Read Aramaic Peshita Isaiah 37 Bible Online

Isaiah 37 - Aramaic Peshita bible

Isaiah 37

¹ܘܲܗܘ̤ܵܐ ܕܟܲܕ݂ ܫ̣ܡܲܥ ܚܹܙܲܩܝܵܐ ܡܲܠܟܵܐ: ܨܲܪܝܼ ܢܲܚܬܵܘ̈ܗܝ: ܘܐܸܬ̣ܟܲܣܝܼ ܣܲܩܵܐ. ܘܥܲܠ ܠܒܲܝܬܹ̇ܗ ܕܡܵܪܝܵܐ.

²ܘܫܲܕܲܪ ܠܐܹܠܝܵܩܝܼܡ ܪܲܒ̇ܒܲܝܬܵܐ: ܘܲܠܫܲܒ̣ܢܵܐ ܣܵܦ̇ܪܵܐ: ܘܲܠܣܵܒܹ̈ܐ ܕܟ݂ܵܗܢܹ̈ܐ ܟܲܕ݂ ܡܟܲܣܹܝܢ ܣܲܩܹ̈ܐ: ܠܘܵܬ̣ ܐܹܫܲܥܝܵܐ ܢܒ̣ܝܼܵܐ ܒܲܪ ܐܵܡܘܿܨ.

³ܘܐܸܡܲܪܘ ܠܹܗ: ܗܵܟܲܢܵܐ ܐܵܡܲܪ ܚܹܙܲܩܝܵܐ: ܝܵܘܡܵܐ ܗ̄ܘܼ ܕܐܘܼܠܨܵܢܵܐ: ܘܲܕ݂ܡܲܟ̇ܣܵܢܘܼܬ̣ܵܐ: ܘܲܕ݂ܪܘܼܓ̣ܙܵܐ: ܝܵܘܡܵܢܵܐ. ܡܸܛܠ ܕܡܲܛܝܼܘ ܚܸܒ̣̈ܠܹܐ ܕܲܒ̣ܢܲـ̈ـܝܵܐ. ܘܠܲܝܬ̇ ܚܲܝܠܵܐ ܒܝܵܠܕ̇ܬܵܐ.

⁴ܟܒܲܪ ܢܸܫܡܲܥ ܡܵܪܝܵܐ ܐܲܠܵܗܵܟ݂ ܡܸܠܵܘ̈ܗܝ ܕܪܲܒ̇ ܫܵܩܹ̈ܐ. ܘܫܲܕ̇ܪܹܗ ܡܵܪܹܗ ܡܲܠܟܵܐ ܐܵܬ̣ܘܿܪܵܝܵܐ: ܕܲܢܚܲܣܸܕ݂ ܠܐܲܠܵܗܵܐ ܚܲܝܵܐ. ܘܢܲܟ̇ܣܝܼܘܗܝ ܒܡܸܠܹ̈ܐ ܕܲܫ̣ܡܲܥ ܡܵܪܝܵܐ ܐܲܠܵܗܵܟ݂. ܘܬܸܒ̣ܥܹܐ ܘܲܬ̣ܨܲܠܸܐ ܥܲܠ ܫܲܪܟܵܐ ܕܐܸܫܬ̇ܚܲܪܘ.

⁵ܘܐܸܬ̣ܵܘ ܥܲܒ̣ܕܵܘ̈ܗܝ ܕܚܹܙܲܩܝܵܐ ܡܲܠܟܵܐ ܠܘܵܬ̣ ܐܹܫܲܥܝܵܐ.

⁶ܘܐܸܡܲܪ ܠܗܘܿܢ ܐܹܫܲܥܝܵܐ: ܗܵܟܲܢܵܐ ܐܸܡܲܪܘ ܠܡܵܪܟ݂ܘܿܢ: ܗܵܟܲܢܵܐ ܐܵܡܲܪ ܡܵܪܝܵܐ: ܠܵܐ ܬܸܕ݂ܚܲܠ ܡ̣ܢ ܡܸܠܹ̈ܐ ܕܲܫܡܲܥܬ̇: ܕܓܲܕܸ̇ܦ̣ܘ ܩܕ݂ܵܡܲܝ ܐܝܼܙܓܲܕܵܘ̈ܗܝ ܕܡܲܠܟܵܐ ܕܐܵܬ̣ܘܿܪ.

⁷ܗܵܐ ܝܵܗܹ̇ܒ̣ ܐ̄ܢܵܐ ܥܠܵܘܗܝ ܪܘܼܚܵܐ ܘܢܸܫܡܲܥ ܛܸܒܵܐ: ܘܢܸܗܦܘܿܟ݂ ܠܐܲܪܥܹܗ. ܘܐܲܪܡܹܝܘܗܝ ܒܚܲܪܒܵܐ ܒܐܲܪܥܹܗ.

⁸ܘܲܗ̣ܦܲܟ݂ ܪܲܒ̇ ܫܵܩܹ̈ܐ. ܘܐܸܫ̣ܟܲܚ ܠܡܲܠܟܵܐ ܕܐܵܬ̣ܘܿܪ ܟܲܕ݂ ܡܸܬ̣ܟܲܬܲܫ ܥܲܠ ܠܸܒ̣ܢܵܐ: ܟܲܕ݂ ܫ̣ܡܲܥ ܕܲܫܩܲܠ̣ ܡ̣ܢ ܠܟ݂ܝܼܫ.

⁹ܘܲܫ̣ܡܲܥ ܥܲܠ ܬܲܪܗܲܦ ܡܲܠܟܵܐ ܕܟ݂ܘܼܫ: ܕܲܢܦܲܩ ܠܡܸܬ̣ܟܲܬܵܫܘܼ ܥܲܡܹܗ. ܘܲܫܡܲܥ ܘܫܲܕܲܪ ܐܝܼܙ̈ܓܲܕܹ̇ܐ ܠܘܵܬ̣ ܚܹܙܲܩܝܵܐ.

¹⁰ܗܵܟܲܢܵܐ ܐܸܡܲܪܘ ܠܚܹܙܲܩܝܵܐ ܡܲܠܟܵܐ ܕܲܝܗܘܼܕ݂ܵܐ ܠܡܹܐܡܲܪ: ܠܵܐ ܢܲܛܥܹܝܟ݂ ܐܲܠܵܗܵܟ݂: ܕܲܬ̣ܟ݂ܝܼܠ ܐܲܢ̄ܬ̇ ܥܠܵܘܗܝ. ܘܐܵܡܲܪ ܐܲܢ̄ܬ̇ ܕܠܵܐ ܡܸܫܬܲܠܡܵܐ ܐܘܿܪܸܫܠܸܡ ܒܐܝܼܕ݂ܵܘ̈ܗܝ ܕܡܲܠܟܵܐ ܕܐܵܬ̣ܘܿܪ.

¹¹ܗܵܐ ܐܲܢ̄ܬ̇ ܫܡܲܥ̣ܬ̇ ܠܟ݂ܠ ܕܲܥܒܲܕ݂ܘ ܡܲܠ̈ܟܹ̇ܐ ܕܐܵܬ̣ܘܿܪ ܠܟ݂ܠܗܹܝܢ ܐܲܪ̈ܥܵܬ̣ܵܐ ܠܡܲܚܪܵܒ̣ܘܼ ܐܸܢܹܝܢ. ܘܐܲܢ̄ܬ̇ ܡܸܬ̣ܦܲܨܹܐ ܐܲܢ̄ܬ̇.

¹²ܕܲܠܡܵܐ ܦܲܨܝܼܘ ܐܲܠܵܗܲܝ̈ܗܘܿܢ ܕܥܲܡܡܹ̈ܐ ܕܲܚܪܲܒ̣ܘ ܐܲܒ̣ܵܗܲܝ̈: ܠܓ̣ܵܘܙܵܢ ܘܲܠܚܵܪܵܢ ܘܲܠܪܵܨܵܦ: ܘܠܲܒ̣ܢܲܝ̈ ܥܲܕܵܢ ܘܕܲܒ̣ܕ݂ܵܠܵܣܵܪ.

¹³ܐܲܝܟܵܘ ܡܲܠܟܵܐ ܕܲܚܡܵܬ̣: ܘܡܲܠܟܵܐ ܕܲܪܦܵܕ݂: ܘܡܲܠܟܵܐ ܕܲܩܪܝܼܬ̣ܵܐ ܣܦܲܪܘܹܝܡ: ܘܲܕ݂ܢܵܥ: ܘܲܕ݂ܥܵܩܵܐ.

¹⁴ܘܩܲܒܸ̇ܠ ܚܹܙܲܩܝܵܐ ܐܸܓ̇ܪ̈ܵܬ̣ܵܐ ܡ̣ܢ ܐܝܼܕ݂ܵܐ ܕܐܝܼܙ̈ܓܲܕܹ̇ܐ ܘܲܩ̣ܪܵܐ ܐܸܢܹܝܢ ܘܲܣܠܸܩ ܠܒܲܝܬܹ̇ܗ ܕܡܵܪܝܵܐ. ܘܲܦܪܲܣ ܐܸܢܹܝܢ. ܚܹܙܲܩܝܵܐ ܩܕ݂ܵܡ ܡܵܪܝܵܐ.

¹⁵ܨܲܠܝܼ ܚܹܙܲܩܝܵܐ ܩܕ݂ܵܡ ܡܵܪܝܵܐ: ܘܐܸܡܲܪ.

¹⁶ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ ܝܵܬܹܒ̣ ܥܲܠ ܟܪ̈ܘܿܒܹܐ. ܐܲܢ̄ܬ̇ ܗ̄ܘܼ ܐܲܠܵܗܵܐ ܒܲܠܚܘܿܕܲܝܟ ܥܲܠ ܟܠܗܹܝܢ ܡܲܠܟ̇ـ̈ـܘܵܬ̣ܵܐ ܕܐܲܪܥܵܐ. ܐܲܢ̄ܬ̇ ܥܒܲܕ̇ܬ̇ ܫܡܲܝܵܐ ܘܐܲܪܥܵܐ.

¹⁷ܨܠܝܼ ܡܵܪܝܵܐ ܐܸܕ݂ܢܵܟ݂ ܘܲܫܡܲܥ ܦܬܲܚ ܡܵܪܝܵܐ ܥܲܝܢܲܝ̈ܟ ܘܲܚܙܝܼ ܘܲܫܡܲܥ ܡܸܠܵܘ̈ܗܝ ܕܣܲܢܚܹܪܝܼܒ̣: ܕܲܫ̣ܠܲܚ ܠܲܡܚܲܣܵܕ݂ܘܼ ܠܐܲܠܵܗܵܐ ܚܲܝܵܐ.

¹⁸ܫܲܪܝܼܪܵܐܝܼܬ̣ ܡܵܪܝܵܐ: ܚܪܲܒ̣ܘ ܡܲܠ̈ܟܹ̇ܐ ܕܐܵܬ̣ܘܿܪ ܠܟ݂ܠܗܹܝܢ ܐܲܪ̈ܥܵܬ̣ܵܐ.

¹⁹ܘܐܲܪܥ̱ܗܘܿܢ ܘܐܲܠܵܗܲܝ̈ܗܘܿܢ ܐܵܘܩܸܕ݂ܘ ܒܢܘܼܪܵܐ ܡܸܛܠ ܕܠܵܐ ܗܘ̤ܵܘ ܐܲܠܗܹ̈ܐ. ܐܹܠܵܐ ܥܒ̣ܵܕ݂ ܐܝܼ̈ܕܲܝܵܐ ܕܐ̄ܢܵܫܵܐ: ܕܩܲܝܣܵܐ: ܘܲܕ݂ܟܸܣܦܵܐ: ܘܲܕ݂ܟܹܐܦܵܐ. ܘܐܵܘܒܸ̇ܕ݂ܘ ܐܸܢܘܿܢ.

²⁰ܘܗܵܫܵܐ ܡܵܪܝܵܐ ܐܲܠܵܗܲܢ: ܦܪܘܿܩܲܝܢ ܡ̣ܢ ܐܝܼܕ݂ܵܘ̈ܗܝ: ܕܢܸ̈ܕ̇ܥܵܢ ܟܠܗܹܝܢ ܡܲܠܟ̇ـ̈ـܘܵܬ̣ܵܐ ܕܐܲܪܥܵܐ: ܕܐܲܢ̄ܬ̇ܘܼ ܐܲܠܵܗܵܐ ܒܲܠܚܘܿܕܲܝܟ.

²¹ܘܐܸܫܬ̇ܠܲܚ ܐܹܫܲܥܝܵܐ ܒܲܪ ܐܵܡܘܿܨ ܠܘܵܬ̣ ܚܹܙܲܩܝܵܐ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܟܠ ܕܨܲܠܝܼܬ̇ ܩܕ݂ܵܡܲܝ ܥܲܠ ܣܲܢܚܹܪܝܼܒ̣ ܡܲܠܟܵܐ ܕܐܵܬ̣ܘܿܪ: ܫܸܡ̇ܥܹܬ̣.

²²ܗܵܢܵܐ ܦܸܬ̣ܓ̣ܵܡܵܐ ܕܐܸܡܲܪ ܥܠܵܘܗܝ ܡܵܪܝܵܐ. ܫܵܝܛܵܐ ܠܵܟ݂: ܘܲܡܡܲܝܩܵܐ ܒܵܟ݂ ܒܬ̣ܘܼܠܬܵܐ ܒܲܪܬ̣ ܨܸܗܝܘܿܢ ܘܲܡܢܝܼܕ݂ܵܐ ܪܹܫܵܗ̇ ܒܵܬ̣ܪܵܟ݂ ܒܲܪܬ̣ ܐܘܿܪܸܫܠܸܡ.

²³ܠܡܲܢ ܚܲܣܕ̇ܬ̇ ܘܓܲܕܸ̇ܦܬ̇. ܘܥܲܠ ܡܲܢ ܐܲܪܝܼܡ̣ܬ̇ ܩܵܠܵܟ݂ ܐܲܪܝܼܡ̣ܬ̇ ܥܲܝܢܲܝ̈ܟ ܠܲܡܪܵܘܡܵܐ ܥܲܠ ܩܲܕ̇ܝܼܫܵܐ ܕܝܼܣܪܵܝܹܠ.

²⁴ܘܒ̣ܐܝܼܕ݂ܵܐ ܕܐܝܼܙܓܲܕܲܝ̈ܟ ܚܲܣܕ̇ܬ̇ ܠܡܵܪܝܵܐ: ܘܐܸܡ̣ܪܬ̇: ܕܲܒ̣ܣܘܿܓ̣ܵܐܐ ܕܡܲܪ̈ܟ̇ܒ̣ܵܬ̣ܝ: ܐܸܢܵܐ ܐܸܣܲܩ ܠܪܵܘܡܵܐ ܕܛܘܼܪܹ̈ܐ: ܘܠܲܫܦܘܿܠܵܘ̈ܗܝ ܕܠܸܒ̣ܢܵܢ. ܘܐܸܦܣܘܿܩ ܩܵܘ̈ܡܵܬ̣ܵܐ ܕܐܲܪ̈ܙܵܘܗܝ: ܘܲܓ̣ܒܲـ̈ـܝܵܐ ܕܫܲܪ̈ܘܲܝܢܵܘܗܝ ܘܐܸܥܘܿܠ ܠܪܵܘܡܵܐ ܕܣܵܟܹ̇ܗ ܕܥܵܒ̣ܵܐ ܕܟܲܪܡ̄ܠܵܐ.

²⁵ܐܸܢܵܐ ܐܸܚܦܘܿܪ ܘܐܸܫܬܹ̇ܐ ܡܲـ̈ـܝܵܐ: ܘܐܵܘܒܸ̇ܫ ܒܦܲܪ̈ܣܵܬ̣ܵܐ ܕܪ̈ܲܟ݂ܫܝ: ܟܠܗܘܿܢ ܢܲܗܪ̈ܵܘܵܬ̣ܵܐ ܥܲܫܝܼܢܹ̈ܐ.

²⁶ܠܵܐ ܫ̣ܡܲܥܬ̇ ܕܡ̣ܢ ܪܘܼܚܩܵܐ ܠܵܗ̇ ܥܸܒ̣ܕܹ̇ܬ̣ ܘܡ̣ܢ ܝܵܘ̈ܡܵܬ̣ܵܐ ܩܲܕ݂ܡܵܝܹ̈ܐ ܠܵܗ̇ ܥܲܬ̇ܕܸܬ̣. ܘܗܵܫܵܐ ܐܲܝܬ̇ܝܼܬܵܗ̇ ܕܬܸܗܘܹܐ ܠܚܘܼܪܒܵܐ: ܘܲܠܨܸܕ݂ܝܵܐ: ܐܲܝܟ݂ ܡܕ݂ܝܼ̈ܢܵܬ̣ܵܐ ܥܲܫܝܼ̈ܢܵܬ̣ܵܐ.

²⁷ܕܥܵܡܘܿܪ̈ܲܝܗܹܝܢ ܐܲܪܦܝܼܘ ܒܗܹܝܢ ܐܝܼ̈ܕܲܝܵܐ. ܘܐܸܬ̇ܬ̇ܒܲܪܘ ܘܲܒ̣ܗܬ̣ܘ ܘܲܗܘ̤ܵܘ ܐܲܝܟ݂ ܥܸܣܒܵܐ ܕܚܲܩܠܵܐ: ܘܐܲܝܟ݂ ܝܘܼܪܵܩܵܐ ܕܬܸܕ݂ܐܵܐ: ܘܐܲܝܟ݂ ܫܸܒ̇ܠܵܐ ܕܐܸܓܵܪܵܐ: ܘܐܲܝܟ݂ ܒܘܼܚܫܝܼܢܵܐ ܩܕ݂ܵܡ ܩܵܝܑܹܡܬ̣ܵܐ.

²⁸ܡܵܘܬ̇ܒ̣ܵܟ݂ ܘܡܲܥܠܵܟ݂ ܘܡܲܦܩܵܟ݂ ܝܵܕܲܥ ܐ̄ܢܵܐ: ܘܕܲܐܡ̣ܪܲܝܬ̇ ܩܕ݂ܵܡܲܝ.

²⁹ܥܲܠ ܕܐܲܡܪܲܚܬ̇ ܩܕ݂ܵܡܲܝ: ܘܓ̣ܘܼܕܵܦܵܟ݂ ܣ̣ܠܸܩ ܒܐܸܕ݂ܢܲܝ̈: ܐܲܪܡܸܐ ܩܠܵܕ݂ܵܐ ܒܲܢܚܝܼܪܵܟ݂: ܘܲܒ̣ܥܵܡܵܐ ܒܣܸܦ̈ܘܵܬ̣ܵܟ݂ ܘܐܲܗܦ̄ܟ݂ܵܟ݂ ܒܐܘܼܪܚܵܐ ܕܐܸܬܲܝ̣ܬ̇ ܒܵܗ̇.

³⁰ܘܗܵܕܹܐ ܠܵܟ݂ ܐܵܬ̤ܵܐ: ܐܵܟܸ̇ܠ ܐܲܢ̄ܬ̇ ܫܲܢ̄ܬܵܐ ܗܵܕܹܐ ܟܵܬ̣ܵܐ. ܘܫܲܢ̄ܬܵܐ ܕܬܲܪܬܹ̇ܝܢ ܟܵܬ̣ ܟܵܬ̣ܵܐ. ܘܫܲܢ̄ܬܵܐ ܬܠܝܼܬ̣ܵܝܬܵܐ ܙܵܪܥܝܼܢ ܐܢ̄ܬ̇ܘܿܢ ܘܚܵܨܕܝܼܢ ܐܢ̄ܬ̇ܘܿܢ: ܘܢܵܨ̇ܒ̇ܝܼܢ ܐܢ̄ܬ̇ܘܿܢ ܟܲܪ̈ܡܹܐ: ܘܐܵܟ݂ܠܝܼܢ ܐܢ̄ܬ̇ܘܿܢ ܦܹܐܪ̈ܲܝܗܘܿܢ.

³¹ܘܢܸܬ̣ܗܲܦܟ̇ܘܼܢ ܫܲܪܟܵܐ ܕܒܹܝܬ̣ ܝܼܗܘܼܕ݂ܵܐ ܕܐܸܫܬܲܚܲܪܘ: ܐܲܝܟ݂ ܥܸܩܵܪܵܐ ܕܲܪܡܸܐ ܠܬܲܚܬ̇: ܘܥܵܒܹ̇ܕ݂ ܦܹܐܪܹ̈ܐ ܠܥܸܠ.

³²ܡܸܛܠ ܕܡ̣ܢ ܐܘܿܪܸܫܠܸܡ ܢܵܦܹ̇ܩ ܫܲܪܟܵܢܵܐ. ܘܢܸܫܬܵܘܙܲܒ̣ ܡ̣ܢ ܛܘܼܪܵܐ ܕܨܸܗܝܘܿܢ. ܛܢܵܢܹܗ ܕܡܵܪܝܵܐ ܚܲܝܠܬ̣ܵܢܵܐ ܥܵܒܹ̇ܕ݂ ܗܵܕܹܐ.

³³ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ ܥܲܠ ܡܲܠܟܵܐ ܕܐܵܬ̣ܘܿܪ: ܠܵܐ ܢܸܥܘܿܠ ܠܲܩܪܝܼܬ̣ܵܐ ܗܵܕܹܐ. ܘܠܵܐ ܢܸܫܕܹ̇ܐ ܬܲܡܵܢ ܓܹܐܪܵܐ. ܘܠܵܐ ܢܹܐܪܥܝܗ̇ ܒܣܲܟ̇ܪܹ̈ܐ. ܘܠܵܐ ܢܲܟ݂ܡܸܢ ܥܠܹܝܗ̇ ܟܡܹܐܢܹ̈ܐ.

³⁴ܐܸܠܵܐ ܒܐܘܼܪܚܵܐ ܕܐܸܬ̣ܵܐ ܒܵܗ̇: ܢܸܗܦܘܿܟ݂ ܘܠܲܩܪܝܼܬ̣ܵܐ ܗܵܕܹܐ ܠܵܐ ܢܸܥܘܿܠ: ܐܵܡܲܪ ܡܵܪܝܵܐ.

³⁵ܘܐܲܓܸ̇ܢ ܥܲܠ ܩܪܝܼܬ̣ܵܐ ܗܵܕܹܐ ܘܐܸܦ̱ܪܩܝܼܗ̇: ܡܸܛܠܵܬ̣ܝ ܘܡܸܛܠ ܕܵܘܝܼܕ݂ ܥܲܒ̣ܕ̇ܝ.

³⁶ܘܲܢܦܲܩ̣ ܡܲܠܲܐܟܹܗ ܕܡܵܪܝܵܐ. ܘܲܩܛܲܠ ܒܡܲܫܪܝܼܬܹܗ ܕܐܵܬ̣ܘܿܪܵܝܵܐ. ܡܵܐܐ ܘܲܬ̣ܡܵܢܐܝܼܢ ܘܚܲܡܫܵܐ ܐܲܠܦܝܼ̈ܢ. ܘܩܲܕܸ̇ܡ̣ܘ ܒܨܲܦܪܵܐ: ܘܗܵܐ ܟܠܗܘܿܢ ܫ̈ܠܲܕܹ̇ܐ ܡܝܼ̈ܬ̣ܵܬ̣ܵܐ.

³⁷ܘܲܫܩܲܠ ܣܲܢܚܹܪܝ̣ܒ̣: ܘܲܗ̣ܦܲܟ݂ ܐܸܙܲܠ ܝܑܼܬܸܒ̣ ܒܢܝܼܢܘܹܐ.

³⁸ܘܟܲܕ݂ ܣܵܓܹ̇ܕ݂ ܗ̄ܘܼܵܐ ܒܹܝܬ̣ ܢܵܣܪܵܟ݂ ܐܵܠܵܗܹܗ: ܐܵܕ݂ܪܡܠܸܟ݂ ܘܫܵܪܵܐܨܵܐܪ ܒܢܵܘ̈ܗܝ ܩܲܛܠܘܼܗܝ ܒܚܲܪܒܵܐ. ܘܗܸܢܘܿܢ ܥܪܲܩ̣ܘ ܠܐܲܪܥܵܐ ܕܩܲܪ̈ܕ̇ܘܵܝܹܐ. ܘܐܲܡܠܸܟ݂ ܣܪܚܲܕ̇ܘܡ ܒܪܹܗ ܒܵܬ̣ܪܹܗ.