Read Aramaic Peshita Isaiah 61 Bible Online

Isaiah 61 - Aramaic Peshita bible

Isaiah 61

¹ܪܘܼܚܹܗ ܕܡܵܪܝܵܐ ܐܲܠܵܗܵܐ ܥܠܲܝ. ܚܠܵܦ ܕܡܲܫܚܲܢܝ ܡܵܪܝܵܐ ܘܫܲܕܲܪܲܢܝ ܕܐܹܣܲܒܲܪ ܠܡܲܟ̇ܝܼ̈ܟܹܐ: ܘܐܸܥܨܘܿܒ̣ ܠܲܬ̣ܒ̣ܝܼܪ̈ܲܝ ܠܸܒܵܐ: ܘܐܸܩܪܹܐ ܚܹܐܪܘܼܬ̣ܵܐ ܠܲܫ̈ܒܲܝܵܐ: ܘܲܫܪܵܝܵܐ ܠܐܲܣܝܼܪܹ̈ܐ.

²ܘܐܸܩܪܹܐ ܫܲܢ̄ܬܵܐ ܕܨܸܒ̣ܝܵܢܵܐ ܠܡܵܪܝܵܐ: ܘܝܵܘܡܵܐ ܕܦܘܼܪܩܵܢܵܐ ܠܐܲܠܵܗܲܢ: ܠܲܡܒܲܝܵܐܘܼ ܠܟ݂ܠܗܘܿܢ ܐܲܒ̣ܝܼ̈ܠܹܐ.

³ܠܡܸܬܲܠ ܠܐܲܒ̣ܝܼ̈ܠܹܐ ܕܨܸܗܝܘܿܢ ܫܘܼܒ̣ܚܵܐ: ܚܠܵܦ ܩܸܛܡܵܐ ܡܸܫܚܵܐ ܒܲܣܝܼܡܵܐ: ܘܲܚܠܵܦ ܐܸܒ̣ܠܵܐ ܥܛܵܦܵܐ ܕܬܸܫܒ̇ܘܿܚܬܵܐ. ܘܲܚܠܵܦ ܪܘܼܚܵܐ ܡܲܟ݂ܐܲܒ̣ܬܵܐ: ܢܸܬ̣ܩܪܘܿܢ ܕܸܟ݂ܪܹ̈ܐ ܕܙܲܕ̇ܝܼܩܘܼܬ̣ܵܐ: ܢܸܨܒ̇ܬܹܗ ܕܡܵܪܝܵܐ ܡܫܲܒܲܚܬܵܐ.

⁴ܘܢܸܒ̣ܢܘܿܢ ܚܲܪ̈ܒܵܬ̣ܵܐ ܕܡ̣ܢ ܥܵܠܲܡ: ܘܨܵܕ݂̈ܝܵܬ̣ܵܐ ܕܡ̣ܢ ܪܹܫܝܼܬ̣ܵܐ ܢܩܝܼܡܘܼܢ ܘܲܢܚܲܕ̇ܬ̣ܘܼܢ ܩܘܼܪ̈ܝܵܐ ܚܲܪ̈ܒܵܬ̣ܵܐ: ܘܨܵܕ݂̈ܝܵܬ̣ܵܐ ܕܕ݂ܵܪܕܵܪ̈ܝܼܢ.

⁵ܘܲܢܩܘܼܡܘܼܢ ܢܘܼܟ݂ܪ̈ܵܝܹܐ: ܘܢܸܪܥܘܿܢ ܥܵܢ̈ܗܘܿܢ. ܘܲܒ̣ܢܲܝ̈ ܢܘܼܟ݂ܪ̈ܵܝܹܐ ܢܸܗܘܘܿܢ ܠܗܘܿܢ ܐܲܟܵܪܹ̈ܐ ܘܟ݂ܵܪ̈ܡܹܐ.

⁶ܘܐܲܢ̄ܬ̇ܘܿܢ ܟܘܼܡܪ̈ܵܘܗܝ ܕܡܵܪܝܵܐ ܬܸܬ̣ܩܪܘܼܢ. ܘܲܡܫܲܡܫܵܢܵܘ̈ܗܝ ܕܐܲܠܵܗܲܢ ܢܸܬ̣ܐ̱ܡܲܪ ܠܟ݂ܘܿܢ. ܢܸܟ݂ܣܲܝ̈ܗܘܿܢ ܕܥܲܡܡܹ̈ܐ ܬܹܐܟ݂ܠܘܼܢ ܘܒ̣ܐܝܼܩܵܪܗܘܿܢ ܬܸܫܬܲܒ̇ܚܘܼܢ.

⁷ܚܠܵܦ ܒܸܗܬ̇ܬ̣ܟ݂ܘܿܢ: ܘܲܚܠܵܦ ܚܸܦ̱ܪܟ݂ܘܿܢ: ܝܘܼܪܬܵܢܵܐ ܬܸܢܝܵܢܵܐ ܬܹܐܪܬ̇ܘܼܢ ܒܐܲܪ̱ܥܗܘܿܢ. ܘܬܸܫܬܲܒ̇ܚܘܼܢ ܒܦܵܠܓ̇ܘܼܬ̣ܗܘܿܢ. ܚܲܕ݂ܘܼܬ̣ܵܐ ܠܥܵܠܲܡ ܬܸܗܘܹܐ ܠܟ݂ܘܿܢ.

⁸ܡܸܛܠ ܕܐܸܢܵܐ ܐ̄ܢܵܐ ܡܵܪܝܵܐ ܕܪܵܚܹ̇ܡ ܐ̄ܢܵܐ ܕܝܼܢܵܐ. ܘܣܵܢܹ̈ܐ ܐ̄ܢܵܐ ܚܛܘܼܦܝܵܐ ܘܥܵܘܼܠܵܐ ܘܐܸܬܸ̇ܠ ܥܲܡ̱ܠܟ݂ܘܿܢ ܒܩܘܼܫܬܵܐ. ܘܲܩܝܵܡܵܐ ܕܥܵܠܲܡ ܐܲܩܝܼܡ ܠܟ݂ܘܿܢ.

⁹ܘܢܸܬ̣̱ܝܼܕܲܥ ܙܲܪܥ̱ܟ݂ܘܿܢ ܒܥܲܡܡܹ̈ܐ: ܘܙܲܪܥܵܐ ܕܙܲܪܥ̱ܟ݂ܘܿܢ ܒܐܸܡ̈ܘܵܬ̣ܵܐ. ܟܠ ܚܵܙ̈ܝܵܝܟ̇ܘܿܢ ܢܸܫܬܵܘܕ̇ܥܘܼܢܵܟ݂ܘܿܢ: ܕܙܲܪܥܵܐ ܐܲܢ̄ܬ̇ܘܿܢ ܕܒܲܪܸܟ݂ ܡܵܪܝܵܐ.

¹⁰ܡܸܬ̣ܒܲܣܵܡܘܼ ܐܸܬ̣ܒܲܣܲܡ ܒܡܵܪܝܵܐ. ܘܲܬ̇ܕ݂ܘܼܨ ܢܲܦ̮ܫܝ ܒܐܲܠܵܗܝ. ܡܸܛܠ ܕܐܲܠܒ̇ܫܲܢܝ ܠܒ̣ܘܼܫܵܐ ܕܦܘܼܪܩܵܢܵܐ: ܘܐܲܥ̣ܛܦܲܢܝ ܦܪܝܼܣܵܐ ܕܙܲܕ̇ܝܼܩܘܼܬ̣ܵܐ: ܐܲܝܟ݂ ܚܲܬ̣ܢܵܐ ܫܒ̣ܝܼܚܵܐ ܘܐܲܝܟ݂ ܟܲܠܬ̣ܵܐ ܡܨܲܒ̇ܬ̇ܬܵܐ.

¹¹ܘܐܲܝܟ݂ ܐܲܪܥܵܐ ܕܡܲܦܩܵܐ ܥܘܼܢܝܵܐ: ܘܐܲܝܟ݂ ܓܲܢܬ̣ܵܐ ܕܡܵܘܥܝܵܐ ܙܲܪܥܵܐ: ܗܵܟܲܢܵܐ ܢܵܘܥܸܐ ܡܵܪܝܵܐ ܐܲܠܵܗܵܐ ܙܲܕ̇ܝܼܩܘܼܬ̣ܵܐ: ܘܬܸܫܒ̇ܘܿܚܬܵܐ ܩܕ݂ܵܡ ܟܠܗܘܿܢ ܥܲܡܡܹ̈ܐ.