Read Aramaic Peshita Isaiah 5 Bible Online

Isaiah 5 - Aramaic Peshita bible

Isaiah 5

¹ܐܹܫܲܒܲܚ ܠܚܲܒ̇ܝܼܒ̣ܝ: ܬܸܫܒ̇ܘܿܚܬܵܐ ܕܚܲܒ̇ܝܼܒ̣ܝ ܠܟܲܪܡܹܗ. ܟܲܪܡܵܐ ܗ̄ܘܼܵܐ ܠܚܲܒ̇ܝܼܒ̣ܝ: ܒܩܲܪܢܵܐ ܕܐܲܬ̣ܪܵܐ ܫܲܡܝܼܢܵܐ.

²ܘܦܲܠܚܹܗ: ܘܐܲܚܕ̇ܪܹܗ ܣܝܵܓ̣ܵܐ. ܘܲܢܨܲܒ̣ ܒܹܗ ܫܲܒ̇ܘܼܩܹ̈ܐ: ܘܲܒ̣ܢܵܐ ܡܲܓܕ̇ܠܵܐ ܒܓܵܘܹܗ. ܘܐܵܦ ܡܲܥܨܲܪܬܵܐ ܥܒܲܕ݂ ܒܹܗ. ܘܣܲܟ̇ܝܼ ܕܢܸܥܒܸ̇ܕ݂ ܥܸܢܒܹ̈ܐ. ܘܲܥ̣ܒܲܕ݂ ܚܲܪ̈ܘܼܒܹܐ.

³ܗܵܫܵܐ ܓܲܒ̣ܪܹ̈ܐ ܕܲܝܗܘܼܕ݂ܵܐ: ܘܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܕܘܼܢܘ ܒܲܝܢܲܝ ܠܟܲܪܡܝ.

⁴ܡܵܢܵܐ ܬܘܼܒ̣ ܘܵܠܹܐ ܗ̄ܘܼܵܐ ܠܡܸܥܒܲܕ݂ ܠܟܲܪܡܝ: ܘܠܵܐ ܥܸܒ̣ܕܹ̇ܬ̣ ܠܹܗ. ܕܣܲܟ̇ܝܼܬ̇ ܕܢܸܥܒܸ̇ܕ݂ ܥܸܢܒܹ̈ܐ: ܘܲܥ̣ܒܲܕ݂ ܚܲܪ̈ܘܼܒܹܐ.

⁵ܗܵܫܵܐ ܐܹܚܵܘܹܝܟ݂ܘܿܢ ܡܸܕܸ̇ܡ ܕܥܵܒܹ̇ܕ݂ ܐ̄ܢܵܐ ܠܹܗ ܠܟܲܪܡܝ: ܥܵܩܲܪ ܐ̄ܢܵܐ ܡܲܓܕ̇ܠܹܗ: ܘܢܸܗܘܹܐ ܠܒܸܙܬ̣ܵܐ. ܘܬ̣ܵܪܲܥ ܐ̄ܢܵܐ ܣܝܵܓܹܗ: ܘܢܸܗܘܹܐ ܠܲܕ݂ܫܵܐ.

⁶ܘܐܸܥܒ̇ܕ݂ܝܼܘܗܝ ܕܢܸܚܪܲܒ̣ ܘܠܵܐ ܢܸܬ̣ܟ̇ܣܲܚ. ܘܠܵܐ ܢܸܬ̣ܦܠܲܚ ܘܢܹܐܥܘܿܢ ܒܹܗ ܟܘܼ̈ܒܹ̇ܐ ܘܝܲܥܪܵܐ. ܘܐܸܦܩܘܿܕ݂ ܠܲܥܢܵܢܹ̈ܐ ܕܠܵܐ ܢܲܚ̈ܬ̣ܵܢ ܥܠܵܘܗܝ ܡܸܛܪܵܐ.

⁷ܡܸܛܠ ܕܟܲܪܡܹܗ ܕܡܵܪܝܵܐ ܚܲܝܠܬ̣ܵܢܵܐ: ܒܲܝܬܵܐ ܗ̄ܘܼ ܕܒܹܝܬ̣ ܝܼܣܪܵܝܹܠ: ܘܓܲܒ̣ܪܹ̈ܐ ܕܡ̣ܢ ܝܼܗܘܼܕ݂ܵܐ: ܢܸܨܒ̇ܬ̣ܵܐ ܚܕܲܬܵܐ ܘܚܲܒ̇ܝܼܒ̣ܬܵܐ ܣܲܟ̇ܝܼܬ̇ ܠܕ݂ܝܼܢܵܐ: ܘܲܗܘ̤ܵܐ ܚܛܘܼܦܝܵܐ. ܘܲܠܙܲܕ̇ܝܼܩܘܼܬ̣ܵܐ: ܘܗܵܐ ܝܑܼܠܲܠܬܵܐ.

⁸ܘܵܝ ܠܕܲܡܩܲܪܒ̣ܝܼܢ ܒܲܝܬܵܐ ܠܒܲܝܬܵܐ: ܘܚܲܩܠܐ ܒܚܲܩܠܵܐ ܚܵܠܛܝܼܢ. ܕܬܹܐܚܕ̇ܘܼܢ ܐܲܬ̣ܪܵܐ: ܘܬܸܬ̇ܒ̣ܘܼܢ ܒܲܠܚܘܿܕܲܝܟ̇ܘܿܢ ܒܓ̣ܵܘܵܗ̇ ܕܐܲܪܥܵܐ.

⁹ܒܐܸܕ݂ܢܲܝ̈ ܡܵܪܝܵܐ ܚܲܝܠܬ̣ܵܢܵܐ ܐܸܫܬ̇ܡܲܥ. ܒܵـ̈ـܬܹܐ ܣܲܓ̇ܝܹ̈ܐܐ ܠܚܘܼܪܒܵܐ ܢܸܗܘܘܿܢ: ܡ̣ܢ ܒܠܲܝ ܕܝܵܬܹܒ̣.

¹⁰ܡܸܛܠ ܕܲܥܣܲܪ ܐܸܫܟܵܪܹ̈ܐ ܕܟܲܪܡܵܐ ܢܸܥ̈ܒ̇ܕܵܢ ܚܕ݂ܵܐ ܚܵܒ̣ܝܼܬ̣ܵܐ: ܘܙܲܪܥܵܐ ܕܟ݂ܘܿܪ ܢܸܥܒܸ̇ܕ݂ ܣܐܵܐ.

¹¹ܘܵܝ ܠܕܲܡܩܲܕ̇ܡܝܼܢ ܒܨܲܦܪܵܐ: ܘܪܵܗ̇ܛܝܼܢ ܠܫܲܟ݂ܪܵܐ. ܘܡܵܘܚ̄ܪܝܼܢ ܒܪܲܡܫܵܐ: ܘܚܲܡܪܵܐ ܡܵܘܩܸܕ݂ ܠܗܘܿܢ.

¹²ܒܟܸܢܵܪܹ̈ܐ: ܘܲܒ̣ܩܝܼܬ̣ܵܪܹ̈ܐ: ܘܒܲܦ̈ܠܲܓܹ̇ܐ: ܘܒܲܪ̈ܒ̣ܝܼܥܹܐ: ܚܲܡܪܵܐ ܫܵܬܹܝܢ. ܘܒܲܥܒ̣ܵܕ݂ܵܘ̈ܗܝ ܕܐܲܠܵܗܵܐ ܠܵܐ ܡܸܣܬܲܟ̇ܠܝܼܢ. ܘܒܲܥܒ̣ܵܕ݂ ܐܝܼܕ݂ܵܘ̈ܗܝ ܠܵܐ ܚܵܝ̇ܪܝܼܢ.

¹³ܡܸܛܠ ܗܵܢܵܐ ܐܸܫܬ̇ܒ̣ܝܼ ܥܲܡܝ ܡ̣ܢ ܒܠܲܝ ܝܼܕܲܥܬ̣ܵܐ. ܡܝܼܬܲܝ̈ܗܘܿܢ ܡ̣ܢ ܟܲܦܢܵܐ. ܘܲܥ̣ܫܸܢܘ ܡ̣ܢ ܨܲܗܝܵܐ.

¹⁴ܡܸܛܠ ܗܵܢܵܐ ܐܲܦ̮ܬ̇ܝܲܬ̤ ܫܝܘܿܠ ܢܲܦ̮ܫܵܗ̇. ܘܦܸܥܪܲܬ̤ ܦܘܼܡܵܗ̇ ܕܠܵܐ ܣܵܟ݂: ܘܢܸܚܬ̣ܘܼܢ ܠܵܗ̇ ܡܫܲܒ̇ܚܹ̈ܐ ܘܲܡܝܲܩܪܹ̈ܐ ܘܥܲܫܝܼܢܹ̈ܐ.

¹⁵ܘܢܸܬ̣ܡܲܟܲܟ݂ ܐ̄ܢܵܫܵܐ: ܘܢܸܫܬܲܦܲܠ ܓܲܒ̣ܪܵܐ ܘܥܲܝܢܹ̈ܐ ܪ̈ܵܡܵܬ̣ܵܐ ܢܸܬ̣ܡܲـ̈ـܟ̇ܟ݂ܵܢ.

¹⁶ܘܢܸܬ̇ܬ̇ܪܝܼܡ ܡܵܪܝܵܐ ܚܲܝܠܬ̣ܵܢܵܐ ܒܕ݂ܝܼܢܵܐ ܘܐܲܠܵܗܵܐ ܩܲܕ̇ܝܼܫܵܐ ܢܸܬ̣ܩܲܕܲܫ ܒܙܲܕ̇ܝܼܩܘܼܬ̣ܵܐ.

¹⁷ܘܢܸܪܥܘܿܢ ܐܸܡܪܹ̈ܐ ܒܙܸܕ݂ܩ̄ܗܘܿܢ. ܘܚܲܪ̈ܒ̣ܵܬ̣ܵܐ ܕܐܸܬ̣ܒ̇ܢܝܼ: ܥܵܡܘܿܪܹ̈ܐ ܢܹܐܟ݂ܠܘܼܢ ܐܸܢܹܝܢ.

¹⁸ܘܵܝ ܠܲܕ݂ܡܵܘܪܟ݂ܝܼܢ ܚܛܵܗܲܝ̈ܗܘܿܢ ܐܲܝܟ݂ ܚܲܒ̣ܠܵܐ ܐܲܪܝܼܟ݂ܵܐ. ܘܐܲܝܟ݂ ܥܪܲܩܬ̣ܵܐ ܕܥܵܓܸܠܬܵܐ ܚܛܝܼܬ̣ܗܘܿܢ.

¹⁹ܘܐܵܡ̇ܪܝܼܢ: ܒܲܥܓܲܠ ܢܣܲܪܗܸܒ̣ ܡܵܪܝܵܐ ܥܒ̣ܵܕ݂ܵܘ̈ܗܝ ܕܢܸܚܙܹܐ ܐܸܢܘܿܢ. ܘܬܸܩܪܘܿܒ̣ ܘܬܹܐܬܹܐ ܬܲܪܥܝܼܬܹܗ ܕܩܲܕ̇ܝܼܫܵܐ ܕܝܼܣܪܵܝܹܠ ܘܢܸܕ̇ܥܹܝܗ̇.

²⁰ܘܵܝ ܠܲܕ݂ܩܵܪܹܝܢ ܠܒ̣ܝܼܫܵܐ ܛܵܒ̣ܵܐ: ܘܲܠܛܵܒ̣ܵܐ ܒܝܼܫܵܐ. ܘܣܵܝܡ̇ܝܢ ܢܲܗܝܼܪܵܐ ܠܚܸܫܘܿܟ݂ܵܐ: ܘܚܸܫܘܿܟ݂ܵܐ ܠܢܲܗܝܼܪܵܐ. ܘܣܵܝ̇ܡܝܼܢ ܡܲܪܝܼܪܵܐ ܚܲܠܝܵܐ: ܘܚܲܠܝܵܐ ܡܲܪܝܼܪܵܐ.

²¹ܘܵܝ ܠܲܕ݂ܚܲܟ̇ܝܼܡܝܼܢ ܒܥܲܝܢܲܝ̈ ܢܲܦ̮ܫܗܘܿܢ: ܘܠܘܼܩܒܲܠ ܐܲܦܲܝ̈ܗܘܿܢ ܣܲܟ̇ܘܼܠܬ̣ܵܢܝܼܢ.

²²ܘܵܝ ܠܲܕ݂ܓܲܢ̄ܒܵܪܝܼܢ ܠܡܸܫܬܵܐ ܚܲܡܪܵܐ: ܘܲܠܓܲܒ̣ܪܹ̈ܐ ܚܲܝܠܬ̣ܵܢܹ̈ܐ ܕܡܵܙ̇ܓ̇ܝܼܢ ܫܲܟ݂ܪܵܐ.

²³ܘܲܡܙܲܟܹ̇ܝܢ ܠܚܲܝܵܒ̣ܵܐ ܡܸܛܠ ܫܘܼܚܕܹ̇ܗ ܘܙܵܟ݂ܘܼܬܹܗ ܕܙܲܟܵܝܵܐ ܡܲܥܒ̇ܪܝܼܢ ܡܸܢܗܘܿܢ.

²⁴ܡܸܛܠ ܗܵܢܵܐ ܐܲܝܟ݂ ܕܡܸܬ̣ܐܲܟ݂ܠܵܐ ܚܲܒ̇ܬ̣ܵܐ. ܒܠܸܫܵܢܵܐ ܕܢܘܼܪܵܐ ܕܐܵܚ̇ܕܵܐ: ܡ̣ܢ ܫܲܠܗܹܒ̣ܝܼܬ̣ܵܐ ܕܡܸܫܬܲܒ̣ܩܵܐ ܢܸܬ̣ܐܲܟ݂ܠܘܼܢ. ܘܥܸܩܵܪܗܘܿܢ ܐܲܝܟ݂ ܚܸܠܵܐ ܢܸܗܘܹܐ. ܘܦܸܪ̱ܥܗܘܿܢ ܐܲܝܟ݂ ܥܘܼܪܵܐ ܢܸܣܲܩ. ܥܲܠ ܕܐܲܣܠܝܼܘ ܢܵܡܘܿܣܹܗ ܕܡܵܪܝܵܐ ܚܲܝܠܬ̣ܵܢܵܐ: ܘܲܠܡܹܐܡܪܹܗ ܕܩܲܕ̇ܝܼܫܵܐ ܕܝܼܣܪܵܝܹܠ ܐܲܪܓܸ̇ܙܘ.

²⁵ܡܸܛܠ ܗܵܢܵܐ ܐܸܬ̣ܚܲܡܲܬ̣ ܪܘܼܓ̣ܙܹܗ ܕܡܵܪܝܵܐ ܥܲܠ ܥܲܡܹܗ. ܘܐܲܪܝܼܡ ܐܝܼܕܹܗ ܥܠܲܝܗܘܿܢ: ܘܲܡܚܵܐ ܐܸܢܘܿܢ. ܘܙܵܥܘܼ ܛܘܼܪܹ̈ܐ ܘܲܗ̤ܘܲܝ̈ ܫܠܲܕܲܝ̈ܗܘܿܢ ܐܲܝܟ݂ ܣܝܵܢܵܐ ܒܓ̣ܵܘ ܫܘܼܩܹ̈ܐ ܘܲܒ̣ܗܵܠܹܝܢ ܟܠܗܹܝܢ ܠܵܐ ܗ̣ܦܲܟ݂ ܪܘܼܓ̣ܙܹܗ: ܘܬ̣ܘܼܒ̣ ܐܝܼܕܹܗ ܪܵܡܵܐ.

²⁶ܘܲܢܪܝܼܡ ܐܵܬ̤ܵܐ ܠܥܲܡܡܹ̈ܐ ܡ̣ܢ ܪܘܼܚܩܵܐ: ܘܢܲܫܪܸܩ ܠܗܘܿܢ ܡ̣ܢ ܣܵܘ̈ܦܹܝܗ̇ ܕܐܲܪܥܵܐ. ܘܒܲܥܓܲܠ ܘܩܲܠܝܼܠܵܐܝܼܬ̣ ܢܹܐܬ̣ܘܿܢ.

²⁷ܠܵܐ ܢܸܬ̇ܛܲܪܦܘܼܢ: ܘܠܵܐ ܢܸܬ̇ܬܲܩܠܘܼܢ. ܘܠܵܐ ܢܢܘܼܡܘܼܢ ܘܠܵܐ ܢܸܕ݂ܡ̱ܟ݂ܘܼܢ. ܘܠܵܐ ܢܸܫܪܘܿܢ ܐܵܣܲܪ ܚܲܨܲܝ̈ܗܘܿܢ: ܘܠܵܐ ܢܸܬ̣ܦܲܣ̈ܩܵܢ ܥܲܪ̈ܩܹܐ ܕܲܡܣܵܢܲܝ̈ܗܘܿܢ.

²⁸ܓܹܐܪ̈ܲܝܗܘܿܢ ܫܢܝܼܢܝܼܢ: ܘܩܸܫ̈ܬܵܬ̣ܗܘܿܢ ܡܲܠ̈ܝܵܢ. ܘܦܲܪ̈ܣܵܬ̣ܵܐ ܕܪ̈ܲܟ݂ܫܗܘܿܢ ܐܲܝܟ݂ ܛܲܪ̈ܵܢܹܐ ܢܸܬ̣ܚܲܫ̈ܒܵܢ: ܘܓ̣ܝܼܓ̣ܠܲܝ̈ܗܘܿܢ ܐܲܝܟ݂ ܥܲܠܥܵܠܵܐ.

²⁹ܘܢܸܗܡܲܬ̣ܗܘܿܢ ܐܲܝܟ݂ ܐܲܪܝܵܐ ܕܢܵܗܹ̇ܡ: ܘܐܲܝܟ݂ ܓܘܼܪܝܵܐ ܕܐܲܪܝܵܐ ܕܢܵܗܹ̇ܡ ܘܐܵܚܹ̇ܕ݂ ܬܒ̣ܵܪܵܐ. ܘܡܲܥܕܹ̇ܐ ܘܠܲܝܬ̇ ܕܲܡܦܲܨܹܐ.

³⁰ܘܢܸܢܗܲܡ ܥܠܲܝܗܘܿܢ ܒܝܵܘܡܵܐ ܗܵܘܿ: ܐܲܝܟ݂ ܢܸܗ̱ܡܬܹܗ ܕܝܲܡܵܐ. ܘܲܢܚܘܼܪܘܼܢ ܒܐܲܪܥܵܐ: ܘܢܸܗܘܹܐ ܚܸܫܘܿܟ݂ܵܐ ܘܐܘܼܠܨܵܢܵܐ. ܘܢܘܼܗܪܵܐ ܢܸܚܫܲܟ݂ ܒܥܲܡܛܵܢܗܘܿܢ.