Read Aramaic Peshita Jeremiah 37 Bible Online

Jeremiah 37 - Aramaic Peshita bible

Jeremiah 37

¹ܘܐܡܠܟ݂ ܡܠܟܐ ܨܕܩܝܐ ܒܪ ܝܘܫܝܐ: ܚܠܦ ܝܘܟܢܝܐ ܒܪ ܝܘܝܩܝܡ: ܕܐܡܠܟ݂ ܢܒܘܟܕܢܨܪ ܡܠܟܐ ܕܒܒܠ ܒܐܪܥܐ ܕܝܗܘܕܐ.

²ܘܠܐ ܫܡܥ ܗܘ ܘܥܒܕܘܗܝ ܘܥܡܐ ܕܐܪܥܐ: ܦܬܓܡܘܗܝ ܕܡܪܝܐ ܕܐܡܪ ܒܝܕ ܐܪܡܝܐ ܢܒܝܐ.

³ܘܫܕܪ ܡܠܟܐ ܨܕܩܝܐ ܠܝܘܟܠ ܒܪ ܫܠܡܝܐ: ܘܠܨܦܢܝܐ ܒܪ ܡܥܣܝܐ ܟܗܢܐ: ܠܘܬ ܐܪܡܝܐ ܢܒܝܐ ܠܡܐܡܪ: ܨܠܐ ܥܠܝܢ ܩܕܡ ܡܪܝܐ ܐܠܗܟ݂.

⁴ܘܐܪܡܝܐ ܢܦܩ ܗ̄ܘܐ ܘܥܐܠ ܒܓܘ ܥܡܐ: ܘܠܐ ܐܪܡܝܘܗܝ ܒܝܬ ܐܣܝܪܐ.

⁵ܘܚܝܠܗ ܕܦܪܥܘܢ ܢܦܩ ܡܢ ܡܨܪܝܢ: ܘܫܡܥܘ ܟܠܕܝܐ ܕܟܪܝܟܝܢ ܠܐܘܪܫܠܡ ܫܡܥܗܘܢ: ܘܫܢܝܘ ܠܗܘܢ ܡܢ ܐܘܪܫܠܡ.

⁶ܘܗܘܐ ܦܬܓܡܗ ܕܡܪܝܐ ܥܠ ܐܪܡܝܐ ܢܒܝܐ ܠܡܐܡܪ.

⁷ܗܟܢܐ ܐܡܪ ܡܪܝܐ ܐܠܗܐ ܕܝܣܪܝܠ: ܗܟܢܐ ܬܐܡܪܘܢ ܠܡܠܟܐ ܕܝܗܘܕܐ ܕܫܕܪܟܘܢ ܠܘܬܝ ܕܬܒܥܘܢ ܡܢܝ: ܗܐ ܚܝܠܗ ܕܦܪܥܘܢ ܕܢܦܩ ܠܡܥܕܪܘܬܟܘܢ: ܗܦܟ݂ ܠܐܪܥܗ ܠܡܨܪܝܢ.

⁸ܘܢܗܦܟܘܢ ܟܠܕܝܐ ܘܢܬܟܬܫܘܢ ܥܠ ܩܪܝܬܐ ܗܕܐ: ܘܢܟܒܫܘܢܗ ܘܢܘܩܕܘܢܗ ܒܢܘܪܐ.

⁹ܗܟܢܐ ܐܡܪ ܡܪܝܐ: ܠܐ ܬܣܒܪܘܢ ܒܢܦ̮ܫܟܘܢ ܘܬܐܡܪܘܢ ܕܐܙܠ̄ܝܢ ܡܢܢ ܟܠܕܝܐ: ܡܛܠ ܕܠܐ ܐܙܠ̄ܝܢ.

¹⁰ܡܛܠ ܕܐܢ ܬܚܪܒܘܢ ܟܠܗ ܚܝܠܐ ܕܟܠܕܝܐ ܕܡܬܟܬܫܝܢ ܥܡܟܘܢ: ܘܢܫܬܚܪܘܢ ܒܗܘܢ ܐ̄ܢܫܐ ܕܡܡܚܝܢ: ܓܒܪ ܡܢ ܡܫܟܢܗ ܢܩܘܡܘܢ: ܘܢܘܩܕܘܢܗ ܠܩܪܝܬܐ ܗܕܐ ܒܢܘܪܐ.

¹¹ܘܫܢܝ ܠܗ ܚܝܠܐ ܕܟܠܕܝܐ ܡܢ ܐܘܪܫܠܡ ܡܢ ܩܕܡ ܚܝܠܗ ܕܦܪܥܘܢ.

¹²ܘܢܦܩ ܐܪܡܝܐ ܡܢ ܐܘܪܫܠܡ ܠܡܐܙܠ ܠܐܪܥܐ ܕܒܢܝܡܝܢ: ܠܡܦܠܓܘ ܬܡܢ ܡܢܬܐ ܥܡ ܥܡܐ.

¹³ܘܟܕ ܩܐܡ ܗ̄ܘܐ ܒܬܪܥܐ ܕܒܢܝܡܝܢ: ܐܝܬ ܗ̄ܘܐ ܬܡܢ ܓܒܪܐ ܦܩܘܕܐ: ܘܫܡܗ ܢܪܝܐ ܒܪ ܫܠܡܝܐ: ܒܪ ܚܢܢܝܐ: ܘܐܚܕܗ ܠܐܪܡܝܐ ܢܒܝܐ: ܘܐܡܪ ܠܗ: ܠܘܬ ܟܠܕܝܐ ܥܪܩ ܐܢ̄ܬ.

¹⁴ܘܐܡܪ ܠܗ ܐܪܡܝܐ ܡܕܓܠ ܐܢ̄ܬ: ܠܐ ܥܪܩ ܐ̄ܢܐ ܠܘܬ ܟܠܕܝܐ: ܘܠܐ ܫܡܥܗ: ܘܐܚܕܗ ܢܪܝܐ ܠܐܪܡܝܐ ܘܐܝܬܝܗ ܠܘܬ ܪܘܪܒܢܐ.

¹⁵ܘܪܓܙܘ ܪܘܪܒܢܐ ܥܠ ܐܪܡܝܐ ܘܢܓܕܘܗܝ: ܘܐܪܡܝܘܗܝ ܒܝܬ ܐܣܝܪܐ ܒܝܬ ܝܘܢܬܢ ܣܦܪܐ: ܡܛܠ ܕܠܗ ܥܒܕܘ ܪܒ ܐܣܝܪܐ.

¹⁶ܘܐܪܡܝܘܗܝ ܠܐܪܡܝܐ ܡܢ ܟܘܬ ܓܘܒܐ ܠܓܘܒܐ: ܘܗܘܐ ܬܡܢ ܐܪܡܝܐ ܝܘܡܬܐ ܣܓܝܐܐ.

¹⁷ܘܫܕܪ ܡܠܟܐ ܨܕܩܝܐ ܘܐܣܩܗ: ܘܫܐܠܗ ܡܠܟܐ ܒܒܝܬܐ ܡܛܫܝܐܝܬ: ܘܐܡܪ ܠܗ: ܢܦܩ ܦܬܓܡܐ ܡܢ ܩܕܡ ܡܪܝܐ: ܘܐܡܪ ܐܪܡܝܐ ܢܦܩ: ܘܐܡܪ ܡܠܟܐ ܐܝܟܢܐ ܢܦܩ: ܘܐܡܪ ܕܒܐܝܕܘܗܝ ܕܡܠܟܐ ܕܒܒܠ ܬܫܬܠܡ.

¹⁸ܘܐܡܪ ܐܪܡܝܐ ܠܡܠܟܐ ܨܕܩܝܐ: ܡܢܐ ܚܛܝܬ ܠܟ݂ ܘܠܥܒܕܝܟ ܘܠܥܡܐ ܗܢܐ: ܕܐܪܡܝܬܘܢܢܝ ܒܝܬ ܐܣܝܪܐ.

¹⁹ܘܐܝܟܐ ܐܢܘܢ ܢܒܝܝܟܘܢ ܕܡܬܢܒܝܢ ܗ̄ܘܘ ܠܟܘܢ ܘܐܡܪܝܢ: ܕܠܐ ܐܬܐ ܡܠܟܐ ܕܒܒܠ ܥܠܝܟܘܢ ܘܥܠ ܐܪܥܐ ܗܕܐ.

²⁰ܗܫܐ ܫܡܥܝܢܝ ܡܪܝ ܡܠܟܐ: ܘܬܦܠ ܒܥܘܬܝ ܩܕܡܝܟ: ܘܠܐ ܬܗܦܟܢܝ ܠܒܝܬ ܝܘܢܬܢ ܣܦܪܐ ܕܠܐ ܐܡܘܬ ܬܡܢ.

²¹ܘܦܩܕ ܡܠܟܐ ܨܕܩܝܐ: ܘܫܒܩܘܗܝ ܠܐܪܡܝܐ ܢܒܝܐ ܒܕܪܬܐ ܕܒܝܬ ܐܣܝܪܐ: ܘܝܗ̄ܒܝܢ ܗ̄ܘܘ ܠܗ ܓܪܝܨܬܐ ܕܠܚܡܐ ܒܝܘܡܐ ܡܢ ܫܘܩܐ ܕܢܚܬܘܡܐ: ܥܕܡܐ ܕܓܡܪ ܟܠܗ ܠܚܡܐ ܡܢ ܩܪܝܬܐ: ܘܝܬܒ ܐܪܡܝܐ ܒܕܪܬܐ ܕܒܝܬ ܐܣܝܪܐ.