Read Aramaic Peshita Isaiah 52 Bible Online

Isaiah 52 - Aramaic Peshita bible

Isaiah 52

¹ܐܸܬ̇ܬ̇ܥܝܼܪܝ: ܐܸܬ̇ܬ̇ܥܝܼܪܝ: ܨܸܗܝܘܿܢ ܘܲܠܒܲܫܝ ܠܒ̣ܘܼܫܵܐ ܕܬܸܫܒ̇ܘܿܚܬܵܐ: ܐܘܿܪܸܫܠܸܡ ܩܪܝܼܬ̣ܵܐ ܩܲܕ̇ܝܼܫܬܵܐ. ܡܸܛܠ ܕܠܵܐ ܢܵܘܣܸܦ ܬܘܼܒ̣ ܠܡܸܥܲܠ ܠܹܟ݂ܝ ܥܘܼܪܠܵܐ ܘܛܲܡܵܐܐ.

²ܐܸܬ̣ܢܲܦ̄ܨܝ ܡ̣ܢ ܥܲܦܪܵܐ ܘܩܘܼܡܝ ܬܹܒ̣ܝ ܐܘܿܪܸܫܠܸܡ ܫܪܵܝ ܢܝܼܪܵܐ ܡ̣ܢ ܨܵܘܪܹܟ݂ܝ ܫܒ̣ܝܼܬ̣ܵܐ: ܒܲܪܬ̣ ܨܸܗܝܘܿܢ.

³ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ: ܡܲܓܵܢ ܐܸܙܕܲܒܲܢ̣ܬ̇ܘܿܢ: ܘܠܵܐ ܒܟܸܣܦܵܐ ܬܸܬ̣ܦܲܪܩܘܼܢ.

⁴ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ: ܠܡܸܨܪܹܝܢ ܢ̣ܚܸܬ̣ ܥܲܡܝ ܒܩܲܕ݂ܡܵܝܬܵܐ ܠܡܸܥܡܲܪ ܬܲܡܵܢ. ܘܐܵܬ̣ܘܿܪܵܝܵܐ ܒܲܩܛܝܼܪܵܐ ܕܲܒ̣ܪܹܗ.

⁵ܘܗܵܫܵܐ ܡܵܐ ܠܝܼ ܗܵܪܟܵܐ ܐܵܡܲܪ ܡܵܪܝܵܐ: ܕܐܸܬ̇ܕ̇ܒܲܪ ܥܲܡܝ ܡܲܓܵܢ. ܫܲܠܝܼܛܵܢܲܝ̈ܗܘܿܢ ܡܲܝܠܠܝܼܢ: ܐܵܡܲܪ ܡܵܪܝܵܐ. ܘܐܲܡܝܼܢܵܐܝܼܬ̣ ܟܠܝܘܿܡ ܥܲܠ ܫܹܡܝ ܡܓܲܕ̇ܦܝܼܢ.

⁶ܡܸܛܠ ܗܵܢܵܐ ܢܸܕܲܥ ܥܲܡܝ ܫܹܡܝ ܒܝܵܘܡܵܐ ܗܵܘܿ. ܡܸܛܠ ܕܐܸܢܵܐ ܗ̄ܘܼ ܡܡܲܠܸܠ: ܘܐܝܼܬ̇ܝ.

⁷ܡܵܐ ܝܵܐ̈ܝܵܢ ܥܲܠ ܛܘܼܪܹ̈ܐ ܪܸ̈ܓ̣ܠܵܘܗܝ ܕܲܡܣܲܒܲܪ ܫܠܵܡܵܐ: ܘܕܲܡܣܲܒܲܪ ܛܵܒ̣ܵـ̈ـܬ̣ܵܐ: ܘܲܕ݂ܡܲܫܡܲܥ ܦܘܼܪܩܵܢܵܐ. ܕܐܵܡܲܪ ܠܨܸܗܝܘܿܢ: ܐܲܡ̣ܠܸܟ݂ ܐܲܠܵܗܹܟ݂ܝ.

⁸ܩܵܠܵܐ ܕܕ݂ܵܘܩܲܝ̈ܟ̇ܝ ܐܲܪܝܼܡܘ ܩܵܠܵܐ. ܘܐܲܟ݂ܚ̄ܕ݂ܵܐ ܡܫܲܒ̇ܚܝܼܢ ܡܸܛܠ ܕܥܹܝܢ ܒܥܹܝܢ ܢܸܚܙܘܿܢ ܟܲܕ݂ ܡܲܦܢܸܐ ܡܵܪܝܵܐ ܠܨܸܗܝܘܿܢ.

⁹ܕܘܼܨܹܝ̈ܢ ܘܫܲܒܲܚܹ̈ܝܢ ܐܲܟ݂ܚ̄ܕ݂ܵܐ ܚܲܪ̈ܒ̣ܵܬ̣ܵܐ ܕܐܘܿܪܸܫܠܸܡ ܡܸܛܠ ܕܒܲܝܲܐ ܡܵܪܝܵܐ ܠܥܲܡܹܗ: ܘܲܦܪܲܩ̣ ܠܐܘܿܪܸܫܠܸܡ.

¹⁰ܓ̣ܠܵܐ ܡܵܪܝܵܐ ܕܪܵܥܹܗ ܩܲܕ̇ܝܼܫܵܐ ܠܥܹܝܢ ܟܠܗܘܿܢ ܥܲܡܡܹ̈ܐ. ܘܢܸܚܙܘܿܢ ܟܠܗܘܿܢ ܥܸܒ̣ܪܹ̈ܝܗ̇ ܕܐܲܪܥܵܐ ܦܘܼܪܩܵܢܹܗ ܕܐܲܠܵܗܲܢ.

¹¹ܥܒܲܪܘ: ܥܒܲܪܘ ܦܘܿܩܘ ܡ̣ܢ ܬܲܡܵܢ: ܘܲܠܛܲܡܹ̈ܐܐ ܠܵܐ ܬܸܬ̣ܩܲܪܒ̣ܘܼܢ. ܦܘܿܩܘ ܡ̣ܢ ܓܵܘܵܗ̇: ܘܐܸܬ̣ܓܲܒܵܘ: ܫܩܝܼ̈ܠܲܝ ܡܵܐܢܵܘ̈ܗܝ ܕܡܵܪܝܵܐ.

¹²ܡܸܛܠ ܕܠܵܐ ܒܣܘܼܪܗܵܒ̣ܵܐ ܬܸܦܩܘܼܢ. ܘܒܲܥܪܘܼܩܝܵܐ ܠܵܐ ܬܹܐܙܠ̄ܘܼܢ ܡܸܛܠ ܕܡܵܪܝܵܐ ܐܵܙܹ̇ܠ ܩܕ݂ܵܡܲܝܟ̇ܘܿܢ: ܘܲܡܟܲܢܫܵܢܟ݂ܘܿܢ ܐܲܠܵܗܹܗ ܕܝܣܪܵܝܹܠ.

¹³ܗܵܐ ܡܸܣܬܲܟܲܠ ܥܲܒ̣ܕ̇ܝ. ܘܡܸܬ̇ܬ̇ܪܝܼܡ: ܘܡܸܫܬܲܩܲܠ: ܘܡܸܬ̣ܥܲܠܸܐ ܛܵܒ̣.

¹⁴ܐܲܝܟ݂ ܕܢܸܬ̣ܡ̱ܗܘܿܢ ܥܠܵܘܗܝ ܣܲܓܝܼ̈ܐܹܐ ܗܵܟܲܢܵܐ ܡܚܲܒܲܠ ܚܸܙܘܹܗ ܡ̣ܢ ܕܓܲܒ̣ܪܵܐ: ܘܩܘܼܒ̣ܠ̱ܠܹܗ ܡ̣ܢ ܕܲܒ̣ܢܲܝ̈ܢܵܫܵܐ.

¹⁵ܗܵܢܵܐ ܡܕܲܟܹ̇ܐ ܥܲܡܡܹ̈ܐ ܣܲܓ̇ܝܼ̈ܐܹܐ: ܘܲܥܠܘܗܝ ܢܹܐܚܕ̇ܘܼܢ ܡܲܠ̈ܟܹ̇ܐ ܦܘܼܡܗܘܿܢ ܡܸܛܠ ܕܲܕ݂ܠܵܐ ܐܸܬ̣ܐ̱ܡܲܪ ܠܗܘܿܢ ܚ̣ܙܵܘ: ܘܲܕ݂ܠܵܐ ܫܡܲܥܘ ܐܸܣܬܲܟܲܠܘ.