Read Aramaic Peshita Isaiah 3 Bible Online

Isaiah 3 - Aramaic Peshita bible

Isaiah 3

¹ܡܸܛܠ ܕܗܵܐ ܡܵܪܹܐ ܡܵܪ̈ܵܘܵܬ̣ܵܐ: ܡܲܥܒܲܪ ܡܢ ܐܘܿܪܸܫܠܸܡ: ܘܡ̣ܢ ܝܼܗܘܼܕ݂ܵܐ: ܣܵܡ̇ܘܿܟ݂ܵܐ ܘܣܵܡ̇ܘܿܟ݂ܬܵܐ: ܟܠ ܕܣܵܡܹ̇ܟ݂ ܒܠܲܚܡܵܐ: ܘܟ݂ܠ ܕܣܵܡܹ̇ܟ݂ ܒܡܲـ̈ـܝܵܐ.

²ܘܓܲܢ̄ܒܵܪܵܐ ܘܓܲܒ̣ܪܵܐ ܩܪܲܒ̣ܬ̣ܵܢܵܐ: ܘܕܲܝܵܢܵܐ ܘܲܢܒ̣ܝܼܵܐ ܘܩܵܨܘܿܡܵܐ ܘܩܲܫܝܼܫܵܐ.

³ܘܪܹܫ ܚܲܡܫܝܼܢ: ܘܲܗܕ݂ܝܼܪ ܐܲܦܹ̈ܐ: ܘܡܵܠܘܿܟ݂ܵܐ ܘܚܲܟ̇ܝܼܡ ܢܲܓܵܪܹ̈ܐ: ܘܲܕ݂ܡܸܬ̣ܒܲܝܲܢ ܒܡܸܠܟܵܐ.

⁴ܘܐܲܩܝܼܡ ܥܠܲܝܡܹ̈ܐ ܪܵܘ̱ܪ̈ܒ̣ܵܢܲܝܗܘܿܢ: ܘܲܡܒܲܙܚܵܢܹ̈ܐ ܢܸܫܬܲܠܛܘܼܢ ܒܗܘܿܢ.

⁵ܘܢܸܦܸܠ ܥܲܡܵܐ ܓܒܲܪ ܒܲܓ̣ܒܲܪ: ܓܲܒ̣ܪܵܐ ܒܚܲܒ̣ܪܹܗ. ܘܢܸܬ̣ܓܲܪܘܿܢ ܥܠܲܝܡܹ̈ܐ ܥܲܠ ܣܵܒܹ̈ܐ: ܘܲܡܨܲܥܪܹ̈ܐ ܥܲܠ ܡܝܲܩܪܹ̈ܐ.

⁶ܡܸܛܠ ܕܢܹܐܚܘܿܕ݂ ܓܲܒ̣ܪܵܐ ܓܒܲܪ ܠܐܲܚܘܼܗܝ ܡ̣ܢ ܒܹܝܬ̣ ܐܲܒ̣ܘܼܗܝ: ܘܢܹܐܡܲܪ ܠܹܗ: ܢܲܚ̈ܬܹ̇ܐ ܐܝܼܬ̣ ܠܵܟ݂. ܗ̤ܘܝܼ ܠܲܢ ܫܲܠܝܼܛܵܐ. ܘܬ̣ܘܼܩ̱ܠܬ̣ܵܐ ܗܵܕܹܐ ܬܚܹܝܬ̣ ܐܝܼܕ݂ܵܟ݂.

⁷ܘܢܸܥܢܹܐ ܒܝܵܘܡܵܐ ܗܵܘܿ: ܘܢܹܐܡܲܪ: ܠܵܐ ܗܵܘܹ̇ܐ ܐ̄ܢܵܐ ܪܹܫܵܐ. ܕܲܒ̣ܒܲܝܬ̇ܝܼ ܠܲܝܬ̇ ܠܲܚܡܵܐ: ܘܐܵܦܠܵܐ ܬܲܟ݂ܣܝܼܬ̣ܵܐ. ܠܵܐ ܬܸܥܒ̇ܕ݂ܘܼܢܢܝ ܫܲܠܝܼܛܵܐ ܥܲܠ ܥܲܡܵܐ.

⁸ܡܸܛܠ ܕܐܸܬ̇ܬܲܩܠܲܬ̤ ܐܘܿܪܸܫܠܸܡ: ܘܲܝܗܘܼܕ݂ܵܐ ܢܦܲܠ̣. ܡܸܛܠ ܕܠܸܫܵܢܗܘܿܢ ܘܲܥܒ̣ܵܕ݂ ܐܝܼܕܲܝ̈ܗܘܿܢ ܡܲܪܡܲܪܘ ܩܕ݂ܵܡ ܡܵܪܝܵܐ: ܘܠܲܥܢܵܢܵܐ ܕܐܝܼܩܵܪܹܗ.

⁹ܡܲܣܲܒ̣ ܒܐܲܦܲܝ̈ܗܘܿܢ ܣܵܗܹܕ݂ ܒܗܘܿܢ. ܘܲܚܛܵܗܲܝ̈ܗܘܿܢ ܐܲܝܟ݂ ܣܕ݂ܘܿܡ ܚܵܘܝܼܘ: ܘܠܵܐ ܐܸܬ̇ܬ̇ܟܸܣܘ ܘܵܝ ܠܢܲܦ̮ܫܗܘܿܢ: ܕܐܲܪܡܝܼܘ ܠܗܘܿܢ ܚܘܼܒ̣̈ܠܹܐ ܒܝܼܫܹ̈ܐ.

¹⁰ܐܸܡܲܪܘ ܠܙܲܕ̇ܝܼܩܵܐ ܛܵܒ̣: ܡܸܛܠ ܗܵܢܵܐ ܦܹܐܪ̈ܲܝ ܥܒ̣ܵܕܲܝ̈ܗܘܿܢ ܢܹܐܟ݂ܠܘܿܢ.

¹¹ܘܵܝ̇ ܠܪܲܫܝܼܥܵܐ ܒܝܼܫܵܐ: ܡܸܛܠ ܕܲܥܒܲܕ݂ ܐܝܼܕ݂ܵܘ̈ܗܝ ܡܸܬ̣ܦܪܲܥ.

¹²ܫܲܠܝܼ̈ܛܵܘܗܝ ܕܥܲܡܝ ܡܒܲܥܪܝܼܢ ܠܹܗ. ܘܢܸܫܹ̈ܐ ܐܸܫܬܲܠܲܛ ܒܹܗ ܥܲܡܝ ܡܲܛܐ̱ܒ̣ܵܢܲܝ̈ܟ ܐܲܛܥ̱ܝܘܼܟ݂. ܘܐܘܼܪܚܵܐ ܕܲܫܒ̣̈ܝܼܠܲܝܟ ܕܲܠܲܚ̣ܘ.

¹³ܩܵܐܹ̇ܡ ܠܲܡܕ݂ܵܢ ܡܵܪܝܵܐ: ܘܩܵܐܹ̇ܡ ܠܲܡܕ݂ܵܢ ܠܥܲܡܹܗ.

¹⁴ܡܵܪܝܵܐ ܒܕ݂ܝܼܢܵܐ ܢܸܥܘܿܠ: ܘܥܲܡ ܣܵܒܹ̈ܐ ܕܥܲܡܹܗ: ܘܥܲܡ ܪܵܘ̱ܪ̈ܒ̣ܵܢܵܘܗܝ. ܐܲܢ̄ܬ̇ܘܿܢ ܐܵܘܩܸܕ̇ܬ̇ܘܿܢ ܟܲܪܡܵܐ. ܘܲܚܛܘܼܦܝܵܐ ܕܡܸܣܟܹ̇ܢܹ̈ܐ ܒܒ̣ܵܬܲܝ̈ܟ̇ܘܿܢ.

¹⁵ܠܡܵܢܵܐ ܢܟܲܝܬ̇ܘܿܢ ܠܥܲܡܝ: ܘܐܲܦܹ̈ܐ ܕܡܸܣܟܹ̇ܢܹ̈ܐ ܐܲܒ̣ܗܸܬ̇ܬ̇ܘܿܢ: ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

¹⁶ܥܲܠ ܕܐܸܬ̇ܬ̇ܪܝܼܡ ܒ̈ܢܵܬ̣ ܨܸܗܝܘܿܢ: ܘܗܲܠܸܟ݂ ܒܨܵܘܪܵܐ ܪܵܡܵܐ. ܘܲܒ̣ܪܸܡܙܵܐ ܕܥܲܝܢܹ̈ܐ ܡܗܲܠ̈ܟ݂ܵܢ ܗ̄ܘܲܝ̈. ܘܲܡܛܲܪ̈ܦܵܢ ܒܪܸ̈ܓ̣ܠܲܝܗܹܝܢ: ܘܡܲܪ̈ܓ̇ܙܵܐ.

¹⁷ܢܡܲܟܸ̇ܟ݂ ܡܵܪܝܵܐ ܪܹ̈ܫܵܝܵܬ̣ܵܐ ܕܲܒ̣̈ܢܵܬ̣ ܨܸܗܝܘܿܢ. ܘܡܵܪܝܵܐ ܐܸܣܟܹ̇ܡܗܹܝܢ ܢܦܲܪܣܸܐ.

¹⁸ܒܝܵܘܡܵܐ ܗܵܘܿ: ܢܲܥܒܲܪ ܡܵܪܝܵܐ ܫܘܼܒ̣ܚܵܐ ܕܢܲܚܬܲܝ̈ܗܹܝܢ. ܘܲܕ݂ܨܸܒ̣ܬ̇ܗܹܝܢ: ܘܕܲܓ̣ܕ݂ܘܿܠܲܝ̈ܗܹܝܢ.

¹⁹ܘܐܸܣܦܹܝܪܹ̈ܐ ܕܣܲܥܪ̈ܲܝܗܹܝܢ: ܘܒܸܠܘܿܪ̈ܲܝܗܹܝܢ: ܘܨܸܕ݂ܥܲܝ̈ܗܹܝܢ.

²⁰ܘܨܸܒ̣ܬܵܐ ܕܐܲܦܲܝ̈ܗܹܝܢ: ܘܲܩܕ݂ܵܫܲܝ̈ܗܹܝܢ: ܘܥܸܩܲܝ̈ܗܹܝܢ.

²¹ܘܐܲܩ̈ܠܵܢܲܝܗܹܝܢ: ܘܩܘܿܠܒܲܝ̈ܗܹܝܢ: ܘܫܹܐܪ̈ܲܝܗܹܝܢ.

²²ܘܟ݂ܘܼܬ̇ܝܼܢ̈ܝܵܬ̣ܗܹܝܢ: ܘܲܡܫܲܠܡܵܢ̈ܝܵܬ̣ܗܹܝܢ: ܘܒ̣ܘܼܨܗܹܝܢ: ܘܐܲܪ̈ܓ̇ܘܵܢܲܝܗܹܝܢ.

²³ܘܢܲܚܬܲܝ̈ܗܹܝܢ: ܘܬܸܟ݂̈ܠ̱ܝܵܬ̣ܗܹܝܢ: ܘܲܙܚܘܿܪ̈ܝܵܬ̣ܗܹܝܢ: ܘܨܸܡܕܵܐ ܟܠܹܗ ܕܨܸܒ̣ܬ̇ܗܹܝܢ.

²⁴ܘܢܸܗܘܸܐ ܚܸܠܵܐ ܚܠܵܦ ܪܹܝܚܗܹܝܢ ܒܲܣܝܼܡܵܐ. ܘܲܚܠܵܦ ܐܲܣܵܪ ܚܲܨܲܝ̈ܗܹܝܢ ܡܝܼܙܪ̈ܵܢܹܐ ܢܹܐܣܪ̈ܵܢ. ܘܲܚܠܵܦ ܒܸܠܘܿܪܹ̈ܐ: ܩܘܼܕ݂ܚܵـ̈ـܬ̣ܵܐ. ܘܲܚܠܵܦ ܬܸܟ݂ܠ̈ܝܵܬ̣ܗܹܝܢ: ܣܲܩܹ̈ܐ ܢܸܬ̣ܟܲܣ̈ܝܵܢ. ܡܸܛܠ ܕܢܸܬ̣ܚܲܒܲܠ ܫܘܼܦ̱ܪܗܹܝܢ.

²⁵ܘܥܲܫܝܼܢܲܝ̈ܟ̇ܝ ܒܚܲܪܒܵܐ ܢܸܦܠܘܼܢ: ܘܓܲܢ̄ܒܵܪ̈ܲܝܟ̇ܝ ܒܲܩܪܵܒ̣ܵܐ.

²⁶ܘܢܹܐܠܘܿܢ: ܘܢܸܬ̇ܒ̣ܘܼܢ ܒܐܸܒ̣ܠܵܐ ܬܲܪ̈ܥܹܝܗ̇. ܘܙܵܟ݂ܘܼܬ̣ܵܗ̇ ܒܐܲܪܥܵܐ ܬܸܦܸܠ.