Read Aramaic Peshita Isaiah 47 Bible Online

Isaiah 47 - Aramaic Peshita bible

Isaiah 47

¹ܐ: ܚܘܿܬ̣ܝ ܘܬܸܒ̣ܝ ܥܲܠ ܥܲܦܪܵܐ ܒܬ̣ܘܼܠܬܵܐ ܒܲܪܬ̣ ܒܵܒܹܠ. ܬܸܒ̣ܝ ܥܲܠ ܐܲܪܥܵܐ ܒܲܪܬ̣ ܟܲܠܕ݂ܵܝܹ̈ܐ. ܠܲܝܬ̇ ܟܘܼܪܣܝܵܐ. ܡܸܛܠ ܕܠܵܐ ܢܵܘܣܦܘܼܢ ܬܘܼܒ̣ ܠܡܸܩ̱ܪܝܹܟ݂ܝ ܡܥܲܕܲܢܬܵܐ ܘܲܡܦܲܢܲܩܬܵܐ.

²ܣܲܒ̣ܝ ܪܲܚܝܵܐ: ܛܚܲܢܝ ܩܲܡܚܵܐ ܓܠܵܝ ܬܲܚܦܝܼܬܹܟ݂ܝ ܓܘܿܙܝ ܚܸܘܵܪ̈ܵܬܹܟ݂ܝ ܓܠܵܝ ܫܵܩܲܝ̈ܟ̇ܝ ܥܒܲܪܝ ܢܲܗܪ̈ܵܘܵܬ̣ܵܐ.

³ܢܸܬ̣ܓ̇ܠܹܐ ܦܘܼܪܣܵܝܹܟ݂ܝ: ܘܢܸܬ̣ܚܙܹܐ ܚܸܣܕܲܟ݂ܝ ܐܸܣܲܒ̣ ܡܸܢܹܟ݂ܝ ܬܒܲܥܬ̣ܵܐ. ܘܠܵܐ ܐܲܦ̮ܓܲܥ ܒܹܟ݂ܝ ܐ̄ܢܵܫ.

⁴ܦܵܪܘܿܩܲܢ ܡܵܪܝܵܐ ܚܲܝܠܬ̣ܵܢܵܐ ܫܡܹܗ: ܩܲܕ̇ܝܼܫܵܐ ܕܝܼܣܪܵܝܹܠ.

⁵ܬܸܒ̣ܝ ܒܲܬ̣ܘܵܪܵܐ. ܥܘܿܠܝ ܒܚܸܫܘܿܟ݂ܵܐ ܒܲܪܬ̣ ܟܲܠܕ݂ܵܝܹ̈ܐ. ܡܸܛܠ ܕܠܵܐ ܢܵܘܣܦܘܼܢ ܬܘܼܒ̣ ܠܡܸܩ̱ܪܝܹܟ݂ܝ ܓܲܢ̄ܒܵܪܲܬ̣ ܡܲܠ̈ܟ̇ܘܵܬ̣ܵܐ.

⁶ܪܸܓ̣ܙܹ̇ܬ̣ ܥܲܠ ܥܲܡܝ: ܕܛܵܘܸܫܘ ܝܵܪܬ̇ܘܼܬ̣ܝ ܘܐܲܫ̱ܠܡܹ̇ܬ̣ ܐܸܢܘܿܢ ܒܐܝܼܕܲܝ̈ܟ̇ܝ ܘܠܵܐ ܥ̣ܒܲܕ̇ܬܝ ܥܠܲܝܗܘܿܢ ܪ̈ܲܚܡܹܐ. ܘܥܲܠ ܣܵܒܹ̈ܐ ܐܲܥܫܸܢܬ̇ܝ ܢܝܼܪܹܟ݂ܝ ܛܵܒ̣.

⁷ܘܐܸܡܲܪܬ̇ܝ ܕܲܠܥܵܠܲܡ ܐܸܗܘܹܐ ܓܲܢ̄ܒܵܪܬܵܐ. ܘܠܵܐ ܣܵܡ̣ܬ̇ܝ ܒܠܸܒܹ̇ܟ݂ܝ ܗܵܠܹܝܢ. ܘܠܵܐ ܐܸܬ̇ܕ̇ܟܲܪܬ̇ܝ ܚܲܪܬ̣ܵܐ.

⁸ܗܵܫܵܐ ܫܡܲܥܝ ܗܵܠܹܝܢ ܡܥܲܕ̇ܢܬܵܐ: ܕܝܵܬ̣ܒܵܐ ܒܫܸܠܝܵܐ: ܘܐܵܡܪܵܐ ܒܠܸܒܵܗ̇: ܐܸܢܵܐ ܐ̄ܢܵܐ ܘܠܲܝܬ̇ ܬܘܼܒ̣. ܠܵܐ ܐܸܬܸ̇ܒ̣ ܐܲܪܡܲܠܬܵܐ: ܘܠܵܐ ܐܸܕܲܥ ܬܟ݂ܵܠܵܐ.

⁹ܢܹܐ̈ܬ̣ܝܵܢ ܥܠܲܝܟ̇ܝ ܗܵܠܹܝܢ ܬܲܪ̈ܬܲܝܗܹܝܢ ܡܲܚ̈ܘܵܬ̣ܵܐ ܒܝܵܘܡܵܐ ܚܲܕ݂. ܬܟ݂ܵܠܵܐ ܘܐܲܪܡܠܘܼܬ̣ܵܐ ܡ̣ܢ ܫܸܠܝܵܐ ܢܹܐ̈ܬ̣ܝܵܢ ܥܠܲܝܟ̇ܝ: ܒܣܘܼܓ̣ܵܐܐ ܕܚܲܪ̈ܵܫܲܝܟ̇ܝ: ܘܲܒ̣ܣܘܿܓ̣ܵܐܐ ܕܲܡܓ̣ܘܫܲܝ̈ܟ̇ܝ.

¹⁰ܕܐܸܬ̇ܬ̇ܟܸܠܬ̇ܝ ܥܲܠ ܒܝܼܫܘܼܬܹܟ݂ܝ ܘܐܸܡܲܪܬ̇ܝ ܕܠܲܝܬ̇ ܕܚܵܙܹ̇ܐ ܠܝܼ. ܚܸܟ݂ܡ̱ܬܹܟ݂ܝ ܘܝܼܕܲܥܬܹܟ݂ܝ. ܗ̤ܝ ܐܲܛܥ̱ܝܵܬܹܟ݂ܝ ܘܐܸܡܪܬ̇ܝ ܒܠܸܒܹ̇ܟ݂ܝ ܕܐܸܢܵܐ ܐ̄ܢܵܐ ܘܠܲܝܬ̇ ܬܘܼܒ̣.

¹¹ܬܹܐܬܹܐ ܥܠܲܝܟܝ ܒܝܼܫܬܵܐ ܒܫܲܦܪܵܐ: ܘܠܵܐ ܬܸܕ̇ܥܝܼܢ ܘܬܸܦܸܠ ܥܠܲܝܟ̇ܝ ܬܵܘܸܗܬ̣ܵܐ: ܘܠܵܐ ܬܹܫܟ̇ܚܝܼܢ ܠܡܲܥܒܵܪܘܼܬ̣ܵܗ̇ ܘܢܹܐܬܹܐ ܥܠܲܝܟܝ ܡ̣ܢ ܫܸܠܝܵܐ ܕܠܘܼܚܝܵܐ ܘܠܵܐ ܬܸܕ̇ܥܝܼܢ.

¹²ܩܘܼܡܝ ܢܹܐ ܒܲܡܓ̣ܘܼܫܲܝ̈ܟ̇ܝ: ܘܲܒ̣ܚܲܪ̈ܵܫܲܝܟ̇ܝ ܣܲܓ̇ܝܼ̈ܐܹܐ ܕܲܠܐܝܼܬ̇ܝ ܒܗܘܿܢ ܡ̣ܢ ܛܲܠܝܘܼܬܹܟ݂ܝ. ܛܵܟ݂ ܬܸܫܟ̇ܚܝܼܢ ܬܵܘܬ̇ܪܝܼܢ: ܛܵܟ݂ ܬܸܬ̣ܥܲܫܢܝܼܢ.

¹³ܠܐܝܼܬ̇ܝ ܒܣܘܿܓ̣ܵܐܐ ܕܡܲܚܫ̈ܒ̣ܵܬܹܟ݂ܝ. ܢܩܘܼܡܘܼܢ ܢܸܦ̱ܪܩܘܼܢܹܟ݂ܝ ܟܲܠܕ݂ܵܝܹ̈ܐ ܕܚܵܝܪܝܼܢ ܒܲܫܡܲܝܵܐ ܘܲܒ̣ܟ݂ܵܘܟ̇ܒܹ̈ܐ: ܘܡܵܘܕ̇ܥܝܼܢ ܠܹܟ݂ܝ ܒܝܲܪܚܵܐ ܡܸܕܸ̇ܡ ܕܐܵܬܹܐ ܥܠܲܝܟ̇ܝ.

¹⁴ܗܵܐ ܗܘ̤ܵܘ ܐܲܝܟ݂ ܓܸܠܹ̈ܐ ܕܐܵܘܩܕܲܬ̤ ܐܸܢܘܿܢ ܢܘܼܪܵܐ. ܘܠܵܐ ܢܦܲܨܘܿܢ ܢܲܦ̮ܫܗܘܿܢ ܡ̣ܢ ܐܝܼܕܵܐ ܕܫܲܠܗܹܒ̣ܝܼܬ̣ܵܐ. ܠܲܝܬ̇ ܓܘܼܡܪܹ̈ܐ ܠܢܘܼܪܗܘܿܢ: ܐܵܦܠܵܐ ܙܲܗܪܵܐ ܠܡܸܬܲܒ̣ ܠܩܘܼܒ̣ܠܹܗ.

¹⁵ܗܵܟܲܢܵܐ ܗܘ̤ܵܘ ܠܹܟ݂ܝ ܬܲܓܵܪ̈ܲܝܟ̇ܝ ܕܲܠܐܝܼܬ̇ܝ ܒܗܘܿܢ ܡ̣ܢ ܛܲܠܝܘܼܬܹܟ݂ܝ ܘܐ̄ܢܵܫ ܠܣܸܛܪܹܗ ܛܥ̣ܵܘ: ܘܠܲܝܬ̇ ܕܦܵܪܹܩ ܠܹܟ݂ܝ.