Read Aramaic Peshita Isaiah 7 Bible Online

Isaiah 7 - Aramaic Peshita bible

Isaiah 7

¹ܘܲܗܘ̤ܵܐ ܒܝܵܘ̈ܡܵܬܹܗ ܕܐܵܚܵܙ: ܒܲܪ ܝܘܿܬ̣ܵܡ: ܒܲܪ ܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܣܠܸܩ ܪܵܨܵܢ ܡܲܠܟܵܐ ܕܐܵܪܵܡ: ܘܲܦܩܲܚ ܒܲܪ ܪܘܿܡܲܠܝܵܐ ܡܲܠܟܵܐ ܕܝܼܣܪܵܝܹܠ ܠܐܘܿܪܸܫܠܸܡ: ܠܡܸܬ̣ܟܲܬܵܫܘܼ ܥܲܡܵܗ̇: ܘܠܵܐ ܐܸܫܟܲܚܘ ܕܢܸܬ̣ܟܲܬ̇ܫܘܼܢ ܥܠܹܝܗ̇.

²ܘܐܸܬ̣ܐ̱ܡܲܪ ܠܲܕ݂ܒܹܝܬ̣ ܕܵܘܝܼܕ݂: ܕܐܸܫܬ̇ܘܝܼ ܐܵܪܵܡ ܥܲܡ ܐܲܦܪܹܝܡ. ܘܙܵܥ̣ ܠܸܒܹ̇ܗ ܘܠܸܒܵܐ ܕܥܲܡܹܗ: ܐܲܝܟ݂ ܕܙܵܝ̇ܥܝܼܢ ܐܝܼܠܵܢܹ̈ܐ ܕܥܵܒ̣ܵܐ ܡ̣ܢ ܩܕ݂ܵܡ ܪܘܼܚܵܐ.

³ܘܐܸܡܲܪ ܡܵܪܝܵܐ ܠܐܹܫܲܥܝܵܐ: ܦܘܿܩ ܠܐܘܼܪܥܹܗ ܕܐܵܚܵܙ: ܐܲܢ̄ܬ̇ ܘܫܲܪܢܵܫܘܿܒ̣ ܒܪܵܟ݂: ܥܲܠ ܓܸܢ̄ܒ̣ ܝܲܡܬ̣ܵܐ ܥܸܠܵܝܬܵܐ ܕܒ̣ܐܘܼܪܚܵܐ ܕܚܲܩܠܹܗ ܕܩܵܨܪܵܐ.

⁴ܘܐܸܡܲܪ ܠܹܗ: ܐܸܙܕܲܗ̄ܪ ܘܲܫܠܝܼ: ܘܠܵܐ ܬܸܕ݂ܚܲܠ. ܘܠܸܒܵܟ݂ ܠܵܐ ܢܬ̣ܘܲܪ ܡ̣ܢ ܗܵܠܹܝܢ ܬܪܹܝܢ ܕܘܼܢ̈ܒܵܬ̣ܵܐ: ܐܘܼ̈ܕܹܐ ܡܚܲܪ̈ܟܹܐ: ܡ̣ܢ ܚܸܡܬ̣ܵܐ ܕܪܘܼܓ̣ܙܹܗ ܕܪܵܨܵܢ ܘܲܕ݂ܒܲܪ ܪܘܿܡܲܠܝܵܐ.

⁵ܚܠܵܦ ܕܐܸܬ̣ܡܲܠܟ݂ܘܼ ܥܠܲܝܟ ܒܝܼܫܬܵܐ: ܐܵܪܵܡ: ܘܐܲܦܪܹܝܡ: ܘܒܲܪ ܪܘܿܡܲܠܝܵܐ.

⁶ܘܐܸܡܲܪܘ ܢܸܣܲܩ ܠܲܝܗܘܼܕ݂ܵܐ ܘܢܸܥܩ̄ܪܝܼܗ̇: ܘܢܸܬ̣ܪ̱ܥܝܼܗ̇ ܘܢܲܡܠܸܟ݂ ܒܵܗ̇ ܡܲܠܟܵܐ ܠܒܲܪ ܛܒ̣ܵܐܹܝܠ.

⁷ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ: ܠܵܐ ܬܩܘܼܡ ܘܠܵܐ ܬܸܗܘܹܐ.

⁸ܡܸܛܠ ܕܪܹܫܵܐ ܕܐܵܪܵܡ ܕܲܪܡܣܘܿܩ: ܘܪܹܫܵܐ ܕܕܲܪܡܣܘܿܩ ܪܵܨܵܢ: ܘܒ̣ܵܬܲܪ ܫܬ̇ܝܼܢ ܘܚܲܡܸܫ ܫܢ̈ܝܼܢ: ܢܸܬܲܪ ܐܲܦܪܹܝܡ ܡ̣ܢ ܥܲܡܵܐ.

⁹ܘܪܹܫܵܐ ܕܐܲܦܪܹܝܡ ܫܵܡ̇ܪܹܝܢ: ܘܪܹܫܵܐ ܕܫܵܡܪܹܝܢ ܒܲܪ ܪܘܿܡܲܠܝܵܐ. ܘܐܸܢ ܠܵܐ ܬܗܲܝܡܢܘܼܢ: ܐܵܦ ܠܵܐ ܬܸܣܬܲܟ̇ܠܘܼܢ.

¹⁰ܘܐܵܘܣܸܦ ܬܘܼܒ̣ ܡܵܪܝܵܐ ܠܡܹܐܡܲܪ ܠܐܵܚܵܙ.

¹¹ܫܐܲܠ ܠܵܟ݂ ܐܵܬ̤ܵܐ ܡ̣ܢ ܡܵܪܝܵܐ ܐܲܠܵܗܵܟ݂: ܥܲܡܸܩ: ܫܐܲܠ: ܐܵܘ ܐܲܪܝܼܡ ܠܥܸܠ.

¹²ܘܐܸܡܲܪ ܐܵܚܵܙ ܠܵܐ ܐܸܫܐܲܠ: ܘܠܵܐ ܐܹܢܲܣܸܐ ܠܡܵܪܝܵܐ ܐܲܠܵܗܝ.

¹³ܘܐܸܡܲܪ ܫܡܲܥܘ ܒܲܝܬܹ̇ܗ ܕܕ݂ܵܘܝܼܕ݂: ܙܥܘܿܪܝܵܐ ܗ̄ܝܼ ܠܟ݂ܘܿܢ ܕܡܲܠܐܹܝܢ ܐ̄ܢܬ̇ܘܿܢ ܠܓܲܒ̣ܪܵܐ: ܐܸܠܵܐ ܕܬܲܠܐܘܿܢ ܐܵܦ ܠܐܲܠܵܗܝ.

¹⁴ܡܸܛܠ ܗܵܢܵܐ ܢܸܬܸ̇ܠ ܠܟ݂ܘܿܢ ܡܵܪܝܵܐ ܐܲܠܵܗܵܐ ܐܵܬ̤ܵܐ: ܗܵܐ ܒܬ̣ܘܼܠܬܵܐ ܒܵܛܢܵܐ ܘܝܵܠܕܵܐ ܒܪܵܐ: ܘܢܸܬ̣ܩܪܸܐ: ܫܡܹܗ ܥܲܡܲܢܘܼܐܹܝܠ.

¹⁵ܚܹܐܘܬ̣ܵܐ ܘܕܸܒ̣ܫܵܐ ܢܹܐܟ݂ܘܿܠ: ܕܢܸܕܲܥ ܠܡܲܣܠܵܝܘܼ ܒܝܼܫܬܵܐ: ܘܲܠܡܸܓ̣ܒ̣ܵܐ ܛܵܒ̣ܬ̣ܵܐ.

¹⁶ܡܸܛܠ ܕܥܲܕ݂ܠܵܐ ܢܸܕܲܥ ܛܲܠܝܵܐ ܠܡܲܣܠܵܝܘܼ ܒܝܼܫܬܵܐ: ܘܲܠܡܸܓܒ̣ܵܐ ܛܲܒ̣ܬ̣ܵܐ: ܬܸܫܬ̇ܒܸܩ ܐܲܪܥܵܐ ܕܲܡܥܵܩ ܐܲܢ̄ܬ̇ ܒܵܗ̇ ܡ̣ܢ ܩܕ݂ܵܡ ܬܪܹܝܢ ܡܲܠܟܹ̇ܝ̈ܗ̇.

¹⁷ܡܵܪܝܵܐ ܢܲܝܬܹ̇ܐ ܥܠܲܝܟ: ܘܥܲܠ ܥܲܡܵܟ݂: ܘܥܠ ܒܹܝܬ̣ ܐܲܒ̣ܘܼܟ݂: ܝܵܘ̈ܡܵܬ̣ܵܐ ܕܠܵܐ ܐܸܬ̣ܵܘ ܡ̣ܢ ܝܵܘܡܵܐ ܕܐܲܥܒܲܪ ܠܐܲܦܪܹܝܡ ܡ̣ܢ ܝܼܗܘܼܕ݂ܵܐ ܡܲܠܟܵܐ ܕܐܵܬ̣ܘܿܪ.

¹⁸ܘܢܸܗܘܹܐ ܒܝܵܘܡܵܐ ܗܵܘܿ: ܢܲܫܪܸܩ ܡܲܪܝܵܐ ܠܕܲܒܵܒܹ̈ܐ: ܕܒܲܫܦܘܿܠܲܝ̈ ܢܲܗܪ̈ܵܘܵܬ̣ܵܐ ܕܡܸܨܪܹܝܢ: ܘܲܠܕܸܒ̇ܘܿܪ̈ܝܵܬ̣ܵܐ ܕܒܲܐܪܥܵܐ ܕܐܵܬ̣ܘܿܪ.

¹⁹ܘܢܹܐܬ̣ܘܿܢ ܘܢܸܬ̇ܬ̇ܢܝܼܚܘܼܢ ܟܠܗܘܿܢ ܒܢܲܚܠܵܐ ܕܝܵܬ̣ܘܿܬ̣: ܘܲܒ̣ܦܲܥܪܹ̈ܐ ܕܟܹܐܦܵܐ: ܘܲܒ̣ܟ݂ܠܗܘܿܢ ܚܠܹܠܹ̈ܐ.

²⁰ܒܝܵܘܡܵܐ ܗܵܘܿ: ܢܸܓ̣ܪܘܿܥ ܡܵܪܝܵܐ ܒܲܡܕܲܟ̇ܝܵܐ ܪܵܘܝܵܐ: ܒܥܸܒ̣ܪ̈ܵܘܗܝ ܕܢܲܗܪܵܐ ܠܡܲܠܟܵܐ ܕܐܵܬ̣ܘܿܪ: ܡ̣ܢ ܪܹܫܹܗ ܘܲܠܣܲܥܪܵܐ ܕܪܸ̈ܓ̣ܠܵܘܗܝ. ܐܵܦ ܕܲܩܢܹܗ ܢܸܫܩܘܿܠ.

²¹ܘܢܸܗܘܹܐ ܒܝܵܘܡܵܐ ܗܵܘܿ: ܢܲܚܹܐ ܓܲܒ̣ܪܵܐ ܥܓܸܠܬܵܐ ܕܬ̣ܵܘܪܹ̈ܐ: ܘܬܲܪܬܹ̇ܝܢ ܥܵـ̈ـܢܵܐ.

²²ܘܢܸܗܘܹܐ ܡ̣ܢ ܣܘܿܓ̣ܵܐܐ ܕܥܵܒ̣̈ـ̈ـܕܵܢ ܚܲܠܒ̣ܵܐ: ܢܹܐܟ݂ܘܿܠ ܚܹܐܘܬ̣ܵܐ: ܡܸܛܠ ܕܕܸܒ̣ܫܵܐ ܘܚܹܐܘܬ̣ܵܐ ܢܹܐܟ݂ܘܿܠ ܡܲܢ ܕܡܸܫܬܲܚܲܪ ܒܓ̣ܵܘܵܗ̇ ܕܐܲܪܥܵܐ.

²³ܘܢܸܗܘܹܐ ܒܝܵܘܡܵܐ ܗܵܘܿ ܟܠ ܐܲܬܲܪ ܕܐܝܼܬ̣ ܒܹܗ ܐܵܠܹܦ ܓܘܼܦܢ̈ܝܼܢ ܒܐܵܠܹܦ ܕܲܟ݂ܣܸܦ: ܠܝܲܥܪܵܐ ܘܲܠܟ݂ܘܼ̈ܒܹ̇ܐ ܢܸܗܘܹܐ.

²⁴ܘܲܒ̣ܓܹܐܪܹ̈ܐ ܘܲܒ̣ܩܸܫ̈ܬܵܬ̣ܵܐ ܢܸܥܠܘܼܢ ܠܬܲܡܵܢ. ܡܸܛܠ ܕܝܲܥܪܵܐ ܘܟ݂ܘܼ̈ܒܹ̇ܐ ܬܸܬ̣ܡ̱ܠܸܐ ܟܠܵܗ̇ ܐܲܪܥܵܐ.

²⁵ܘܟ݂ܠܗܘܿܢ ܛܘܼܪܹ̈ܐ ܕܕ݂ܵܒ̣ܪܵܐ ܗ̄ܘܼܵܬ̣ ܒܗܘܿܢ ܦܲܕܵܢܵܐ. ܢܸܬ̇ܕܲܒ̣ܪܘܼܢ: ܘܠܵܐ ܬܸܥܘܿܠ ܠܬܲܡܵܢ ܕܸܚܠ̱ܬ̣ܵܐ ܕܝܲܥܪܵܐ ܘܲܕ݂ܟ݂ܘܼ̈ܒܹ̇ܐ. ܘܢܸܗܘܹܐ ܒܹܝܬ̣ ܪܸܥܝܵܐ ܠܬ̣ܵܘܪܹ̈ܐ: ܘܒܹܝܬ̣ ܕܝܵܫܵܐ ܠܥܵـ̈ـܢܵܐ.