Read Aramaic Peshita Isaiah 26 Bible Online

Isaiah 26 - Aramaic Peshita bible

Isaiah 26

¹ܒܹܗ ܒܝܵܘܡܵܐ ܗܵܘܿ: ܬܸܙܕܲܡܲܪ ܙܡܝܼܪܬܵܐ ܗܵܕܹܐ ܒܐܲܪܥܵܐ ܕܲܝܗܘܼܕ݂: ܩܪܝܼܬ̣ܵܐ ܕܲܥܫܸܢ ܦܘܼܪܩܵܢܵܗ̇: ܣܵܡ̣ܘ ܫܘܼܪܵܐ ܘܒܲܪ ܫܘܼܪܵܐ.

²ܦܬܲܚܘ ܬܲܪ̈ܥܹܐ: ܢܸܥܘܿܠ ܥܲܡܵܐ ܙܲܕ̇ܝܼܩܵܐ: ܕܢܵܛܲܪ ܗܲܝܡܵܢܘܼܬ̣ܵܐ: ܕܢܵܛܲܪ ܒܲܫܪܵܪܵܐ.

³ܬܸܛܲܪ ܠܲܢ ܫܠܵܡܵܐ: ܡܸܛܠ ܕܒ̣ܵܟ݂ ܣܲܒܲܪܢ ܡܵܪܝܵܐ: ܠܥܵܠܲܡ ܥܲܠܡܝܼܢ.

⁴ܡܸܛܠ ܕܡܵܪܝܵܐ ܐܲܠܵܗܵܐ ܬܲܩܝܼܦܵܐ ܠܥܵܠܡܝܼܢ.

⁵ܡܸܛܠ ܕܢܲܡܸܟ ܠܲܕ݂ܥܵܡ̇ܪܝܼܢ ܒܪܵܘܡܵܐ. ܘܲܩܪܝܼܬ̣ܵܐ ܥܲܫܝܼܢܬܵܐ ܢܡܲܟ̇ܟ݂ܝܼܗ̇ ܥܕܲܡܵܐ ܠܐܲܪܥܵܐ. ܘܲܢܡܲܛܝܹܗ ܥܕܲܡܵܐ ܠܥܲܦܪܵܐ.

⁶ܬܕ݂ܘܼܫܝܼܗ̇ ܪܸܓ̣ܠܵܐ ܕܒ̣ܵܝܫܹ̈ܐ: ܘܲܗܠܲܟ݂ܬ̣ܵܐ ܕܡܸܣܟܹ̇ܢܹ̈ܐ.

⁷ܫܒ̣ܝܼܠܵܐ ܬܪܝܼܨ ܠܡܸܣܟܹ̇ܢܹ̈ܐ. ܘܲܬ̣ܪܝܼܨܵܐ ܘܫܲܦܝܵܐ ܐܘܼܪܚܵܐ ܕܙܲܕ̇ܝܼܩܹ̈ܐ.

⁸ܘܐܵܦ ܠܐܘܼܪܚܵܐ ܕܕ݂ܝܼܢܲܝ̈ܟ ܡܵܪܝܵܐ ܣܲܟܝܼܢ ܠܲܫܡܵܟ݂ ܘܲܠܕ݂ܘܼܟ݂ܪܵܢܵܟ݂ ܪܸܓܲܬ̤ ܢܲܦ̮ܫܵܟ݂.

⁹ܢܲܦ̮ܫܝ ܐܸܬ̣ܐܵܘܒܲܬ̤ ܠܵܟ݂ ܒܠܸܠܝܵܐ: ܐܵܦ ܪܘܼܚܝ ܒܓ̣ܵܘܝ ܡܩܲܕ̇ܡܵܐ ܠܘܵܬ̣ܵܟ݂. ܡܸܛܠ ܕܐܲܝܟ݂ ܕܝܼܢܲܝ̈ܟ ܥܲܠ ܐܲܪܥܵܐ ܙܲܕ̇ܝܼܩܘܼܬ̣ܵܐ ܝܑܼܠܸܦ̣ܘ ܥܵܡܘܿܪܹ̈ܝܗ̇ ܕܬܹܒܹܝܠ.

¹⁰ܐܸܬ̣ܪܲܚܲܩ ܥܵܘܿܠܵܐ ܕܠܵܐ ܢܹܐܠܲܦ ܙܲܕ̇ܝܼܩܘܼܬ̣ܵܐ. ܡܲܟ̇ܣܵܢܘܼܬ̣ܵܐ ܒܐܲܪܥܵܐ ܡܟ݂ܵܘܢܵܐ. ܘܠܵܐ ܢܸܚܙܘܿܢ ܒܓܲܐܝܘܼܬܹܗ ܕܡܵܪܝܵܐ.

¹¹ܡܵܪܝܵܐ ܒܪܵܡܘܼܬ̣ܵܐ ܕܐܝܼܕܲܝ̈ܟ ܠܵܐ ܢܸܚܙܘܿܢ. ܢܸܚܙܘܿܢ ܘܢܸܒ̣ܗ̱ܬ̣ܘܼܢ ܛܢܵܢܹܗ ܕܥܲܡܵܐ. ܘܐܲܝܟ݂ ܬܲܢܘܼܪܵܐ ܬܹܐܟ݂ܘܿܠ ܐܸܢܘܿܢ ܠܲܒ̣ܥܸܠܕ̇ܒ̣ܵܒܲܝ̈ܟ.

¹²ܡܵܪܝܵܐ ܬܸܛܲܪ ܠܲܢ ܫܠܵܡܵܐ: ܡܸܛܠ ܕܐܲܝܟ݂ ܟܠܗܘܿܢ ܥܒ̣ܵܕܲܝܢ ܥܲܬܸ̇ܕ̇ܬ̇ ܠܲܢ.

¹³ܡܵܪܝܵܐ ܐܲܠܵܗܲܢ: ܗܘ̤ܵܘ ܥܠܲܝܢ ܡܵܪ̈ܲܝܵܐ ܠܒܲܪ ܡܸܢܵܟ݂. ܒܲܠܚܘܿܕ݂ ܫܡܵܟ݂ ܕܝܼܠܵܟ݂ ܢܸܬ̇ܕܲܟܲܪ.

¹⁴ܡܝܼܬܹ̈ܐ ܠܵܐ ܡܲܚܹܝܢ: ܘܓܲܢ̄ܒܵܪܹ̈ܐ ܠܵܐ ܡܩܝܼܡܝܼܢ ܡܸܛܠ ܗܵܢܵܐ ܦ̣ܩܲܕ̇ܬ̇ ܘܕܲܢܒ̣ܬ̇ ܐܸܢܘܿܢ. ܘܐܵܘܒܸ̇ܕ̇ܬ̇ ܟܠܹܗ ܕܘܼܟ݂ܪܵܢܗܘܿܢ.

¹⁵ܐܵܘܣܸܦܬ̇ ܡܵܪܝܵܐ ܥܲܠ ܥܲܡܵܐ: ܐܵܘܣܸܦܬ̇ ܥܲܠ ܥܲܡܵܐ. ܐܸܬ̣ܪܲܚܲܩ̣ܬ̇ ܘܲܕ݂ܚܲܩ̣ܬ̇ ܟܠܗܘܿܢ ܣܵܘ̈ܦܹܝܗ̇ ܕܐܲܪܥܵܐ.

¹⁶ܡܵܪܝܵܐ ܒܐܘܼܠܨܵܢܵܐ ܦܲܩ̣ܕ̇ܘܿܟ݂: ܘܒܲܚܒ̣ܘܼܫܝܵܐ ܠܲܚܸܫܘ ܡܲܪܕ̇ܘܼܬ̣ܵܟ݂.

¹⁷ܐܲܝܟ݂ ܒܲܛܢ̱ܬ̣ܵܐ ܕܩܲܪܝܼܒ̣ܵܐ ܠܡܹܐܠܲܕ݂: ܘܲܡܚܲܒ̇ܠܵܐ ܘܡܲܝܠܠܵܐ ܒܚܸܒ̣̈ܠܹܝܗ̇: ܗܵܟܲܢܵܐ ܗܘܲܝܢ ܡ̣ܢ ܩܕ݂ܵܡܲܝܟ ܡܵܪܝܵܐ.

¹⁸ܒܛܸܢܢ ܘܚܲܒܸ̇ܠܢ ܐܲܝܟ݂ ܗܵܢܹ̇ܝܢ ܕܝܵܠ̈ܕܵܢ ܪ̈ܘܼܚܹܐ. ܦܪܘܿܩܲܝܢ ܕܠܵܐ ܢܹܐܒܲܕ݂ ܒܐܲܪܥܵܐ: ܘܠܵܐ ܢܸܦܠܘܿܢ ܥܵܡܘܿܪܹ̈ܝܗ̇ ܕܬܹܒܹܝܠ.

¹⁹ܢܸܚܘܿܢ ܡܝܼܬܲܝ̈ܟ: ܘܲܫܠܲܕܲܝ̈ܗܘܿܢ ܢܩ̈ܘܼܡܵܢ. ܘܢܸܬ̇ܬ̇ܥܝܼܪܘܼܢ ܘܲܢܫܲܒ̇ܚܘܼܢ ܫܵܟ݂ܒܲܝ̈ ܥܲܦܪܵܐ. ܡܸܛܠ ܕܛܵܠܵܟ݂ ܛܲܠܵܐ ܗ̄ܘܼ ܕܢܘܗܪܵܐ: ܘܐܲܪܥܵܐ ܕܓܲܢ̄ܒܵܪܹ̈ܐ ܬܣܲܚܸܦ.

²⁰ܙܸܠ ܥܲܡܝ: ܥܘܿܠ ܠܬ̣ܵܘܢܲܝ̈ܟ. ܘܐܲܚܘܿܕ݂ ܬܲܪ̈ܥܲܝܟ ܒܐܲܦܲܝ̈ܟ ܘܐܸܬ̇ܛܲܫܵܐ ܩܲܠܝܼܠ ܙܥܘܿܪ: ܥܲܕ݂ ܥܵܒܲܪ ܪܘܼܓ̣ܙܝ.

²¹ܡܸܛܠ ܕܗܵܐ ܡܵܪܝܵܐ ܢܵܦܹ̇ܩ ܡ̣ܢ ܐܲܬ̣ܪܹܗ: ܘܦܵܩܹܕ݂ ܥܵܘܼܠܹܗ ܕܥܵܡܘܿܪܵܐ ܕܐܲܪܥܵܐ ܥܠܵܘܗܝ. ܘܬܸܓ̣ܠܹܐ ܐܲܪܥܵܐ ܕܡܵܗ̇: ܘܠܵܐ ܬܟܲܣܸܐ ܬܘܼܒ̣ ܥܲܠ ܩܛܝܼ̈ܠܹܝܗ̇.