Read Aramaic Peshita Isaiah 34 Bible Online

Isaiah 34 - Aramaic Peshita bible

Isaiah 34

¹ܐܲܬ̣ܪܵܐ ܕܕ݂ܝܼܢܵܐ. ܩܪܘܿܒ̣ܘ ܥܲܡܡܹ̈ܐ ܠܡܸܫܡܲܥ: ܘܨܘܼ̈ܬܹܝܢ ܐܸܡ̈ܘܵܬ̣ܵܐ. ܬܸܫܡܲܥ ܐܲܪܥܵܐ ܒܲܡܠܹܐܵܗ̇: ܘܟ݂ܠܗܘܿܢ ܥܵܡܘܿܪܹ̈ܝܗ̇.

²ܡܸܛܠ ܕܪܘܼܓ̣ܙܹܗ ܕܡܵܪܝܵܐ ܥܲܠ ܟܠܗܘܿܢ ܥܲܡܡܹ̈ܐ. ܘܚܸܡܬܹܗ ܥܲܠ ܟܠܹܗ ܚܲܝܠܗܘܿܢ ܕܢܸܚܪܘܿܒ̣ ܐܸܢܘܿܢ: ܘܢܲܫܠܸܡ ܐܸܢܘܿܢ ܠܩܸܛܠܵܐ.

³ܘܢܸܫܬ̇ܕ݂ܘܿܢ ܩܛܝܼܠܲܝ̈ܗܘܿܢ. ܘܢܸܡܚܸܐ ܪܹܝܚܵܐ ܕܲܫܠܲܕܲܝ̈ܗܘܿܢ. ܘܢܸܬ̣ܡ̱ܣܘܿܢ ܛܘܼܪܹ̈ܐ ܡ̣ܢ ܕܸܡܗܘܿܢ.

⁴ܘܢܸܬ̣ܡ̱ܣܘܿܢ ܟܠ ܚܲܝܠܵـ̈ـܘܵܬ̣ܵܐ ܕܲܫܡܲܝܵܐ. ܘܢܸܬ̣ܟܲܪܟ̇ܘܼܢ ܫܡܲܝܵܐ ܐܲܝܟ݂ ܡܓܲܠܬ̣ܵܐ. ܘܟ݂ܠܹܗ ܚܲܝܠܗܘܿܢ ܢܸܬܲܪ: ܐܲܝܟ݂ ܛܲܪܦܵܐ ܕܢܵܬܲܪ ܡ̣ܢ ܓܦܸܬܵܐ: ܘܐܲܝܟ݂ ܦܲܩܘܼܥܵܐ ܡ̣ܢ ܬܹܬܵܐ.

⁵ܡܸܛܠ ܕܬܸܬ̣ܪ̱ܘܸܐ ܚܲܪܒ̇ܝ ܒܲܫܡܲܝܵܐ. ܗܵܐ ܥܲܠ ܐܲܕ݂ܘܿܡܵܝܹ̈ܐ ܬܸܚܘܿܬ̣: ܥܲܠ ܥܲܡܵܐ ܕܐܸܬ̣ܚܲܝܲܒ̣ ܒܕ݂ܝܼܢܵܐ.

⁶ܚܲܪܒܹ̇ܗ ܕܡܵܪܝܵܐ ܡܲܠܝܵܐ ܕܡܵܐ. ܐܸܬ̇ܕܲܗܢܲܬ̤ ܡ̣ܢ ܕܡܵܐ ܘܡ̣ܢ ܬܲܪܒܵܐ ܕܲܡܦܲܛܡܹ̈ܐ: ܘܕܲܓ̣ܕܲܝܵܐ: ܘܬܲܪܒܵܐ ܕܟ݂ܘܿܠ̈ܝܵܬ̣ܵܐ ܕܕܸܟ݂ܪܹ̈ܐ. ܡܸܛܠ ܕܕܸܒ̣ܚ̱ܬ̣ܵܐ ܠܡܵܪܝܵܐ ܒܒ̣ܘܼܨܵܪ: ܘܩܸܛܠܵܐ ܪܲܒܵܐ ܒܐܲܪܥܵܐ ܕܐܲܕ݂ܘܿܡ.

⁷ܘܢܸܦܠܘܼܢ ܪ̈ܲܝܡܹܐ ܥܲܡܗܘܿܢ: ܘܬ̣ܵܘܪܹ̈ܐ ܥܲܡ ܐܲܪ̈ܘܵܢܹܐ. ܘܬܸܬ̣ܪ̱ܘܐ ܐܲܪܥܵܐ ܡ̣ܢ ܕܸܡܗܘܿܢ. ܘܥܲܦܪܵܐ ܡ̣ܢ ܬܲܪܒ̇ܗܘܿܢ ܢܸܕ݂ܗܲܢ.

⁸ܡܸܛܠ ܕܝܵܘܡܵܐ ܕܲܬ̣ܒܲܥܬ̣ܵܐ ܠܡܵܪܝܵܐ: ܘܫܲܢ̄ܬܵܐ ܕܦܘܼܪܥܵܢܵܐ ܠܕܲܝܵܢܵܐ ܕܨܸܗܝܘܿܢ.

⁹ܘܢܸܬ̣ܦܟ̇ܘܿܢ ܢܲܚ̈ܠܹܝܗ̇ ܠܙܸܦ̮ܬܵܐ: ܘܥܲܦܪܵܗ̇ ܠܟܸܒ̣ܪܝܼܬ̣ܵܐ ܘܬܸܗܘܹܐ ܐܲܪܥܵܗ̇ ܙܸܦܬܵܐ ܕܝܵܩܕܵܐ.

¹⁰ܘܠܵܐ ܬܸܕ݂ܥܲܟ݂ ܠܸܠܝܵܐ ܘܐܝܼܡܵܡܵܐ ܘܲܠܥܵܠܲܡ ܢܸܣܲܩ ܬܸܢܵܢܵܗ̇ ܘܬܸܚܪܲܒ̣ ܠܕ݂ܵܪܕܵܪ̈ܝܼܢ. ܘܲܠܥܵܠܲܡ ܥܲܠܡܝܼܢ ܐ̄ܢܵܫ ܠܵܐ ܢܸܥܒܲܪ ܒܵܗ̇.

¹¹ܕܢܹܐܪܬ̇ܘܼܢܵܗ̇ ܩܵܩܹ̈ܐ ܘܩܘܼ̈ܦܕܹܐ. ܘܩܲܦܘܼ̈ܦܹܐ ܘܢܲܥܒܹ̈ܐ ܢܸܫܪܘܿܢ ܒܵܗ̇.

¹²ܘܢܸܬ̣ܡ̱ܬܲܚ ܥܠܹܝܗ̇ ܚܘܼܛܵܐ ܕܚܲܪܒܵܐ ܘܠܵܐ ܬܸܗܘܹܐ ܬܲܡܵܢ ܚܲܕ݂ܘܼܬ̣ܵܐ. ܐܵܦܠܵܐ ܢܸܩܪܘܿܢ ܬܲܡܵܢ ܡܲܠܟ̇ܘܼܬ̣ܵܐ. ܘܟ݂ܠܗܘܿܢ ܪܵܘ̱ܪ̈ܒ̣ܵܢܹܝܗ̇ ܢܸܗܘܘܿܢ ܠܐܲܒ̣ܕܵܢܵܐ.

¹³ܘܢܹܐܥܘܿܢ ܟܘܼ̈ܒܹ̇ܐ ܒܣܵܚܪ̈ܵܬ̣ܵܗ̇: ܘܩܘܼܪ̈ܛܒܹܐ ܘܕܲܕ̇ܪܹ̈ܐ ܒܥܘܼܫܢܵܗ̇. ܘܬܸܗܘܹܐ ܕܲܝܪܵܐ ܕܝܵܪܘܿܪܹ̈ܐ: ܘܒܹܝܬ̣ ܪܸܥܝܵܐ ܠܲܒ̣̈ܢܵܬ̣ ܢܲܥܵܡܹ̈ܐ.

¹⁴ܘܢܹܐܪܥܘܼܢ ܒܵܗ̇ ܪ̈ܘܼܚܹܐ ܒܦܸܓܥܹ̈ܐ. ܘܫܹܐܕ݂ܵܐ ܠܚܲܒ̣ܪܹܗ ܢܸܩܪܸܐ. ܬܲܡܵܢ ܐܸܬ̇ܬ̇ܢܝܼܚܲܬ̣ ܠܸܠܝܼܬ̣ܵܐ. ܘܐܸܫܟ̇ܚܲܬ̤ ܠܵܗ̇ ܢܝܵܚܵܐ.

¹⁵ܘܬܲܡܵܢ ܐܲܩܢܲܬ̤ ܩܘܼܦܕܵܐ: ܘܐܸܬ̣ܢܲܦܨܲܬ̤ ܘܚܸܠܕܲܬ̣ ܘܒܸܙܥܲܬ̣ ܒܛܸܠܵܠܵܗ̇. ܘܬܲܡܵܢ ܐܸܬ̣ܟܲܢܲܫ ܕܲܝܵـ̈ـܬ̣ܵܐ ܚܕ݂ܵܐ ܠܘܵܬ̣ ܚܕ݂ܵܐ.

¹⁶ܒܥܵܘ ܒܲܟ݂ܬ̣ܵܒܹܗ ܕܡܵܪܝܵܐ ܘܲܩܪܵܘ. ܕܲܚܕ݂ܵܐ ܡܸܢܗܹܝܢ ܠܵܐ ܛܥܵܬ̤. ܘܲܚܕ݂ܵܐ ܠܲܚܕ݂ܵܐ ܠܵܐ ܒܥܲܝ̈. ܐܸܠܵܐ ܗ̤ܘ ܦܩܲܕ݂ ܒܦܘܼܡܹܗ. ܘܪܘܼܚܹܗ ܟܲܢܫܲܬ̤ ܐܸܢܹܝܢ.

¹⁷ܘܗ̤ܘ ܐܲܪܡܝܼ ܠܗܹܝܢ ܦܸܨܹ̈ܐ. ܘܐܝܼܕܹܗ ܦܲܠܓܲܬ̤ ܠܗܹܝܢ ܡܘܼܫ̈ܚܵܬ̣ܵܐ: ܕܲܥܕܲܡܵܐ ܠܥܵܠܲܡ ܢܹܐܪ̈ܬܵܢܵܗ̇: ܘܲܠܕ݂ܵܪܕܵܪ̈ܝܼܢ ܢܸܫ̱ܪ̈ܝܵܢ ܒܵܗ̇.