Read Aramaic Peshita Isaiah 9 Bible Online

Isaiah 9 - Aramaic Peshita bible

Isaiah 9

¹ܣܲܪܗܒܲܬ̤ ܐܲܪܥܵܐ ܕܲܙܒ̣ܘܿܠܘܿܢ: ܘܐܲܪܥܵܐ ܕܢܲܦ̮ܬܵܠܝܼ. ܘܐܘܼܚܕܵܢܵܐ ܥ̣ܫܸܢ: ܐܘܼܪܚܵܐ ܕܝܲܡܵܐ: ܥܸܒ̣ܪ̈ܵܘܗܝ ܕܝܘܿܪܕ̇ܢܵܢ ܢܲܗܪܵܐ: ܓܠܝܼܠܵܐ ܕܥܲܡܡܹ̈ܐ.

²ܥܲܡܵܐ ܕܲܡܗܲܠܟ݂ܝܼܢ ܒܚܸܫܘܿܟ݂ܵܐ: ܚ̣ܙܵܘ ܢܘܼܗܪܵܐ ܪܲܒܵܐ. ܘܲܕ݂ܝܵܬ̣ܒ̇ܝܼܢ ܒܐܲܪܥܵܐ ܕܛܸܠܵܠܲܝ̈ ܡܵܘܬܵܐ: ܢܘܼܗܪܵܐ ܕܢܲܚ̣ ܥܠܲܝܗܘܿܢ.

³ܐܲܣܓ̇ܝܼܬ̇ ܥܲܡܵܐ: ܘܠܹܗ ܐܵܘܪܸܒ̣ܬ̇ ܚܲܕ݂ܘܼܬ̣ܵܐ. ܚܕ݂ܝܼܘ ܩܕ݂ܵܡܲܝܟ ܐܲܝܟ݂ ܗܵܢ̇ܘܿܢ ܕܚܵܕܹܝܢ ܒܲܚܨܵܕ݂ܵܐ: ܘܐܲܝܟ݂ ܗܵܢ̇ܘܿܢ ܕܕ݂ܵܝܨܝܼܢ ܡܵܐ ܕܲܡܦܲܠܓ̣ܝܼܢ ܒܸܙܬ̣ܵܐ.

⁴ܡܸܛܠ ܕܢܝܼܪܵܐ ܕܫܘܼܥܒܵܕ݂ܗܘܿܢ: ܘܚܘܼܛܪܵܐ ܕܟܲܬ̣ܦ̄ܗܘܿܢ: ܘܫܲܒ̣ܛܵܐ ܕܲܡܫܲܥܒܸ̇ܕ݂ ܗ̄ܘܼܵܐ ܠܗܘܿܢ: ܬܒܲܪܬ̇ ܐܲܝܟ݂ ܝܵܘܡܵܐ ܕܡܸܕ݂ܝܲܢ.

⁵ܡܸܛܠ ܕܟ݂ܠ ܩܵܠ ܐܸܫܬ̇ܡܲܥ ܒܙܵܘܥܬ̣ܵܐ. ܘܢܲܚܬܵܐ ܡܦܲܠܦܲܠ ܒܲܕ݂ܡܵܐ. ܘܲܗܘ̤ܵܐ ܠܝܲܩܕܵܢܵܐ ܘܲܠܡܹܐܟ݂ܘܼܠܬܵܐ ܕܢܘܼܪܵܐ.

⁶ܡܸܛܠ ܕܝܲܠܕܵܐ ܐܸܬ̣̱ܝܼܠܸܕ݂ ܠܲܢ: ܘܲܒ̣ܪܵܐ ܐܸܬ̣̱ܝܼܗܸܒ̣ ܠܲܢ. ܘܲܗܘ̤ܵܐ ܫܘܼܠܛܵܢܹܗ ܥܲܠ ܟܲܬ̣ܦܹܗ. ܘܐܸܬ̣ܩ̄ܪܝܼ ܫܡܹܗ ܕܘܼܡܵܪܵܐ ܘܡܵܠܘܿܟ݂ܵܐ: ܐܲܠܵܗܵܐ ܓܲܢ̄ܒܵܪܵܐ ܕܥܵܠܡܹ̈ܐ: ܫܲܠܝܼܛܵܐ ܕܲܫܠܵܡܵܐ.

⁷ܠܡܲܣܓܵܝܘܼ ܫܘܼܠܛܵܢܹܗ. ܘܠܲܫܠܵܡܹܗ ܠܲܝܬ̇ ܣܵܟ݂ܵܐ: ܥܲܠ ܟܘܼܪܣܝܹܗ ܕܕ݂ܵܘܝܼܕ݂: ܘܥܲܠ ܡܲܠܟ̇ܘܼܬܹܗ. ܕܢܲܬ̣ܩ̄ܢܝܼܗ̇ ܘܲܢܣܲܡܟ݂ܝܼܗ̇ ܒܕ݂ܝܼܢܵܐ ܘܲܒ̣ܙܲܕ̇ܝܼܩܘܼܬ̣ܵܐ: ܡܸܟܹ̇ܝܠ ܘܲܥܕܲܡܵܐ ܠܥܵܠܲܡ. ܛܢܵܢܹܗ ܕܡܵܪܝܵܐ ܚܲܝܠܬ̣ܵܢܵܐ ܥܵܒܹ̇ܕ݂ ܗܵܕܹܐ.

⁸ܦܸܬ̣ܓ̣ܵܡܵܐ ܫܲܕܲܪ ܡܵܪܝܵܐ ܒܝܲܥܩܘܿܒ̣: ܘܲܢ̣ܦܲܠ ܒܝܼܣܪܵܝܹܠ.

⁹ܘܢܸܕ̇ܥܘܼܢ ܥܲܡܡܹ̈ܐ ܟܠܗܘܿܢ: ܐܲܦܪܹܝܡ ܘܥܵܡ̇ܘܿܪܹ̈ܝܗ̇ ܕܫܵܡܪܹܝܢ: ܒܓܲܐܝܘܼܬ̣ܵܐ ܘܲܒ̣ܪܲܒ̇ܘܼܬ̣ ܠܸܒܵܐ: ܘܐܵܡ̇ܪܝܼܢ.

¹⁰ܠܸܒ̣ܢܹ̈ܐ ܢܲܪܡܸܐ: ܘܢܸܓ̣ܙܘܿܪ ܓܙܝܼܪ̈ܵܬ̣ܵܐ. ܘܢܸܦܣܘܿܩ ܫܲܩܡܹ̈ܐ: ܘܐܲܪ̈ܙܹܐ ܢܸܚܠܘܿܦ.

¹¹ܘܢܲܥܫܸܢ ܡܵܪܝܵܐ ܠܐܵܠܘܼܨܵܘ̈ܗܝ ܕܪܵܨܵܢ ܥܠܵܘܗܝ. ܘܠܲܒ̣ܥܸܠܕ̇ܒ̣ܵܒ̣ܵܘ̈ܗܝ ܢܓܲܪܸܓ̣.

¹²ܠܐܲܕ݂ܘܿܡ ܡ̣ܢ ܡܲܕ݂ܢ̱ܚܵܐ: ܘܠܲܦܠܸܫܬܵܝܹ̈ܐ ܡ̣ܢ ܡܲܥ̱ܪܒ̣ܵܐ. ܘܢܹܐܟ݂ܠܘܼܢܹܗ ܠܝܼܣܪܵܝܹܠ ܒܟ݂ܠܹܗ ܦܘܼܡܗܘܿܢ ܘܲܒ̣ܗܵܠܹܝܢ ܟܠܗܹܝܢ ܠܵܐ ܗ̣ܦܲܟ݂ ܪܘܼܓ̣ܙܹܗ. ܘܬ̣ܘܼܒ̣ ܐܝܼܕܹܗ ܪܵܡܵܐ.

¹³ܘܥܲܡܵܐ ܠܵܐ ܐܸܬ̣ܦ̄ܢܝܼܘ: ܥܕܲܡܵܐ ܕܲܒ̣ܠܲܥ̣ܘ. ܘܲܠܡܵܪܝܵܐ ܚܲܝܠܬ̣ܵܢܵܐ ܠܵܐ ܒܥ̣ܵܘ.

¹⁴ܘܐܵܘܒܸ̇ܕ݂ ܡܵܪܝܵܐ ܡ̣ܢ ܝܼܣܪܵܝܹܠ: ܪܹܫܵܐ ܘܕ݂ܘܼܢܒ̇ܬ̣ܵܐ: ܘܕ݂ܘܼܢܒ̇ܬ̣ܵܐ ܘܪܹܫܵܐ: ܒܝܵܘܡܵܐ ܚܲܕ݂.

¹⁵ܣܵܒ̣ܵܐ ܘܲܗܕ݂ܝܼܪ ܐܲܦܹ̈ܐ ܗ̤ܘܝܘܼ ܪܹܫܵܐ. ܘܲܢܒ̣ܝܼܵܐ ܕܡܲܠܸܦ ܫܘܼܩܪܵܐ ܗܘ̤ܝܘܼ ܕܘܼܢܒ̇ܬ̣ܵܐ.

¹⁶ܘܢܸܗܘܘܿܢ ܡܲܛܐ̱ܒ̣ܵܢܵܘ̈ܗܝ ܕܥܲܡܵܐ ܗܵܢܵܐ: ܡܲܛܥܹܝܢ ܘܲܡܛܲܒ̇ܥܝܼܢ ܠܹܗ.

¹⁷ܡܸܛܠ ܗܵܢܵܐ ܠܵܐ ܢܚܲܕܸ̇ܐ ܡܵܪܝܵܐ ܥܲܠ ܥܠܲܝܡܲܝ̈ܗܘܿܢ. ܘܥܲܠ ܝܲܬ̣ܡܲܝ̈ܗܘܿܢ ܘܥܲܠ ܐܲܪ̈ܡܠܵܬ̣ܗܘܿܢ ܠܵܐ ܢܪܲܚܸܦ. ܡܸܛܠ ܕܟ݂ܠܗܘܿܢ ܚܲܠܦܝܼܢ ܘܒ̣ܝܼܫܝܼܢ. ܘܟ݂ܠ ܦܘܼܡ ܡܡܲܠܸܠ ܫܵܛ̇ܝܘܼܬ̣ܵܐ. ܘܲܒ̣ܗܵܠܹܝܢ ܟܠܗܹܝܢ ܠܵܐ ܗ̣ܦܲܟ݂ ܪܘܼܓ̣ܙܹܗ. ܘܬ̣ܘܼܒ̣ ܐܝܼܕܹܗ ܪܵܡܵܐ.

¹⁸ܡܸܛܠ ܕܣܸܦܲܬ̤ ܚܛܝܼܬ̣ܵܐ ܐܲܝܟ݂ ܢܘܼܪܵܐ: ܘܬܹܐܟ݂ܘܿܠ ܝܲܥܪܵܐ ܘܟ݂ܘܼ̈ܒܹ̇ܐ. ܘܬܸܣܲܦ ܒܣܵܘ̈ܟܹ̇ܐ ܕܥܵܒ̣ܵܐ. ܘܢܸܬ̣ܥܲܪܩ̄ܠܘܼܢ ܓܒܲـ̈ـܝܵܐ ܒܬܸܢܵܢܵܐ.

¹⁹ܒܲܟ݂ܐܵܬܹܗ ܕܡܵܪܝܵܐ ܚܲܝܠܬ̣ܵܢܵܐ ܙܵܥܲܬ̤ ܐܲܪܥܵܐ. ܘܲܗܘ̤ܵܐ ܥܲܡܵܐ ܐܲܝܟ݂ ܗܵܘܿ ܕܐܸܟܲܠܬܹܗ ܢܘܼܪܵܐ. ܘܲܓ̣ܒܲܪ ܥܲܠ ܐܲܚܘܼܗܝ ܠܵܐ ܢܚܘܼܣ.

²⁰ܘܢܸܓ̣ܙܘܿܪ ܥܲܠ ܝܲܡܝܼܢܹܗ ܘܢܸܟ݂ܦܲܢ. ܘܢܹܐܟ݂ܘܿܠ ܥܲܠ ܣܸܡܵܠܹܗ. ܘܠܵܐ ܢܸܣܒ̇ܥܘܼܢ ܓܒܲܪ ܒܸܣܪܵܐ ܕܲܕ݂ܪܵܥܹܗ ܢܹܐܟ݂ܘܿܠ.

²¹ܡܢܲܫܹܐ ܠܐܲܦܪܹܝܡ: ܘܐܲܦܪܹܝܡ ܠܲܡܢܲܫܸܐ: ܘܐܲܟ݂ܚܕ݂ܵܐ ܥܲܠ ܝܼܗܘܼܕ݂ܵܐ. ܘܲܒ̣ܗܵܠܹܝܢ ܟܠܗܹܝܢ ܠܵܐ ܗ̣ܦܲܟ݂ ܪܘܼܓ̣ܙܹܗ. ܘܬ̣ܘܼܒ̣ ܐܝܼܕܹܗ ܪܵܡܵܐ.