Read Aramaic Peshita Isaiah 42 Bible Online

Isaiah 42 - Aramaic Peshita bible

Isaiah 42

¹ܗܵܐ ܠܥܲܒ̣ܕ̇ܝ ܣܲܡ̇ܟܹ̇ܬ̣. ܘܲܒ̣ܓܲܒ̣ܚ̄ ܨܒ̣ܵܬ̤ ܢܲܦ̮ܫܝ. ܘܝܸܗ̄ܒܹ̇ܬ̣ ܪܘܼܚܝ ܥܠܵܘܗܝ: ܕܢܲܦܸܩ ܕܝܼܢܵܐ ܠܥܲܡܡܹ̈ܐ.

²ܠܵܐ ܢܸܩܥܸܐ: ܘܠܵܐ ܢܪܝܼܒ̣ ܘܠܵܐ ܢܲܫܡܲܥ ܩܵܠܹܗ ܒܫܘܼܩܵܐ.

³ܩܲܢܝܵܐ ܪܥܝܼܥܵܐ ܠܵܐ ܢܸܬ̣ܒܲܪ. ܘܲܫܪܵܓ̣ܵܐ ܕܲܡܛܲܦܛܸܦ ܠܵܐ ܢܲܕ݂ܥܸܟ݂. ܒܩܘܼܫܬܵܐ ܢܲܦܸܩ ܕܝܼܢܵܐ.

⁴ܠܵܐ ܢܸܕ݂ܥܲܟ݂ ܘܠܵܐ ܢܛܲܦܛܸܦ: ܥܕܲܡܵܐ ܕܲܢܣܝܼܡ ܕܝܼܢܵܐ ܒܐܲܪܥܵܐ. ܘܲܠܢܵܡܘܿܣܹܗ ܓܵܙܪ̈ܵܬ̣ܵܐ ܢܣܲܟ̇ـ̈ـܝܵܢ.

⁵ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ: ܕܲܒ̣ܪܵܐ ܫܡܲܝܵܐ ܘܲܡ̣ܬܚ ܐܸܢܘܿܢ. ܘܲܪܩܲܥ̣ ܐܲܪܥܵܐ ܘܟ݂ܠ ܕܒ̣ܵܗ̇. ܘܝܲܗ̄ܒ̣ ܢܫܲܡܬ̣ܵܐ ܠܥܲܡܵܐ ܕܲܥܠܹܝܗ̇: ܘܪܘܼܚܵܐ ܠܕܲܡܗܲܠܟ݂ܝܼܢ ܒܵܗ̇.

⁶ܐܸܢܵܐ ܡܵܪܝܵܐ ܩܪܹܝܬ̣ܵܟ݂ ܒܙܲܕ̇ܝܩܘܼܬ̣ܵܐ: ܘܐܸܚ̇ܕܹ̇ܬ̣ ܒܐܝܼܕ݂ܵܟ݂ ܘܚܲܝܸܠܬܵܟ݂. ܘܝܲܗ̄ܒ̣ܬܵܟ݂ ܩܝܵܡܵܐ ܠܥܲܡܵܐ: ܘܢܘܼܗܪܵܐ ܠܥܲܡܡܹ̈ܐ.

⁷ܕܲܬ̣ܦܲܬܲܚ ܥܲܝܢܹ̈ܐ ܕܲܥܘܼܝܼܪܹ̈ܐ: ܘܬܲܦܸܩ ܠܐܲܣܝܼܪܹ̈ܐ ܡ̣ܢ ܒܹܝܬ̣ ܚܒ̣ܘܼܫܝܵܐ: ܘܡ̣ܢ ܒܹܝܬ̣ ܐܲܣܝܼܪܹ̈ܐ ܠܲܕ݂ܝܵܬ̣ܒ̇ܝܼܢ ܒܚܸܫܘܿܟ݂ܵܐ.

⁸ܐܸܢܵܐ ܐ̄ܢܵܐ ܡܵܪܝܵܐ: ܘܗܵܢܵܘ ܫܹܡܝ. ܘܐܝܼܩܵܪܝ ܠܐܲܚܪܹܝܢ ܠܵܐ ܐܸܬܸ̇ܠ: ܘܐܵܦܠܵܐ ܬܸܫܒ̇ܘܿܚܬ̇ܝ ܠܲܓ̣ܠܝܼܦܹ̈ܐ.

⁹ܚܲܕ݂̈ܬ̣ܵܬ̣ܵܐ ܐܸܢܵܐ ܡܚܵܘܸܐ. ܘܩܲܕ݂ܡܵـ̈ـܝܵܬ̣ܵܐ ܗܵܐ ܐܸܬܲܝ̈. ܘܥܲܕ݂ܠܵܐ ܢܸܨܡ̱̈ܚܵܢ: ܐܲܫ̱ܡ̇ܥܹܬ̣ ܐܸܢܹܝܢ ܠܟ݂ܘܿܢ. ܬܸܫܒ̇ܘܼܚܬܵܐ ܕܐܹܫܲܥܝܵܐ.

¹⁰ܫܲܒܲܚܘ ܠܡܵܪܝܵܐ ܬܸܫܒ̇ܘܿܚܬܵܐ ܚܕܲܬܵܐ. ܬܸܫܒ̇ܘܿܚܬܹܗ ܡ̣ܢ ܣܵܘ̈ܦܹܝܗ̇ ܕܐܲܪܥܵܐ. ܢܵܚܬܲܝ̈ ܝܲܡܵܐ ܒܲܡܠܹܐܹܗ: ܘܓ̣ܵܙܪ̈ܵܬ̣ܵܐ ܘܲܕ݂ܥܵܡ̇ܪܝܼܢ ܒܗܹܝܢ.

¹¹ܢܸܚܕܹ̇ܐ ܡܲܕ݂ܒ̇ܪܵܐ ܘܩܘܼܪ̈ܝܹܗ: ܘܡܲܪ̈ܓܹܐ ܬܸܗܘܹܐ ܩܕ݂ܵܪ. ܢܫܲܒ̇ܚܘܼܢ ܝܵܬ̣ܒܲܝ̈ ܫܩܝܼ̈ܦܹܐ: ܘܡ̣ܢ ܪܹܫܵܐ ܕܛܘܼܪܹ̈ܐ ܢܸܩܥܘܿܢ.

¹²ܘܢܸܬ̇ܠܘܼܢ ܬܸܫܒ̇ܘܿܚܬܵܐ ܠܡܵܪܝܵܐ: ܘܬܸܫ̈ܒ̇ܚܵܬܹܗ ܢܚܵܘܘܿܢ ܒܓ̣ܵܙܪ̈ܵܬ̣ܵܐ.

¹³ܡܵܪܝܵܐ ܐܲܝܟ݂ ܓܲܢ̄ܒܵܪܵܐ ܢܸܦܘܿܩ. ܘܐܲܝܟ݂ ܓܲܒ̣ܪܵܐ ܩܪܲܒ̣ܬ̣ܵܢܵܐ ܢܓܲܪܸܓ̣ ܛܢܵܢܵܐ. ܢܸܩܥܸܐ ܘܢܸܬ̣ܓܲܢ̄ܒܲܪ: ܘܢܸܩܛܘܿܠ ܠܲܒ̣ܥܸܠܕ̇ܒ̣ܵܒ̣ܵܘ̈ܗܝ.

¹⁴ܫܸܬ̣ܩܹ̇ܬ̣: ܡ̣ܢ ܥܵܠܲܡ ܐܹܫܬ̇ܘܿܩ ܣܲܝܒ̇ܪܹܬ̣ ܐܲܝܟ݂ ܝܵܠܹܕ̇ܬܵܐ. ܐܲܬ̣ܡܲܗ ܘܐܲܬ̣ܘܲܪ ܐܲܟ݂ܚ̄ܕ݂ܵܐ.

¹⁵ܐܲܚܪܸܒ̣ ܛܘܼܪܹ̈ܐ ܘܪ̈ܵܡܵܬ̣ܵܐ: ܘܟ݂ܠܹܗ ܥܘܼܫܢ̱ܗܘܿܢ ܐܵܘܒܸ̇ܫ. ܐܸܥܒܸ̇ܕ݂ ܢܲܗܪ̈ܵܘܵܬ̣ܵܐ ܠܓ̣ܵܙܪ̈ܵܬ̣ܵܐ: ܘܐܵܓ̣ܡܹ̈ܐ ܐܵܘܒܸ̇ܫ.

¹⁶ܐܸܕ݂ܒܲܪ ܥܘܝܼܪܹ̈ܐ ܒܐܘܼܪܚܵܐ ܕܠܵܐ ܝܵܕ݂ܥܝܼܢ. ܘܒܲܫܒ̣ܝܼ̈ܠܹܐ ܕܠܵܐ ܝܵܕ݂ܥܝܼܢ ܗ̄ܘܼܵܘ: ܐܹܗܲܠܸܟ݂ ܐܸܢܘܿܢ. ܐܸܥܒܸ̇ܕ݂ ܚܸܫܘܿܟ݂ܵܐ ܩܕ݂ܵܡܲܝܗܘܿܢ ܢܘܼܗܪܵܐ. ܘܥܲܪܡܵܐ ܐܹܫܲܦܹܐ. ܗܵܠܹܝܢ ܦܸܬ̣ܓ̣ܵܡܹ̈ܐ ܥܸܒ̣ܕܹ̇ܬ̣ ܠܗܘܿܢ. ܘܠܵܐ ܫܸܒ̣ܩܹ̇ܬ̣ ܐܸܢܘܿܢ.

¹⁷ܢܸܗܦ̄ܟ݂ܘܿܢ ܠܒܸܣܬܲܪܗܘܿܢ: ܘܢܸܒ̣ܗ̱ܬ̣ܘܼܢ ܒܒܸܗܬ̇ܬ̣ܵܐ: ܐܲܝܠܹܝܢ ܕܲܬ̣ܟ݂ܝܼܠܝܼܢ ܥܲܠ ܓܠܝܼܦܹ̈ܐ: ܘܐܵܡ̇ܪܝܼܢ ܠܲܢܣܝܟܹ̈ܐ: ܕܐܲܢ̄ܬ̇ܘܿܢ ܐܸܢܘܿܢ ܐܲܠܵܗܲܝ̈ܢ.

¹⁸ܚܲܪ̈ܫܹܐ ܫܡܲܥܘ. ܘܲܥܘܝܼܪܹ̈ܐ ܐܸܣܬܲܟܲܠܘ: ܘܲܚܙܵܘ.

¹⁹ܡܲܢ̣ܘܼ ܥܘܝܼܪܵܐ ܐܸܠܵܐ ܥܲܒ̣ܕ̇ܝ: ܘܚܲܪܫܵܐ ܐܲܝܟ݂ ܡܲܠܲܐܟ݂ܝ ܕܐܹܫܲܕܲܪ ܡܲܢܘܼ ܥܘܝܼܪܵܐ ܐܲܝܟ݂ ܫܲܠܝܼܛܵܐ: ܘܲܥܘܝܼܪܵܐ ܐܲܝܟ݂ ܥܲܒ̣ܕܹ̇ܗ ܕܡܵܪܝܵܐ.

²⁰ܚܵܪܹ̇ܬ̣ ܣܲܓ̇ܝܼ ܘܠܵܐ ܢܵܛ̇ܪܝܼܢ ܐ̄ܢܬ̇ܘܿܢ ܘܦܸܬ̣ܚܹ̇ܬ̣ ܐܸܕ݂ܢܹ̈ܐ: ܘܠܵܐ ܫܵܡ̇ܥܝܼܢ ܐ̄ܢܬ̇ܘܿܢ.

²¹ܡܵܪܝܵܐ ܨܒ̣ܵܐ ܡܸܛܠ ܙܲܕ̇ܝܼܩܘܼܬܹܗ: ܕܢܵܘܪܸܒ̣ ܢܵܡܘܿܣܵܐ ܘܲܢܫܲܒ̇ܚܝܼܘܗܝ.

²²ܘܗ̤ܘ ܥܲܡܵܐ ܒܙܝܼܙܵܐ ܘܕ݂ܝܼܫܵܐ ܦܲܚܹ̈ܐ ܐܸܢܘܿܢ ܟܠܗܘܿܢ ܓܲܕ݂ܘܼ̈ܕܹܐ ܘܲܒ̣̈ܒ̣ܵܬܹ̇ܐ ܐܲܣܝܼܪܹ̈ܐ ܛܲܫܝܼܘ. ܗܘ̤ܵܘ ܠܒܸܙܬ̣ܵܐ: ܘܠܲܝܬ̇ ܕܲܡܦܲܨܸܐ ܘܠܲܕ݂ܝܵܫܵܐ: ܘܠܲܝܬ̇ ܕܡܲܦܢܸܐ.

²³ܡܲܢܘܼ ܐܝܼܬ̣ ܒܟ݂ܘܿܢ ܕܢܲܫܡܲܥ ܗܵܕܹܐ. ܘܲܢܨܘܼܬ̣ ܘܢܸܫܡܲܥ ܠܐܲܚܪܬ̣ܵܐ.

²⁴ܡܲܢܘܼ ܝܲܗ̄ܒ̣ ܠܝܲܥܩܘܿܒ̣ ܠܲܕ݂ܝܵܫܵܐ: ܘܠܝܼܣܪܵܝܹܠ ܠܲܒ̣ܙܵܙܵܐ. ܠܵܐ ܗ̄ܘܼܵܐ ܡܵܪܝܵܐ ܥܲܠ ܕܲܚܛܲܝܢ ܠܹܗ: ܘܠܵܐ ܨܒܲܝܢ ܠܲܡܗܲܠܵܟ݂ܘܼ ܒܐܘܼܪ̈ܚܵܬܹܗ: ܘܠܵܐ ܫ̣ܡܲܥܢ ܢܵܡܘܿܣܹܗ.

²⁵ܐܹܫܲܕ݂ ܥܠܲܝܗܘܿܢ ܚܸܡܬ̣ܵܐ ܕܪܘܼܓ̣ܙܹܗ. ܘܥܘܼܫܢܵܐ ܕܲܩܪܵܒ̣ܵܐ ܐܵܘܩܸܕ݂ ܐܸܢܘܿܢ ܡ̣ܢ ܚܕ݂ܵܪ̈ܲܝܗܘܿܢ ܘܠܵܐ ܝܼܕܲܥܘ ܘܚܸܒܲܬ ܒܗܘܿܢ ܢܘܼܪܵܐ: ܘܠܵܐ ܐܲܝܬܝܼܘ ܥܲܠ ܒܵܠܗܘܿܢ.