Read Aramaic Peshita Isaiah 46 Bible Online

Isaiah 46 - Aramaic Peshita bible

Isaiah 46

¹ܢܦܲܠ̣ ܒܹܝܠ: ܘܐܸܣܬ̇ܚܸܦ ܢܒ̣ܘܿ ܘܲܗܘ̤ܵܘ ܦܬܲܟ݂ܪ̈ܲܝܗܘܿܢ ܓܠܝܼܦܹ̈ܐ ܛܲܥܢܹ̈ܐ ܥܕ݂ܝܼ̈ܕܹܐ: ܠܚܲܝ̄ܘܼܬ̣ܵܐ ܘܠܲܒ̣ܥܝܼܪܵܐ ܟܦܲܢܬܵܐ.

²ܐܸܣܬ̇ܚܸܦܘ ܘܲܢܦܲܠܘ ܐܲܟ݂ܚ̄ܕ݂ܵܐ. ܘܠܵܐ ܐܸܫܟܲܚܘ ܠܲܡܫܵܘܙܒ̣ܵܘܼ ܛܵܥܘܿܢܲܝ̈ܗܘܿܢ ܘܐܸܙܲܠ ܒܫܸܒ̣ܝܵܐ ܢܲܦ̮̈ܫܵܬ̣ܗܘܿܢ.

³ܫܘܼܡܥܘܼܢܝ ܝܒܹܝܬ̣ ܝܲܥܩܘܿܒ̣: ܘܟ݂ܠܹܗ ܫܲܪܟܹ̇ܗ ܕܝܼܣܪܵܝܹܠ ܕܡܸܫܬܲܩܠܝܼܢ ܒܟܲܪܣܵܐ: ܘܡܸܫܬܲܩܠܝܼܢ ܒܡܲܪܒ̇ܥܵܐ.

⁴ܥܕܲܡܵܐ ܠܣܲܝܒ̇ܘܼܬ̣ܵܐ ܐܸܢܵܐ ܗ̄ܘܼ ܘܲܥܕܲܡܵܐ ܠܩܲܫܝܼܫܘܼܬ̣ܵܐ ܐܸܢܵܐ ܐܸܣܒ̇ܘܿܠ ܐܸܢܵܐ ܥܸܒ̣ܕܹ̇ܬ̣: ܘܐܸܢܵܐ ܐܸܫܩܘܿܠ ܘܐܸܢܵܐ ܐܸܣܒ̇ܘܿܠ ܘܐܹܦܲܨܹܐ.

⁵ܠܡܲܢ ܕܲܡܝܼܬ̇ܘܿܢܵܢܝ ܘܦܲܚܸܡ̣ܬ̇ܘܿܢܵܢܝ.

⁶ܠܲܕ݂ܛܵܥܹ̇ܝܢ ܘܡܲܦܩܝܼܢ ܕܲܗܒ̣ܵܐ ܡ̣ܢ ܟܝܼܣܲܝ̈ܗܘܿܢ ܘܣܹܐܡܵܐ ܒܡܲܣܲܐܬ̣ܵܐ ܬܵܩ̇ܠܝܼܢ. ܘܐܵܓ̣ܪܝܼܢ ܩܲܢܝܵܢܵܐ. ܘܥܵܒ̣ܕ̇ܝܼܢ ܐܲܠܵܗܵܐ ܘܣܵܓ̣ܕܝܼܢ ܠܹܗ: ܘܐܵܦ ܡܨܲܠܹܝܢ ܠܹܗ.

⁷ܘܫܵܩܠܝܼܢ ܠܹܗ ܥܲܠ ܟܲܬ̣ܦܬ̣̈ܗܘܿܢ: ܘܲܡܗܲܠܟ݂ܝܼܢ ܠܹܗ. ܘܣܵܝܡܝܼܢ ܠܹܗ ܥܲܠ ܕܘܼܟ̇ܬܹܗ. ܘܠܵܐ ܡܸܫܟܲܚ ܠܲܡܩܵܡ ܡ̣ܢ ܕܘܼܟ̇ܬܹܗ ܘܐܵܦ ܡܨܲܠܹܝܢ ܠܹܗ: ܘܠܵܐ ܥܵܢܹ̇ܐ ܠܗܘܿܢ. ܘܠܵܐ ܦܵܪܹܩ ܠܗܘܿܢ ܡ̣ܢ ܐܘܼܠܨܵܢܲܝ̈ܗܘܿܢ.

⁸ܐܸܬ̇ܕܲܟ݂ܪܘ ܗܵܠܹܝܢ ܘܐܸܬ̣ܒܲܝܲܢܘ ܘܐܲܝܬܵܘ ܥܵܘܿܠܹ̈ܐ ܥܲܠ ܠܸܒ̇ܟ݂ܘܿܢ.

⁹ܐܸܬܲܕܲܟ݂ܪܘ ܩܲܕ݂ܡܵـ̈ـܝܵܬ̣ܵܐ ܕܡ̣ܢ ܥܵܠܲܡ. ܕܐܸܢܵܐ ܐ̄ܢܵܐ ܐܲܠܵܗܵܐ: ܘܠܲܝܬ̇ ܬܘܼܒ̣ ܐܲܠܵܗ: ܘܠܲܝܬ̇ ܐܲܟ݂ܘܵܬ̣ܝ.

¹⁰ܘܲܡܚܵܘܸܐ ܐ̄ܢܵܐ ܡ̣ܢ ܪܹܫܝܼܬ̣ܵܐ ܐ̄ܚܪ̈ܵܝܬܵܐ: ܘܡ̣ܢ ܩܕ݂ܝܼܡ ܐܲܝܠܹܝܢ ܕܠܵܐ ܐܸܬ̣ܥ̱ܒܸܕ݂ ܐܵܡܲܪ ܐ̄ܢܵܐ. ܬܲܪܥܝܼܬܝ ܡܩܝܼܡ ܐ̄ܢܵܐ. ܘܟ݂ܠܹܗ ܨܸܒ̣ܝܵܢܝ ܥܵܒܹ̇ܕ݂ ܐ̄ܢܵܐ.

¹¹ܩܵܪܹܐ ܐ̄ܢܵܐ ܡ̣ܢ ܡܲܕ݂ܢ̄ܚܵܐ ܛܲܝܪܵܐ: ܘܡ̣ܢ ܐܲܪܥܵܐ ܪܲܚܝܼܩܬܵܐ ܓܲܒ̣ܪܵܐ ܕܬܲܪܥܝܼܬ̣ܝ. ܐܸܢܵܐ ܡܡܲܠܸܠ ܐ̄ܢܵܐ: ܐܵܦ ܡܲܝܬܹܐ ܐ̄ܢܵܐ. ܓܸܒ̣ܠܹ̇ܬ̣: ܐܵܦ ܥܵܒܸܕ݂ ܐ̄ܢܵܐ.

¹²ܫܘܼܡܥܘܼܢܝ ܥܲܫܝܼ̈ܢܲܝ ܠܸܒܵܐ: ܪ̈ܲܚܝܼܩܲܝ ܡ̣ܢ ܙܲܕ̇ܝܼܩܘܼܬ̣ܵܐ.

¹³ܩܸܪܒܲܬ̤ ܙܲܕ̇ܝܼܩܘܼܬ̣ܝ ܠܡܹܐܬ̣ܵܐ: ܘܦܘܼܪܩܵܢܝ ܠܵܐ ܢܵܘܚܲܪ ܘܐܸܬܸ̇ܠ ܒܨܸܗܝܘܿܢ ܦܘܼܪܩܵܢܵܐ: ܘܠܝܼܣܪܵܝܹܠ ܬܸܫܒ̇ܘܿܚܬ̇ܝ.