Read Aramaic Peshita Jeremiah 51 Bible Online

Jeremiah 51 - Aramaic Peshita bible

Jeremiah 51

¹ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܗܵܐ ܡܕ݂ܝܼܠ ܐ̄ܢܵܐ ܥܲܠ ܒܵܒܹܠ ܘܥܲܠ ܥܵܡܘܿܪܹ̈ܝܗ̇: ܠܸܒܵܐ ܩܲܫܝܵܐ ܘܪܘܼܚܵܐ ܡܚܲܒ̇ܠܵܢܵܐ.

²ܘܐܹܫܲܕܲܪ ܥܲܠ ܒܵܒܹܠ ܒܵܙܘܿܙܹ̈ܐ: ܘܢܸܒ̇ܙܘܼܢܵܗ̇ ܘܲܢܕ݂ܘܼܫܘܼܢ ܐܲܪܥܵܗ̇: ܘܢܸܬ̣ܟܲܢܫܘܼܢ ܥܠܹܝܗ̇ ܡ̣ܢ ܚܕ݂ܵܪܹܝܗ̇ ܒܝܵܘܡܵܐ ܕܒ̣ܝܼܫܬܵܐ.

³ܠܵܐ ܢܸܫܠܹܐ ܡܲܢ ܕܫܵܕܹܐ ܒܩܸܫܬܵܐ: ܘܠܵܐ ܢܸܫܠܲܚ ܫܸܪܝܵܢܹܗ ܩܪܲܒ̣ܬ̣ܵܢܵܐ: ܘܠܵܐ ܬܚܘܼܣܘܼܢ ܥܲܠ ܓܲܕ̇ܘܼ̈ܕܹܝܗ̇: ܚܪܘܿܒ̣ܘ ܟܠܹܗ ܚܲܝܠܵܗ̇.

⁴ܘܢܸܦܠܘܿܢ ܩܛܝܼ̈ܠܹܐ ܒܐܲܪܥܵܐ ܕܟܲܠܕܵܝܹ̈ܐ: ܘܕܲܡܡܲܚܹܝܢ ܒܫܘܼܩܹ̈ܝܗ̇.

⁵ܡܸܛܠ ܕܠܵܐ ܐܲܪܡܸܠܘ ܝܑܼܣܪܵܝܹܠ ܘܲܝܗܘܼܕ݂ܵܐ ܡ̣ܢ ܐܲܠܵܗܗܘܿܢ: ܡ̣ܢ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܗܘܿܢ: ܡܸܛܠ ܕܐܲܪ̱ܥܗܘܿܢ ܐܸܬ̣ܡܲܠܝܲܬ̤ ܥܵܘܼܠܵܐ ܩܕ݂ܵܡ ܩܲܕ̇ܝܼܫܵܐ ܕܝܼܣܪܵܝܹܠ.

⁶ܥܪܘܿܩܘ ܡ̣ܢ ܓܵܘ ܒܵܒܹܠ: ܘܦܲܨܵܘ ܓܒܲܪ ܢܲܦ̮ܫܹܗ: ܠܵܐ ܬܸܒ̣ܠ̱ܥܘܼܢ ܒܲܚܛܵܗܹܝ̈ܗ̇: ܡܸܛܠ ܕܙܲܒ̣ܢܵܐ ܗ̄ܘ̣ ܕܦܘܼܪܥܵܢܵܗ̇ ܡ̣ܢ ܡܵܪܝܵܐ: ܐܲܝܟ݂ ܥܲܒ̣ܕܹܝܗ̇ ܗ̄ܘ̣ ܦܵܪܲܥ ܠܵܗ̇.

⁷ܟܵܣܵܐ ܕܕܲܗܒ̣ܵܐ ܒܵܒܹܠ ܒܐܝܼܕܹܗ ܕܡܵܪܝܵܐ: ܕܡܲܪܘܸܐ ܠܟ݂ܠܵܗ̇ ܐܲܪܥܵܐ ܡ̣ܢ ܚܲܡܪܹܗ: ܐܸܫܬ̇ܝܼܘ ܟܠܗܘܿܢ ܥܲܡܡܹ̈ܐ ܘܐܸܬ̇ܛܲܪܲܦܘ.

⁸ܡ̣ܢ ܫܸܠܝܵܐ ܢܸܦܠܲܬ̣ ܒܵܒܹܠ ܘܐܸܬ̣ܒܲܙܲܬ̤: ܐܲܝܠܸܠܘ ܥܠܹܝܗ̇: ܣܲܒ̣ܘ ܣܲܡܡܵܢܹ̈ܐ ܠܟܹܐܒܹܝ̈ܗ̇: ܛܵܟ݂ ܬܸܬ̣ܐܲܣܸܐ.

⁹ܐܲܣܝܼܢܵܗ̇ ܠܒ̣ܵܒܹܠ ܘܠܵܐ ܐܸܬ̣ܐܲܣܝܲܬ̤: ܢܸܫܒ̇ܩܝܼܗ̇ ܘܢܹܐܙܲܠ ܓܒܲܪ ܠܐܲܪܥܹܗ: ܡܸܛܠ ܕܲܩ̣ܪܸܒ̣ ܥܕܲܡܵܐ ܠܲܫܡܲܝܵܐ ܕܝܼܢܵܗ̇: ܘܐܸܬ̇ܬܪܝܼܡ ܥܕܲܡܵܐ ܠܲܥܢܵܢܹ̈ܐ.

¹⁰ܐܲܦܸܩ ܡܵܪܝܵܐ ܙܵܟ݂ܘܼܬܲܢ: ܬܵܘ ܢܸܫܬܲܥܸܐ ܒܨܸܗܝܘܿܢ ܥܒ̣ܵܕ݂ܵܘ̈ܗܝ ܕܡܵܪܝܵܐ ܐܲܠܵܗܲܢ.

¹¹ܟܲܢܸܫܘ ܫܵܠ̈ܛܹܐ: ܡܠܵܘ ܓܹܐܪܹ̈ܐ: ܐܲܕ݂ܝܼܥ ܡܵܪܝܵܐ ܪܘܼܚܵܐ ܕܡܲܠܟܵܐ ܕܡܵܕܲܝ: ܡܸܛܠ ܕܥܲܠ ܒܵܒܹܠ ܬܲܪܥܝܼܬܹܗ ܠܲܡܚܲܒܵܠܘܼܬ̣ܵܗ̇: ܡܸܛܠ ܕܦܘܼܪܥܵܢܹܗ ܗ̄ܘ̣ ܕܡܵܪܝܵܐ: ܘܲܬ̣ܒܲܥܬ̣ܵܐ ܕܗܲܝܟ̇ܠܹܗ.

¹²ܥܲܠ ܫܘܼܪܹ̈ܝܗ̇ ܕܒܵܒܹܠ ܫܩܘܿܠܘ ܐܵܬ̤ܵܐ: ܐܲܩܝܼܡܘ ܡܲܛܲܪܬܵܐ ܘܛܲܒ̇ܥܘܼܗ̇ ܒܡܲـ̈ـܝܵܐ: ܡܸܛܠ ܕܲܥܒܲܕ݂ ܡܵܪܝܵܐ ܡܸܕܸ̇ܡ ܕܐܸܬ̣ܪܲܥܝܼ ܒܒ̣ܵܒܹܠ.

¹³ܕܫܲܪܝܵܐ ܗ̄ܘ̣ܵܬ̣ ܒܡܲـ̈ـܝܵܐ ܣܲܓ̇ܝܼ̈ܐܹܐ: ܣܲܓ̇ܝܼܐܝܼܢ ܓܲܙܲܝ̈ܟ̇ܝ: ܡܸܛܵܐ ܩܸܨܹܟ݂ܝ ܘܥܸܫܢܲܬ̤ ܡܚܘܿܬܹܟ݂ܝ.

¹⁴ܝܑܼܡܵܐ ܡܵܪܝܵܐ ܚܲܝܠܬ̣ܵܢܵܐ ܒܢܲܦ̮ܫܹܗ: ܕܐܸܡܠܹܝܟ݂ܝ ܐ̄ܢܵܫܵܐ ܐܲܝܟ݂ ܩܲܡܨܵܐ: ܘܢܸܥܢܘܿܢ ܥܠܲܝܟ̇ܝ ܘܢܹܐܡܪܘܼܢ: ܗܹܘܵܝ ܗܹܘܵܝ.

¹⁵ܡܵܪܝܵܐ ܥܒܲܕ݂ ܐܲܪܥܵܐ ܒܚܲܝܠܹܗ: ܘܐܲܬ̣ܩܸܢ ܬܹܒܹܝܠ ܒܚܸܟ݂ܡ̱ܬܹܗ: ܘܲܒ̣ܣܘܼܟܵܠܹܗ ܡ̣ܬܲܚ ܫܡܲܝܵܐ.

¹⁶ܝܵܗܹ̇ܒ̣ ܩܵܠܵܐ ܕܲܪܓ̣ܘܼܫܝܵܐ ܕܡܲـ̈ـܝܵܐ ܒܲܫܡܲܝܵܐ: ܡܲܣܸܩ ܥܢܵܢܹ̈ܐ ܡ̣ܢ ܣܵܘ̈ܦܹܝܗ̇ ܕܐܲܪܥܵܐ: ܘܒܲܪ̈ܩܹܐ ܠܡܸܛܪܵܐ ܥܒܲܕ: ܡܲܦܸܩ ܪ̈ܘܼܚܹܐ ܡ̣ܢ ܐܵܘܨܪ̈ܵܘܗܝ.

¹⁷ܫܛܵܐ ܟܠ ܒܲܪܢܵܫ ܡ̣ܢ ܝܑܼܕܲܥܬ̣ܵܐ: ܒܗܸܬ̣ܘ ܟܠ ܩܲܝܢܵܝܹ̈ܐ ܡ̣ܢ ܓܠܝܼܦܹ̈ܐ ܕܲܥ̣ܒܲܕ݂ܘ: ܡܸܛܠ ܕܕܲܓܵܠܘܼܬ̣ܵܐ ܢܣܲܟ݂ܘ ܘܠܲܝܬ̇ ܒܗܘܿܢ ܪܘܼܚܵܐ.

¹⁸ܠܵܐ ܡܸܕܸ̇ܡ ܐܸܢܘܿܢ: ܘܲܥܒ̣ܵܕܹܐ ܐܸܢܘܿܢ ܫܵܛܲـ̈ـܝܵܐ: ܒܙܲܒ̣ܢܵܐ ܕܡܸܬ̣ܦܲܩܕ̇ܝܼܢ ܢܹܐܒ̣ܕ̇ܘܼܢ.

¹⁹ܠܵܐ ܐܲܝܟ݂ ܕܗܵܠܹܝܢ ܡܢܵܬܹܗ ܕܝܲܥܩܘܿܒ̣: ܐܸܠܵܐ ܡܲܢ ܕܲܒ̣ܪܵܐ ܟܠ ܗ̤ܘܝܘܼ ܡܢܵܬ̣ܗܘܿܢ: ܘܫܲܒ̣ܛܵܐ ܕܝܵܪܬ̇ܘܼܬ̣ܗܘܿܢ ܡܵܪܝܵܐ ܚܲܝܠܬ̣ܵܢܵܐ ܫܡܹܗ.

²⁰ܛܲܝܸܒ̣ܘ ܠܝܼ ܡܵܐܢܹ̈ܐ ܕܲܩܪܵܒ̣ܵܐ: ܐܹܒܲܕܲܪ ܒܹܟ݂ܝ ܥܲܡܡܹ̈ܐ: ܘܐܹܚܲܒܸ̇ܠ ܒܹܟ݂ܝ ܡܲܠ̈ܟ̇ܘܵܬ̣ܵܐ.

²¹ܘܐܹܒܲܕܲܪ ܒܹܟ݂ܝ ܪ̈ܲܟ݂ܫܵܐ ܘܪ̈ܵܟ݂ܒܲܝܗܘܿܢ.

²²ܘܐܹܒܲܕܲܪ ܒܹܟ݂ܝ ܡܲܪ̈ܟ̇ܒ̣ܵܬ̣ܵܐ ܘܪ̈ܵܟ݂ܒܲܝܗܹܝܢ: ܘܐܹܒܲܕܲܪ ܒܹܟ݂ܝ ܓܲܒ̣ܪܹ̈ܐ ܘܢܸܫܹ̈ܐ: ܘܐܹܒܲܕܲܪ ܒܹܟ݂ܝ ܣܵܒܹ̈ܐ ܘܲܥܠܲܝܡܹ̈ܐ: ܘܐܹܒܲܕܲܪ ܒܹܟ݂ܝ ܓܲܕ̇ܘܼ̈ܕܹܐ ܘܲܒ̣ܬ̣ܘܼܠܵܬ̣ܵܐ.

²³ܘܐܹܒܲܕܲܪ ܒܹܟ݂ܝ ܪܵܥܝܵܐ ܘܲܓ̣ܙܵܪܹܗ: ܘܐܹܒܲܕܲܪ ܒܹܟ݂ܝ ܐܲܟܵܪܵܐ ܘܦܲܕܵܢܹܗ: ܘܐܹܒܲܕܲܪ ܒܹܟ݂ܝ ܛܪ̈ܘܿܢܹܐ ܘܫܲܠܝܼܛܵܢܹ̈ܐ.

²⁴ܘܐܸܦܪܘܿܥ ܠܒ̣ܵܒܹܠ ܘܲܠܟ݂ܠܗܘܿܢ ܥܵܡܘܿܪܹ̈ܐ ܕܟܲܠܕܵܝܹ̈ܐ: ܟܠܵܗ̇ ܒܝܼܫܬܵܐ ܕܲܥܒܲܕ݂ܘ ܒܨܸܗܝܘܿܢ ܠܥܹܢܲܝܟ̇ܘܿܢ ܐܵܡܲܪ ܡܵܪܝܵܐ.

²⁵ܗܵܐ ܐܸܢܵܐ ܥܠܲܝܟ ܛܘܼܪܵܐ ܡܚܲܒ̇ܠܵܢܵܐ ܐܵܡܲܪ ܡܵܪܝܵܐ: ܕܚܲܒܸ̇ܠ ܠܟ݂ܠܵܗ̇ ܐܲܪܥܵܐ: ܘܐܲܪܝܼܡ ܐܝܼܕ݂ܝ ܥܠܲܝܟ: ܘܐܸܩܠܵܟ݂ ܡ̣ܢ ܟܹܐܦܵܐ: ܘܐܸܥܒ̇ܕ݂ܵܟ݂ ܠܛܘܼܪܵܐ ܝܲܩܝܼܕ݂ܵܐ.

²⁶ܘܠܵܐ ܢܸܣܒ̣ܘܼܢ ܡܸܢܵܟ݂ ܟܹܐܦܵܐ ܠܙܵܘܝܼܬ̣ܵܐ: ܘܟܹܐܦܵܐ ܠܫܲܬ̣ܐ̱ܣܬ̣ܵܐ: ܐܸܠܵܐ ܠܚܘܼܪܒܵܐ ܠܥܵܠܲܡ ܬܸܗܘܹܐ ܐܵܡܲܪ ܡܵܪܝܵܐ.

²⁷ܫܩܘܿܠܘܿ ܐܵܬ̤ܵܐ ܒܐܲܪܥܵܐ: ܩܪܵܘ ܫܝܼܦܘܿܪܵܐ ܒܥܲܡܡܹ̈ܐ: ܛܲܝܸܒ̣ܘ ܥܠܹܝܗ̇ ܥܲܡܡܹ̈ܐ: ܐܲܫܡܲܥܘ ܥܠܹܝܗ̇ ܡܲܠ̈ܟ̇ܘܵܬ̣ܵܐ ܕܐܲܪܕܲܛ: ܘܕܲܐܪܡܸܢܝ: ܘܕܲܐܫܟ̇ܢܲܙ: ܦܩܘܿܕ݂ܘ ܥܠܹܝܗ̇ ܐܲܒ̣ܕܵܢܵܐ: ܐܲܣܸܩܘ ܪ̈ܲܟ݂ܫܵܐ ܐܲܝܟ݂ ܙܵܚܠܵܐ.

²⁸ܛܲܝܸܒ̣ܘ ܥܠܹܝܗ̇ ܥܲܡܡܹ̈ܐ: ܠܡܲܠܟܵܐ ܕܡܵܕܲܝ ܘܲܠܚܹܐܪ̈ܵܘܗܝ: ܘܲܠܟ݂ܠܗܘܿܢ ܫܲܠܝܼܛܵܢܵܘ̈ܗܝ.

²⁹ܘܲܬ̣ܙܘܼܥ ܐܲܪܥܵܐ ܘܬܸܬ̣ܘܲܪ: ܡܸܛܠ ܕܩܵܡܲܬ̤ ܥܲܠ ܒܵܒܹܠ ܡܲܚܫܲܒ̣ܬܹܗ: ܕܡܵܪܝܵܐ: ܠܡܲܚܪܵܒ̣ܘܼ ܐܲܪܥܵܐ ܕܒ̣ܵܒܹܠ ܡ̣ܢ ܒܠܲܝ ܕܝܵܬܹܒ̣.

³⁰ܣܵܦܘ ܓܲܒ̣ܪܹ̈ܐ ܕܒܵܒܹܠ ܠܡܸܬ̣ܟܲܬܵܫܘܼ ܥܲܡ ܝܵܬ̣ܒܲܝ̈ ܡܸܨܪܘܿܬ̣: ܐܸܬ̇ܬܲܒ̣ܪܲܬ̤ ܓܲܢ̄ܒܵܪܘܼܬ̣ܗܘܿܢ ܘܲܗܘ̤ܵܘ ܐܲܝܟ݂ ܢܸܫܹ̈ܐ: ܥܩܘܿܪܘ ܡܲܫܟ̇ܢܹ̈ܝܗ̇: ܬܲܒܲܪܘ ܬܲܪ̈ܥܹܝܗ̇.

³¹ܕܪܵܗܹ̇ܛ ܠܘܼܩܒܲܠ ܕܪܵܗܹ̇ܛ ܢܸܪܗܲܛ: ܘܕܲܡܚܵܘܹܐ ܠܘܼܩܒܲܠ ܕܲܡܚܵܘܹܐ: ܠܲܡܚܵܘܵܝܘܼ ܠܡܲܠܟܵܐ ܕܒ̣ܵܒܹܠ: ܕܐܸܬ̇ܬܲܚܕܲܬ̤ ܡܕ݂ܝܼܢ̄ܬܹܗ ܡ̣ܢ ܚܕ݂ܵܪܹ̈ܝܗ̇.

³²ܘܡܲܥܒ̇ܪ̈ܵܬ̣ܵܗ̇ ܐܸܬ̇ܬ̇ܚܸܕ݂: ܘܐܵܓ̣ܡܹ̈ܝܗ̇ ܝܑܼܩܸܕ݂ܘ ܒܢܘܼܪܵܐ. ܘܟ݂ܠܗܘܿܢ ܓܲܒ̣ܪܹ̈ܝܗ̇ ܩܪ̈ܲܒ̣ܬ̣ܵܢܹܐ ܐܸܬ̇ܕܲܠܲܚܘ.

³³ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܒܲܪܬ̣ ܒܵܒܹܠ ܐܲܝܟ݂ ܐܸܕ̇ܪܵܐ ܕܲܡ̣ܛܵܐ ܙܒܲܢ ܕܪܵܟ݂ܬܹ̇ܗ: ܥܲܕ݂ ܩܲܠܝܼܠ ܘܲܡ̣ܛܵܐ ܩܛܵܦܵܗ̇.

³⁴ܐܸܡܪܲܬ̤ ܐܘܿܪܸܫܠܸܡ: ܐܲܟ݂ܠܲܢܝ ܘܒܲܙܲܢܝ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܐܲܩܝܼܡܲܢܝ ܐܲܝܟ݂ ܡܵܐܢܵܐ ܣܪܝܼܩܵܐ: ܒܲܠܥܲܢܝ ܐܲܝܟ݂ ܬܲܢܝܼܢܵܐ: ܡ̣ܠܵܐ ܟܲܪܣܹܗ ܡ̣ܢ ܥܘܼܕܵܢܝ ܘܐܲܛܥ̱ܝܲܢܝ.

³⁵ܒܸܙܲܬ̣ܝ ܘܩܸܢܝܵܢܝ ܠܒ̣ܵܒܹܠ ܐܸܫܬ̇ܒ̣ܝܼܘ: ܘܕܹܡܝ ܥܲܠ ܥܵܡܘܿܪܹ̈ܐ ܕܟܲܠܕܵܝܹ̈ܐ ܬܹܐܡܲܪ ܐܘܿܪܸܫܠܸܡ.

³⁶ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ: ܗܵܐ ܕܵܐܹ̇ܢ ܐ̄ܢܵܐ ܕܝܼܢܹܟ݂ܝ: ܘܡܸܬ̣ܢܲܩܲܡ ܐ̄ܢܵܐ ܢܩܲܡܬܹܟ݂ܝ: ܘܐܲܚܪܸܒ̣ ܝܲܡܵܐ ܕܒ̣ܵܒܹܠ: ܘܐܵܘܒܸ̇ܫ ܡܲܒ̇ܘܼܥܵܘ̈ܗܝ.

³⁷ܘܬܸܗܘܹܐ ܒܵܒܹܠ ܚܲܪܒ̇ܬ̣ܐ: ܡܲܥܡ̄ܪܵܐ ܠܝܵܪܘܿܪܹ̈ܐ: ܘܲܠܬܸܡܗܵܐ ܘܲܠܡܲܫܪܘܿܩܝܼܬ̣ܵܐ ܡ̣ܢ ܒܠܲܝ ܕܝܵܬܹܒ̣ ܒܵܗ̇.

³⁸ܐܲܝܟ݂ ܐܲܪ̈ܝܵܘܵܬ̣ܵܐ ܢܢܲܗܡܘܼܢ: ܘܢܸܥܪܘܿܢ ܐܲܝܟ݂ ܓܪ̈ܲܝܵܐ ܕܐܲܪ̈ܝܵܘܵܬ̣ܵܐ.

³⁹ܒܚܸܡܬ̣ܵܐ ܐܸܥܒܸ̇ܕ݂ ܡܲܫܬܲܝܗܘܿܢ: ܘܐܲܪܘܸܐ ܐܸܢܘܿܢ ܘܢܸܬ̇ܬܲܒ̣ܪܘܿܢ: ܘܢܸܕ݂ܡ̱ܟ݂ܘܿܢ ܫܸܢܬ̣ܵܐ ܠܥܵܠܲܡ: ܘܠܵܐ ܢܸܬ̇ܬ̇ܥܝܼܪܘܿܢ ܐܵܡܲܪ ܡܵܪܝܵܐ.

⁴⁰ܘܐܲܫܠܸܡ ܐܸܢܘܿܢ ܐܲܝܟ݂ ܡܦܲܛܡܹ̈ܐ ܠܩܸܛܠܵܐ: ܘܐܲܝܟ݂ ܕܸܟ݂ܪܹ̈ܐ ܘܲܓ̣̈ܕܲܝܵܐ ܠܢܸܟ݂ܣܬܵܐ.

⁴¹ܐܲܝܟܲܢܵܐ ܐܸܬ̇ܬܲܚܕܲܬ̤ ܐܵܪܹܫܟ݂ܵܝܬܵܐ ܬܸܫܒ̇ܘܿܚܬܵܐ ܕܟ݂ܠܵܗ̇ ܐܲܪܥܵܐ: ܐܲܝܟܲܢܵܐ ܗܘ̤ܵܬ̣ ܠܬܹܡܗܵܐ ܒܵܒܹܠ ܒܥܲܡܡܹ̈ܐ.

⁴²ܣܠܸܩ ܥܲܠ ܒܵܒܹܠ ܝܲܡܵܐ ܘܲܒ̣ܣܘܿܓ̣ܵܐܐ ܕܓܲܠܠܵܘ̈ܗܝ ܐܸܬ̣ܟܲܣܝܲܬ̤.

⁴³ܗ̤ܘܲܝ̈ ܩܘܼܪ̈ܝܵܗ̇ ܠܬܸܡܗܵܐ: ܐܲܝܟ݂ ܐܲܪܥܵܐ ܚܲܪܒ̇ܬ̣ܵܐ ܘܨܵܕ݂ܝܼܬ̣ܵܐ: ܠܵܐ ܢܸܬܸ̇ܒ̣ ܒܗܹܝܢ ܓܒܲܪ: ܘܠܵܐ ܢܸܥܡܲܪ ܒܗܹܝܢ ܒܲܪܢܵܫ.

⁴⁴ܘܐܸܦܩܘܿܕ݂ ܥܲܠ ܒܹܝܠ ܒܒ̣ܵܒܹܠ: ܘܐܲܦܸܩ ܙܵܘܬ̇ܪ̈ܵܘܗܝ ܡ̣ܢ ܦܘܼܡܹܗ: ܘܠܵܐ ܢܸܕ݂ܚ̄ܠܘܼܢ ܠܹܗ ܬܘܼܒ̣ ܥܲܡܡܹ̈ܐ: ܘܐܵܦ ܫܘܼܪܹ̈ܝܗ̇ ܕܒ̣ܵܒܹܠ ܪ̈ܘܝܼܚܹܐ ܢܸܦܠܘܼܢ.

⁴⁵ܦܘܿܩܘ ܡ̣ܢ ܓܵܘܵܗ̇ ܥܲܡܝ: ܘܦܲܠܸܛܘ ܓܒܲܪ ܢܲܦ̮ܫܹܗ: ܡ̣ܢ ܚܸܡܬ̣ܵܐ ܕܪܘܼܓ̣ܙܹܗ ܕܡܵܪܝܵܐ.

⁴⁶ܕܲܠܡܵܐ ܢܸܬ̇ܬ̇ܒܲܪ ܠܸܒ̇ܟ݂ܘܿܢ: ܘܬܸܕ݂ܚ̄ܠܘܼܢ ܡ̣ܢ ܛܸܒܵܐ ܕܡܸܫܬ̇ܡܲܥ ܒܐܲܪܥܵܐ: ܘܢܹܐܬܹܐ ܒܵܗ̇ ܒܫܲܢ̄ܬܵܐ ܗܵܝ̇ ܛܸܒܵܐ: ܘܒ̣ܵܬ̣ܪܵܗ̇ ܕܫܲܢ̄ܬܵܐ ܛܸܒܵܐ ܐ̄ܚܪܹܢܵܐ: ܘܢܸܗܘܹܐ ܚܛܘܼܦܝܵܐ ܒܐܲܪܥܵܐ: ܘܲܢܩܘܼܡ ܫܲܠܝܼܛܵܐ ܥܲܠ ܫܲܠܝܼܛܵܐ.

⁴⁷ܡܸܛܠ ܗܵܢܵܐ ܗܵܐ ܝܵܘ̈ܡܵܬ̣ܵܐ ܐܵܬܹ̇ܝܢ ܐܵܡܲܪ ܡܵܪܝܵܐ: ܘܐܸܦܩܘܿܕ݂ ܥܲܠ ܓܠܝܼܦܹ̈ܝܗ̇ ܕܒ̣ܵܒܹܠ: ܘܟ݂ܠܵܗ̇ ܐܲܪܥܵܐ ܬܹܐܒܲܕ݂: ܘܟ݂ܠܗܘܿܢ ܩܛܝܼܠܹܝ̈ܗ̇ ܢܸܦܠܘܿܢ ܒܓ̣ܵܘܵܗ̇.

⁴⁸ܘܢܸܚܕ̇ܘܿܢ ܥܲܠ ܒܵܒܹܠ ܫܡܲܝܵܐ ܘܐܲܪܥܵܐ ܘܟ݂ܠ ܕܲܒ̣ܗܘܿܢ: ܡܸܛܠ ܕܡ̣ܢ ܓܲܪܒ̇ܝܵܐ ܢܹܐܬ̣ܘܿܢ ܥܠܹܝܗ̇: ܒܵܙܘܿܙܹ̈ܐ ܐܵܡܲܪ ܡܵܪܝܵܐ.

⁴⁹ܘܐܵܦ ܒܒ̣ܵܒܹܠ ܢܸܦܠܘܿܢ ܩܛܝܼ̈ܠܹܐ ܕܝܼܣܪܵܝܹܠ: ܘܐܵܦ ܡ̣ܢ ܒܵܒܹܠ ܢܸܦܠܘܿܢ ܩܛܝܼ̈ܠܹܐ ܒܟ݂ܠܵܗ̇ ܐܲܪܥܵܐ.

⁵⁰ܐܲܝܠܹܝܢ ܕܐܸܬ̣ܦܲܠܲܛܘ ܡ̣ܢ ܚܲܪܒܵܐ: ܙܸܠܘ ܘܠܵܐ ܬܩܘܼܡܘܼܢ: ܐܸܬ̇ܕܲܟ݂ܪܘ ܡ̣ܢ ܪܘܼܚܩܵܐ ܠܡܵܪܝܵܐ: ܘܐܘܿܪܸܫܠܸܡ ܬܸܣܲܩ ܥܲܠ ܠܸܒ̇ܟ݂ܘܿܢ.

⁵¹ܘܢܹܐܡܪܘܿܢ ܕܒܹܝܬ̣ ܝܑܼܣܪܵܝܹܠ ܒܗܸܬ̣ܢ ܛܵܒ̣: ܡܸܛܠ ܕܲܫܡܲܥܢ ܚܸܣܕܵܐ: ܘܟܲܣܝܲܬ̤ ܒܸܗܬ̇ܬ̣ܵܐ ܠܐܲܦܲܝ̈ܢ: ܡܸܛܠ ܕܥܲܠܘ ܢܘܼܟ݂ܪ̈ܵܝܹܐ ܠܡܲܩܕ̇ܫܹܗ ܕܡܵܪܝܵܐ.

⁵²ܡܸܛܠ ܗܵܢܵܐ ܗܵܐ ܝܵܘ̈ܡܵܬ̣ܵܐ ܐܵܬܹ̇ܝܢ ܐܵܡܲܪ ܡܵܪܝܵܐ: ܘܐܸܦܩܘܿܕ݂ ܥܲܠ ܒܵܒܹܠ ܘܥܲܠ ܓܠܝܼܦܹ̈ܝܗ̇: ܘܲܒ̣ܟ݂ܠܵܗ̇ ܐܲܪܥܵܐ ܢܸܦܠܘܿܢ ܩܛܝܼ̈ܠܹܝܗ̇.

⁵³ܐܸܢ ܬܸܣܲܩ ܒܵܒܹܠ ܠܲܫܡܲܝܵܐ: ܘܐܸܢ ܬܣܝܼܡ ܒܪܵܘܡܵܐ ܥܘܼܫܢܵܗ̇: ܡ̣ܢ ܩܕ݂ܵܡܲܝ ܢܹܐܬ̣ܘܿܢ ܥܠܹܝܗ̇ ܒܵܙܘܿܙܹ̈ܐ ܐܵܡܲܪ ܡܵܪܝܵܐ.

⁵⁴ܩܵܠܵܐ ܕܝܼܠܲܠܬܵܐ ܡ̣ܢ ܒܵܒܹܠ: ܘܲܬ̣ܒ̣ܵܪܵܐ ܪܲܒܵܐ ܡ̣ܢ ܐܲܪܥܵܐ: ܕܟܲܠܕ݂ܵܝܹ̈ܐ.

⁵⁵ܡܸܛܠ ܕܒܲܙ ܡܵܪܝܵܐ ܠܒ̣ܵܒܹܠ: ܘܐܵܘܒܸ̇ܕ݂ ܡܸܢܵܗ̇ ܒܢܲܝ̈ ܐ̄ܢܵܫܵܠ ܘܲܒ̣ܥܝܼܪܵܐ: ܩܵܠܵܐ ܪܲܒܵܐ ܐܲܝܟ݂ ܡܲـ̈ـܝܵܐ ܣܲܓ̇ܝܼ̈ܐܹܐ ܕܐܵܙܹ̇ܠ ܩܵܠܗܘܿܢ.

⁵⁶ܡܸܛܠ ܕܐܸܬ̣ܵܘ ܥܲܠ ܒܵܒܹܠ ܒܵܙܘܿܙܹ̈ܐ: ܘܐܸܬ̇ܬ̇ܚܸܕ݂ܘ ܓܲܢ̄ܒܵܪܹ̈ܝܗ̇ ܘܐܸܬ̇ܬ̇ܒܲܪ ܩܸܫ̈ܬܵܬ̣ܗܘܿܢ: ܡܸܛܠ ܕܐܲܠܵܗܵܐ ܦܵܪܘܿܥܵܐ ܡܵܪܝܵܐ: ܡܸܦܪܲܥ ܢܸܦܪܘܿܥ ܐܸܢܘܿܢ.

⁵⁷ܘܐܲܪܘܸܐ ܪܵܘܪ̈ܒ̣ܵܢܹ̈ܝܗ̇ ܘܚܲܟ̇ܝܼܡܹ̈ܝܗ̇: ܘܚܹܐܪܹ̈ܝܗ̇ ܘܫܲܠܝܼܛܵܢܹ̈ܝܗ̇ ܘܓܲܢ̄ܒܵܪܹ̈ܝܗ̇: ܘܢܸܕ݂ܡ̱ܟ݂ܘܿܢ ܫܸܢܬ̣ܵܐ ܠܥܵܠܲܡ ܘܠܵܐ ܢܸܬ̇ܬ̇ܥܝܼܪܘܼܢ: ܐܵܡܲܪ ܡܲܠܟܵܐ ܡܵܪܝܵܐ ܚܲܝܠܬ̣ܵܢܵܐ ܫܡܹܗ.

⁵⁸ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܫܘܼܪܹ̈ܝܗ̇ ܕܒ̣ܵܒܹܠ ܪ̈ܘܝܼܚܹܐ ܡܸܬ̣ܥܲܩܵܪܘܼ ܢܸܬ̣ܥܲܩܪܘܼܢ: ܘܬܲܪ̈ܥܹܝܗ̇ ܪ̈ܵܡܹܐ ܒܢܘܼܪܵܐ ܢܹܐܩܕ̇ܘܼܢ: ܘܢܸܠܐܘܿܢ ܥܲܡܡܹ̈ܐ ܣܪܝܼܩܵܐܝܼܬ̣: ܘܐܸܡ̈ܘܵܬ̣ܵܐ ܒܢܘܼܪܵܐ ܢܸܬ̇ܛܲܪ̈ܦܵܢ.

⁵⁹ܦܸܬ̣ܓ̣ܵܡܵܐ ܕܦܲܩܸܕ݂ ܐܹܪܲܡܝܵܐ ܢܒ̣ܝܼܵܐ: ܠܫܹܪܝܼܵܐ ܒܲܪ ܢܹܪܝܼܵܐ ܒܲܪ ܡܥܲܣܝܵܐ: ܟܲܕ݂ ܐܸܙܲܠ ܥܲܡ ܨܹܕܲܩܝܵܐ ܡܲܠܟܵܐ ܕܲܝܗܘܼܕ݂ܵܐ ܠܒ̣ܵܒܹܠ: ܒܲܫܢܲܬ̣ ܚܕܲܥܸܣܪܹ̈ܐ ܕܡܲܠܟ̇ܘܼܬܹܗ: ܘܫܹܪܝܼܵܐ ܪܲܒ̇ ܡܲܫܪܝܼܬ̣ܵܐ ܗ̄ܘ̣ܵܐ.

⁶⁰ܘܲܟ݂ܬܲܒ̣ ܐܹܪܲܡܝܵܐ ܟܠܵܗ̇ ܒܝܼܫܬܵܐ ܕܐܵܬ̣ܝܵܐ ܥܲܠ ܒܵܒܹܠ ܒܣܸܦܪܵܐ ܚܲܕ݂: ܡܸܠܹ̈ܐ ܗܵܠܹܝܢ ܕܲܟ݂ܬ̣ܝܼ̈ܒ̣ܵܢ ܥܲܠ ܒܵܒܹܠ.

⁶¹ܘܐܸܡܲܪ ܐܹܪܲܡܝܵܐ ܠܫܹܪܝܼܵܐ: ܡܵܐ ܕܥܲܠܬ̇ ܠܓ̣ܵܘ ܒܵܒܹܠ: ܩܪܝܼ ܘܲܚܙܝܼ ܟܠܗܘܿܢ ܦܸܬ̣ܓ̣ܵܡܹ̈ܐ ܗܵܠܹܝܢ.

⁶²ܘܐܸܡܲܪ ܡܵܪܝܵܐ: ܐܲܢ̄ܬ̇ ܐܸܡܲܪܬ̇ ܥܲܠ ܐܲܬ̣ܪܵܐ ܗܵܢܵܐ ܠܡܵܘܒܵܕ݂ܘܼܬܹܗ: ܕܠܵܐ ܢܸܗܘܹܐ ܒܹܗ ܕܝܵܬܹܒ̣ ܡ̣ܢ ܒܢܲܝ̈ܢܵܫܵܐ ܘܲܥܕܲܡܵܐ ܠܲܒ̣ܥܝܼܪܵܐ: ܡܸܛܠ ܕܲܠܚܘܼܪܒܵܐ ܠܥܵܠܲܡ ܢܸܗܘܹܐ.

⁶³ܘܡܵܐ ܕܫܲܠܡܸܬ̇ ܠܡܸܩܪܵܐ ܒܣܸܦܪܵܐ ܗܵܢܵܐ: ܩܛܘܿܪ ܒܹܗ ܟܹܐܦܵܐ ܘܲܫܕ݂ܝܼܘܗܝ ܒܲܦܪܵܬ̣.

⁶⁴ܘܐܸܡܲܪ ܗܵܟܲܢܵܐ ܬܸܦܸܠ ܒܵܒܹܠ ܘܠܵܐ ܬܩܘܼܡ: ܡ̣ܢ ܩܕ݂ܵܡ ܒܝܼܫܬܵܐ ܕܡܲܝܬܹ̇ܐ ܐ̄ܢܵܐ ܥܠܲܝܗܘܿܢ ܘܢܸܬ̇ܛܲܪܦܘܼܢ.