Read Aramaic Peshita Isaiah 64 Bible Online

Isaiah 64 - Aramaic Peshita bible

Isaiah 64

¹ܠܵܐ ܦ̣ܬܲܚܬ̇ ܫܡܲܝܵܐ ܘܲܢܚܸܬ̇ܬ̇ ܘܡܢ ܩܕ݂ܵܡܲܝܟ ܕܵܠܘܼ ܛܘܼܪܹ̈ܐ. ܘܐܸܬ̣ܦܲܫܲܪܘ ܐܲܝܟ݂ ܕܡܸܬ̣ܦܲܫܪܵܐ ܫܥܘܿܬ̣ܵܐ ܡ̣ܢ ܩܕ݂ܵܡ ܢܘܼܪܵܐ.

²ܘܬ̣ܵܘܩܸܕ݂ ܢܘܼܪܵܐ ܠܲܒ̣ܥܸܠܕ̇ܒ̣ܵܒܲܝ̈ܟ. ܘܢܸܬ̣̱ܝܼܕܲܥ ܫܡܵܟ݂ ܠܲܒ̣ܥܸܠܕ̇ܒ̣ܵܒܲܝ̈ܟ. ܘܢܸܬ̇ܕܲܠܚܘܼܢ ܥܲܡܡܹ̈ܐ ܡ̣ܢ ܩܕ݂ܵܡܲܝܟ.

³ܟܲܕ݂ ܥ̣ܒܲܕ̇ܬ̇ ܕܚܝܼ̈ܠܵܬ̣ܵܐ ܕܠܵܐ ܣܲܟ̇ܝܼܢ ܠܵܟ݂: ܢܚܸܬ̇ܬ̇: ܘܡ̣ܢ ܩܕ݂ܵܡܲܝܟ ܕܵܠܘܼ ܛܘܼܪܹ̈ܐ.

⁴ܡ̣ܢ ܥܵܠܲܡ ܠܵܐ ܨܵܬ̣ܘ ܘܠܵܐ ܫܡܲܥܘ ܘܥܹܝܢ ܠܵܐ ܚܙܵܬ̤ ܐܲܠܵܗ ܠܒܲܪ ܡܸܢܵܟ݂. ܕܥܵܒܹ̇ܕ݂ ܐܲܢ̄ܬ̇ ܠܐܲܝܠܹܝܢ ܕܲܡܣܲܟܹ̇ܝܢ ܠܵܟ݂.

⁵ܘܦܵܓܲܥ ܐܲܢ̄ܬ̇ ܒܒ̣ܘܼܣܵܡܵܐ ܒܐܲܝܠܹܝܢ ܕܥܵܒ̣ܕ̇ܝܼܢ ܙܲܕ̇ܝܼܩܘܼܬ̣ܵܐ ܒܐܘܼܪ̈ܚܵܬ̣ܵܟ݂ ܢܸܬ̇ܕܲܟ݂ܪܘܼܢܵܟ݂. ܗܵܐ ܐܲܢ̄ܬ̇ ܪܓܸܙܬ̇ ܘܲܚܛܲܝܢ ܒܗܹܝܢ. ܒܥܵܠܲܡ ܢܸܬ̣ܦܪܸܩ.

⁶ܕܲܗ̤ܘܲܝܢ ܐܲܝܟ݂ ܛܲܡܹ̈ܐܐ ܟܠܲܢ. ܘܐܲܝܟ݂ ܐܘܼܪܩܲܥܬ̣ܵܐ ܕܟܸܦ̮ܣܵܢܝܼܬ̣ܵܐ ܟܠܵܗ̇ ܙܲܕ̇ܝܼܩܘܼܬܲܢ. ܢܬܲܪܢ ܐܲܝܟ݂ ܛܲܪ̈ܦܹܐ ܟܠܲܢ. ܘܐܲܝܟ݂ ܥܲܠܥܵܠܵܐ ܫܲܩ̣ܠܘܿܢ ܚܛܵܗܲܝ̈ܢ.

⁷ܘܠܲܝܬ̇ ܕܩܵܪܹܐ ܒܲܫܡܵܟ݂: ܘܲܕ݂ܥܵܗܹ̇ܕ݂ ܠܲܡܚܲܡܣܵܢܘܼ ܒܵܟ݂. ܡܸܛܠ ܕܐܲܗ̣ܦܸܟ݂ܬ̇ ܐܲܦܲܝ̈ܟ ܡܸܢܲܢ: ܘܐܲܫܠܸܡ̣ܬܵܢ ܒܝܲܕ݂ ܚܛܵܗܲܝ̈ܢ.

⁸ܗܵܫܵܐ ܡܵܪܝܵܐ ܐܲܒ̣ܘܼܢ ܐܲܢ̄ܬ̇ ܚܢܲܢ ܛܝܼܢܵܐ: ܘܐܲܢ̄ܬ̇ ܓܵܒ̣ܘܿܠܲܢ ܘܲܥܒ̣ܵܕ݂ ܐܝܼܕܲܝ̈ܟ ܚܢܲܢ ܟܠܲܢ.

⁹ܠܵܐ ܬܸܪܓܲܙ ܡܵܪܝܵܐ ܛܵܒ̣ ܠܥܵܠܲܡ. ܘܠܵܐ ܬܸܬ̇ܕ̇ܟܲܪ ܠܥܵܠܲܡ ܚܛܵܗܲܝ̈ܢ ܚܙܝܼ ܕܥܲܡܵܟ݂ ܚܢܲܢ ܟܠܲܢ.

¹⁰ܩܘܼܪ̈ܝܵܐ ܕܩܘܼܕ݂ܫܵܟ݂ ܗ̤ܘܲܝ̈ ܡܲܕ݂ܒ̇ܪܵܐ. ܘܨܸܗܝܘܿܢ ܗܘ̤ܵܬ̣ ܡܲܕ݂ܒ̇ܪܵܐ: ܘܐܘܿܪܸܫܠܸܡ ܚܲܪܒ̇ܬ̣ܵܐ.

¹¹ܒܹܝܬ̣ ܩܘܼܕ݂ܫܲܢ ܘܬܸܫܒ̇ܘܿܚܬܲܢ: ܕܫܲܒ̇ܚܘܼܟ݂ ܐܲܒ̣ܵܗܲܝ̈ܢ: ܗܘ̤ܵܐ ܠܝܲܩܕܵܢܵܐ ܕܢܘܼܪܵܐ. ܘܟ݂ܠܵܗ̇ ܪܸܓ̇ܬܲܢ ܗܘ̤ܵܬ̣ ܠܚܘܼܪܒܵܐ.

¹²ܥܲܠ ܗܵܠܹܝܢ ܚܲܡ̣ܣܸܢܬ̇ ܡܵܪܝܵܐ. ܘܲܫܬܸܩܬ̇ ܘܡܲܟܸ̇ܟ݂ܬܵܢ ܛܵܒ̣.