Read Aramaic Peshita Jeremiah 48 Bible Online

Jeremiah 48 - Aramaic Peshita bible

Jeremiah 48

¹ܥܲܠ ܡܘܼܐܵܒ̣. ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܘܵܝ ܠܢܵܒ̣ܘܿ ܕܐܸܬ̣ܒܲܙܙܲܬ̤: ܒܸܗܬܲܬ̤ ܘܐܲܚܦܪܲܬ̤ ܩܘܿܪ ܝܲܬܝܼܡ: ܒܗܸܬ̣ ܥܘܼܫܢܵܗ̇ ܘܐܸܬ̣ܒܲܕܲܪ.

²ܘܠܲܝܬ̇ ܬܘܼܒ̣ ܬܸܫܒ̇ܘܿܚܬܵܐ ܠܡܘܼܐܵܒ̣: ܒܚܸܫܒ̇ܘܿܢ ܐܸܬ̣ܚܲܫܲܒ̣ܘ ܥܠܹܝܗ ܒܝܼܫܬܵܐ: ܘܐܸܡܲܪܘ ܬܵܘ ܢܵܘܒ̇ܕ݂ܝܼܗ̇ ܡ̣ܢ ܥܲܡܵܐ: ܐܵܦܸܢ ܡܸܫܬܲܩ ܐܸܢ ܬܸܫܬ̇ܩܝܼܢ: ܒܵܬ̣ܪܹܟ݂ܝ ܬܹܐܙܲܠ ܚܲܪܒܵܐ.

³ܩܵܠ ܝܑܼܠܲܠܬܵܐ ܡ̣ܢ ܚܘܿܪܢܝܼܡ. ܒܸܙܬ̣ܵܐ ܘܲܬ̣ܒ̣ܵܪܵܐ ܪܲܒܵܐ.

⁴ܐܸܬ̇ܬܲܒ̣ܪܲܬ̤ ܡܘܼܐܵܒ̣: ܐܲܫܡܲܥܘ ܝܑܼܠܠܬܵܐ ܡܸܣܟܹ̇ܢܹܝ̈ܗ̇.

⁵ܒܡܲܣܩܵܢܵܐ ܕܠܘܼܚܝܲܬ̣ ܟܲܕ݂ ܒܵܟܹ̇ܝܢ ܢܸܣܩܘܼܢ: ܘܲܒ̣ܡܲܚܲܬ̇ܬܵܐ ܕܚܘܿܪܢܝܼܡ: ܐܘܼܠܨܵܢܵܐ ܘܲܓ̣ܥܵܬ̣ܵܐ ܕܲܬ̣ܒ̣ܵܪܵܐ ܢܸܥܒ̇ܕ݂ܘܼܢ.

⁶ܫܡܲܥܘ ܘܲܥܪܘܿܩܘ ܘܦܲܨܵܘ ܢܲܦ̮ܫܟ݂ܘܿܢ: ܘܲܗܘ̤ܵܘ ܐܲܝܟ݂ ܥܸܩܵܪܵܐ ܒܡܲܕ݂ܒ̇ܪܵܐ.

⁷ܥܲܠ ܕܐܸܬ̇ܬ̇ܟܸܠܬ̇ܝ ܥܲܠ ܚܸܣܢܲܝ̈ܟ̇ܝ ܘܥܲܠ ܓܲܙܲܝ̈ܟ̇ܝ: ܐܵܦ ܐܲܢ̄ܬ̇ܝ ܬܸܬܲܚܕ̇ܝܼܢ: ܘܢܸܦܘܿܩ ܟܵܡܘܿܫ ܒܲܫܒ̣ܝܼܬ̣ܵܐ: ܘܟ݂ܘܼܡܪ̈ܵܘܗܝ ܘܪܵܘܪ̈ܒ̣ܵܢܵܘܗܝ ܐܲܟ݂ܚ̄ܕ݂ܵܐ.

⁸ܘܢܹܐܬܹܐ ܒܵܙܘܿܙܵܐ ܥܲܠ ܟܠܗܹܝܢ ܩܘܼܪ̈ܝܲܝܟ ܘܠܵܐ ܢܸܬ̣ܦܲܨ̈ܝܵܢ: ܘܢܹܐܒܲܕ݂ ܥܘܼܡܩܵܐ ܘܬܸܚܪܲܒ̣ ܦܩܲܥܬ̣ܵܐ: ܐܲܝܟܲܢܵܐ ܕܐܸܡܲܪ ܡܵܪܝܵܐ.

⁹ܗܲܒ̣ܘ ܟܠܝܼܠܵܐ ܠܡܘܼܐܵܒ̣ ܡܸܛܠ ܕܡܸܚܪܲܒ̣ ܚܵܪܒܵܐ: ܘܟ݂ܠܗܹܝܢ ܩܘܼܪ̈ܝܵܗ̇ ܢܸܗܘ̈ܝܵܢ ܠܚܘܼܪܒܵܐ ܡܢ ܒܠܲܝ ܕܝܵܬܹܒ̣.

¹⁰ܠܝܼܛ ܗ̄ܘ̣ ܡܲܢ ܕܢܸܥܒܸ̇ܕ݂ ܥܒ̣ܵܕܹܗ ܕܡܵܪܝܵܐ ܒܢܸܟ݂ܠܵܐ: ܘܠܝܼܛ ܗ̄ܘ̣ ܡ̣ܢ ܕܢܸܟ݂ܠܵܐ ܚܲܪܒܹ̇ܗ ܡ̣ܢ ܕܡܵܐ.

¹¹ܫܠܹܝܢ ܡܘܼܐܵܒ̣ܵܝܹ̈ܐ ܡ̣ܢ ܛܲܠܝܘܼܬ̣ܗܘܿܢ: ܘܫܲܟ̇ܘܼܬ̣ܝܼܢ ܥܲܠ ܬܸܛܪ̈ܲܝܗܘܿܢ: ܘܠܵܐ ܣܲܪܸܩ̣ܘ ܡ̣ܢ ܡܵܐܢܵܐ ܠܡܵܐܢܵܐ: ܘܒܲܫܒ̣ܝܼܫܬܵܐ ܠܵܐ ܐܸܙܲܠܘ: ܡܸܛܠ ܗܵܢܵܐ ܩܲܝܵܡ ܛܲܥ̱ܡܗܘܿܢ ܒܗܘܿܢ: ܘܪܹܝܚܗܘܿܢ ܠܵܐ ܦܵܓ̣.

¹²ܡܸܛܠ ܗܵܢܵܐ ܗܵܐ ܝܵܘ̈ܡܵܬ̣ܵܐ ܐܵܬܹ̇ܝܢ ܐܵܡܲܪ ܡܵܪܝܵܐ: ܘܐܹܫܲܕܲܪ ܥܠܲܝܗܘܿܢ ܒܵܙܘܿܙܹ̈ܐ ܘܢܸܒ̇ܙܘܼܢ ܐܸܢܘܿܢ: ܘܡܵܐܢܲܝ̈ܗܘܿܢ ܢܣܲܪܩܘܼܢ: ܘܲܓ̣ܪ̈ܲܒܲܝܗܘܿܢ ܢܫܲܚܩܘܼܢ.

¹³ܘܢܸܒ̣ܗܲܬ̣ ܡܘܼܐܵܒ̣ ܡ̣ܢ ܟܵܡܘܿܫ: ܐܲܝܟ݂ ܕܒ̣ܗܸܬ̣ܘ ܒܢܲܝ̈ ܝܼܣܪܵܝܹܠ ܡ̣ܢ ܒܹܝܬ̣ ܐܹܝܠ ܬܘܼܟ݂ܠܵܢܗܘܿܢ.

¹⁴ܐܲܝܟܲܢܵܐ ܐܵܡ̇ܪܝܼܬ̇ܘܿܢ ܕܓܲܢ̄ܒܵܪܹ̈ܐ ܚܢܲܢ: ܘܓܲܒ̣ܪܹ̈ܐ ܚܲܝܠܬ̣ܵܢܹ̈ܐ ܠܲܩܪܵܒ̣ܵܐ.

¹⁵ܐܸܬ̣ܒ̇ܙܸܙ ܡܘܼܐܵܒ̣ ܘܩܘܼܪ̈ܝܹܗ̇ ܣܠܸܩ: ܘܲܓ̣ܒܲـ̈ـܝܵܐ ܕܓܲܢ̄ܒܵܪ̈ܵܘܗܝ ܐܸܫܬܲܠܸܡܘ ܠܩܸܛܠܵܐ: ܐܵܡܲܪ ܡܲܠܟܵܐ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ ܫܡܹܗ.

¹⁶ܩܲܪܝܼܒ̣ ܗ̄ܘ̣ ܬܒ̣ܵܪܹܗ ܕܡܘܼܐܵܒ̣ ܠܡܹܐܬ̣ܵܐ: ܘܒ̣ܝܼܫܬܹ̇ܗ ܡܣܲܪܗܒ̣ܵܐ ܛܵܒ̣.

¹⁷ܐܸܬ̇ܕܲܠܲܚܘ ܘܙܵܥܘ ܟܠ ܕܲܚܕ݂ܵܪ̈ܵܘܗܝ: ܘܟ݂ܠ ܕܝܵܕ݂ܥܝܼܢ ܫܡܹܗ ܐܸܡܲܪܘ: ܐܲܝܟܲܢܵܐ ܐܸܬ̇ܬ̇ܒܲܪ ܚܘܼܛܪܵܐ ܥܲܫܝܼܢܵܐ ܘܓ̣ܘܼܙܥܵܐ ܕܬܸܫܒ̇ܘܿܚܬܵܐ.

¹⁸ܚܘܿܬ̣ܝ ܡ̣ܢ ܐܝܼܩܵܪܵܐ ܘܬܸܒ̣ܝ ܒܨܲܥܪܵܐ: ܥܵܡܘܿܪܬܵܐ ܕܒܲܪܬ̣ ܪܝܼܒ̣ܘܼܢ: ܡܸܛܠ ܕܒ̣ܵܙܘܿܙܵܐ ܕܡܘܼܐܵܒ̣ ܣܠܸܩ ܥܠܲܝܟ̇ܝ ܘܐܲܚܪܸܒ̣ ܟܲܪ̈ܟܲܝܟ̇ܝ.

¹⁹ܥܲܠ ܐܘܼܪ̈ܚܵܬ̣ܵܐ ܩܘܼܡܝ ܘܚܘܼܪܝ ܥܵܡܘܿܪܬܵܐ ܕܥܲܕ݂ܘܵܥܝܼܪ: ܫܲܐܸܠܝ ܠܲܕ݂ܥܵܪܹܩ: ܘܠܲܕ݂ܡܸܬ̣ܦܲܠܲܛ ܐܸܡܲܪܝ ܡܵܢܵܐ ܗܘ̤ܵܐ.

²⁰ܒܗܸܬ̣ ܡܘܼܐܵܒ̣ ܡܸܛܠ ܕܐܸܬ̇ܬ̇ܒܲܪ: ܘܐܲܝܠܸܠܘ ܘܐܲܙܥܸܩܘ ܒܐܲܪܢܘܿܢ: ܡܸܛܠ ܕܐܸܬ̇ܬ̇ܒܲܪ ܡܘܼܐܵܒ̣.

²¹ܘܕ݂ܝܼܢܵܐ ܐܸܬ̣ܵܐ ܥܲܠ ܐܲܪܥܵܐ ܕܡܫܘܿܪ: ܘܥܲܠ ܚܲܠܘܼܢ: ܘܥܲܠ ܝܵܗܵܨ: ܘܥܲܠ ܡܦܝܼܥܲܬ̣.

²²ܘܥܲܠ ܪܝܼܒ̣ܘܿܢ ܘܥܲܠ ܢܵܒ̣ܘܿ: ܘܥܲܠ ܒܹܝܬ̣ ܕܲܒ̣ܠܲܬܝܼܡ.

²³ܘܥܲܠ ܩܘܼܪܝܲܬ̇ܝܼܡ ܘܥܲܠ ܒܹܝܬ̣ ܓܵܡܘܿܠ: ܘܥܲܠ ܒܹܝܬ̣ ܡܥܘܿܢ.

²⁴ܘܥܲܠ ܩܸܪܝܘܿܬ̣: ܘܥܲܠ ܒܘܼܨܵܪ: ܘܥܲܠ ܟܠܗܹܝܢ ܩܘܼܪ̈ܝܵܢ ܕܐܲܪܥܵܐ ܕܡܘܼܐܵܒ̣ ܕܪ̈ܲܚܝܼܩܵܢ ܘܲܕ݂ܩܲܪ̈ܝܼܒ̣ܵܢ.

²⁵ܐܸܬ̣ܓܲܕ݂ܡܲܬ̣ ܩܲܪܢܹܗ ܕܡܘܼܐܵܒ̣: ܘܲܕ݂ܪܵܥܹܗ ܐܸܬ̇ܬ̇ܒܲܪ ܐܵܡܲܪ ܡܵܪܝܵܐ.

²⁶ܕܵܘܵܐܘܼܗܝ ܡܸܛܠ ܕܥܲܠ ܡܵܪܝܵܐ ܐܸܬ̇ܬ̇ܪܝܼܡ: ܘܢܸܬ̇ܛܲܪܲܦ ܡܘܼܐܵܒ̣ ܒܲܬ̣ܝܵܒ̣ܬܹ̇ܗ: ܘܢܸܗܘܹܐ ܠܓ̣ܘܼܚܟܵܐ ܐܵܦ ܗ̤ܘ.

²⁷ܘܐܸܢ ܠܵܐ ܗ̄ܘ̣ܵܐ ܠܓ̣ܘܼܚܟܵܐ ܗܘ̤ܵܐ ܠܵܟ݂ ܝܼܣܪܵܝܹܠ: ܘܲܒ̣ܓܲܢܵܒܹ̈ܐ ܐܸܫܬ̇ܟܲܚ ܟܲܕ݂ ܥܵܒܹ̇ܕ݂ ܗ̄ܘܲܝܬ̇ ܥܲܡܹܗ ܩܪܵܒ̣ܵܐ.

²⁸ܫܒ̣ܘܿܩܘ ܩܘܼܪ̈ܝܵܐ: ܘܲܫܪܵܘ ܒܲܫܩܝܼܦܹ̈ܐ ܝܵܬ̣ܒܲܝ̈ ܡܘܼܐܵܒ̣: ܘܲܗܘ̤ܵܘ ܐܲܝܟ݂ ܝܵܘܢܵܐ ܕܡܲܩܢܵܐ ܒܲܓ̣ܕ݂ܵܢܦܵܐ.

²⁹ܫܡܲܥܢ ܪܵܘܪ̈ܒ̣ܵܢܹܐ ܕܡܘܼܐܵܒ̣ ܕܡܸܬ̣ܓܲܐܹܝܢ ܛܵܒ̣: ܓܲܐܝܘܼܬ̣ܗܘܿܢ ܘܪܵܡܘܼܬ̣ܗܘܿܢ ܘܪܵܡܘܼܬ̣ ܠܸܒ̇ܗܘܿܢ: ܐܸܢܵܐ ܝܵܕܲܥ ܐ̄ܢܵܐ ܐܵܡܲܪ ܡܵܪܝܵܐ.

³⁰ܥܒ̣ܵܕܲܝ̈ܗܘܿܢ ܕܠܵܐ ܗܘ̤ܵܘ ܟܹܐܢ̈ܝܼܢ܆ ܘܩܵܨܘܿܡܵܘ̈ܗܝ ܠܵܐ ܗ̄ܘ̣ܵܐ ܗܵܟܲܢܵܐ ܒܲܕܸ̇ܩ̣ܘ ܥܠܵܘܗܝ.

³¹ܡܸܛܠ ܗܵܢܵܐ ܥܲܠ ܡܘܼܐܵܒ̣ ܐܲܝܠܸܠܘ: ܘܥܲܠ ܡܘܼܐܵܒ̣ ܟܠܹܗ ܡ̣ܢ ܟܠ ܐܲܬܲܪ ܩܥܵܘ: ܘܥܲܠ ܐ̄ܢܵܫܵܐ ܕܥܵܡ̇ܪܝܼܢ ܒܒܲܝܬܹ̇ܗ: ܒܝܼܫܬܵܐ ܢܸܗܘܘܿܢ ܪܵܢܹܝܢ.

³²ܡ̣ܢ ܒܟ݂ܵܬ̣ܵܐ ܕܝܲܥܙܝܼܪ ܐܹܒܲܟܹ̇ܝܟ݂ܝ ܓܦܸܬܵܐ ܕܣܲܒ̣ܡܵܐ: ܫܲܒ̇ܘܼܩܲܝ̈ܟ̇ܝ ܥ̣ܒܲܪܘ ܝܲܡܵܐ: ܘܲܥܕܲܡܵܐ ܠܝܲܡܵܐ ܕܝܲܥܙܝܼܪ ܡ̣ܛܵܘ: ܡܸܛܠ ܕܥܲܠ ܚܨܵܕܹܟ݂ܝ ܘܥܲܠ ܩܛܵܦܹܟ݂ܝ ܒܵܙܘܿܙܵܐ ܢܦܲܠ̣.

³³ܘܬܸܥܒܲܪ ܚܲܕ݂ܘܼܬ̣ܵܐ ܘܲܕ݂ܝܵܨܵܐ ܡ̣ܢ ܐܲܪܥܵܐ ܕܟܲܪܡ̄ܠܵܐ: ܘܡ̣ܢ ܐܲܪܥܵܐ ܕܡܘܼܐܵܒ̣: ܘܚܲܡܪܵܐ ܡ̣ܢ ܡܲܥܨܲܪܬܵܐ ܢܸܒ̣ܛܲܠ: ܘܠܵܐ ܢܸܥܨ̄ܪܘܼܢ ܥܵܨܘܿܪܹ̈ܐ: ܘܠܵܐ ܢܸܥܢܘܿܢ ܘܠܵܐ ܢܹܐܡܪܘܼܢ ܝܵܗܵܝ ܝܵܗܵܝ.

³⁴ܡ̣ܢ ܝܑܼܠܲܠܬܵܐ ܕܚܸܫܒ̇ܘܿܢ ܘܲܥܕܲܡܵܐ ܠܐܲܠܥܵܠܵܐ: ܘܲܥܕܲܡܵܐ ܠܝܵܗܵܨ ܐܲܪܝܼܡܘ ܩܵܠܗܘܿܢ: ܡ̣ܢ ܨܲܥܵܪ ܘܲܥܕܲܡܵܐ ܠܚܘܿܪܢܝܼܡ: ܘܲܥܕܲܡܵܐ ܠܟܲܪܟ݂ܵܐ ܕܐܲܠܸܣ ܥܓܸܠܬܵܐ ܬܘܼܠܬܵܐ: ܡܸܛܠ ܕܡܲـ̈ـܝܵܐ ܕܢܲܡܪܝܼܡ ܢܓ̣ܘܼܙܘܼܢ.

³⁵ܘܐܹܒܲܛܸܠ ܡ̣ܢ ܡܘܼܐܵܒ̣ ܐܵܡܲܪ ܡܵܪܝܵܐ: ܕܡܲܣܸܩ ܥܠܵܬ̣ܵܐ ܘܣܵܐܹ̇ܡ ܒܸܣܡܹ̈ܐ ܠܐܲܠܵܗܹܗ.

³⁶ܡܸܛܠ ܗܵܢܵܐ ܠܹܒ̇ܝ ܥܲܠ ܡܘܼܐܵܒ̣ ܐܲܝܟ݂ ܟܸܢܵܪܵܐ ܢܡܲܠܸܠ: ܡܸܛܠ ܕܒ̣ܝܼܫܬܵܐ ܥܒܲܕ݂ܘ ܘܐܸܒܲܕ݂ܘ.

³⁷ܪܹ̈ܫܲܝܗܘܿܢ ܓܹܝܪ ܡܣܲܦܪܝܼܢ: ܘܕܲܩܢܲܝ̈ܗܘܿܢ ܓܪܝܼܥܝܼܢ: ܘܥܲܠ ܟܠܗܹܝܢ ܐܝܼܕܲܝ̈ܗܘܿܢ ܡܲܪ̈ܩܕ݂ܵܬ̣ܵܐ: ܘܥܲܠ ܚܲܨܹ̈ܐ ܣܲܩܹ̈ܐ.

³⁸ܘܥܲܠ ܟܠ ܐܸܓܵܪܹ̈ܐ ܕܡܘܼܐܵܒ̣ ܘܲܒ̣ܫܘܼܩܹ̈ܐ ܟܠܗܘܿܢ ܡܲܪ̈ܩܕ݂ܵܬ̣ܵܐ: ܡܸܛܠ ܕܬܸܒ̣ܪܹܬ̣ ܠܡܘܼܐܵܒ̣: ܐܲܝܟ݂ ܡܵܐܢܵܐ ܕܠܲܝܬ̇ ܒܹܗ ܚܲܫܚܘܼ ܐܵܡܲܪ ܡܵܪܝܵܐ.

³⁹ܐܲܝܟܲܢܵܐ ܐܸܬ̇ܬ̇ܒܲܪܘ ܘܐܲܝܠܸܠܘ ܐܲܝܟܲܢܵܐ ܐܲܦܢܝܼ ܩܕ݂ܵܠܹ݂ܗ ܡܘܼܐܵܒ̣ ܘܲܒ̣ܗܸܬ̣. ܘܢܸܗܘܹܐ ܡܘܼܐܵܒ̣ ܠܓ̣ܘܼܚܟܵܐ ܘܠܲܬ̣ܒ̣ܵܪܵܐ ܠܟ݂ܠܗܘܿܢ ܕܲܚܕ݂ܵܪ̈ܵܘܗܝ.

⁴⁰ܗܵܟܲܢܵܐ ܐܵܡܲܪ ܡܵܪܝܵܐ: ܗܵܐ ܐܲܝܟ݂ ܢܸܫܪܵܐ ܢܸܣܲܩ ܘܲܢܛܘܼܣ: ܘܢܸܦܪܘܿܣ ܓܸܦܵܘ̈ܗܝ ܥܲܠ ܡܘܼܐܵܒ̣.

⁴¹ܐܸܬ̇ܬܲܚܕܲܬ̣ ܩܸܪܝܘܿܬ̣ ܘܡܸܨܪܘܼܬ̣ ܐܸܬ̣ܟܲܒ̣ܫܲܬ̤: ܘܢܸܗܘܹܐ ܠܸܒ̇ܗܘܿܢ ܕܓܲܢ̄ܒܵܪ̈ܲܝ ܡܘܼܐܵܒ̣ ܒܝܵܘܡܵܐ ܗܵܘܚ: ܐܲܝܟ݂ ܠܸܒܵܐ ܕܐܲܢ̄ܬ̇ܬ̣ܵܐ ܕܲܡܚܲܒ̇ܠܵܐ ܠܡܹܐܠܲܕ݂.

⁴²ܘܢܹܐܒܲܕ݂ ܡܘܼܐܵܒ̣ ܡ̣ܢ ܥܲܡܵܐ: ܡܸܛܠ ܕܥܲܠ ܡܵܪܝܵܐ ܐܸܬ̇ܬ̇ܪܝܼܡ.

⁴³ܕܸܚ̱ܠܬ̣ܵܐ ܘܓ̣ܘܼܡܵܨܵܐ ܘܦܲܚܵܐ ܥܠܲܝܟ ܥܵܡܘܿܪܵܐ ܕܡܘܼܐܵܒ̣ ܐܵܡܲܪ ܡܵܪܝܵܐ.

⁴⁴ܘܡܲܢ ܕܢܸܥܪܘܿܩ ܡ̣ܢ ܩܵܠܵܐ ܕܕܸܚ̱ܠܬܵܐ ܢܸܦܸܠ ܒܓ̣ܘܼܡܵܨܵܐ: ܘܡܲܢ ܕܢܸܣܲܩ ܡ̣ܢ ܓܵܘ ܓܘܼܡܵܨܵܐ ܢܸܬ̇ܬ̇ܚܸܕ݂ ܒܦܲܚܵܐ: ܡܸܛܠ ܕܡܲܝܬܸ̇ܐ ܐ̄ܢܵܐ ܗܵܠܹܝܢ ܥܲܠ ܡܘܼܐܵܒ̣: ܫܲܢ̄ܬܵܐ ܕܦܘܼܩܕܵܢܗܘܿܢ ܐܵܡܲܪ ܡܵܪܝܵܐ.

⁴⁵ܡܸܛܠ ܕܢܘܼܪܵܐ ܢܸܦܩܲܬ̣ ܡ̣ܢ ܚܸܫܒ̇ܘܿܢ: ܘܫܲܠܗܹܒ̣ܝܼܬ̣ܵܐ ܡ̣ܢ ܟܲܪܟ݂ܵܐ ܕܣܝܼܚܘܿܢ: ܘܬܹܐܟ݂ܘܿܠ ܦܵܐܬܹܗ ܕܡܘܼܐܵܒ̣: ܘܪܹ̈ܫܵܢܹܐ ܕܲܒ̣ܢܲܝ̈ ܫܵܐܘܿܢ.

⁴⁶ܘܵܝ ܠܵܟ݂ ܡܘܼܐܵܒ̣: ܐܸܒܲܕ̇ܬ̇ ܥܲܡܵܐ ܕܟ݂ܵܡܘܿܫ: ܕܐܸܬ̣ܒܲܕܲܪܘ ܒܢܲܝ̈ܟ ܘܲܒ̣̈ܢܵܬ̣ܵܟ݂ ܒܫܸܒ̣ܝܵܐ.

⁴⁷ܘܐܲܗܦܸܟ݂ ܫܒ̣ܝܼܬܹܗ ܕܡܘܼܐܵܒ̣ ܒܲܐ̄ܚܪܵܝܑܬ̇ ܝܵܘ̈ܡܵܬ̣ܵܐ ܐܵܡܲܪ ܡܵܪܝܵܐ. ܥܕܲܡܵܐ ܠܗܵܪܟܵܐ ܕܝܼܢܹܗ ܕܡܘܼܐܵܒ̣.