Read Aramaic Peshita Isaiah 43 Bible Online

Isaiah 43 - Aramaic Peshita bible

Isaiah 43

¹ܗܵܫܵܐ ܗܵܟܲܢܵܐ ܐܵܡܲܪ ܡܵܪܝܵܐ: ܕܲܒ̣ܪܵܟ݂ ܝܲܥܩܘܿܒ̣ ܘܓܲܒ̣ܠܵܟ݂ ܝܼܣܪܵܝܹܠ ܠܵܐ ܬܸܕ݂ܚܲܠ ܕܲܦܪܲܩ̇ܬ̣ܵܟ݂: ܘܲܩܪܹܝܬ̣ܵܟ݂ ܒܲܫܡܵܟ݂: ܕܕ݂ܝܼܠܝ ܐܲܢ̄ܬ̇.

²ܐܸܢ ܬܸܥܒܲܪ ܒܝܲܡܵܐ: ܥܲܡܵܟ݂ ܐ̄ܢܵܐ ܘܢܗܪ̈ܵܘܵܬ̣ܵܐ ܠܵܐ ܢܸܓ̣ܪܦܘܼܢܵܟ݂. ܐܸܢ ܬܗܲܠܸܟ݂ ܥܲܠ ܢܘܼܪܵܐ ܠܵܐ ܬܸܬ̣ܟܵܘܸܐ: ܘܫܲܠܗܹܒ̣ܝܼܬ̣ܵܐ ܠܵܐ ܬܵܘܩܕܵܟ݂.

³ܡܸܛܠ ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܵܟ݂: ܩܲܕ̇ܝܼܫܵܐ ܕܝܼܣܪܵܝܹܠ ܦܵܪܘܿܩܵܟ݂ ܝܸܗ̄ܒܹ̇ܬ̣ ܠܡܸܨܪܹܝܢ ܚܠܵܦܲܝܟ: ܘܲܠܟ݂ܘܼܫ ܘܠܲܫܒ̣ܵܐ ܥܲܠ ܐܲܦܲܝ̈ܟ.

⁴ܡ̣ܢ ܕܝܲܩܝܼܪ ܐܲܢ̄ܬ̇ ܒܥܲܝ̈ܢܲܝ ܐܸܫܬܲܒܲܚܬ̇: ܘܐܸܢܵܐ ܪܚܸܡܬ̣ܵܟ݂ ܝܸܗ̄ܒܹ̇ܬ̣ ܐ̄ܢܵܫܵܐ ܚܠܵܦܲܝܟ: ܘܐܸܡ̈ܘܵܬ̣ܵܐ ܚܠܵܦ ܢܲܦ̮ܫܵܟ݂.

⁵ܠܵܐ ܬܸܕ݂ܚܲܠ ܡܸܛܠ ܕܥܲܡܵܟ݂ ܐ̄ܢܵܐ ܡ̣ܢ ܡܲܕ݂ܢ̱ܚܵܐ ܐܲܝܬܸ̇ܐ ܙܲܪܥܵܟ݂. ܘܡ̣ܢ ܡܲܥ̱ܪܒ̣ܵܐ ܐܹܟܲܢܫܵܟ݂.

⁶ܐܹܡܲܪ ܠܓܲܪܒ̇ܝܵܐ ܕܗܲܒ̣ܝ. ܘܲܠܬܲܝܡܢܵܐ ܕܠܵܐ ܬܸܟ݂ܠܝܼܢ ܐܲܝܬܹ̇ܐ ܒܢܲܝ̈ ܡ̣ܢ ܪܘܼܚܩܵܐ: ܘܲܒ̣̈ܢܵܬ̣ܝ ܡ̣ܢ ܣܵܘ̈ܦܹܝܗ̇ ܕܐܲܪܥܵܐ.

⁷ܟܠ ܕܩܵܪܹܐ ܒܫܹܡܝ: ܠܐܝܼܩܵܪܝ ܒܪܹܝܬܹܗ ܘܲܓ̣ܒܲܠܬܹ̇ܗ ܘܲܥܒܲܕ̇ܬܹ̇ܗ.

⁸ܐܲܦܸܩ ܥܲܡܵܐ ܥܘܝܼܪܵܐ: ܕܥܲܝܢܹ̈ܐ ܐܝܼܬ̣ ܠܗܘܿܢ: ܘܐܸܕ݂ܢܹ̈ܐ ܐܝܼܬ̣ ܠܗܘܿܢ ܘܚܲܪܫܝܼܢ.

⁹ܟܠܗܘܿܢ ܥܲܡܡܹ̈ܐ ܢܸܬ̣ܟܲܢܫܘܼܢ ܐܲܟ݂ܚ̄ܕ݂ܵܐ. ܘܢܸܬ̣ܟܲܢ̈ܫܵܢ ܐܸܡـ̈ـܘܵܬ̣ܵܐ ܡܲܢ̣ܘܼ ܐܝܼܬ̣ ܒܟ݂ܘܿܢ ܕܲܢܚܵܘܸܐ ܗܵܕܹܐ: ܘܩܲܕ݂ܡܵܝܵܬ̣ܵܐ ܢܲܫܡܲܥ ܢܲܝܬ̇ܘܿܢ ܣܵܗܕܲܝ̈ܗܘܿܢ ܘܢܸܙܕܲܕ̇ܩܘܼܢ: ܘܢܸܫ̱ܡܥܘܼܢ ܘܢܹܐܡܪܘܼܢ.

¹⁰ܒܩܘܼܫܬܵܐ ܐܲܢ̄ܬ̇ܘܿܢ ܣܵܗ̈ܕܲܝ: ܐܵܡܲܪ ܡܵܪܝܵܐ: ܘܥܲܒ̣̈ܕܲܝ ܕܲܓ̣ܒܹ̇ܝܬ̣ ܘܬܸܕ̇ܥܘܼܢ ܘܲܬ̣ܗܲܝܡܢܘܿܢ ܒܝܼ ܘܬܸܣܬܲܟ̇ܠܘܼܢ ܕܐܸܢܵܐ ܗ̄ܘܼ. ܘܲܩܕ݂ܵܡܲܝ ܠܵܐ ܐܸܬ̣ܒ̇ܪܝܼ ܐܲܠܵܗ ܘܒ̣ܵܬܲܪܝ ܠܵܐ ܢܸܗܘܹܐ.

¹¹ܐܸܢܵܐ ܐ̄ܢܵܐ ܡܵܪܝܵܐ: ܘܠܲܝܬ̇ ܬܘܼܒ̣ ܠܒܲܪ ܡܹܢܝ.

¹²ܐܸܢܵܐ ܚܵܘܝܼܬ̣ ܘܦܸܪܩܹ̇ܬ̣ ܘܐܲܫ̱ܡ̇ܥܹܬ̣: ܘܠܲܝܬ̇ ܒܟ݂ܘܿܢ ܢܘܼܟ݂ܪܵܝܵܐ: ܘܐܲܢ̄ܬ̇ܘܿܢ ܣܵܗ̈ܕܲܝ: ܐܵܡܲܪ ܡܵܪܝܵܐ. ܘܐܸܢܵܐ ܐܲܠܵܗܵܐ.

¹³ܘܐܵܦ ܡ̣ܢ ܝܵܘܡܵܐ ܩܲܕ݂ܡܵܝܵܐ ܐܸܢܵܐ ܐ̄ܢܵܐ: ܘܠܲܝܬ̇ ܕܡܸܬ̣ܦܲܨܹܐ ܡ̣ܢ ܐܝܼܕܲܝ̈. ܘܡܸܕܸ̇ܡ ܕܥܵܒܹ̇ܕ݂ ܐ̄ܢܵܐ: ܡܲܢܘܼ ܡܲܗܦܸܟ݂.

¹⁴ܗܵܟܲܢܵܐ ܐܵܡܲܪ ܡܵܪܝܵܐ ܦܵܪܘܿܩܟ݂ܘܿܢ ܩܲܕ̇ܝܼܫܵܐ ܕܝܼܣܪܵܝܹܠ. ܡܸܛܠܵܬ̣ܟ݂ܘܿܢ ܫܲܕ̇ܪܹܬ̣ ܠܒ̣ܵܒܹܠ. ܘܐܲܝܬ̇ܝܼܬ̣ ܠܟ݂ܠܗܘܿܢ ܥܵܪ̈ܘܿܩܹܐ: ܘܲܠܟܲܠܕ݂ܵܝܹ̈ܐ ܕܒܲܣܦܝܼܢܹ̈ܐ ܡܸܫܬܲܒ̇ܚܝܼܢ.

¹⁵ܐܸܢܵܐ ܐ̄ܢܵܐ ܡܵܪܝܵܐ ܩܲܕ̇ܝܼܫܟ݂ܘܿܢ: ܕܲܒ̣ܪܹܝܬ̇ ܠܝܼܣܪܵܝܹܠ ܡܲܓܟ̇ܟ݂ܘܿܢ.

¹⁶ܗܵܟܲܢܵܐ ܐܵܡܲܪ ܡܵܪܝܵܐ: ܕܝܲܗ̄ܒ̣ ܐܘܼܪܚܵܐ ܒܝܲܡܵܐ: ܘܲܫܒ̣ܝܼܠܵܐ ܒܡܲـ̈ـܝܵܐ ܣܲܓ̇ܝܼ̈ܐܹܐ.

¹⁷ܕܡܲܦܸܩ ܡܲܪ̈ܟ̇ܒ̣ܵܬ̣ܵܐ ܙܪ̈ܲܟ݂ܫܵܐ ܘܚܲܝܠܵܐ ܥܲܫܝܼܢܵܐ. ܘܐܲܟ݂ܚ̄ܕ݂ܵܐ ܢܸܫܟ̇ܒ̣ܘܼܢ ܘܠܵܐ ܢܩܘܼܡܘܼܢ. ܘܢܸܕ݂ܥ̱ܟ݂ܘܼܢ ܐܲܝܟ݂ ܫܪܵܓ̣ܵܐ ܕܲܡܛܲܦܛܸܦ.

¹⁸ܠܵܐ ܬܸܬ̇ܕܲܟ݂ܪܘܼܢ ܩܲܕ݂ܡܵـ̈ـܝܵܬ̣ܵܐ: ܘܲܕ݂ܡ̣ܢ ܪܹܫܝܼܬ̣ܵܐ ܠܵܐ ܬ̣ܣܬܲܟ̇ܠܘܼܢ.

¹⁹ܗܵܐ ܥܵܒܹ̇ܕ݂ ܐ̄ܢܵܐ ܚܕܲܬܵܐ ܘܗܵܫܵܐ ܬܹܐܥܹܐ ܘܬܸܕ̇ܥܘܼܢܵܗ̇. ܘܐܸܥܒܸ̇ܕ݂ ܐܘܼܪܚܵܐ ܒܡܲܕ݂ܒ̇ܪܵܐ: ܘܢܲܗܪ̈ܵܘܵܬ̣ܵܐ ܒܐܲܫܝܼܡܘܿܢ.

²⁰ܬܫܲܒ̇ܚܲܢܝ ܚܲܝ̄ܘܬ̣ܵܐ ܕܕܲܒ̣ܪܵܐ: ܝܵܪܘܿܪܹ̈ܐ ܘܲܒ̣̈ܢܵܬ̣ ܢܲܥܵܡܹ̈ܐ: ܡܸܛܠ ܕܝܸܗ̄ܒܹ̇ܬ̣ ܡܲـ̈ـܝܵܐ ܒܡܲܕ݂ܒ̇ܪܵܐ: ܘܢܲܗܪ̈ܵܘܵܬ̣ܵܐ ܒܐܲܫܝܼܡܘܿܢ: ܕܢܸܫܬܹ̇ܐ ܥܲܡܝ ܓܲܒ̣ܝܵܐ.

²¹ܥܲܡܵܐ ܗܵܢܵܐ ܕܲܓ̣ܒܹ̇ܝܬ̣ ܠܝܼ: ܢܸܫܬ̇ܘܿܢ.

²²ܠܵܐ ܗ̄ܘܼܵܐ ܠܝܼ ܩ̣ܪܲܝܬ̇ ܝܲܥܩܘܿܒ̣: ܕܲܩܪܹܝܼܬ̣ܵܟ݂ ܝܼܣܪܵܝܹܠ.

²³ܠܵܐ ܐܲܝܬ̇ܝܼܬ̇ ܠܝܼ ܐܸܡܪܹ̈ܐ ܕܝܲܩܕ̇ܝ̈ܟ. ܘܲܒ̣ܕܸܒ̣ܚܲܝ̈ܟ ܠܵܐ ܝܲܩܲܪܬܵܢܝ ܠܵܐ ܫܲܥܒܸܕ̇ܬܵܟ݂ ܒܩܘܼܪ̈ܒܵܢܹܐ: ܘܠܵܐ ܐܲܠܐܝܼܬܵܟ݂ ܒܲܠܒ̣ܘܼܢ̄ܬܵܐ.

²⁴ܠܵܐ ܙܒܲܢܬ̇ ܠܝܼ ܒܟܸܣܦܵܐ ܩܲܢܝܵܐ ܕܒܸܣܡܵܐ. ܘܲܒ̣ܬܲܪܒܵܐ ܕܕܸܒ̣ܚܲܝ̈ܟ ܠܵܐ ܐܲܪܘܝܼܬܵܢܝ ܐܸܠܵܐ ܫܲܥ̣ܒܸ̇ܕ̇ܬܵܢܝ ܒܲܚܛܵܗܲܝ̈ܟ: ܘܲܒ̣ܥܘܼܠܵܟ݂ ܐܲܠܐ̄ܝܼܬܵܢܝ.

²⁵ܐܸܢܵܐ ܐ̄ܢܵܐ ܕܥܵܛܹ̇ܐ ܐ̄ܢܵܐ ܥܵܘܼܠܵܟ݂ ܡܸܛܠܵܬ̣ܝ. ܘܲܚܛܵܗܲܝ̈ܟ ܠܵܐ ܐܸܬ̇ܕ̇ܟܲܪ.

²⁶ܐܸܬ̇ܕܲܟ݂ܪܲܝܢܝ: ܢܸܬ̇ܬ̇ܕܝܼܢ ܐܲܟ݂ܚ̄ܕ݂ܵܐ. ܐܸܡ̇ܪܹܬ̣ ܕܬܸܙܕܲܕܲܩ.

²⁷ܐܲܒ̣ܘܼܟ݂ ܩܲܕ݂ܡܵܝܵܐ ܚܛܵܐ ܫܲܠܝܼܛܵܢܲܝ̈ܟ ܐܲܥܠܝܼܘ ܒܝܼ.

²⁸ܛܵܘܸܫܘ ܪܵܘ̱ܪ̈ܒ̣ܵܢܲܝܟ ܩܘܼܕ݂ܫܵܐ. ܝܸܗ̄ܒܹ̇ܬ̣ ܠܝܲܥܩܘܿܒ̣ ܠܚܪܡܵܐ: ܘܠܝܼܣܪܵܝܹܠ ܠܚܸܣܕܵܐ.