Read Aramaic Peshita Isaiah 24 Bible Online

Isaiah 24 - Aramaic Peshita bible

Isaiah 24

¹ܗܵܐ ܡܵܪܝܵܐ ܡܚܲܒܸ̇ܠ ܐܲܪܥܵܐ: ܘܲܡܬܲܪܲܥ ܠܵܗ̇. ܘܣܵܚܹ̇ܦ ܐܲܦܹܝ̈ܗ̇: ܘܲܡܒܲܕܲܪ ܥܵܡܘܿܪܹ̈ܝܗ̇.

²ܘܢܸܗܘܹܐ ܥܲܡܵܐ ܐܲܝܟ݂ ܟܵܗܢܵܐ: ܘܥܲܒ̣ܕܵܐ ܐܲܝܟ݂ ܡܵܪܹܗ: ܘܐܲܡܬ̣ܵܐ ܐܲܝܟ݂ ܡܵܪܬܵܗ̇: ܩܲܢܵܝܵܐ ܐܲܝܟ݂ ܡܙܲܒ̇ܢܵܢܵܐ: ܘܝܵܙܘܿܦܵܐ ܐܲܝܟ݂ ܡܵܘܙܦܵܢܵܐ: ܐܲܝܟ݂ ܡܵܪܹܐ ܚܵܘܒ̇ܬܹܗ ܕܚܲܝܵܒ̣ ܠܹܗ.

³ܡܸܬ̣ܚܲܒܵܠܘܼ ܬܸܬ̣ܚܲܒܲܠ ܐܲܪܥܵܐ: ܘܡܸܬ̣ܒ̇ܙܵܙܘܼ ܬܸܬ̣ܒ̇ܙܸܙ. ܡܸܛܠ ܕܡܵܪܝܵܐ ܡܲܠܸܠ̣ ܦܸܬ̣ܓ̣ܵܡܵܐ ܗܵܢܵܐ.

⁴ܐܲܠܲܬ̤ ܘܝܸܬ̣ܒܲܬ̤ ܒܐܸܒ̣ܠܵܐ ܐܲܪܥܵܐ. ܐܲܠܲܬ̤ ܘܝܸܬ̣ܒܲܬ̤: ܘܐܸܬ̣ܐܲܒ̣ܠܲܬ̤ ܬܹܒܹܝܠ. ܐܲܠܵܐ ܪܵܘܡܵܗ̇ ܕܐܲܪܥܵܐ.

⁵ܘܐܲܪܥܵܐ ܐܸܬ̇ܕܲܡܝܲܬ̤ ܠܥܵܡܘܿܪܹ̈ܝܗ̇. ܡܸܛܠ ܕܲܥܒܲܪܘ ܢܵܡܘܿܣܵܐ: ܘܚܲܠܸܦܘ ܦܘܼܩܕܵܢܵܐ: ܘܒܲܛܸܠ̣ܘ ܩܝܵܡܵܐ ܕܥܵܠܲܡ.

⁶ܡܸܛܠ ܗܵܠܹܝܢ ܬܸܬܸ̇ܒ̣ ܒܐܸܒ̣ܠܵܐ ܐܲܪܥܵܐ. ܘܢܸܬ̣ܚܲܝܒ̣ܘܼܢ ܟܠܗܘܿܢ ܥܵܡܘܿܪܹ̈ܝܗ̇ ܡܸܛܠ ܗܵܢܵܐ ܢܸܬ̣ܚܲܪܒ̇ܘܿܢ ܟܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ: ܘܢܸܫܬܲܚܪܘܼܢ ܐ̄ܢܵܫܵܐ ܩܲܠܝܼܠ.

⁷ܝܼܬܸܒ̣ ܒܐܸܒ̣ܠܵܐ ܥܒ̣ܘܼܪܵܐ. ܘܐܲܠܲܝ̈ ܓܘܼܦܢܹ̈ܐ ܘܐܸܬ̇ܬܲܢܲܚܘ ܟܠ ܚܵܕ݂ܝܲܝ̈ ܠܸܒܵܐ.

⁸ܒܸܛܠܲܬ̤ ܚܲܕ݂ܘܼܬ̣ܵܐ ܘܲܦܠܲـ̈ـܓܹ̇ܐ. ܘܲܫܠܝܼ ܩܵܠܵܐ ܕܲܕ݂ܝܵܨܵܐ. ܒܸܛܠܲܬ̤ ܚܲܕ݂ܘܼܬ̣ܵܐ ܘܟܸܢܵܪܹ̈ܐ.

⁹ܒܲܙܡܵܪܵܐ ܠܵܐ ܢܸܫܬ̇ܘܿܢ ܚܲܡܪܵܐ. ܢܸܡܲܪ ܫܲܟ݂ܪܵܐ ܠܫܵܬ̣ܝܵܘ̈ܗܝ.

¹⁰ܐܸܬ̣ܒܲܙܙܲܬ̤ ܩܪܝܼܬ̣ܵܐ: ܘܐܸܬ̇ܬ̇ܚܸܕ݂ܘ ܟܠ ܒܹܝܬ̣ ܡܲܕܵܢܹ̈ܐ.

¹¹ܝܑܼܠܲܠܬܵܐ ܥܲܠ ܚܲܡܪܵܐ ܒܫܘܼ̈ܩܹܐ. ܒܸܛܠܲܬ̤ ܟܠܵܗ̇ ܚܲܕ݂ܘܼܬ̣ܵܐ. ܘܲܥܒܲܪ ܕܝܵܨܵܗ̇ ܕܐܲܪܥܵܐ.

¹²ܘܐܸܫܬ̇ܚܲܪ ܒܲܩܪܝܼܬ̣ܵܐ ܚܒ̣ܵܠܵܐ ܘܕ݂ܵܘܘܿܢܵܐ ܢܦܲܣܸܩ ܬܲܪ̈ܥܹܝܗ̇.

¹³ܗܵܟܲܢܵܐ ܢܸܗܘܹܐ ܒܓ̣ܵܘܵܗ̇ ܕܐܲܪܥܵܐ ܒܲܝܢܵܬ̣ ܥܲܡܡܹ̈ܐ: ܐܲܝܟ݂ ܚܒ̣ܵܛܵܐ ܕܙܲܝܬܵܐ: ܘܐܲܝܟ݂ ܒܘܼܥܵܪܵܐ ܡܵܐ ܕܲܓ̣ܡܲܪ ܩܛܵܦܵܐ.

¹⁴ܗܸܢ̣ܘܿܢ ܢܪܝܼܡܘܿܢ ܩܵܠܗܘܿܢ ܘܲܢܫܲܒ̇ܚܘܼܢ ܒܓܲܐܝܘܼܬܹܗ ܕܡܵܪܝܵܐ. ܘܢܸܨܗ̱ܠܘܼܢ ܡ̣ܢ ܝܲܡܵܐ.

¹⁵ܡܸܛܠ ܗܵܢܵܐ ܒܬܸܫܒ̇ܘܿܚܬܵܐ ܫܲܒܲܚܘ ܠܡܵܪܝܵܐ: ܘܲܒ̣ܓܲܙܪ̈ܵܬ̣ܵܐ ܕܝܲܡܵܐ ܫܡܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

¹⁶ܡ̣ܢ ܟܸܢܦܹ̈ܝܗ̇ ܕܐܲܪܥܵܐ ܙܡܝܼܪ̈ܵܬ̣ܵܐ ܫ̣ܡܲܥܢ: ܚܲܝܠܵܐ ܕܙܲܕ̇ܝܼܩܵܐ ܕܐܵܡܲܪ: ܐ̄ܪܵܙ ܠܝܼ: ܐ̄ܪܵܙ ܠܝܼ: ܐܘܿܝ ܠܝܼ: ܥܵܘܿܠܹܐ ܐܲܥܠܝܼܘ: ܥܵܘܿܠܹܐ ܥܵܘܼܠܵܐ ܐܲܥ̣ܠܝܼܘ.

¹⁷ܕܸܚ̱ܠܬܵܐ ܘܓܘܼܡܵܨܵܐ: ܘܦܲܚܵܐ ܥܠܲܝܟ: ܥܲܡܘܿܪܵܐ ܕܐܲܪܥܵܐ.

¹⁸ܘܡܲܢ ܕܢܸܥܪܘܿܩ ܡ̣ܢ ܩܵܠܵܐ ܕܕܸܚ̱ܠܬ̣ܵܐ: ܢܸܦܸܠ ܒܓ̣ܘܼܡܵܨܵܐ. ܘܡܲܢ ܕܢܸܣܲܩ ܡ̣ܢ ܓܵܘ ܓܘܼܡܵܨܵܐ: ܢܸܬ̇ܬ̇ܚܸܕ݂ ܒܦܲܚܵܐ. ܡܸܛܠ ܕܡܲܣܘܼܟܹ̈ܐ ܡ̣ܢ ܡܪܵܘܡܵܐ ܐܸܬ̣ܦܬܲܚܘ: ܘܙܵܥ̣ ܫܲܬ̣ܐ̱ܣܹ̈ܝܗ̇ ܕܐܲܪܥܵܐ.

¹⁹ܡܙܵܥ ܬܙܘܼܥ ܐܲܪܥܵܐ: ܘܲܡܕ݂ܵܠ ܬܕ݂ܘܼܠ ܐܲܪܥܵܐ: ܘܲܡܡܵܛ ܬܡܘܼܛ ܐܲܪܥܵܐ.

²⁰ܘܲܡܙܵܥ ܬܙܘܼܥ ܐܲܪܥܵܐ ܐܲܝܟ݂ ܪܵܘܝܵܐ ܘܲܬ̣ܢܘܼܕ݂ ܐܲܝܟ݂ ܥܲܪܙܵܠܵܐ. ܘܢܸܥܫܲܢ ܥܠܹܝܗ̇ ܥܵܘܼܠܵܗ̇: ܘܬܸܦܸܠ ܘܠܵܐ ܬܵܘܣܸܦ ܠܲܡܩܵܡ.

²¹ܒܹܗ ܒܝܵܘܡܵܐ ܗܵܘܿ: ܢܸܦܩܘܼܕ݂ ܡܵܪܝܵܐ ܥܲܠ ܚܲܝ̈ܠܹܐ ܕܪܵܘܡܵܐ ܒܪܵܘܡܵܐ: ܘܥܲܠ ܡܲܠ̈ܟܹ̇ܐ ܕܐܲܪܥܵܐ ܒܐܲܪܥܵܐ.

²²ܘܢܸܟ݂ܢ̱ܫܘܼܢ ܟܢܘܼܫܝܵܐ ܥܲܠ ܐܲܣܝܼܪ ܓܘܼܒܵܐ. ܘܢܸܬ̣ܚܲܫܒ̣ܘܼܢ ܥܲܠ ܚܒ̣ܝܼܫܵܐ. ܘܲܠܣܘܿܓ̣ܵܐܐ ܕܝܵܘ̈ܡܵܬ̣ܵܐ ܢܸܬ̣ܦܲܪܩܘܼܢ.

²³ܘܢܸܚܦܘܿܪ ܣܲܗܪܵܐ: ܘܢܸܒ̣ܗܲܬ̣ ܫܸܡܫܵܐ. ܡܸܛܠ ܕܐܲܡܠܸܟ݂ ܡܵܪܝܵܐ ܚܲܝܠܬ̣ܵܢܵܐ: ܒܛܘܼܪܵܐ ܕܨܸܗܝܘܿܢ: ܘܒ̣ܐܘܿܪܸܫܠܸܡ ܘܲܩܕ݂ܵܡ ܩܲܕ̇ܝܼܫܵܘ̈ܗܝ ܢܸܫܬܲܒܲܚ.