Read Aramaic Peshita Isaiah 66 Bible Online

Isaiah 66 - Aramaic Peshita bible

Isaiah 66

¹ܗܵܟܲܢܵܐ ܐܵܡܲܪ ܡܵܪܝܵܐ: ܫܡܲܝܵܐ ܟܘܼܪܣܲܝ: ܘܐܲܪܥܵܐ ܟܘܼܒ̣ܫܵܐ ܕܪܸ̈ܓ̣ܠܲܝ: ܐܲܝܢܵܘ ܒܵܝܬܵܐ ܕܒ̣ܵܢܹ̇ܝܢ ܐ̄ܢܬ̇ܘܿܢ ܠܝܼ: ܐܵܘ ܐܲܝܢܵܘ ܐܲܬ̣ܪܐ ܕܲܢܝܵܚܬ̇ܝ.

²ܗܵܠܹܝܢ ܟܠܗܹܝܢ ܐܝܼܕ݂ܝ ܥܸܒ̣ܕܲܬ̤: ܘܕ݂ܝܼܠܝ ܐܸܢܹܝܢ ܗܵܠܹܝܢ ܟܠܗܹܝܢ ܐܵܡܲܪ ܡܵܪܝܵܐ. ܘܲܒ̣ܡܲܢ ܐܹܚܘܼܪ ܘܐܸܥܡܲܪ: ܐܸܠܵܐ ܒܢܝܼܚܵܐ ܘܲܒ̣ܡܲܟ̇ܝܼܟ݂ ܪܘܼܚܵܐ ܕܐܵܙܲܥ ܡ̣ܢ ܡܸܠܲܬ̣ܝ.

³ܕܢܵܟܹ̇ܣ ܬܵܘܪܵܐ ܐܲܝܟ݂ ܗܵܘܿ ܕܩܵܛܹ̇ܠ ܓܲܒ̣ܪܵܐ: ܕܕ݂ܵܒܲܚ̇ ܐܸܡܪܵܐ ܐܲܝܟ݂ ܗܵܘܿ ܕܩܵܛܹ̇ܠ ܟܲܠܒܵܐ: ܕܲܡܩܲܪܸܒ̣ ܣܡܝܼܕ݂ܵܐ ܐܲܝܟ݂ ܕܡܵܐ ܕܲܚܙܝܼܪܵܐ: ܕܲܡܩܲܪܸܒ̣ ܠܒ̣ܘܿܢ̄ܬܵܐ ܐܲܝܟ݂ ܗܵܘܿ ܕܲܡܒܲܪܸܟ݂ ܠܲܦܬܲܟ݂ܪܹ̈ܐ: ܐܵܦ ܗܸܢܘܿܢ ܐܸܬ̣ܪܲܥܝܼܘ ܒܐܘܼܪ̈ܚܵܬ̣ܗܘܿܢ: ܘܲܨܒ̣ܵܬ̤ ܢܲܦ̮ܫܗܘܿܢ ܒܲܦܬܲܟ݂ܪ̈ܲܝܗܘܿܢ.

⁴ܐܵܦ ܐܸܢܵܐ ܐܸܨܒܹ̇ܐ ܒܒ̣ܘܼܙܵܚܗܘܿܢ: ܘܐܸܦܪܘܿܥ ܐܸܢܘܿܢ ܥܒ̣ܵܕܲܝ̈ܗܘܿܢ: ܥܲܠ ܕܲܩܪܹܝܬ̣ ܘܠܲܝܬ̇ ܕܥܵܢܹ̇ܐ: ܘܡܲܠܠܹܬ̣ ܘܠܵܐ ܫܡܲܥ̣ܘ: ܘܲܥܒܲܕ݂ܘ ܕܒ̣ܝܼܫ ܩܕ݂ܵܡܲܝ: ܘܲܓ̣ܒ̣ܵܘ ܡܸܕܸ̇ܡ ܕܠܵܐ ܨܒܹ̇ܝܬ̣.

⁵ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ ܐܲܝܠܹܝܢ ܕܙܵܝܥܝܼܢ ܡ̣ܢ ܡܸܠܬܹܗ. ܐܸܡܲܪܘ ܠܐܲܚܲܝ̈ܟ̇ܘܿܢ ܣܵܢܐܲܝ̈ܟ̇ܘܿܢ ܡܲܣ̱ܠܝܵܢܲܝ̈ܟ̇ܘܿܢ ܡܸܛܠ ܫܹܡܝ. ܢܸܫܬܲܒܲܚ ܡܵܪܝܵܐ ܘܢܸܚܕܹ̇ܐ ܒܚܲܕ݂ܘܼܬ̣ܟ݂ܘܿܢ: ܘܗܸܢ̣ܘܿܢ ܢܸܒ̣ܗ̱ܬ̣ܘܼܢ.

⁶ܩܵܠܵܐ ܕܲܕ݂ܠܘܼܚܝܵܐ ܡ̣ܢ ܩܪܝܼܬ̣ܵܐ: ܘܩܵܠܵܐ ܡ̣ܢ ܗܲܝܟ̇ܠܵܐ: ܩܵܠܹܗ ܕܡܵܪܝܵܐ ܕܦܵܪܲܥ ܦܘܼܪܥܵܢܵܐ ܠܲܒ̣ܥܸܠܕ̇ܒ̣ܵܒ̣ܵܘ̈ܗܝ.

⁷ܥܲܕ݂ܠܵܐ ܬܚܲܒܸ̇ܠ ܕܝܵܠܕܵܐ: ܘܥܲܕ݂ܠܵܐ ܢܸܡܛܘܿܢ ܚܸܒ̣̈ܠܹܝܗ̇ ܘܬܸܦܠܲܛ ܕܸܟ݂ܪܵܐ.

⁸ܡܲܢ ܫ̣ܡܲܥ ܐܲܝܟ݂ ܗܵܕܹܐ: ܘܡܲܢ ܚ̣ܙܵܐ ܐܲܝܟ݂ ܗܵܠܹܝܢ: ܕܲܡܚܲܒ̇ܠܵܐ ܐܲܪܥܵܐ ܒܝܵܘܡܵܐ ܚܕ݂: ܘܡܸܬ̣̱ܝܼܠܸܕ݂ ܥܲܡܵܐ ܒܫܵܥܬ̣ܵܐ ܚܕ݂ܵܐ: ܡܸܛܠ ܕܚܲܒ̇ܠܲܬ̤ ܘܝܸܠܕܲܬ̣ ܨܸܗܝܘܿܢ ܠܲܒ̣ܢܹ̈ܝܗ̇.

⁹ܐܸܢܵܐ ܝܸܗ̄ܒܹ̇ܬ̣ ܣܘܼܟܵܝܵܐ ܗܵܢܵܐ: ܘܠܵܐ ܡܵܘܠܸܕ݂ ܐ̄ܢܵܐ ܐܵܡܲܪ ܡܵܪܝܵܐ ܕܲܠܡܵܐ ܠܵܐ ܗ̄ܘܼܵܐ ܐܸܢܵܐ ܡܵܘܠܸܕ݂ ܐ̄ܢܵܐ ܘܟ݂ܵܠܹ̇ܐ ܐ̄ܢܵܐ ܐܵܡܲܪ ܐܲܠܵܗܹܟ݂ܝ.

¹⁰ܚܕ݂ܵܘ ܒܐܘܿܪܸܫܠܸܡ ܘܕ݂ܘܼܨܘ ܒܵܗ̇ ܟܠ ܪ̈ܵܚܡܹܝܗ̇. ܐܸܬ̣ܒܲܣܲܡܘ ܥܲܡܵܗ̇ ܒܒ̣ܘܼܣܵܡܵܐ ܟܠ ܕܲܗܘ̤ܵܘ ܒܐܸܒ̣ܠܵܐ ܥܠܹܝܗ̇.

¹¹ܘܬܹܐܢܩܘܼܢ ܘܬܸܣܒ̇ܠܘܼܢ ܡ̣ܢ ܬܕ݂ܵܐ ܕܒ̣ܘܼܝܵܐܵܗ̇: ܘܬܹܐܢܩܘܼܢ ܘܬܸܬ̣ܦܲܢܩܘܼܢ ܡ̣ܢ ܥܘܼܫܢܵܐ ܕܐܝܼܩܵܪܵܗ̇.

¹²ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ: ܕܗܵܐ ܪܵܡܹ̇ܐ ܐ̄ܢܵܐ ܥܠܹܝܗ̇ ܫܠܵܡܵܐ ܐܲܝܟ݂ ܢܲܗܪܵܐ: ܘܐܲܝܟ݂ ܢܲܚܠܵܐ ܕܓ̣ܵܪܹܦ. ܘܐܝܼܩܵܪܵܐ ܕܥܲܡܡܹ̈ܐ ܬܹܐܢܩܘܼܢ: ܘܥܲܠ ܦܸܪ̈ܝܵܘܵܬ̣ܵܐ ܬܸܫܬܲܩܠܘܼܢ: ܘܥܲܠ ܒܘܼܪ̈ܟܹ̇ܐ ܬܸܬ̣ܪܲܒ̇ܘܿܢ.

¹³ܐܲܝܟ݂ ܓܲܒ̣ܪܵܐ ܕܲܡܒܲܝܐܵܐ ܠܹܗ ܐܸܡܹܗ: ܗܵܟܲܢܵܐ ܐܸܢܵܐ ܐܹܒܲܝܲܐܟ݂ܘܿܢ: ܘܒ̣ܐܘܿܪܸܫܠܸܡ ܬܸܬ̣ܒܲܝܐܘܼܢ.

¹⁴ܘܬܸܚܙܘܿܢ ܘܢܸܚܕܹ̇ܐ ܠܸܒ̇ܟ݂ܘܿܢ: ܘܓܲܪ̈ܡܲܝܟ̇ܘܿܢ ܐܲܝܟ݂ ܬܸܕ݂ܐܵܐ ܢܸܪܘ̱ܙܘܼܢ. ܘܬܸܬ̣̱ܝܼܕܲܥ ܐܝܼܕܹܗ ܕܡܵܪܝܵܐ ܥܲܠ ܥܲܒ̣ܕܵܘ̈ܗܝ: ܘܬ̣ܵܘܒܸ̇ܕ݂ ܠܲܒ̣ܥܸܠܕ̇ܒ̣ܵܒ̣ܵܘ̈ܗܝ.

¹⁵ܡܸܛܠ ܕܗܵܐ ܡܵܪܝܵܐ ܒܢܘܼܪܵܐ ܐܵܬܹ̇ܐ: ܘܐܲܝܟ݂ ܥܲܠܥܵܠܵܐ ܡܲܪܟܲܒ̣ܬܹܗ. ܕܢܸܗܦܘܿܟ݂ ܒܚܸܡܬ̣ܵܐ ܕܪܘܼܓ̣ܙܹܗ. ܘܲܟ݂ܐܵܬܹܗ ܫܲܠܗܹܒ̣ܝܼܬ̣ܵܐ ܕܢܘܼܪܵܐ.

¹⁶ܡܸܛܠ ܕܲܒ̣ܢܘܼܪܵܐ ܕܵܐܹ̇ܢ ܡܵܪܝܵܐ: ܘܒ̣ܵܚܲܪ ܒܵܗ̇ ܠܟ݂ܠ ܒܣܲܪ: ܘܢܸܣܓ̇ܘܿܢ ܩܛܝܼܠܵܘ̈ܗܝ ܕܡܵܪܝܵܐ.

¹⁷ܕܡܸܬ̣ܩܲܕ̇ܫܝܼܢ ܘܡܸܬ̇ܕܲܟܹ̇ܝܢ ܒܓܲܢܹ̈ܐ: ܚܲܕ݂ ܒܵܬܲܪ ܚܲܕ݂ ܒܲܡܨܲܥܬ̣ܵܐ: ܘܐܵܟ݂ܠܝܼܢ ܒܸܣܪܵܐ ܕܲܚܙܝܼܪܵܐ: ܘܫܸܪܨܵܐ ܘܥܘܼܩܒ̇ܪܹ̈ܐ. ܐܲܟ݂ܚ̄ܕ݂ܵܐ ܢܣܘܼܦܘܼܢ ܐܵܡܲܪ ܡܵܪܝܵܐ.

¹⁸ܘܐܸܢܵܐ ܝܵܕܲܥ ܐ̄ܢܵܐ ܥܒ̣ܵܕܲܝ̈ܗܘܿܢ ܘܬܲܪ̈ܥܝܵܬ̣ܗܘܿܢ: ܡܵܐ ܕܐܸܬܹ̇ܝܬ̣ ܠܲܡܟܲܢܵܫܘܼ ܠܟ݂ܠܗܘܿܢ ܥܲܡܡܹ̈ܐ ܘܲܠܸܠܫܵܢܹ̈ܐ: ܘܢܹܐܬ̣ܘܿܢ ܘܢܸܚܙܘܿܢ ܐܝܼܩܵܪܝ.

¹⁹ܘܐܹܣܝܼܡ ܒܗܘܿܢ ܐܵܬ̤ܵܐ: ܘܐܹܫܲܕܲܪ ܡܸܢܗܘܿܢ ܡܫܵܘܙ̈ܒܹܐ ܠܥܲܡܡܹ̈ܐ: ܠܬܲܪܫܝܼܫ: ܘܲܠܦܘܿܠ: ܘܲܠܠܘܿܕ݂: ܕܢܵܓܕ̇ܝܼܢ ܒܩܸܫܬܵܐ: ܘܲܠܬ̣ܘܼܒܹܝܠ: ܘܲܠܝܵܘܵܢ: ܘܲܠܓ̣ܵܙܪ̈ܵܬ̣ܵܐ ܪ̈ܲܚܝܼܩܵܬ̣ܵܐ: ܕܠܵܐ ܫ̣ܡܲܥܘ ܫܹܡܝ ܘܠܵܐ ܚܙܵܘ ܐܝܼܩܵܪܝ: ܘܲܢܚܵܘܘܿܢ ܐܝܼܩܵܪܝ ܒܥܲܡܡܹ̈ܐ.

²⁰ܘܢܲܝܬ̇ܘܿܢ ܠܟ݂ܠܗܘܿܢ ܐܲܚܲܝ̈ܟ̇ܘܿܢ ܡ̣ܢ ܟܠܗܘܿܢ ܥܲܡܡܹ̈ܐ ܩܘܼܪܒܵܢܵܐ ܠܡܵܪܝܵܐ: ܒܪ̈ܲܟ݂ܫܵܐ: ܘܲܒ̣ܡܲܪ̈ܟ̇ܒ̣ܬ̣ܵܐ: ܘܲܒ̣ܩܵܪ̈ܘܿܟܹܐ: ܠܛܘܼܪܵܐ ܕܩܘܼܕ݂ܫܝ: ܠܐܘܿܪܸܫܠܸܡ ܐܵܡܲܪ ܡܵܪܝܵܐ: ܐܲܝܟ݂ ܕܡܲܝܬܹ̇ܝܢ ܒܢܲܝ̈ ܝܑܼܣܪܵܝܹܠ ܣܡܝܼܕ݂ܵܐ ܒܡܵܐܢܹ̈ܐ ܕܟܲـ̈ـܝܵܐ ܠܒܲܝܬܹ̇ܗ ܕܡܵܪܝܵܐ.

²¹ܐܵܦ ܡܸܢܗܘܿܢ ܐܸܣܲܒ̣ ܠܟ݂ܵܗܢܹ̈ܐ: ܘܲܠܠܹܘܵܝܹ̈ܐ: ܐܵܡܲܪ ܡܵܪܝܵܐ.

²²ܐܲܝܟ݂ ܫܡܲܝܵܐ ܚܲܕ݂ܬܹ̈ܐ ܘܐܲܪܥܵܐ ܚܕܲܬܵܐ ܕܥܵܒܹ̇ܕ݂ ܐ̄ܢܵܐ: ܕܩܵܝ̇ܡܝܼܢ ܩܕ݂ܵܡܲܝ ܐܵܡܲܪ ܡܵܪܝܵܐ: ܗܵܟܲܢܵܐ ܢܸܬ̣ܩܲܝܲܡ ܙܲܪܥ̱ܟ݂ܘܿܢ ܘܫܸܡܟ݂ܘܿܢ.

²³ܘܢܸܗܘܸܐ ܡ̣ܢ ܙܒܲܢ ܝܼܪܲܚ ܒܝܼܪܲܚ: ܘܡ̣ܢ ܙܒܲܢ ܫܲܒܵܐ ܠܫܲܒܵܐ: ܢܹܐܬ̣ܘܿܢ ܟܠ ܒܣܲܪ ܠܡܸܣܓܲܕ݂ ܩܕ݂ܵܡܲܝ ܐܵܡܲܪ ܡܵܪܝܵܐ.

²⁴ܘܢܸܦܩܘܼܢ ܘܢܸܚܙܘܿܢ ܫܠܲܕܲܝ̈ܗܘܿܢ ܕܓܲܒ̣ܪܹ̈ܐ ܕܐܲܥܠܝܼܘ ܒܝܼ: ܡܵܝ̇ܬܵܐ ܬܵܘܠܲܥܗܘܿܢ: ܘܢܘܼܪܗܘܿܢ ܠܵܐ ܕܵܥܟܵܐ: ܘܢܸܗܘܘܿܢ ܕܘܼܡܵܪܵܐ ܠܟ݂ܠ ܒܣܲܪ.