Read Aramaic Peshita Isaiah 28 Bible Online

Isaiah 28 - Aramaic Peshita bible

Isaiah 28

¹ܘܵܝ ܠܲܟ݂ܠܝܼܠܵܐ ܓܲܐܝܵܐ ܕܪܵܘܝܵܐ ܐܲܦܪܹܝܡ: ܘܠܲܓ̣ܕ݂ܵܠܵܐ ܡܨܲܥܪܵܐ ܚܲܝܠܵܐ ܕܫܘܼܒ̣ܚܹܗ ܕܲܒ̣ܪܹܫ ܢܲܚܠܵܐ ܕܫܲܡܝܼܢܹ̈ܐ: ܕܬ̣ܵܘܝܼܪܝܼܢ ܒܚܲܡܪܵܐ.

²ܗܵܐ ܚܲܝܠܵܐ ܘܥܘܼܫܢܵܐ ܕܡܵܪܝܵܐ: ܐܲܝܟ݂ ܙܵܪܝܼܦ̮ܬܵܐ ܕܒܲܪܕ݂ܵܐ: ܘܐܲܝܟ݂ ܥܲܠܥܵܠܵܐ ܕܬ̣ܵܒ̣ܪܵܐ: ܘܐܲܝܟ݂ ܙܵܪܝܼܦ̮ܬܵܐ ܕܡܲـ̈ـܝܵܐ ܣܲܓ̇ܝܹ̈ܐܐ ܕܓ̣ܵܪܦܝܼܢ.

³ܐܲܢܝܼܚ ܠܐܲܪܥܵܐ ܒܐܝܼܕ݂ܵܟ݂. ܘܲܒ̣ܪܸܓ̣ܠܵܐ ܢܸܬ̇ܬ̇ܕ̇ܝܼܫ ܟܠܝܼܠܵܐ ܓܲܐܝܵܐ ܕܪܵܘܝܵܐ ܐܲܦܪܹܝܡ.

⁴ܢܸܗܘܹܐ ܓܕ݂ܵܠܵܐ ܡܨܲܥܪܵܐ: ܚܲܝܠܵܐ ܕܫܘܼܒ̣ܚܹܗ ܕܲܒ̣ܪܹܫ ܢܲܚܠܵܐ ܕܫܲܡܝܼܢܹ̈ܐ: ܐܲܝܟ݂ ܒܲܟܵܪܬܵܐ ܕܲܩܕ݂ܵܡ ܩܲܝܛܵܐ: ܕܡܵܐ ܕܲܚ̣ܙܵܘ ܡܲܢ ܕܚܵܙܹ̇ܐ ܠܵܗ̇: ܥܲܕ݂ ܗ̤ܝ ܒܐܝܼܕܹܗ: ܒܵܠܲܥ ܠܵܗ̇.

⁵ܒܝܵܘܡܵܐ ܗܵܘܿ: ܢܸܗܘܹܐ ܡܵܪܝܵܐ ܚܲܝܠܬ̣ܵܢܵܐ ܠܲܟ݂ܠܝܼܠܵܐ ܕܚܲܝܠܵܐ: ܘܠܲܓ̣ܕ݂ܵܠܵܐ ܡܫܲܒ̇ܚܵܐ ܠܫܲܪܟܵܐ ܕܥܲܡܹܗ.

⁶ܠܪܘܼܚܵܐ ܕܕ݂ܝܼܢܵܐ: ܠܡܲܢ ܕܝܵܬܹܒ̣ ܥܲܠ ܕܝܼܢܵܐ ܘܓܲܢ̄ܒܵܪܘܼܬ̣ܵܐ: ܕܡܲܗܦܟ݂ܝܼܢ ܩܪܵܒ̣ܵܐ ܡ̣ܢ ܬܲܪܥܵܐ.

⁷ܐܵܦ ܗܵܠܹܝܢ ܒܚܲܡܪܵܐ ܛܥ̣ܵܘ: ܘܲܒ̣ܫܲܟ݂ܪܵܐ ܛܥ̣ܵܘ. ܟܵܗ̈ܢܹܐ ܘܲܢܒ̣ܝܹ̈ܐ ܛܥ̣ܵܘ ܒܫܲܟ݂ܪܵܐ. ܐܸܬ̣ܒ̇ܠܲܥܘ ܡ̣ܢ ܚܲܡܪܵܐ. ܙܵܥ̣ܘ ܡ̣ܢ ܫܲܟ݂ܪܵܐ. ܛܥ̣ܵܘ ܒܪܵܘܵܝܘܼܬ̣ܵܐ ܐܸܟܲܠܘ ܐܵܣܘܿܛܵܐܝܼܬ̣.

⁸ܡܸܛܠ ܕܟ݂ܠܗܘܿܢ ܦܵܬ̣ܘܿܪܹ̈ܐ ܐܸܬ̣ܡ̱ܠܝܼܘ ܬܝܘܿܒ̣ܵܐ ܘܬܸܒ̣ܬܵܐ ܡ̣ܢ ܒܠܲܝ ܐܲܬ̣ܪܵܐ.

⁹ܠܡܲܢ ܢܲܠܸܦ ܝܼܕܲܥܬ̣ܵܐ ܘܲܠܡܲܢ ܢܣܲܟܸ̇ܠ ܫܸܡܥܵܐ: ܠܕܲܚܣܝܼܠܝܼܢ ܡ̣ܢ ܚܲܠܒ̣ܵܐ: ܘܲܢܓ̣ܝܼܕ݂ܝܼܢ ܡ̣ܢ ܬܕܲܝܵـ̈ـܐ.

¹⁰ܡܸܛܠ ܬܸܒ̣ܬܵܐ ܥܲܠ ܬܸܒ̣ܬܵܐ: ܘܬܸܒ̣ܬܵܐ ܥܲܠ ܬܸܒ̣ܬܵܐ. ܘܲܬ̣ܝܘܿܒ̣ܵܐ ܥܲܠ ܬܝܘܿܒ̣ܵܐ: ܘܲܬ̣ܝܘܿܒ̣ܵܐ ܥܲܠ ܬܝܘܿܒ̣ܵܐ. ܩܲܠܝܼܠ ܠܬܲܡܵܢ: ܘܩܲܠܝܠ ܠܬܲܡܵܢ.

¹¹ܡܸܛܠ ܕܲܒ̣ܡܲܡܠܠܵܐ ܥܲܛܠܵܐ ܘܲܒ̣ܠܸܫܵܢܵܐ ܐ̄ܚܪܹܢܵܐ ܐܹܡܲܠܸܠ ܥܲܡܹܗ ܥܲܡ ܥܲܡܵܐ ܗܵܢܵܐ.

¹²ܕܐܸܡ̇ܪܹܬ̣ ܠܗܘܿܢ: ܗܵܕܲܐ ܗ̄ܝܼ ܢܝܵܚܬ̇ܝ: ܐܲܢܝܼܚܘ ܠܲܡܛܲܪ̈ܦܵܐ ܘܗܵܢܵܘ ܫܸܠܝܵܐ ܘܠܵܐ ܨܒ̣ܵܘ ܠܡܸܫܡܲܥ.

¹³ܘܲܗܘ̤ܵܬ̣ ܠܗܘܿܢ ܡܸܠܬܹܗ ܕܡܵܪܝܵܐ: ܬܸܒ̣ܬܵܐ ܥܲܠ ܬܸܒ̣ܬܵܐ: ܘܬܸܒ̣ܬܵܐ ܥܲܠ ܬܸܒ̣ܬܵܐ: ܘܲܬ̣ܝܘܿܒ̣ܵܐ ܥܲܠ ܬܝܘܿܒ̣ܵܐ: ܘܲܬ̣ܝܘܿܒ̣ܵܐ ܥܲܠ ܬܝܘܿܒ̣ܵܐ: ܩܲܠܝܼܠ ܠܬܲܡܵܢ: ܘܩܲܠܝܼܠ ܠܬܲܡܵܢ ܕܢܸܗ̄ܦܟ݂ܘܿܢ ܘܢܸܣܬܲܚܦܘܼܢ ܠܒܸܣܬܲܪܗܘܿܢ: ܘܢܸܬ̇ܬܲܒ̣ܪܘܼܢ ܘܢܸܬ̇ܬ̇ܨܝܼܕ݂ܘܼܢ ܘܢܸܬ̇ܬܲܚܕ̇ܘܼܢ.

¹⁴ܡܸܛܠ ܗܵܢܵܐ ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ ܓܲܒ̣ܪܹ̈ܐ ܡܡܲܝܩܵܢܹ̈ܐ: ܫܲܠܝܼܛܵܘ̈ܗܝ ܕܥܲܡܵܐ ܗܵܢܵܐ ܕܒ̣ܐܘܿܪܸܫܠܸܡ.

¹⁵ܡܸܛܠ ܕܐܸܡܲܪܬ̇ܘܿܢ ܕܐܲܩܝܼܡ̄ܢ ܩܝܵܡܵܐ ܥܲܡ ܡܵܘܬܵܐ: ܘܥܲܡ ܫܝܘܿܠ ܥܒܲܕ݂ܢ ܚܸܙܘܵܐ. ܫܵܘܛܵܐ ܕܲܓ̣ܪܘܼܦܝܵܐ ܟܲܕ݂ ܢܸܥܒܲܪ: ܠܵܐ ܢܹܐܬܹܐ ܥܠܲܝܢ. ܡܸܛܠ ܕܣܵܡܢ ܒܕܲܓܵܠܘܼܬ̣ܵܐ ܬܘܼܟ݂ܠܵܢܲܢ: ܘܲܒ̣ܫܘܼܩܪܵܐ ܐܸܣܬܲܬܲܪܢ.

¹⁶ܡܸܛܠ ܗܵܢܵܐ ܐܵܡܲܪ ܡܵܪܝܵܐ ܐܲܠܵܗܵܐ: ܗܵܐ ܐܸܢܵܐ ܡܲܬ̣ܩܸܢ ܐ̄ܢܵܐ ܒܨܸܗܝܘܿܢ ܟܹܐܦܵܐ: ܟܹܐܦܵܐ ܒܚܝܼܪܬܵܐ ܒܙܵܘܝܼܬ̣ܵܐ ܝܲܩܝܼܪܬܵܐ: ܪܹܫ ܐܸܣܬ̣ܵܐ ܕܫܲܬ̣ܐ̱ܣܬ̣ܵܐ. ܕܲܡܗܲܝܡܸܢ ܠܵܐ ܢܸܕ݂ܚܲܠ.

¹⁷ܘܐܹܣܝܼܡ ܕܝܼܢܵܐ ܠܲܡܫܘܼܚܬ̣ܵܐ: ܘܙܲܕ̇ܝܼܩܘܼܬ̣ܵܐ ܠܡܲܬ̣ܩܵܠܵܐ. ܘܢܸܚܒ̇ܘܿܛ ܒܲܪܕ݂ܵܐ ܠܣܲܒ̣ܪܵܐ ܕܲܓܵܠܵܐ: ܘܲܠܣܸܬܵܪܵܐ ܡܲـ̈ـܝܵܐ ܢܸܓܪ̱ܦܘܼܢ.

¹⁸ܘܢܸܬ̣ܟܲܦܲܪ ܩܝܵܡܟ݂ܘܿܢ ܕܥܲܡ ܡܵܘܬܵܐ. ܘܚܸܙ̱ܘܟ݂ܘܿܢ ܕܥܲܡ ܫܝܘܿܠ ܠܵܐ ܢܩܘܼܡ. ܫܵܘܛܵܐ ܓܵܪܘܿܦܵܐ ܟܲܕ݂ ܢܸܥܒܲܪ: ܬܸܗܘܘܿܢ ܠܹܗ ܠܲܕ݂ܝܵܫܵܐ.

¹⁹ܘܲܒ̣ܙܲܒ̣ܢܵܐ ܕܥܵܒܲܪ ܢܸܕ݂ܒܲܪܟ݂ܘܿܢ. ܡܸܛܠ ܕܲܒ̣ܨܲܦܪܵܐ ܒܨܲܦܪܵܐ ܢܸܥܒܲܪ ܒܐܝܼܡܵܡܵܐ ܘܲܒ̣ܠܸܠܝܵܐ ܗܵܘܝܵܐ ܙܵܘܥܬ̣ܵܐ. ܒܲܠܚܘܿܕ݂ ܐܸܣܬܲܟܲܠ ܫܵܡܘܿܥܵܐ.

²⁰ܡܸܛܠ ܕܟܲܪܝܼ ܡܵܐܢܵܐ ܠܡܸܣܬ̇ܪܹܗ. ܘܡܸܫܬ̇ܝܼܬ̣ܵܐ ܩܸܛܢܲܬ̤: ܘܠܵܐ ܡܡܲܠܝܵܐ.

²¹ܡܸܛܠ ܕܲܒ̣ܛܘܼܪܵܐ ܒܬ̣ܘܼܪ̱ܥܬ̣ܵܐ ܢܩܘܼܡ ܡܵܪܝܵܐ: ܐܲܝܟ݂ ܥܘܼܡܩܵܐ ܕܓܸܒ̣ܥܘܿܢ ܢܸܪܓܲܙ ܠܡܸܥܒܲܕ݂ ܥܒ̣ܵܕ݂ܵܘ̈ܗܝ: ܢܘܿܟ݂ܪ̈ܵܝܑܼܝܢ ܥܒ̣ܵܕ݂ܵܘ̈ܗܝ. ܘܲܠܡܸܥܒܲܕ݂ ܥܒ̣ܝܼ̈ܕ݂ܵܬܹܗ: ܢܘܼܟ݂ܪ̈ܵܝܵܢ ܥܒ̣ܝܼ̈ܕܵܬܹܗ.

²²ܘܗܵܫܵܐ ܠܵܐ ܬܡܲܝܩܘܼܢ: ܕܠܵܐ ܢܸܥܫ̈ܢܵܢ ܡܲܪ̈ܕ̇ܘܵܬ̣ܟ݂ܘܿܢ ܡܸܛܠ ܕܲܓ̣ܡܘܼܪܝܵܐ ܘܦܵܣܝܼ̈ܩܵܬ̣ܵܐ ܫܸܡ̇ܥܹܬ̣ ܡ̣ܢ ܡܵܪܝܵܐ ܚܲܝܠܬ̣ܵܢܵܐ: ܥܲܠ ܟܠܵܗ̇ ܐܲܪܥܵܐ.

²³ܨܘܼܬ̣ܘ ܘܲܫܡܲܥܘ ܩܵܠܝ: ܨܘܼܬܘ ܘܲܫܡܲܥܘ ܡܹܐܡܲܪܝ.

²⁴ܕܲܠܡܵܐ ܝܵܘܡܵܐ ܟܠܹܗ ܕܵܒܲܪ ܐܲܟܵܪܵܐ ܠܡܸܙܪܲܥ: ܘܙܵܩܹ̇ܦ ܘܫܵܦܹ̇ܢ ܐܲܪܥܹܗ.

²⁵ܠܵܐ ܗ̄ܘܼܵܐ ܡܵܐ ܕܐܲܫܘܼܝܼ ܐܲܦܹܝ̈ܗ̇: ܒܵܕܲܪ ܫܒ̣ܘܼܒ̣ܵܢܵܐ: ܘܟܲܡܘܼܢܵܐ ܙܵܪܲܥ. ܘܪܵܡܹ̇ܐ ܚܸܛܹ̈ܐ ܘܲܣܥܵܪܹܐ ܘܟ݂ܘܼ̈ܢܵܬܹܐ ܒܲܬ̣ܚܘܼ̈ܡܝܗ̇.

²⁶ܢܸܪܕܸ̇ܝܘܗܝ ܒܕ݂ܝܼܢܵܐ ܕܐܲܠܵܗܵܐ ܘܲܢܫܲܒ̇ܚܝܼܘܗܝ.

²⁷ܡܸܛܠ ܕܠܵܐ ܗ̄ܘܼܵܐ ܒܕܸܪܫܵܐ ܡܸܬ̇ܕܲܪܸܟ݂ ܫܒ̣ܘܼܒ̣ܵܢܵܐ. ܘܐܵܦܠܵܐ ܡܸܬ̣ܟ̇ܪܸܟ݂ ܓܲܪܓ̇ܪܵܐ ܥܲܠ ܟܲܡܘܼܢܵܐ. ܡܸܛܠ ܕܲܒ̣ܚܘܼܛܪܵܐ ܡܸܬ̣ܚܲܒܲܛ ܫܒ̣ܘܼܒ̣ܵܢܵܐ: ܘܟܲܡܘܼܢܵܐ ܒܙܸܩܬܵܐ.

²⁸ܥܒ̣ܘܼܪܵܐ ܡܸܬ̇ܕ̇ܪܸܟ݂ ܡܸܛܠܵܬܲܢ. ܡܸܛܠ ܕܠܵܐ ܗ̄ܘܼܵܐ ܠܙܵܟ݂ܘܼ ܡܲܕ݂ܪܵܟ݂ܘܼ ܐܲܕ݂ܪܸܟ݂ܢܵܝܗܝ ܘܲܒ̣ܣܘܿܓ̣ܵܐܐ ܕܓ̣ܝܼ̈ܓ̣ܠܹܐ ܕܓܲܪܓ̇ܪ̈ܵܘܗܝ: ܘܲܒ̣ܦܲܪ̈ܣܵܘܗܝ ܢܲܕ̇ܩܘܼܢܹܗ.

²⁹ܘܐܵܦ ܗܵܕܹܐ ܩܕ݂ܵܡ ܡܵܪܝܵܐ ܚܲܝܠܬ̣ܵܢܵܐ ܢܸܦܩܲܬ̤ ܕܘܼܡܵܪܵܐ ܕܬܲܪܥܝܼܬ̣ܵܐ ܐܵܘܪܸܒ̣ ܬܲܪܒ̇ܝܼܬ̣ܵܐ.