Read Aramaic Peshita Leviticus 22 Bible Online

Leviticus 22 - Aramaic Peshita bible

Leviticus 22

¹ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ.

²ܐܸܡܲܪ ܠܐܲܗܪܘܿܢ ܘܠܲܒ݂ܢܵܘܗܝ: ܘܢܸܬ݂ܢܲܙܪܘܼܢ ܡܼܢ ܩܘܼܕ݂ܫܹ̈ܐ ܕܲܒ݂ܢܲܝ ܝܼܣܪܵܝܹܠ: ܘܠܵܐ ܢܛܲܢܦܘܼܢ ܫܡܵܐ ܕܩܘܼܕ݂ܫܝ: ܡܸܛܠ ܕܲܡܩܲܕܫܝܼܢ ܐܸܢܘܿܢ ܠܝܼ: ܐܸܢܵܐ ܐ̄ܢܵܐ ܡܵܪܝܵܐ.

³ܐܸܡܲܪ ܠܗܘܿܢ ܠܕ݂ܵܪܲܝܗܘܿܢ: ܟܠ ܓܲܒ݂ܪܵܐ ܕܢܸܩܪܘܿܒ݂ ܡܼܢ ܟܠܹܗ ܙܲܪܥܟ݂ܘܿܢ ܠܩܘܼܕ݂ܫܵܐ ܕܲܡܩܲܕܿܫܝܼܢ ܒܢܲܝ ܝܼܣܪܵܝܹܠ ܠܡܵܪܝܵܐ: ܟܲܕ݂ ܛܲܢܦܘܼܬܹܗ ܐܝܼܬ݂ ܥܠܵܘܗܝ: ܬܹܐܒܲܕ ܢܲܦ̮ܫܵܐ ܗܵܝ ܡܼܢ ܩܕ݂ܵܡ ܥܲܝܢܲܝ: ܐܸܢܵܐ ܐ̄ܢܵܐ ܡܵܪܝܵܐ.

⁴ܓܒܲܪ ܓܒܲܪ ܡܼܢ ܙܲܪܥܹܗ ܕܐܲܗܪܘܿܢ: ܘܗ̤ܘ ܓܪܸܒ݂ ܐܵܘ ܕܵܐܹܒ݂: ܡܼܢ ܩܘܼܕܫܵܐ ܠܵܐ ܢܹܐܟ݂ܘܿܠ ܥܕܲܡܵܐ ܕܡܸܬܿܕܲܟܸܿܐ: ܘܡܿܢ ܕܢܸܩܪܘܿܒ݂ ܠܟ݂ܠܵܗ ܛܲܡܐܘܼܬ݂ܵܐ ܕܢܲܦ̮ܫܵܐ: ܐܵܘ ܓܲܒ݂ܪܵܐ ܕܢܸܦܘܿܩ ܡܸܢܹܗ ܙܲܪܥܵܐ ܕܡܲܕ݂ܡܟ݂ܵܐ.

⁵ܐܵܘ ܓܲܒ݂ܪܵܐ ܕܢܸܩܪܘܿܒ݂ ܠܟ݂ܠ ܪܲܚܫܵܐ ܕܛܲܡܲܐ ܠܹܗ: ܐܵܘ ܒܐ̄ܢܵܫܵܐ ܕܛܲܡܲܐ ܠܹܗ ܒܟ݂ܠܵܗ ܛܲܡܐܘܼܬܹܗ.

⁶ܘܟ݂ܠ ܢܲܦ̮ܫܵܐ ܕܬܸܩܪܘܿܒ݂ ܠܹܗ: ܬܸܗܘܸܐ ܛܲܡܵܐܐ ܥܕܲܡܵܐ ܠܪܲܡܫܵܐ: ܘܠܵܐ ܢܹܐܟ݂ܘܿܠ ܡܼܢ ܩܘܼܕ݂ܫܵܐ: ܐܸܠܵܐ ܐܸܢ ܐܲܫܝܼܓ݂ ܒܸܣܪܹܗ ܒܡܲܝܵܐ.

⁷ܘܲܒ݂ܡܲܥܪܵܒܲܝ ܫܸܡܫܵܐ ܢܸܬܿܕܲܟܸܿܐ: ܘܗܵܝܕܹܿܝܢ ܢܹܐܟ݂ܘܿܠ ܡܼܢ ܩܘܼܕ݂ܫܵܐ: ܡܸܛܠ ܕܠܲܚܡܹܗ ܗ̄ܘܼ.

⁸ܘܦܲܓ݂ܪܵܐ ܕܲܬ݂ܒ݂ܝܼܪ ܠܚܲܝܘܬ݂ܵܐ ܠܵܐ ܢܹܐܟ݂ܘܿܠ: ܕܠܵܐ ܢܸܬܿܛܲܡܲܐ ܒܹܗ: ܐܸܢܵܐ ܐ̄ܢܵܐ ܡܵܪܝܵܐ.

⁹ܘܢܸܛܪܘܿܢ ܢܛܘܼܪܵܬ݂ܝ: ܘܠܵܐ ܢܩܲܒܿܠܘܼܢ ܥܠܲܝܗܘܿܢ ܚܛܵܗܹ̈ܐ ܘܲܢܡܘܼܬ݂ܘܼܢ ܒܗܘܿܢ: ܡܸܛܠ ܕܛܵܘܸܫܘ ܢܲܦ̮ܫܵܬ݂ܗܘܿܢ: ܐܸܢܵܐ ܐ̄ܢܵܐ ܡܵܪܝܵܐ ܕܲܡܩܲܕܸܿܫ ܐ̄ܢܵܐ ܠܗܘܿܢ.

¹⁰ܘܟ݂ܠ ܢܘܼܟ݂ܪܵܝܵܐ ܠܵܐ ܢܹܐܟ݂ܘܿܠ ܩܘܼܕ݂ܫܵܐ: ܬܵܘܬܵܒ݂ܵܐ ܕܟ݂ܵܗܢܵܐ: ܘܐܲܓ݂ܝܼܪܵܐ ܠܵܐ ܢܹܐܟ݂ܘܿܠ ܩܘܼܕ݂ܫܵܐ.

¹¹ܘܟ݂ܵܗܢܵܐ ܟܲܕ݂ ܢܸܙܒܲܢ ܢܲܦ̮ܫܵܐ: ܙܒ݂ܝܼܢ ܟܸܣܦܹܗ ܢܹܐܟ݂ܘܿܠ ܡܼܢ ܠܲܚܡܹܗ: ܘܝܼܠܝܼܕܲܝ ܒܲܝܬܹܿܗ: ܗܸܢܘܿܢ ܢܹܐܟ݂ܠܘܼܢ ܡܼܢ ܠܲܚܡܹܗ.

¹²ܘܒܲܪܬ݂ ܟܵܗܢܵܐ ܟܲܕ݂ ܬܸܗܘܸܐ ܠܓܲܒ݂ܪܵܐ ܢܘܼܟ݂ܪܵܝܵܐ: ܐܵܦ ܗܝܼ ܡܼܢ ܦܘܼܪܫܵܢܵܐ ܕܩܘܼܕ݂ܫܵܐ ܠܵܐ ܬܹܐܟ݂ܘܿܠ.

¹³ܘܒܲܪܬ݂ ܟܵܗܢܵܐ ܟܲܕ݂ ܬܸܗܘܸܐ ܐܲܪܡܲܠܬܵܐ: ܘܲܫܒ݂ܝܼܩܬܵܐ: ܘܲܒ݂ܢܲܝܵܐ ܠܲܝܬܿ ܠܵܗ: ܘܬܸܗܦܘܿܟ݂ ܠܒܹܝܬ݂ ܐܲܒ݂ܘܼܗܿ: ܐܲܝܟ݂ ܕܲܒ݂ܛܲܠܝܘܼܬ݂ܵܗ ܡܼܢ ܠܲܚܡܵܐ ܕܐܲܒ݂ܘܼܗܿ ܬܹܐܟ݂ܘܿܠ: ܘܟ݂ܠ ܢܘܼܟ݂ܪܵܝܵܐ ܠܵܐ ܢܹܐܟ݂ܘܿܠ ܡܸܢܹܗ.

¹⁴ܘܓܲܒ݂ܪܵܐ ܕܢܹܐܟ݂ܘܿܠ ܩܘܼܕ݂ܫܵܐ ܒܛܘܼܥܝܲܝ: ܢܵܘܣܸܦ ܚܲܕ݂ ܡܼܢ ܚܲܡܫܵܐ ܥܠܵܘܗܝ: ܘܢܸܬܿܠܝܼܘܗܝ ܠܟ݂ܵܗܢܵܐ ܩܘܼܕ݂ܫܵܐ.

¹⁵ܘܠܵܐ ܢܛܵܘܫܘܼܢ ܒܢܲܝ ܝܼܣܪܵܝܹܠ ܩܘܼܕ݂ܫܵܐ ܕܲܡܦܲܪܫܝܼܢ ܠܡܵܪܝܵܐ.

¹⁶ܘܢܸܫܩܠܘܼܢ ܥܠܲܝܗܘܿܢ ܥܵܘܠܵܐ ܘܲܚܛܵܗܵܐ ܡܵܐ ܕܐܵܟ݂ܠܝܼܢ ܡܼܢ ܩܘܼܕ݂ܫܲܝܗܘܿܢ: ܡܸܛܠ ܕܐܸܢܵܐ ܐ̄ܢܵܐ ܡܵܪܝܵܐ ܕܲܡܩܲܕܸܿܫ ܐ̄ܢܵܐ ܠܗܘܿܢ.

¹⁷ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ.

¹⁸ܡܲܠܸܠ ܥܲܡ ܐܲܗܪܘܿܢ ܘܲܒ݂ܢܵܘܗܝ: ܘܥܲܡ ܟܠܗܘܿܢ ܒܢܲܝ ܝܼܣܪܵܝܹܠ: ܘܐܸܡܲܪ ܠܗܘܿܢ: ܓܒܲܪ ܓܒܲܪ ܡܼܢ ܒܹܝܬ݂ ܝܼܣܪܵܝܹܠ: ܘܡܼܢ ܐܲܝܠܹܝܢ ܕܡܸܬ݂ܦܢܹܝܢ ܠܘܵܬ݂ܝ: ܕܥܵܡܪܝܼܢ ܒܝܼܣܪܵܝܹܠ: ܕܲܢܩܲܪܸܒ݂ ܩܘܼܪܒܵܢܹܗ ܡܼܢ ܟܠ ܢܸܕ݂ܪܲܝܗܘܿܢ: ܘܡܼܢ ܟܠ ܦܘܼܪܫܵܢܲܝܗܘܿܢ ܕܲܡܩܲܪܒ݂ܝܼܢ ܠܡܵܪܝܵܐ: ܝܲܩܕܵܐ ܫܲܠܡܵܐ.

¹⁹ܠܩܘܼܒܵܠܵܐ: ܕܸܟ݂ܪܵܐ ܕܠܲܝܬܿ ܒܹܗ ܡܘܼܡܵܐ: ܡܼܢ ܬܵܘܪܹ̈ܐ ܘܡܼܢ ܐܸܡܪܹ̈ܐ: ܘܡܼܢ ܥܸܙܹ̈ܐ.

²⁰ܟܠ ܕܐܝܼܬ݂ ܒܹܗ ܡܘܼܡܵܐ: ܠܵܐ ܬܩܲܪܒ݂ܘܼܢ: ܡܸܛܠ ܕܠܵܐ ܗܵܘܹܐ ܠܟ݂ܘܿܢ ܠܨܸܒ݂ܝܵܢܵܐ.

²¹ܘܓܲܒ݂ܪܵܐ ܕܲܢܩܲܪܸܒ݂ ܕܸܒ݂ܚܵܐ ܫܲܠܡܵܐ ܠܡܵܪܝܵܐ: ܠܡܸܦܪܲܫ ܢܸܕ݂ܪܵܐ: ܐܵܘ ܦܘܼܪܫܵܢܵܐ: ܡܼܢ ܬܵܘܪܹ̈ܐ ܐܵܘ ܡܼܢ ܥܵܢܵܐ: ܡܵܐ ܕܠܲܝܬܿ ܒܹܗ ܡܘܼܡܵܐ: ܢܸܬ݂ܩܲܒܲܠ: ܐܸܢ ܟܠ ܡܘܼܡ ܠܲܝܬܿ ܒܹܗ.

²²ܕܲܥܘܝܼܪ: ܐܵܘ ܕܲܬ݂ܒ݂ܝܼܪ: ܐܵܘ ܕܲܚܙܵܙ: ܐܵܘ ܕܲܪܫܵܠ: ܐܵܘ ܕܲܓ݂ܪܸܒ݂: ܐܵܘ ܕܩܲܣܕ݂ܵܢ: ܠܵܐ ܬܩܲܪܒ݂ܘܼܢ ܚܲܕ݂ ܡܼܢ ܗܵܠܹܝܢ ܠܡܵܪܝܵܐ: ܘܩܘܼܪܒܵܢܵܐ ܡܼܢ ܗܵܠܹܝܢ ܠܵܐ ܬܣܝܼܡܘܼܢ ܥܲܠ ܡܲܕ݂ܒܚܵܐ ܠܡܵܪܝܵܐ.

²³ܘܬ݂ܵܘܪܵܐ: ܘܐܸܡܪܵܐ ܕܲܣܪܝܼܥܵܐ ܐܸܕ݂ܢܹܗ: ܐܵܘ ܕܟܲܪܝܵܐ ܐܲܠܝܼܬܹܗ: ܠܦܘܼܪܫܵܢܵܐ ܬܸܥܒܿܕ݂ܝܼܘܗܝ: ܒܪܲܡ ܕܹܝܢ ܠܢܸܕ݂ܪܵܐ ܠܵܐ ܢܸܬ݂ܩܲܒܲܠ.

²⁴ܘܕܲܪܨܝܼܨ: ܘܕܲܦܣܝܼܩ: ܘܕܲܩܛܝܼܥ: ܠܵܐ ܬܩܲܪܒ݂ܘܼܢ ܠܡܵܪܝܵܐ: ܘܠܵܐ ܬܸܥܒܿܕ݂ܘܼܢ ܒܐܲܪܥܟ݂ܘܿܢ.

²⁵ܘܡܼܢ ܝܲܕ݂ ܒܲܪ ܢܘܼܟ݂ܪܵܝܵܐ: ܠܵܐ ܬܩܲܪܒ݂ܘܼܢ ܠܲܚܡܵܐ ܕܐܲܠܵܗܟ݂ܘܿܢ ܡܼܢ ܗܵܠܹܝܢ ܟܠܗܘܿܢ: ܡܸܛܠ ܕܲܡܚܲܒܿܠܝܼܢ ܐܸܢܘܿܢ: ܘܡܘܼܡܵܐ ܐܝܼܬ݂ ܒܗܘܿܢ: ܘܠܵܐ ܡܸܬ݂ܩܲܒܿܠܝܼܢ ܡܸܢܟ݂ܘܿܢ.

²⁶ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ.

²⁷ܬܵܘܪܵܐ: ܐܵܘ ܐܸܡܪܵܐ: ܐܵܘ ܓܲܕ݂ܝܵܐ ܟܲܕ݂ ܢܸܬ݂ܝܼܠܸܕ݂: ܢܸܗܘܸܐ ܫܲܒ݂ܥܵܐ ܝܵܘܡܝܼܢ ܒܵܬܲܪ ܐܸܡܹܗ: ܘܡܼܢ ܝܵܘܡܵܐ ܕܲܬ݂ܡܵܢܝܵܐ ܘܲܠܗܲܠ ܢܸܬ݂ܩܲܒܲܠ ܩܘܼܪܒܵܢܹܗ: ܩܘܼܪܒܵܢܵܐ ܠܡܵܪܝܵܐ.

²⁸ܘܬ݂ܵܘܪܵܐ ܐܵܘ ܥܸܪܒܵܐ: ܠܹܗ ܘܠܲܒ݂ܪܹܗ ܠܵܐ ܬܸܟܿܣܘܼܢ ܒܝܵܘܡܵܐ ܚܲܕ݂.

²⁹ܘܐܸܢ ܬܕܲܒܿܚܘܼܢ ܕܸܒ݂ܚܵܐ ܕܬ݂ܵܘܕܝܼܬ݂ܵܐ ܠܡܵܪܝܵܐ: ܠܩܘܼܒܵܠܵܐ ܕܘܼܒ݂ܚܘܼܗܝ.

³⁰ܘܒܹܗ ܒܝܵܘܡܵܐ ܗܵܘ ܢܸܬ݂ܐܟܸܠ: ܘܠܵܐ ܬܵܘܬܿܪܘܼܢ ܡܸܢܹܗ ܠܨܲܦܪܵܐ: ܐܸܢܵܐ ܐ̄ܢܵܐ ܡܵܪܝܵܐ.

³¹ܛܲܪܘ ܦܘܼܩܕܵܢܲܝ: ܘܲܥܒܸܕ݂ܘ ܐܸܢܘܿܢ: ܐܸܢܵܐ ܐ̄ܢܵܐ ܡܵܪܝܵܐ.

³²ܘܠܵܐ ܬܛܲܢܦܘܼܢ ܫܡܵܐ ܕܩܘܼܕ݂ܫܝ: ܕܐܸܬ݂ܩܲܕܲܫ ܒܲܝܢܵܬ݂ ܒܢܲܝ ܝܼܣܪܵܝܹܠ: ܐܸܢܵܐ ܐ̄ܢܵܐ ܡܵܪܝܵܐ ܕܲܡܩܲܕܸܫ ܐ̄ܢܵܐ ܠܟ݂ܘܿܢ.

³³ܕܐܲܦܸܩܬܿܟ݂ܘܿܢ ܡܼܢ ܐܲܪܥܵܐ ܕܡܸܨܪܹܝܢ: ܕܐܸܗܘܸܐ ܠܟ݂ܘܿܢ ܐܲܠܵܗܵܐ: ܐܸܢܵܐ ܐ̄ܢܵܐ ܡܵܪܝܵܐ.