Read Aramaic Peshita Isaiah 41 Bible Online

Isaiah 41 - Aramaic Peshita bible

Isaiah 41

¹ܫܬ̣ܘܿܩܹ̈ܝܢ ܓܵܙܪ̈ܵܬ̣ܵܐ. ܘܐܸܡ̈ܘܵܬ̣ܵܐ ܢܚܲܠ̈ܦܵܢ ܚܲܝܠܵܐ. ܢܸܩ̱ܪ̈ܒ̣ܵܢ: ܘܗܵܝܕܹ̇ܝܢ ܢܡܲܠ̈ܠܵܢ ܘܐܲܟ݂ܚ̄ܕ݂ܵܐ ܠܕ݂ܝܼܢܵܐ ܢܸܩ̱ܪ̈ܒ̣ܵܢ.

²ܡܲܢܘܼ ܐܲܥܝܼܪ ܙܲܕ̇ܝܼܩܘܼܬ̣ܵܐ ܡ̣ܢ ܡܲܕ݂ܢ̱ܚܵܐ: ܘܲܩ̣ܪܵܗ̇ ܠܪܸܓ̣ܠܹܗ. ܢܸܫܬܲܠܡܘܼܢ ܩܕ݂ܵܡܵܘܗܝ ܥܲܡܡܹ̈ܐ ܘܡܲܠ̈ܟܹ̇ܐ ܢܸܬ̣ܘ̱ܪܘܼܢ ܢܸܬܸ̇ܠ ܐܲܝܟ݂ ܥܲܦܪܵܐ ܚܲܪܒܹ̇ܗ: ܘܐܲܝܟ݂ ܕܢܵܬ̣ܪܵܐ ܩܸܫܬܹ̇ܗ.

³ܢܸܪܕ̇ܘܿܦ ܐܸܢܘܿܢ: ܘܢܸܥܒܸ̇ܕ݂ ܫܠܵܡܵܐ. ܘܐܘܼܪܚܵܐ ܒܪܸ̈ܓ̣ܠܵܘܗܝ ܠܵܐ ܢܲܥܸܠ.

⁴ܡܲܢܘܼ ܥܲܬܸ̇ܕ݂ ܘܲܥܒܲܕ݂ ܡܲܢ ܕܲܩ̣ܪܵܐ ܠܕ݂ܵܪܹ̈ܐ ܡ̣ܢ ܪܹܫܝܼܬ̣ܵܐ. ܐܸܢܵܐ ܐ̄ܢܵܐ ܡܵܪܝܵܐ ܩܲܕ݂ܡܵܝܵܐ ܘܲܐ̄ܚܪܵܝܵܐ: ܐܸܢܵܐ ܐ̄ܢܵܐ.

⁵ܚܙܲܝܵܢ̈ܝ ܓܵܙܪ̈ܵܬ̣ܵܐ. ܘܲܕ݂ܚܸܠ̣ܘ ܣܵܘ̈ܦܹܝܗ̇ ܕܐܲܪܥܵܐ. ܕܚܸܠ̣ܘ ܘܲܩ̣ܪܸܒ̣ܘ ܘܐܸܬ̣ܵܘ.

⁶ܘܲܓ̣ܒܲܪ ܠܚܲܒ̣ܪܹܗ ܡܥܲܕ̇ܪܝܼܢ ܘܠܲܐܚܘܼܗܝ ܐܵܡܲܪ ܐܸܬ̣ܚܲܝܲܠ.

⁷ܘܠܲܒܸ̇ܒ̣ ܢܲܓܵܪܵܐ ܠܩܲܝܢܵܝܵܐ ܕܐܵܪܹܫ ܒܩܘܼܪܢܵܣܵܐ: ܘܦܵܠܲܚ. ܘܐܵܡܲܪ ܥܲܠ ܕܸܒ̣ܩܵܐ ܕܫܲܦܝܼܪ ܗ̄ܘܼ. ܘܩܵܒ̣ܥܝܼܢ ܠܹܗ ܒܨܸܨܹ̈ܐ: ܕܠܵܐ ܢܸܬ̇ܬ̇ܙܝܼܥ.

⁸ܗܵܫܵܐ ܝܼܣܪܵܝܹܠ ܥܲܒ̣ܕ̇ܝܼ: ܝܲܥܩܘܿܒ̣ ܕܲܓ̣ܒܹ̇ܝܬ̣ܵܟ݂: ܙܲܪܥܹܗ ܕܐܲܒ̣ܪܵܗܵܡ ܪܵܚܹܡܝ ܕܚܲܝܸܠܬܵܟ݂.

⁹ܡ̣ܢ ܣܵܘ̈ܦܹܝܗ̇ ܕܐܲܪܥܵܐ: ܘܡ̣ܢ ܕܵܘܩܹ̈ܝܗ̇ ܩܪܝܼܬ̣ܵܟ݂ ܘܐܸܡ̇ܪܹܬ̣ ܠܵܟ݂ ܥܲܒ̣ܕ̇ܝ ܠܵܟ݂ ܥܲܒ̣ܕܝܼ ܐܲܢ̄ܬ̇ ܓܒܹܝܬ̣ܵܟ݂ ܘܠܵܐ ܐܲܣܠܝܼܬܵܟ݂.

¹⁰ܠܵܐ ܬܸܕ݂ܚܲܠ ܡܸܛܠ ܕܥܲܡܵܟ݂ ܐ̄ܢܵܐ. ܘܠܵܐ ܬܸܬ̣ܪ̱ܗܸܒ̣ ܡܸܛܠ ܕܐܸܢܵܐ ܐ̄ܢܵܐ ܐܲܠܵܗܵܟ݂. ܚܲܝܸܠܬܵܟ݂: ܐܵܦ ܥܲܕܲܪܬܵܟ݂ ܐܵܦ ܣܲܡܸܟ݂ܬܵܟ݂ ܒܝܲܡܝܼܢܝ ܙܲܕ̇ܝܼܩܬܵܐ.

¹¹ܢܸܒ̣ܗ̱ܬ̣ܘܼܢ ܘܢܸܚܦܪܘܿܢ ܐܲܝܠܹܝܢ ܕܣܵܩ̇ܪܝܼܢ ܠܵܟ݂: ܢܸܗܘܘܿܢ ܐܲܝܟ݂ ܠܵܐ ܡܸܕܸ̇ܡ. ܘܢܹܐܒ̣ܕ̇ܘܿܢ ܓܲܒ̣ܪܹ̈ܐ ܕܢܵܨܹ̇ܝܢ ܥܲܡܵܟ݂.

¹²ܬܸܒ̣ܥܸܐ ܐܸܢܘܿܢ: ܘܠܵܐ ܬܸܫܟܲܚ ܐܸܢܘܿܢ ܠܓܲܒ̣ܪܹ̈ܐ ܕܢܵܨܹ̇ܝܢ ܥܲܡܵܟ݂. ܢܸܗܘܘܿܢ ܐܲܝܟ݂ ܕܠܵܐ ܐܝܼܬܲܝܗܘܿܢ: ܓܲܒ̣ܪܹ̈ܐ ܕܡܸܬ̣ܟܲܬ̇ܫܝܼܢ ܥܲܡܵܟ݂.

¹³ܡܸܛܠ ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܵܟ݂: ܡܚܲܝܠܵܢܵܐ ܕܝܲܡܝܼܢܵܟ݂: ܐܸܡ̇ܪܹܬ̣ ܠܵܟ݂ ܠܵܐ ܬܸܕ݂ܚܲܠ. ܐܸܢܵܐ ܐ̄ܢܐ ܥܵܕ݂ܘܿܪܵܟ݂.

¹⁴ܠܵܐ ܬܸܕ݂ܚ̄ܠܝܼܢ ܬܵܘܠܥܹܗ ܕܝܲܥܩܘܿܒ̣: ܘܲܡܢܝܼܢܹܗ ܕܝܼܣܪܵܝܹܠ ܐܸܢܵܐ ܐ̄ܢܵܐ ܥܵܕ݂ܘܿܪܹܟ݂ܝ: ܐܵܡܲܪ ܡܵܪܝܵܐ. ܘܦܵܪܘܿܩܹܟ݂ܝ ܩܲܕ̇ܝܼܫܵܐ ܕܝܣܪܵܝܹܠ.

¹⁵ܗܵܐ ܥܒܲܕ̇ܬܵܟ݂ ܐܲܝܟ݂ ܓܲܪܓܲܪܵܟ݂ ܚܲܕ݂ܬ̣ܵܐ: ܕܫܵܚܹ̇ܩ ܘܡܲܕܸ̇ܩ ܬܕ݂ܘܼܫ ܛܘܼܪܹ̈ܐ: ܘܬܲܕܸ̇ܩ ܘܪ̈ܵܡܵܬ̣ܵܐ ܬܸܥܒܸ̇ܕ݂ ܐܲܝܟ݂ ܥܘܼܪܵܐ.

¹⁶ܬܸܕ݂ܕܹܐ ܐܸܢܘܿܢ. ܘܪܘܼܚܵܐ ܬܸܫܩܘܿܠ ܐܸܢܘܿܢ ܘܥܲܠܥܵܠܵܐ ܬܒܲܕܲܪ ܐܸܢܘܿܢ. ܘܐܲܢ̄ܬ̇ ܬܕ݂ܘܼܨ ܒܡܵܪܝܵܐ. ܘܲܒ̣ܩܲܕ̇ܝܼܫܵܐ ܕܝܼܣܪܵܝܹܠ ܬܸܫܬܲܒܲܚ.

¹⁷ܡܸܣܟܹ̇ܢܹ̈ܐ ܘܒ̣ܵܝܫܹ̈ܐ ܒܵܥܹ̇ܝܢ ܡܲـ̈ـܝܵܐ ܘܠܲܝܬ̇ ܘܠܸܫܵܢܗܘܿܢ ܒܨܲܗܝܵܐ ܝܑܼܒܸܫ ܐܸܢܵܐ ܡܵܪܝܵܐ ܐܸܥܢܸܐ ܐܸܢܘܿܢ ܐܲܠܵܗܹܗ ܕܝܼܣܪܵܝܹܠ: ܘܠܵܐ ܐܸܫܒ̇ܘܿܩ ܐܸܢܘܿܢ.

¹⁸ܐܸܦ̮ܬܲܚ ܢܲܗܪ̈ܵܘܵܬ̣ܵܐ ܒܛܘܼܪܹ̈ܐ: ܘܲܒ̣ܓ̣ܵܘ ܦܲܩ̈ܥܵܬ̣ܵܐ ܡܲܒ̇ܘܼܥܹ̈ܐ: ܐܸܥܒܸ̇ܕ݂ ܡܲܕ݂ܒ̇ܪܵܐ ܠܐܵܓ̣ܡܹ̈ܐ ܕܡܲـ̈ـܝܵܐ: ܘܐܲܪܥܵܐ ܨܗܝܼܬ̣ܵܐ ܠܡܲܒ̇ܘܼܥܹ̈ܐ ܕܡܲـ̈ـܝܵܐ.

¹⁹ܐܸܬܸ̇ܠ ܒܡܲܕ݂ܒ̇ܪܵܐ ܐܲܪ̈ܙܹܐ ܘܐܸܫܟܵܪ̈ܥܹܐ: ܘܐܵܣܵܐ ܘܩܲܝܣܵܐ ܕܡܸܫܚܵܐ. ܐܹܣܝܼܡ ܒܲܦܩܲܬ̣ܵܐ ܫܲܪ̈ܘܲܝܢܹܐ ܗܕ݂ܝܼܪܹ̈ܐ ܐܲܟ݂ܚ̄ܕ݂ܵܐ.

²⁰ܕܢܸܚܙܘܿܢ ܘܢܸܕ̇ܥܘܼܢ ܘܢܸܬ̣ܒܲܝܢܘܼܢ. ܘܢܸܣܬܲܟ̇ܠܘܼܢ ܐܲܟ݂ܚ̄ܕ݂ܵܐ: ܕܐܝܼܕܹܗ ܕܡܵܪܝܵܐ ܥܸܒ̣ܕܲܬ̤ ܗܵܕܹܐ: ܘܩܲܕ̇ܝܼܫܵܐ ܕܝܼܣܪܵܝܹܠ ܒ̣ܪܵܗ̇.

²¹ܩܲܪܸܒ̣ܘ ܕܝܼܢܲܝ̈ܟ̇ܘܿܢ: ܐܵܡܲܪ ܡܵܪܝܵܐ. ܩܲܪܸܒ̣ܘ ܬܲܪ̈ܥܝܵܬ̣ܟ݂ܘܿܢ ܐܵܡܲܪ ܡܲܠܟܹ̇ܗ ܕܝܲܥܩܘܿܒ̣.

²²ܢܸܩ̱ܪܒ̣ܘܼܢ: ܘܲܢܚܵܘܘܿܢ ܐܲܝܠܹܝܢ ܕܲܥܬ̣ܝܼ̈ܕ݂ܵܢ ܩܲܕ݂ܡܵܝܵـ̈ـܬ̣ܵܐ ܡܵܢܵܐ ܐܸܢܹܝܢ: ܚܵܘܵܐܘܼܢܝ. ܘܲܢܣܝܼܡ ܒܠܸܒܲܢ: ܘܢܸܕܲܥ ܐ̄ܚܪܵܝܬ̇ܗܹܝܢ. ܐܵܘ ܕܐܵܬ̣̈ܝܵܢ ܐܲܫ̱ܡܥܘܼܢ.

²³ܚܵܘܵܐܘܼܢܝ ܐܵܬ̣̈ܘܵܬ̣ܵܐ ܕܲܥܬ̣ܝܼܕ݂ܵܢ ܘܢܸܕܲܥ ܕܐܲܠܵܗܹ̈ܐ ܐܲܢ̄ܬ̇ܘܿܢ ܐܵܦ ܡܲܛܐ̱ܒ̣ܝܼܢ ܐ̄ܢܬ̇ܘܿܢ ܐܵܦ ܡܲܒ̣ܐ̱ܫܝܼܢ ܐ̄ܢܬ̇ܘܿܢ ܘܢܸܫܬܲܥܹܐ: ܘܢܸܚܙܹܐ ܐܲܟ݂ܚ̄ܕ݂ܵܐ.

²⁴ܗܵܐ ܐܲܢ̄ܬ̇ܘܿܢ ܠܵܐ ܡܸܕܸ̇ܡ ܐܲܢ̄ܬ̇ܘܿܢ. ܘܲܥܒ̣ܵܕܲܝ̈ܟ̇ܘܿܢ ܡ̣ܢ ܚܲܪܒܵܐ. ܘܛܲܢܦܘܼܬ̣ܵܐ ܗ̄ܝܼ ܓܒ̣ܝܼܬ̣ܟ݂ܘܿܢ.

²⁵ܐܲܥܝܼܪܹܬ̣ ܡ̣ܢ ܓܲܪܒ̇ܝܵܐ: ܕܢܹܐܬܹܐ ܡ̣ܢ ܡܲܕ݂ܢܵܚܲܝ̈ ܫܸܡܫܵܐ: ܘܢܸܩܪܹܐ ܒܫܹܡܝ. ܘܢܹܐܬ̣ܘܿܢ ܫܲܠܝܼܛܵܢܹ̈ܐ ܘܢܸܬ̇ܬ̇ܕ̇ܝܼܫܘܼܢ: ܐܲܝܟ݂ ܛܝܼܢܵܐ ܕܕ݂ܵܐܹ̇ܫ ܦܲܚܵܪܵܐ.

²⁶ܡܲܢܘܼ ܕܲܢܚܵܘܹܐ ܡ̣ܢ ܪܹܫܝܼܬ̣ܵܐ: ܘܢܸܕܲܥ ܘܢܹܐܡܲܪ ܕܙܲܕ̇ܝܼܩ. ܠܲܝܬ̇ ܕܲܡܚܵܘܸܐ ܐܵܦܠܵܐ ܕܡܲܫܡܲܥ: ܐܵܦܠܵܐ ܕܫܵܡܲܥ ܡܸܠܲܝ̈ܟ̇ܘܿܢ.

²⁷ܪܹ̈ܫܵܝܵܬ̣ܵܐ ܕܨܸܗܝܘܿܢ ܗܵܠܹܝܢ ܐܸܢܹܝܢ. ܘܠܐܘܿܪܸܫܠܸܡ ܡܣܲܒ̇ܪܵܢܵܐ ܐܸܬܸ̇ܠ.

²⁸ܚܵܪܹܬ̣ ܘܠܲܝܬ̇ ܐ̄ܢܵܫ ܕܡܸܬ̣ܪܲܥܹܐ ܥܲܠ ܗܵܠܹܝܢ: ܕܐܹܫܲܐܸܠ ܐܸܢܘܿܢ: ܘܢܸܬ̇ܠܘܼܢ ܠܝܼ ܦܸܬ̣ܓ̣ܵܡܵܐ.

²⁹ܗܵܐ ܟܠܗܘܿܢ ܠܵܐ ܡܸܕܸ̇ܡ ܐܸܢܘܿܢ: ܘܲܥܒ̣ܵܕܲܝ̈ܗܘܿܢ ܣܪܝܼܩܝܼܢ ܘܪܘܼܚܵܐ ܪܲܝܩܵܢܝܼܬ̣ܵܐ ܥܒ̣ܵܕܲܝ̈ܗܘܿܢ.