕ݂ܵܐ.

²²ܘܲܢܣܝܼܡ ܩܠܝܼ̈ܕܹܐ ܕܒܹܝܬ̣ ܕܵܘܝܼܕ݂ ܥܲܠ ܟܲܬ̣ܦܹܗ. ܘܢܸܦ̮ܬܲܚ: ܘܠܲܝܬ̇ ܕܢܹܐܚܘܿܕ݂. ܘܢܹܐܚܘܿܕ݂ ܘܠܲܝܬ̇ ܕܢܸܦ̮ܬܲܚ.

²³ܘܐܸܩܫܝܼܘܗܝ ܣܸܟ̇ܬ̣ܵܐ ܒܐܲܬ̣ܪܵܐ ܡܗܲܝܡܢܵܐ. ܘܢܸܗܘܹܐ ܟܘܼܪܣܝܵܐ ܕܐܝܼܩܵܪܵܐ ܠܒܹܝܬ̣ ܐܲܒ̣ܘܼܗܝ.

²⁶ܒܝܵܘܡܵܐ ܗܵܘܿ: ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܬܸܬ̣ܥ̱ܩܲܪ ܣܸܟ̇ܬ̣ܵܐ ܕܲܢܩܝܼܫܵܐ ܒܐܲܬ̣ܪܵܐ ܡܗܲܝܡܢܵܐ. ܘܬܸܣܬ̇ܚܸܦ ܘܬܸܦܸܠ. ܘܢܹܐܒܲܕ݂ ܫܩܵܠܵܐ ܕܣܝܼܡ ܥܠܹܝܗ̇: ܡܸܛܠ ܕܡܵܪܝܵܐ ܡܲܠܸܠ̣.