Read Aramaic Peshita Isaiah 55 Bible Online

Isaiah 55 - Aramaic Peshita bible

Isaiah 55

¹ܐܘܿܝ ܟܠ ܕܲܨܗܹܝܢ: ܙܸܠܘ ܠܡܲـ̈ـܝܵܐ: ܕܠܲܝܬ̇ ܠܹܗ ܟܸܣܦܵܐ. ܙܸܠܘ ܡܘܼܪܘ: ܘܐܲܟ݂ܘܿܠܘ ܕܠܵܐ ܟܸܣܦܵܐ: ܘܲܕ݂ܠܵܐ ܕܡܝܼ̈ܢ: ܚܲܡܪܵܐ ܘܚܲܠܒ̣ܵܐ.

²ܠܡܵܐ ܬܵܩ̇ܠܝܼܢ ܐ̄ܢܬ̇ܘܿܢ ܟܸܣܦܵܐ ܕܠܵܐ ܠܠܲܚܡܵܐ: ܘܠܹܐܘܲܬ̣ܟ݂ܘܿܢ ܕܠܵܐ ܠܡܸܣܒܲܥ ܫܘܼܡܥܘܼܢܝ ܡܸܫܡܲܥ: ܘܬܹܐܟ݂ܠܘܼܢ ܛܵܒ̣ܵـ̈ـܬ̣ܵܐ. ܘܬܸܬ̣ܦܲܢܲܩ ܢܲܦ̮ܫܟ݂ܘܿܢ ܒܕ݂ܘܼܗܵܢܵܐ.

³ܨܠܵܘ ܐܸܕ݂ܢܲܝ̈ܟ̇ܘܿܢ: ܘܬ̣ܵܘ ܠܘܵܬ̣ܝ ܫܘܼܡܥܘܼܢܝ ܘܬܸܚܹܐ ܢܲܦ̮ܫܟ݂ܘܿܢ. ܘܐܲܩܝܼܡ ܠܟ݂ܘܿܢ ܩܝܵܡܵܐ ܕܥܵܠܲܡ: ܛܲܝܒ̇ܘܼܬܹܗ ܕܕ݂ܵܘܝܼܕ݂ ܡܗܲܝܡܲܢܬܵܐ.

⁴ܗܵܐ ܣܵܗܕܵܐ ܠܥܲܡܡܹ̈ܐ ܝܲܗ̄ܒ̣ܬܵܟ݂: ܫܲܠܝܼܛܵܐ ܘܲܡܕܲܒ̇ܪܵܢܵܐ ܠܐܸܡ̈ܘܵܬ̣ܵܐ.

⁵ܕܬܸܩܪܹܐ ܥܲܡܡܹ̈ܐ ܕܠܵܐ ܝܼܕܲܥ̣ܬ̇. ܘܥܲܡܡܹ̈ܐ ܕܠܵܐ ܝܵܕ݂ܥܝܼܢ ܠܵܟ݂ ܠܘܵܬ̣ܵܟ݂ ܢܸܪܗ̱ܛܘܼܢ. ܡܸܛܠ ܡܵܪܝܵܐ ܐܲܠܵܗܵܟ݂: ܘܩܲܕ̇ܝܼܫܵܐ ܕܝܼܣܪܵܝܹܠ ܕܫܲܒ̇ܚܵܟ݂.

⁶ܒܥܵܘ ܠܡܵܪܝܵܐ. ܘܡܵܐ ܕܐܸܫ̣ܟܲܚܬ̇ܘܿܢܵܝܗܝ: ܩܪܵܐܘܼܗܝ.

⁷ܘܡܵܐ ܕܲܩ̣ܪܸܒ̣: ܢܸܫܒ̇ܘܿܩ ܚܲܛܵܝܵܐ ܐܘܼܪܚܹܗ: ܘܓܲܒ̣ܪܵܐ ܥܵܘܿܠܵܐ ܬܲܪܥܝܼܬܹܗ. ܘܢܸܬ̣ܦܢܸܐ ܠܘܵܬ̣ܝ: ܘܐܹܪܲܚܸܡ ܥܠܵܘܗܝ: ܘܲܠܘܵܬ̣ ܐܲܠܵܗܲܢ ܕܡܲܣܓܸ̇ܐ ܠܡܸܫܒܲܩ.

⁸ܡܸܛܠ ܕܬܲܪ̈ܥܝܵܬ̣ܝ ܠܵܐ ܗ̤ܘܲܝ̈ ܐܲܝܟ݂ ܬܲܪ̈ܥܝܵܬ̣ܟ݂ܘܿܢ. ܘܐܘܼܪ̈ܚܵܬ̣ܝ ܠܵܐ ܗ̤ܘܲܝ̈ ܐܲܝܟ݂ ܐܘܼܪ̈ܚܵܬ̣ܟ݂ܘܿܢ: ܐܵܡܲܪ ܡܵܪܝܵܐ.

⁹ܡܸܛܠ ܕܐܲܝܟ݂ ܕܪܵܡܝܼܢ ܫܡܲܝܵܐ ܡ̣ܢ ܐܲܪܥܵܐ: ܗܵܟܲܢܵܐ ܪ̈ܵܡܵܢ ܐܘܼܪ̈ܚܵܬ̣ܝ ܡ̣ܢ ܐܘܼܪ̈ܚܵܬ̣ܟ݂ܘܿܢ. ܘܬܲܪ̈ܥܝܵܬ̣ܝ ܡ̣ܢ ܬܲܪ̈ܥܝܵܬ̣ܟ݂ܘܿܢ.

¹⁰ܡܸܛܠ ܕܐܲܝܟܲܢܵܐ ܕܵܢܵܚܹ̇ܬ̣ ܡܸܛܪܵܐ ܘܬܲܠܓܵܐ ܡ̣ܢ ܫܡܲܝܵܐ: ܘܲܠܬܲܡܵܢ ܠܵܐ ܗܵܦܹ̇ܟ݂: ܐܸܠܵܐ ܡܲܪܘܸܐ ܠܐܲܪܥܵܐ: ܘܡܵܘܠܸܕ݂ ܠܵܗ̇: ܘܡܵܘܥܹܐ ܠܵܗ̇: ܘܝܵܗܹ̇ܒ̣ ܙܲܪܥܵܐ ܠܙܵܪܘܿܥܵܐ: ܘܠܲܚܡܵܐ ܠܡܹܐܟ݂ܘܼܠܬܵܐ.

¹¹ܗܵܟܲܢܵܐ ܢܸܗܘܹܐ ܦܸܬ̣ܓ̣ܵܡܝ ܕܲܢܦܲܩ̣ ܡ̣ܢ ܦܘܼܡܝ: ܘܠܵܐ ܢܸܗܦܘܿܟ݂ ܠܘܵܬ̣ܝ ܣܪܝܼܩܵܐܝܼܬ̣: ܐܸܠܵܐ ܐܸܢ ܥ̣ܒܲܕ݂ ܡܸܕܸ̇ܡ ܕܨܵܒܹ̇ܐ ܐ̄ܢܵܐ: ܘܫܲܠܸܡ̣ ܕܫܲܕܲܪܬܹ̇ܗ.

¹²ܡܸܛܠ ܕܲܒ̣ܚܲܕ݂ܘܼܬ̣ܵܐ ܬܸܦܩܘܼܢ: ܘܒܲܫܠܵܡܵܐ ܬܹܐܙܠ̄ܘܼܢ ܘܛܘܼܪܹ̈ܐ ܘܪ̈ܵܡܵܬ̣ܵܐ ܢܸܬ̣ܦܲܨܚܘܼܢ ܩܕ݂ܵܡܲܝܟ̇ܘܿܢ. ܘܬܸܫܒ̇ܘܿܚܬܵܐ ܕܟ݂ܠܗܘܿܢ ܐܝܼܠܵܢܹ̈ܐ ܕܚܲܩܠܵܐ ܢܸܩܫܘܼܢ ܟܲܦܵܐ.

¹³ܚܠܵܦ ܚܵܓ̣ܬ̣ܵܐ ܬܹܐܥܹܐ ܒܪܘܿܬ̣̱ܵܐ ܘܲܚܠܵܦ ܨܵܬ̣ܪܵܐ ܢܹܐܥܹܐ ܐܵܣܵܐ. ܘܢܸܗܘܹܐ ܠܡܵܪܝܵܐ ܠܲܫܡܵܐ: ܘܠܵܐܬ̤ܵܐ ܕܲܠܥܵܠܲܡ ܕܠܵܐ ܓܵܡ̇ܪܵܐ.