Read Aramaic Peshita Isaiah 51 Bible Online

Isaiah 51 - Aramaic Peshita bible

Isaiah 51

¹ܫܘܼܡܥܘܼܢܝ ܕܪܵܗ̇ܛܝܼܢ ܒܙܲܕ̇ܝܼܩܘܼܬ̣ܵܐ: ܘܒ̣ܵܥܹ̇ܝܢ ܠܡܵܪܝܵܐ. ܚܘܼܪܘ ܠܛܘܼܪܵܐ ܕܐܸܬ̣ܓ̇ܙܲܪܬ̇ܘܿܢ ܡܸܢܹܗ: ܘܲܠܓ̣ܘܼܒܵܐ ܕܐܸܬ̣ܢܲܩܲܪܬ̇ܘܿܢ ܡܸܢܹܗ.

²ܚܘܼܪܘ ܠܐܲܒ̣ܪܵܗܵܡ ܐܲܒ̣ܘܼܟ݂ܘܿܢ: ܘܲܠܣܲܪܵܐ ܕܲܒ̣ܛܹܢܬ̣ܟ݂ܘܿܢ ܕܚܲܕ݂ ܗ̄ܘܼܵܐ: ܘܲܩܪܹܝ̇ܬܹܗ: ܘܒܲܕܸܟ݂ܬܹ̇ܗ: ܘܐܲܣܓܝܼܬܹ̇ܗ.

³ܡܸܛܠ ܕܒ̣ܵܢܹ̇ܐ ܡܵܪܝܵܐ ܠܨܸܗܝܘܿܢ: ܘܲܡܒܲܢܸܐ ܠܟ݂ܠܗܹܝܢ ܚܲܪ̈ܒ̣ܵܬ̣ܵܗ̇. ܘܥܵܒܹ̇ܕ݂ ܡܲܕ݂ܒ̇ܪܵܗ̇ ܐܲܝܟ݂ ܥܕܸܢ: ܘܲܦܩܲܥܬ̣ܵܗ̇ ܐܲܝܟ݂ ܦܲܪܕܲܝܣܹܗ ܕܡܵܪܝܵܐ. ܕܝܵܨܵܐ ܘܚܲܕ݂ܘܼܬ̣ܵܐ ܢܸܫܬ̇ܡܲܥ ܒܓ̣ܵܘܵܗ̇: ܬܵܘܕ̇ܝܼܬ̣ܵܐ ܘܩܵܠܵܐ ܕܲܙܡܵܪܵܐ.

⁴ܫܘܼܡܥܘܼܢܝ ܥܲܡܡܹ̈ܐ: ܘܨܘܼܬܹܝܢܵܢ̈ܝ ܐܸܡ̈ܘܵܬ̣ܵܐ. ܡܸܛܠ ܕܢܵܡܘܿܣܵܐ ܡ̣ܢ ܩܕ݂ܵܡܲܝ ܢܵܦܹ̇ܩ ܘܕ݂ܝܼܢܝ ܢܘܼܗܪܵܐ ܗ̄ܘܼ ܠܥܲܡܡܹ̈ܐ.

⁵ܩܸܪܒܲܬ̤ ܙܲܕ̇ܝܼܩܘܼܬ̣ܝ: ܘܲܢܦܲܩ̣ ܦܘܼܪܩܵܢܝ. ܘܒܲܕ݂ܪܵܥܝ ܥܲܡܡܹ̈ܐ ܢܸܬ̇ܬ̇ܕ̇ܝܼܢܘܼܢ. ܠܝܼ ܢܣܲܟ̇ـ̈ـܝܵܢ ܓܵܙܪ̈ܵܬ̣ܵܐ. ܘܠܲܕ݂ܪܵܥܝ ܢܣܲܒ̇ܪ̈ܵܢ.

⁶ܐܲܪܝܼܡܘ ܥܲܝܢܲܝ̈ܟ̇ܘܿܢ ܠܲܫܡܲܝܵܐ: ܘܚܘܼܪܘ ܐܵܦ ܠܬܲܚܬ̇ ܒܐܲܪܥܵܐ. ܡܸܛܠ ܕܲܫܡܲܝܵܐ ܐܲܝܟ݂ ܬܸܢܵܢܵܐ ܢܸܥܒ̇ܪܘܼܢ: ܘܐܲܪܥܵܐ ܐܲܝܟ݂ ܠܒ̣ܘܼܫܵܐ ܬܸܒ̣ܠܸܐ. ܘܥܵܡܘܿܪܹ̈ܝܗ̇ ܐܲܟ݂ܘܵܬ̣ܵܗ̇ ܢܸܗܘܘܿܢ. ܘܦܘܼܪܩܵܢܝ ܠܥܵܠܲܡ ܢܸܗܘܹܐ: ܘܙܲܕ̇ܝܼܩܘܼܬ̣ܝ ܠܵܐ ܬܸܥܒܲܪ.

⁷ܫܘܼܡܥܘܼܢܝ ܝܵܕ݂ܥܲܝ̈ ܙܲܕ̇ܝܼܩܘܼܬ̣ܵܐ: ܥܲܡܵܐ ܕܢܵܡܘܿܣܝ ܒܠܸܒ̇ܗܘܿܢ. ܠܵܐ ܬܸܕ݂ܚ̄ܠܘܼܢ ܡ̣ܢ ܚܸܣܕܵܐ ܕܐ̄ܢܵܫܵܐ. ܘܡ̣ܢ ܓܘܼܕܵܦܗܘܿܢ ܠܵܐ ܬܙܘܼܥܘܼܢ.

⁸ܡܸܛܠ ܕܐܲܝܟ݂ ܕܲܠܥܲܡܪܵܐ ܘܐܲܝܟ݂ ܕܠܲܠܒ̣ܘܼܫܵܐ ܢܹܐܟ݂ܘܿܠ ܐܸܢܘܿܢ ܣܵܣܵܐ. ܘܙܲܕ̇ܝܼܩܘܼܬ̣ܝ ܠܥܵܠܲܡ ܬܸܗܘܹܐ. ܘܦܘܼܪܩܵܢܝ ܠܕ݂ܵܪܕܵܪ̈ܝܼܢ.

⁹ܐܸܬ̇ܬ̇ܥܝܼܪܝ: ܐܸܬ̇ܬ̇ܥܝܼܪܝ: ܘܲܠܒܲܫܝ ܥܘܼܫܢܵܐ ܕܲܕ݂ܪܵܥܹܗ ܕܡܵܪܝܵܐ. ܐܸܬ̇ܬ̇ܥܝܼܪܝ ܐܲܝܟ݂ ܕܲܒ̣ܝܵܘ̈ܡܵܬ̣ܵܐ ܩܲܕ݂ܡܵܝܹ̈ܐ: ܘܐܲܝܟ݂ ܕܵܪܹ̈ܐ ܕܡ̣ܢ ܥܵܠܡܝܼܢ. ܐܲܢ̄ܬ̇ܝ ܐܲܢ̄ܬ̇ܝ ܕܲܦܣܲܩ̣ܬ̇ܝ ܦܣܵܩܵܐ ܪܲܒܵܐ: ܘܲܩ̣ܛܲܠܬ̇ܝ ܠܬܲܢܝܼܢܵܐ.

¹⁰ܐܲܢ̄ܬ̇ܝ ܗ̄ܝܼ ܕܐܲܚܪܸܒ̣ܬ̇ܝ ܝܲܡܵܐ: ܘܡܲـ̈ـܝܵܐ ܕܲܬ̣ܗܘܿܡܵܐ ܪܲܒܵܐ. ܘܲܒ̣ܥܘܼܡܩܵܐ ܕܡܲـ̈ـܝܵܐ ܥ̣ܒܲܕ̇ܬ̇ܝ ܐܘܼܪܚܵܐ. ܕܢܸܥܒ̇ܪܘܼܢ ܦܪ̈ܝܼܩܹܐ ܦܪ̈ܝܼܩܵܘܗܝ ܕܡܵܪܝܵܐ.

¹¹ܘܢܸܗ̄ܦܟ݂ܘܿܢ ܘܢܸܥܠܘܼܢ ܠܨܸܗܝܘܿܢ ܒܫܘܼܒ̣ܚܵܐ. ܘܲܠܥܵܠܡܝܼܢ ܬܸܗܘܹܐ ܚܲܕ݂ܘܼܬ̣ܵܐ ܥܲܠ ܪܹ̈ܫܲܝܗܘܿܢ. ܒܘܼܣܵܡܵܐ ܘܚܲܕ݂ܘܼܬ̣ܵܐ ܢܲܕ݂ܪ̱ܟ݂ܘܼܢ. ܘܢܸܥܪ̱ܩܘܼܢ ܕܵܘܘܿܢܹ̈ܐ ܘܬܸܢ̈ܚܵܬ̣ܵܐ.

¹²ܐܸܢܵܐ ܐ̄ܢܵܐ ܒܡܲܝܐܵܢܟ݂ܘܿܢ ܐܵܡܲܪ ܡܵܪܝܵܐ. ܡܲܢ ܐܲܢ̄ܬ̇ܝ ܕܲܕ݂ܚܸܠܬ̇ܝ ܡ̣ܢ ܐ̄ܢܵܫܵܐ ܕܡܵܐܹ̇ܬ̣: ܘܡ̣ܢ ܒܲܪܢܵܫܵܐ ܕܐܲܝܟ݂ ܥܵܡܝܼܪܵܐ ܝܵܒܹ̇ܫ.

¹³ܘܲܛܥܲܝܬ̇ܝ ܠܡܵܪܝܵܐ ܕܥܲܒ̣ܕܲܟ݂ܝ. ܕܲܡܬܲܚ̣ ܫܡܲܝܵܐ: ܘܐܲܬ̣ܩܸܢ ܫܲܬ̣ܐ̱ܣܹ̈ܝܗ̇ ܕܐܲܪܥܵܐ. ܘܲܕ݂ܚܸܠܬ̇ܝ ܐܲܡܝܼܢܵܐܝܼܬ̣ ܟܠܝܘܿܡ ܡ̣ܢ ܩܕ݂ܵܐ ܚܸܡܬܹܗ ܕܐܵܠܘܿܨܵܐ: ܕܲܡܛܲܝܲܒ̣ ܗ̄ܘܼܵܐ ܠܲܡܚܲܒܵܠܘܼ ܐܲܝܟܵܐ ܗ̄ܝܼ ܚܸܡܬܹܗ ܕܐܵܠܘܿܨܵܐ.

¹⁴ܕܲܡܣܲܪܗܸܒ̣ ܗ̄ܘܼܵܐ ܥܲܫܝܼܢܹ̈ܐ ܠܲܡܚܲܒܵܠܘܼ ܠܵܐ ܢܡܘܼܬ̣ܘܼܢ ܠܲܚܒ̣ܵܠܵܐ. ܘܠܵܐ ܢܸܚܣܲܪ ܠܲܚܡܹܗ.

¹⁵ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܹܟ݂ܝ ܕܟ݂ܵܐܹ̇ܐ ܒܝܲܡܵܐ ܘܫܵܠܹ̇ܝܢ ܓܲܠܠܵܘ̈ܗܝ ܡܵܪܝܵܐ ܚܲܝܠܬ̣ܵܢܵܐ ܫܡܹܗ.

¹⁶ܕܣܵܡܹ̇ܬ̣ ܡܸـ̈ـܠܲܝ ܒܦܘܼܡܹܟ݂ܝ. ܘܲܒ̣ܛܸܠܵܠܵܐ ܕܐܝܼܕ݂ܝ ܟܲܣܝܼܬܹ̇ܟ݂ܝ ܒܗܵܝ̇ ܕܡܸܬ̣ܚܹ̇ܬ̣ ܫܡܲܝܵܐ: ܘܐܲܬ̣ܩܢܹ̇ܬ̣ ܫܲܬ̣ܐ̱ܣܹ̈ܝܗ̇ ܕܐܲܪܥܵܐ: ܘܐܸܡ̇ܪܹܬ̣ ܠܨܸܗܝܘܿܢ ܕܥܲܡܝ ܐܲܢ̄ܬ̇ܝ.

¹⁷ܐܸܬ̇ܬ̇ܥܝܼܪܝ: ܐܸܬ̇ܬ̇ܥܝܼܪܝ: ܘܩܘܼܡܝ ܐܘܿܪܸܫܠܸܡ ܕܐܸܫܬܲܝܼܬܝ ܡ̣ܢ ܐܝܼܕܹܗ ܕܡܵܪܝܵܐ ܟܵܣܵܐ ܕܪܘܼܓ̣ܙܹܗ ܘܐܸܫܬ̇ܝܼܬ̇ܝ ܘܐܲܡ̣ܨܝܼܬ̇ܝ ܟܵܣܵܐ ܕܲܪܥܵܠܵܐ.

¹⁸ܘܠܲܝܬ̇ ܕܲܡܒܲܝܲܐ ܠܵܗ̇ ܡ̣ܢ ܟܠܗܘܿܢ ܒܢܲـ̈ـܝܵܐ ܕܝܸܠܕܲܬ̤. ܘܠܲܝܬ̇ ܕܐܵܚܹ̇ܕ݂ ܒܐܝܼܕ݂ܵܗ̇ ܘܲܡܩܝܼܡ ܠܵܗ̇: ܡ̣ܢ ܟܠܗܘܿܢ ܒܢܲـ̈ـܝܵܐ ܕܪܲܒܝܲܬ̤.

¹⁹ܬܲܪܬܹ̇ܝܢ ܐܸܢܹܝܢ ܡܲܛ̈ܝܹܟ݂ܝ ܠܡܲܢ ܬܸܟ݂ܪܸܐ ܥܠܲܟ̇ܝ ܒܸܙܬ̣ܵܐ ܘܲܬ̣ܒ̣ܵܪܐ: ܙܟܲܦܢܵܐ ܘܚܲܪܒܵܐ ܡܲܢ ܢܒܲܝܐܹܟ݂ܝ.

²⁰ܒܢܲܝ̈ܟ̇ܝ ܬܵܘܝܼܪܝܼܢ: ܘܕ݂ܵܡܟ̇ܝܼܢ ܒܪܹܫ ܟܠܗܘܿܢ ܫܘܼܩܹ̈ܐ: ܐܲܝܟ݂ ܣܸܠܩܵܐ ܕܲܟ݂ܡܝܼܕ݂. ܘܲܡܠܹܝܢ ܪܘܼܓ̣ܙܹܗ ܕܡܵܪܝܵܐ: ܘܲܟ݂ܐܵܬܹܗ ܕܐܲܠܵܗܹܟ݂ܝ.

²¹ܡܸܛܠ ܗܵܢܵܐ ܫܡܲܥܝ ܗܵܠܹܝܢ ܡܡܲܟܲܟ݂ܬܵܐ: ܕܪܲܘܝܵܐ ܠܵܐ ܡ̣ܢ ܚܲܡܪܵܐ.

²²ܗܵܟܲܢܵܐ ܐܵܡܲܪ ܡܵܪܹܟ݂ܝ ܡܵܪܝܵܐ: ܘܐܲܠܵܗܹܟ݂ܝ ܢܕ݂ܘܼܢ ܠܥܲܡܹܗ. ܗܵܐ ܢܸܣܒܹ̇ܬ̣ ܡ̣ܢ ܐܝܼܕܲܝ̈ܟ̇ܝ ܟܵܣܵܐ ܕܲܪܥܵܠܵܐ. ܘܟ݂ܵܣܵܐ ܕܪܘܼܓ̣ܙܝ ܠܵܐ ܬܵܘܣܦܝܼܢ ܬܘܼܒ̣ ܠܡܸܫܬ̇ܝܹܗ.

²³ܘܐܹܣܝܼܡܝܼܘܗܝ ܒܝܲܕ݂ ܡܡܲܟ̇ܟ݂ܵܢܲܝ̈ܟ̇ܝ ܕܐܸܡܲܪܘ ܠܢܲܦ̮ܫܹܟ݂ܝ ܐܸܬ̣ܡܲܟܲܟ݂ܝ: ܘܢܸܥܒܲܪ. ܘܲܥ̣ܒܲܕ̇ܬ̇ܝ ܠܥܲܡܹܟ݂ܝ ܐܲܝܟ݂ ܐܲܪܥܵܐ: ܘܐܲܝܟ݂ ܫܘܼܩܵܐ ܠܲܕ݂ܥܵܒ̣ܪܝܼܢ.