Read Aramaic Peshita Isaiah 44 Bible Online

Isaiah 44 - Aramaic Peshita bible

Isaiah 44

¹ܡܸܟܹ̇ܝܠ ܫܡܲܥܲܝܢܝ ܝܲܥܩܘܿܒ̣ ܥܲܒ̣ܕ̇ܝ: ܘܝܼܣܪܵܝܹܠ ܕܲܓ̣ܒܹ̇ܝܬ̣

²ܗܵܟܲܢܵܐ ܐܵܡܲܪ ܡܵܪܝܵܐ: ܕܥܲܒ̣ܕܵܟ݂ ܘܓܲܒ̣ܠܵܟ݂ ܒܡܲܪܒ̇ܥܵܐ ܘܥܲܕ݂ܪܵܟ݂ ܠܵܐ ܬܸܕ݂ܚܸܠ ܥܲܒ̣ܕ̇ܝ ܝܲܥܩܘܿܒ̣: ܘܝܼܣܪܵܝܹܠ ܕܲܩܪܹܝܬ̣.

³ܡܸܛܠ ܕܐܸܬܸ̇ܠ ܡܲـ̈ـܝܵܐ ܒܐܲܬ̣ܪܵܐ ܨܲܗܝܵܐ: ܘܪ̈ܵܕܲܝܵܐ ܒܝܲܒ̣ܫܵܐ ܐܹܫܘܿܕ݂ ܪܘܼܚܝ ܥܲܠ ܙܲܪܥܵܟ݂: ܘܒ̣ܘܼܪ̈ܟܵܬ̣ܝ ܥܲܠ ܒܢܲܝ̈ܟ.

⁴ܘܢܹܐܥܘܿܢ ܡ̣ܢ ܒܲܝܢܵܬ̣ ܥܡܝܼܪܵܐ: ܐܲܝܟ݂ ܥܲܪ̈ܒܹܐ ܕܥܲܠ ܬܲܦܹ̈ܐ ܕܡܲـ̈ـܝܵܐ.

⁵ܗܵܢܵܐ ܢܹܐܡܲܪ ܕܡܵܪܝܵܐ ܐ̄ܢܵܐ: ܘܗܵܢܵܐ ܢܸܩܪܸܐ ܒܲܫܡܹܗ ܕܝܲܥܩܘܿܒ̣ ܘܗܵܢܵܐ ܢܲܟ݂ܬܸ̇ܒ̣ ܐܝܼܕܹܗ ܠܡܵܪܝܵܐ. ܘܲܒ̣ܫܸܡ ܝܼܣܪܵܝܹܠ ܢܸܬ̣ܟܲܢܸܐ.

⁶ܗܵܟܲܢܵܐ ܐܵܡܲܪ ܡܵܪܝܵܐ ܡܲܠܟܹ̇ܗ ܕܝܼܣܪܵܝܹܠ ܘܦܵܪܘܿܩܹܗ: ܡܵܪܝܵܐ ܚܲܝܠܬ̣ܵܢܵܐ ܫܡܹܗ. ܐܸܢܵܐ ܐ̄ܢܵܐ ܩܲܕ݂ܡܵܝܵܐ: ܘܐܸܢܵܐ ܐ̄ܢܵܐ ܐ̄ܚܪܵܝܵܐ. ܘܠܲܝܬ̇ ܐܲܠܵܗ ܠܒܲܪ ܡܹܢܝ.

⁷ܘܡܲܢ̣ܘܼ ܐܲܟ݂ܘܵܬ̣ܝ ܢܸܩܪܸܐ: ܘܢܸܬ̇ܛܲܝܲܒ̣ ܘܲܢܚܵܘܸܐ: ܡ̣ܢ ܕܣܵܡܹ̇ܬ̣ ܥܲܡܵܐ ܠܥܵܠܲܡ: ܘܐܵܬ̣̈ܘܵܬ̣ܵܐ ܕܐܵܬ̣̈ܝܵܢ ܢܚܵܘܘܿܢ.

⁸ܠܵܐ ܬܸܕ݂ܚ̄ܠܘܼܢ ܘܠܵܐ ܬܸܬ̣ܪܲܗܒ̣ܘܼܢ: ܠܵܐ ܐܲܫܡܲܥ̇ܬ̇ܟ݂ܘܿܢ ܡ̣ܢ ܩܕ݂ܝܼܡ ܘܚܵܘܝܼܬ̇ܟ݂ܘܿܢ ܘܐܲܢ̄ܬ̇ܘܿܢ ܣܵܗ̈ܕܲܝ. ܕܠܲܝܬ̇ ܐܲܠܵܗ ܠܒܲܪ ܡܹܢܝ: ܘܠܲܝܬ̇ ܕܬܲܩܝܼܦ ܕܠܵܐ ܝܵܕܲܥ ܐ̄ܢܵܐ.

⁹ܣܪܝܼܩܝܼܢ ܐܸܢܘܿܢ ܟܠܗܘܿܢ ܐܘܼܡܵܢܹ̈ܐ ܕܥܵܒ̣ܕ̇ܝܼܢ ܨܲܠܡܹ̈ܐ. ܘܠܲܝܬ̇ ܝܘܼܬ̣ܪܵܢ ܒܲܥܒ̣ܵܕܲܝܗܘܿܢ ܕܪܲܓ̣ܘ ܠܡܸܥܒܲܕ݂ ܘܣܵܗܕ̇ܝܼܢ ܐܘܼܡܵܢܹ̈ܐ ܕܲܥ̣ܒܲܕ݂ܘ ܐܸܢܘܿܢ: ܕܠܵܐ ܚܵܙܹ̇ܝܢ: ܘܠܵܐ ܫܵܡ̇ܥܝܼܢ: ܘܠܵܐ ܝܵܕ݂ܥ̇ܝܼܢ.

¹⁰ܡܸܛܠ ܗܵܢܵܐ ܢܸܒ̣ܗ̱ܬ̣ܘܼܢ ܐܲܝܠܹܝܢ ܕܥܵܒ̣ܕ̇ܝܼܢ ܐܲܠܵܗܹ̈ܐ: ܘܓ̣ܵܠܦܝܼܢ ܢܣܝܼܟܹ̈ܐ ܕܝܘܼܬ̣ܪܵܢ ܠܲܝܬ̇ ܒܗܘܿܢ.

¹¹ܗܵܐ ܟܠܗܘܿܢ ܐܘܼܡܵܢܲܝ̈ܗܘܿܢ: ܚܲܪܫܝܼܢ ܐܸܢܘܿܢ ܡ̣ܢ ܒܢܲܝ̈ܢܵܫܵܐ. ܢܸܬ̣ܟܲܢܫܘܼܢ ܟܠܗܘܿܢ ܘܲܢܩܘܼܡܘܼܢ ܘܢܸܒ̣ܗ̱ܬ̣ܘܼܢ ܘܢܸܚܦܪܘܿܢ ܐܲܟ݂ܚ̄ܕ݂ܵܐ.

¹²ܕܲܠܛܲܫ̣ ܦܲܪܙܠܵܐ ܢܲܓܵܪܵܐ: ܘܲܒ̣ܥܸܫܦܵܐ ܫܲܦܝܹܗ. ܘܲܒ̣ܡܲܩܵܪܵܐ ܓܲܠ̣ܦܹܗ ܘܥܲܒ̣ܕܹ̇ܗ ܒܚܲܝܠܵܐ ܕܲܕ݂ܪܵܥܹܗ. ܐܵܦ ܟܦܸܢ ܐܵܦ ܨܗ̣ܝܼ. ܘܠܵܐ ܐܸܫܬ̇ܝܼ ܡܲـ̈ـܝܵܐ ܘܐܸܬ̇ܛܲܪܲܦ.

¹³ܓܒ̣ܵܐ ܢܲܓܵܪܵܐ ܩܲܝܣܵܐ: ܘܡܲܫ̣ܚܹܗ ܘܲܒ̣ܬܸ̇ܬܵܐ ܕܲܒ̇ܩܹܗ. ܘܓܲܠܦܹܗ ܘܥܲܒ̣ܕܹ̇ܗ ܒܲܕ݂ܡܘܼܬ̣ܵܐ ܕܓܲܒ̣ܪܵܐ: ܐܲܝܟ݂ ܝܵܐܝܘܼܬ̣ܵܐ ܕܒܲܪܢܵܫܵܐ.

¹⁴ܘܐܲܩܝܼܡܹܗ ܒܒܲܝܬܵܐ ܠܩܲܝܣܵܐ ܕܲܦܣܝܼܩ ܡ̣ܢ ܥܵܒ̣ܵܐ: ܕܲܒ̣ܡܸܛܪܵܐ ܐܸܬ̣ܪܲܒ̇ܝܼ. ܕܢܸܗܘܹܐ ܠܐ̄ܢܵܫܵܐ ܠܝܲܩܕܵܢܵܐ.

¹⁵ܘܲܢܣܲܒ̣ܘ ܡܸܢܹܗ: ܘܐܲܚܸܡ̣ܘ: ܘܐܲܦܵܘ ܠܲܚܡܵܐ. ܘܐܵܦ ܥ̣ܒܲܕ݂ܘ ܐܲܠܵܗܵܐ: ܘܣܵܓ̣ܕܲܝܼܢ ܠܹܗ. ܥ̣ܒܲܕ݂ܘ ܓܠܝܼܦܵܐ ܘܲܣܓܸܕ݂ܘ ܠܹܗ.

¹⁶ܦܸܠܓܹ̇ܗ ܐܵܘܩܸܕ݂ܘ ܒܢܘܼܪܵܐ. ܘܛܵܘܝܼܘ ܒܸܣܪܵܐ ܥܲܠ ܓܘܼܡܪ̈ܵܘܗܝ. ܘܐܸܟܲܠܘ ܘܲܣܒܲܥܘ ܘܐܵܦ ܫܚܸܢܘ ܘܐܸܡܲܪܘ ܐܲܚܵܢ: ܫܸܚܢܹ̇ܬ̣: ܘܲܚܙܹܝܬ̣ ܢܘܼܪܵܐ.

¹⁷ܘܫܲܪܟܵܐ ܥܒܲܕ݂ܘ ܐܲܠܵܗܵܐ ܓܠܝܼܦܵܐ: ܘܲܣܓܸܕ݂ܘ ܠܹܗ: ܘܨܲܠܝܼܘ ܠܹܗ: ܘܐܸܡܲܪܘ ܦܲܨܵܢ: ܡܸܛܠ ܕܐܲܢ̄ܬ̇ܘܼ ܐܲܠܵܗܲܢ.

¹⁸ܘܠܵܐ ܝܼܕܲܥ̣ܘ ܘܠܵܐ ܐܸܣܬܲܟܲܠܘ: ܕܫܝܼܥ ܗ̄ܘܼ ܚܸܙܘܵܐ ܕܥܲܝܢܲܝ̈ܗܘܿܢ. ܘܣܘܼܟܵܠܵܐ ܕܠܸܒ̇ܗܘܿܢ.

¹⁹ܘܠܵܐ ܐܲܝܬ̇ܝܘ ܥܲܠ ܒܵܠܗܘܿܢ: ܘܠܵܐ ܝܼܕܲܥ̣ܘ ܘܠܵܐ ܐܸܬ̣ܪܲܥܝܼܘ ܘܐܸܡܲܪܘ: ܕܦܸܠܓܹ̇ܗ ܐܵܘܩܸܕ݂ܘ ܒܢܘܼܪܵܐ. ܘܥܲܠ ܓܘܼܡܪ̈ܵܘܗܝ ܐܲܦܵܘ ܠܲܚܡܵܐ. ܘܛܵܘܝܼܘ ܒܸܣܪܵܐ ܘܐܸܟܲܠܘ ܘܫܲܪܟܵܐ ܥܒܲܕ݂ܘ ܠܗܘܿܢ ܦܬܲܟ݂ܪܵܐ ܕܩܲܝܣܵܐ: ܘܲܣܓܸܕ݂ܘ ܠܹܗ.

²⁰ܪܵܥܹ̇ܐ ܗ̄ܘܼ ܒܩܸܛܡܵܐ ܠܸܒ̇ܗܘܿܢ. ܘܡܸܛܥܵܐ ܗ̄ܘܼ ܛܵܥܹ̇ܝܢ: ܘܠܵܐ ܡܦܲܨܹܝܢ ܢܲܦ̮ܫܗܘܿܢ. ܘܠܵܐ ܐܵܡ̇ܪܝܼܢ ܕܕ̇ܓܵܠܘܼܬ̣ܵܐ ܥܸܒ̣ܕܲܬ̤ ܝܲܡܝܼܢܲܢ.

²¹ܐܸܬ̇ܕܲܟ݂ܪ ܗܵܠܹܝܢ ܝܲܥܩܘܿܒ̣: ܘܝܼܣܪܵܝܹܠ ܕܥܲܒ̣ܕ̇ܝ ܐܲܢ̄ܬ̇. ܓܒܲܠܬܵܟ݂ ܠܝܼ ܥܲܒ̣ܕ݂ܵܐ: ܡܸܟܹ̇ܝܠ ܝܼܣܪܵܝܹܠ ܠܵܐ ܬܸܛܥܹܝܢܝ.

²²ܐܲܥ̇ܒܪܹܬ̣ ܥܵܘܼܠܵܟ݂ ܐܲܝܟ݂ ܥܲܪܦܸܠܵܐ: ܘܲܚܛܵܗܲܝ̈ܟ ܐܲܝܟ݂ ܥܢܵܢܵܐ. ܐܸܬ̣ܦܲܢܝ ܠܘܵܬ̣ܝ ܕܲܦܪܲܩܬܵܟ݂.

²³ܫܲܒܲܚܘ ܫܡܲܝܵܐ ܡܸܛܠ ܕܲܥ̣ܒܲܕ݂ ܡܵܪܝܵܐ: ܝܲܒܸ̇ܒܹܝ̈ܢ ܫܲܬ̣ܐ̱ܣܹ̈ܝܗ̇ ܕܐܲܪܥܵܐ. ܐܸܬ̣ܦܲܨ̄ܚܘ ܛܘܼܪܹ̈ܐ ܒܬܸܫܒ̇ܘܿܚܬܵܐ: ܘܥܵܒ̣ܵܐ ܘܟ݂ܠ ܐܝܼܠܵܢܹ̈ܐ ܕܒܹܗ. ܕܲܦܪܲܩ̣ ܡܵܪܝܵܐ ܠܝܲܥܩܘܿܒ̣: ܘܒ̣ܝܼܣܪܵܝܹܠ ܐܸܫܬܲܒܲܚ.

²⁴ܗܵܟܲܢܵܐ ܐܵܡܲܪ ܡܵܪܝܵܐ: ܕܦܲܪܩܵܟ݂ ܘܓܲܒ̣ܠܵܟ݂ ܒܡܲܪܒ̇ܥܵܐ ܘܥܲܕ̇ܪܵܟ݂. ܐܸܢܵܐ ܐ̄ܢܵܐ ܡܵܪܝܵܐ ܕܥܸܒ̣ܕܸ̇ܬ̣ ܟܠ. ܡܸܬܚܹ̇ܬ̣ ܫܡܲܝܵܐ ܒܲܠܚܘܿܕܲܝ. ܘܪܸܩܥܹ̇ܬ̣ ܐܲܪܥܵܐ ܡܹܢܝ ܘܠܝܼ.

²⁵ܡܒܲܛܸܠ ܐܵܬ̣̈ܘܵܬ̣ܵܐ ܕܙܲܟ̇ܘܼܪܹ̈ܐ ܘܩܸܨܡܲܝ̈ܗܘܿܢ ܡܲܫܛܸܐ ܐ̄ܢܵܐ. ܡܲܗܦܸܟ݂ ܚܲܟ̇ܝܼܡܹ̈ܐ ܠܒܸܣܬܲܪܗܘܿܢ ܘܝܼܕܲܥܬ̣ܗܘܿܢ ܡܣܲܟܸ̇ܠ ܐ̄ܢܵܐ.

²⁶ܘܲܡܩܝܼܡ ܡܸܠܬ̣ܵܐ ܕܥܲܒ̣ܕܹ̇ܗ: ܘܬܲܪܥܝܼܬ̣ܵܐ ܕܡܲܠܲܐܟ݂ܵܘ̈ܗܝ ܡܫܲܠܸܡ. ܕܐܸܡܲܪ ܠܐܘܿܪܸܫܠܸܡ: ܕܬܸܬ̣ܝܲܬܲܒ̣. ܘܲܠܩܘܼܪ̈ܝܵܐ ܕܲܝܗܘܼܕ݂ܵܐ: ܕܢܸܬ̣ܒܲܢ̈ܝܵܢ. ܘܲܠܚܲܪ̈ܒ̣ܵܬ̣ܵܗ̇ ܐܲܩܝܼܡ.

²⁷ܕܐܸܡܲܪ ܠܥܘܼܡܩܵܐ ܚܪܲܒ̣. ܘܢܲܗܪ̈ܵܘܵܬ̣ܵܟ݂ ܐܵܘܒܸ̇ܫ.

²⁸ܕܐܸܡܲܪ ܠܟ݂ܘܼܪܸܫ ܪܵܥܚ: ܕܟ݂ܠܹܗ ܨܸܒ̣ܝܵܢܝ ܢܫܲܠܸܡ: ܠܡܹܐܡܲܪ ܠܐܘܿܪܸܫܠܸܡ ܕܬܸܬ̣ܒ̇ܢܸܐ ܘܗܲܝܟ̇ܠܵܐ ܢܸܫܬܲܟ݂ܠܲܠ.