Read Aramaic Peshita Isaiah 32 Bible Online

Isaiah 32 - Aramaic Peshita bible

Isaiah 32

¹ܗܵܐ ܒܙܲܕ̇ܝܼܩܘܼܬ̣ܵܐ ܡܲܠܟܵܐ. ܘܪܵܘ̱ܪ̈ܒ̣ܵܢܹܐ ܒܕ݂ܝܼܢܵܐ ܢܸܫܬܲܠܛܘܼܢ.

²ܘܢܸܗܘܹܐ ܓܲܒ̣ܪܵܐ ܐܲܝܟ݂ ܓܸܢܝܵܐ ܠܪܘܼܚܵܐ. ܘܐܲܝܟ݂ ܣܸܬܵܪܵܐ ܠܙܵܪܝܼܦ̮ܬܵܐ: ܘܐܲܝܟ݂ ܬܲܦܵܐ ܕܡܲـ̈ـܝܵܐ ܒܨܲܗܝܵܐ: ܘܐܲܝܟ݂ ܛܸܠܵܠܵܐ ܕܟܹܐܦܵܐ ܥܲܫܝܼܢܬܵܐ ܒܐܲܪܥܵܐ ܡܛܲܪܦܬܵܐ.

³ܘܠܵܐ ܢܸܬ̇ܬ̇ܫ̈ܝܼܥܵܢ ܥܲܝܢܲܝ̈ܗܘܿܢ ܕܐܲܝܠܹܝܢ ܕܚܵܙܹ̇ܝܢ. ܘܐܸܕ݂ܢܲܝ̈ܗܘܿܢ ܕܐܲܝܠܹܝܢ ܕܫܵܡ̇ܥܝܼܢ: ܢܨܘܼ̈ܬ̣ܵܢ.

⁴ܘܠܸܒܵܐ ܕܲܣܟܲܠ ܢܸܣܬܲܟܲܠ ܝܑܼܕܲܥܬ̣ܵܐ: ܘܠܸܫܵܢܵܐ ܕܠܲܥܓܵܐ ܢܸܣܬܲܪܗܲܒ̣ ܠܲܡܡܲܠܵܠܘܼ ܫܠܵܡܵܐ.

⁵ܘܠܵܐ ܢܸܩܪܘܼܢ ܬܘܼܒ̣ ܠܫܵܛܝܵܐ ܫܲܠܝܼܛܵܐ. ܐܵܦܠܵܐ ܠܲܣܪܝܼܩܵܐ ܢܸܩܪܘܿܢ ܦܵܪܘܿܩܵܐ.

⁶ܡܸܛܠ ܕܫܵܛ̇ܝܵܐ ܫܵܛܝܘܼܬ̣ܵܐ ܡܡܲܠܸܠ ܘܠܸܒܹ̇ܗ ܚܵܫܹ̇ܠ ܥܵܘܼܠܵܐ. ܕܢܸܥܒܸ̇ܕ݂ ܚܲܠܦܘܼܬ̣ܵܐ: ܘܲܢܡܲܠܸܠ ܥܲܠ ܛܵܥ̇ܝܘܼܬ̣ܵܐ: ܘܲܢܣܲܪܸܩ ܢܲܦ̮ܫܵܐ ܕܟܲܦܢܵܐ: ܘܡܲܫܬ̇ܝܵܐ ܕܨܲܗܝܵܐ ܢܓܲܝܸܙ.

⁷ܒܝܼܫܝܼܢ ܐܸܢܘܿܢ ܡܵܐܢܵܘ̈ܗܝ ܕܲܣܪܝܼܩܵܐ. ܘܗ̤ܘ ܬܲܪܥܝܼܬ̣ܵܐ ܡܸܬ̣ܚܲܫܲܒ̣: ܠܲܡܚܲܒܵܠܘܼ ܡܸܣܟܹ̇ܢܹ̈ܐ ܒܡܹܐܡܪܵܐ ܕܫܘܼܩܪܵܐ: ܘܡܸܠܬܹܗ ܕܒ̣ܵܝܫܵܐ ܒܕ݂ܝܼܢܵܐ.

⁸ܘܪܲܒܵܐ ܪܲܒ̇ܘܼܬ̣ܵܐ ܡܸܬ̣ܪܲܥܹܐ ܘܗ̤ܘ ܥܲܠ ܪܲܒ̇ܘܼܬ̣ܵܐ ܢܩܘܼܡ.

⁹ܢܸܫܹ̈ܐ ܥܲܬ̇ܝܼܪ̈ܵܬ̣ܵܐ: ܩܘܼܡܹ̈ܝܢ ܫܡܲܥܹ̈ܝܢ ܩܵܠܝ. ܒܢܵـ̈ـܬ̣ܵܐ ܕܲܡܣܲܒ̇ܪ̈ܵܢ: ܨܘܼ̈ܬܹܝܢ ܡܸܠܲܝ.

¹⁰ܝܵܘ̈ܡܵܬ̣ܵܐ ܕܫܲܢ̄ܬܵܐ ܢܸܪ̈ܓ̇ܙܵܢ ܐܲܝܠܹܝܢ ܕܲܡܣܲܒ̇ܪ̈ܵܢ. ܡܸܛܠ ܕܲܓ̣ܡܲܪ ܩܛܵܦܵܐ: ܘܐܸܬ̣ܚ̄ܡܸܠ: ܘܠܵܐ ܐܸܬ̣ܵܐ.

¹¹ܙܘܼܥܹ̈ܝܢ ܥܲܬ̇ܝܼܪ̈ܵܬ̣ܵܐ: ܘܲܪܓܲܙܹܝܢ ܐܲܝܠܹܝܢ ܕܲܡܣܲܒ̇ܪ̈ܵܢ ܫܠܲܚܹ̈ܝܢ ܥܲܪܛܸܠ: ܡܚܵܝܑܹܝ̈ܢ ܣܲܩܹ̈ܐ ܒܚܲܨܲܝܟܹ̇ܝ̈ܢ.

¹²ܘܥܲܠ ܬܕܲܝ̈ܟܹ̇ܝܢ ܐܲܪ̈ܩܸܕܹܝܢ: ܥܲܠ ܬܸܕ݂ܐܵܐ ܕܚܲܩܠܵܐ: ܘܥܲܠ ܓܦܸܬܵܐ ܕܦܹܐܪܹ̈ܝܗ̇.

¹³ܘܥܲܠ ܐܲܪܥܹܗ ܕܥܲܡܝ ܟܘܼ̈ܒܹ̇ܐ ܘܝܲܥܪܵܐ ܢܹܐܥܘܿܢ: ܘܲܒ̣ܟ݂ܠܗܘܿܢ ܒܵـ̈ـܬܹ̇ܐ ܕܚܲܕ݂ܘܼܬ̣ܵܐ: ܘܒܲܩܪܝܼܬ̣ܵܐ ܥܲܫܝܼܢܬܵܐ.

¹⁴ܡܸܛܠ ܕܢܵܘܣܵܐ ܐܸܬ̇ܛܥܝܼ. ܘܚܲܝܠܵܐ ܕܲܩܪܝܼܬ̣ܵܐ ܐܸܫܬ̇ܒܸܩ. ܘܫܘܼܦ̱ܪܗܘܿܢ ܕܒ̣ܵـ̈ـܬܹ̇ܐ ܗܘ̤ܵܐ ܠܲܡܥܲܪܹ̈ܐ ܥܕܲܡܵܐ ܠܥܵܠܲܡ. ܟܘܼ̈ܒܹ̇ܐ ܘܚܲܕ݂ܘܼܬ̣ܵܐ ܠܲܥܪ̈ܵܕܹܐ: ܘܒܹܝܬ̣ ܪܸܥܝܵܐ ܠܲܓ̣ܙܵܪܹ̈ܐ ܕܥܵـ̈ـܢܵܐ.

¹⁵ܥܕܲܡܵܐ ܕܬܸܬ̇ܥܝܼܪ ܥܠܲܝܢ ܪܘܼܚܵܐ ܡ̣ܢ ܡܪܵܘܡܵܐ: ܘܢܸܗܘܐ ܡܲܘܒ̇ܪܵܐ ܐܲܝܟ݂ ܟܲܪܡ̄ܠܵܐ: ܘܟܲܪܡ̄ܠܵܐ ܐܲܝܟ݂ ܥܒ̣ܵܐ ܢܸܬ̣ܚܫܸܒ̣.

¹⁶ܘܢܸܫܪܹܐ ܕܝܼܢܵܐ ܒܡܲܕ݂ܒ̇ܪܵܐ: ܘܙܲܕ̇ܝܼܩܘܼܬ̣ܵܐ ܒܟܲܪܡ̄ܠܵܐ ܬܸܬ̣̱ܝܼܗܸܒ̣.

¹⁷ܘܢܸܗܘܹܐ ܥܒ̣ܵܕ݂ܵܗ̇ ܕܙܲܕ̇ܝܼܩܘܼܬ̣ܵܐ ܫܠܵܡܵܐ: ܘܦܘܼܠܚܵܢܵܗ̇ ܕܙܲܕ̇ܝܼܩܘܼܬ̣ܵܐ ܫܸܠܝܵܐ: ܘܣܲܒ̣ܪܵܐ ܠܥܵܠܲܡ ܥܵܠܡܝܼܢ.

¹⁸ܘܢܸܬܸ̇ܒ̣ ܥܲܡܝ ܒܕܲܝܪܵܐ ܕܲܫܠܵܡܵܐ: ܘܲܒ̣ܡܲܫܟ̇ܢܵܐ ܕܣܲܒ̣ܪܵܐ: ܘܒܹܝܬ̣ ܡܲܫ̱ܪܝܵܐ ܕܣܲܒ̣ܪܵܐ.

¹⁹ܘܲܒ̣ܪܕ݂ܵܐ ܢܸܚܘܿܬ̣ ܥܲܠ ܥܵܒ̣ܵܐ: ܘܐܲܝܟ݂ ܦܩܲܥܬ̣ܵܐ ܬܸܬ̣ܡ̱ܟܸܟ݂ ܡܕ݂ܝܼܢ̄ܬܵܐ.

²⁰ܛܘܼܒܲܝܟ̇ܘܿܢ ܕܙܵܪܥܝܼܢ ܥܲܠ ܟܠ ܡܝܼ̈ܢ: ܟܲܪ ܕܕ݂ܵܪܹܟ݂ ܬܵܘܪܵܐ ܘܲܚܡܵܪܵܐ.