Read Aramaic Peshita Lamentations 1 Bible Online

Lamentations 1 - Aramaic Peshita bible

Lamentations 1

¹ܐܲܝܟܲܢܵܐ ܝܸܬ̣ܒܲܬ̤ ܒܲܠܚܘܿܕܹܝܗ̇ ܡܕ݂ܝܼܢ̄ܬܵܐ ܣܲܓ̇ܝܲܐܬ̣ ܒܥܲܡܵܐ: ܗܘ̤ܵܬ̣ ܐܲܝܟ݂ ܐܲܪܡܲܠܬܵܐ ܣܲܓ̇ܝܼܐܬ̣ ܒܥܲܡܡܹ̈ܐ: ܪܹܫܵܐ ܕܲܡܕ݂ܝܼ̈ܢܵܬ̣ܵܐ ܗܘ̤ܵܬ̣ ܠܡܲܕܲܐܬ̣ܵܐ.

²ܒܟ݂ܵܬ̤ ܒܠܸܠܝܵܐ ܘܕܸܡܥܹ̈ܝܗ̇ ܫ̣ܚܸܠ ܥܲܠ ܦܲܟ̇ܝ̈ܗ̇: ܘܠܲܝܬ̇ ܠܵܗ̇ ܡܒܲܝܐܵܢܵܐ ܡ̣ܢ ܟܠܗܘܿܢ ܪ̈ܵܚܡܹܝܗ̇. ܟܠܗܘܿܢ ܪ̈ܵܚܡܹܝܗ̇ ܕܲܓܸ̇ܠ̣ܘ ܒܵܗ̇ ܘܲܗܘ̤ܵܘ ܠܵܗ̇ ܒܥܸܠܕ̇ܒ̣ܵܒܹ̈ܐ.

³ܓܲܠܝܲܬ̤ ܝܑܼܗܘܼܕ݂ܵܐ ܡ̣ܢ ܫܘܼܥܒܵܕ݂ܵܐ ܘܡ̣ܢ ܣܘܿܓܲܐܬ̣ ܥܲܒ̣ܕ̇ܘܼܬ̣ܵܐ: ܗ̤ܝ ܝܸܬ̣ܒܲܬ̤ ܒܹܝܬ̣ ܥܲܡܡܹ̈ܐ: ܘܠܵܐ ܐܸܫܟ̇ܚܲܬ̤ ܠܵܗ̇ ܢܝܵܚܵܐ: ܟܠܗܘܿܢ ܪ̈ܵܕ݂ܘܿܦܹܝܗ̇ ܐܲܕܪ̱ܟ݂ܘܼܗ̇ ܒܹܝܬ̣ ܐܘܼܠܨܵܢܵܐ.

⁴ܐܘܼܪ̈ܚܵܬ̣ܵܗ̇ ܕܨܸܗܝܘܿܢ ܒܐܸܒ̣ܠܵܐ: ܡ̣ܢ ܒܠܲܝ ܕܐܵܬܹ̇ܝܢ ܠܥܲܕ݂ܥܹܕ݂ܵܐ: ܟܠܗܘܿܢ ܬܲܪ̈ܥܹܝܗ̇ ܨܕܹܝܢ: ܘܟ݂ܵܗܢܹ̈ܝܗ̇ ܡܸܬ̇ܬܲܢܚܝܼܢ: ܘܲܒ̣ܬ̣ܘܼ̈ܠܵܬ̣ܵܗ̇ ܡܡܲܟ̇ܟ݂ܵܢ: ܘܗ̤ܝ ܡܲܪܝܼܪ ܠܵܗ̇.

⁵ܗܘ̤ܵܘ ܐܵܠܘܿܨܹܝ̈ܗ̇ ܠܪܹܫ: ܘܲܒ̣ܥܸܠܕ̇ܒ̣ܵܒܹ̈ܝܗ̇ ܫܠܝܼܘ: ܡܸܛܠ ܕܡܵܪܝܵܐ ܡܲܟ̇ܟ݂ܵܗ̇ ܥܲܠ ܣܘܿܓܲܐܬ̣ ܚܛܵܗܹ̈ܝܗ̇: ܘܝܲܠܘܼܕܹܝ̈ܗ̇ ܐܸܙܲܠ̣ܘ ܒܫܸܒ̣ܝܵܐ ܩܕ݂ܵܡ ܐܵܠܘܿܨܵܐ.

⁶ܘܲܢܦܲܩ̣ ܡ̣ܢ ܒܲܪܬ̣ ܨܸܗܝܘܿܢ ܟܠܹܗ ܗܸܕ݂ܪܵܗ̇: ܗܘ̤ܵܘ ܪܵܘܪ̈ܒ̣ܵܢܹܝܗ̇ ܐܲܝܟ݂ ܐܲܝ̈ܠܹܐ: ܘܠܵܐ ܐܸܫܟܲܚܘ ܡܲܪܥܝܼܬ̣ܵܐ: ܘܐܸܙܲܠ̣ܘ ܕܠܵܐ ܚܲܝܠܵܐ ܩܕ݂ܵܡ ܪܵܕ݂ܘܿܦܵܐ.

⁷ܐܸܬ̇ܕܲܟ݂ܪܲܬ̤ ܐܘܿܪܸܫܠܸܡ ܝܵܘ̈ܡܲܝ ܫܘܼܥܒܵܕ݂ܵܗ̇ ܘܡܲܪܕ̇ܘܼܬ̣ܵܗ̇: ܘܟ݂ܠܗܹܝܢ ܪ̈ܓ̣ܝܼܓ̣ܵܬ̣ܵܗ̇ ܕܲܗ̤ܘܲܝ̈ ܡ̣ܢ ܝܵܘ̈ܡܵܬ̣ܵܐ ܩܲܕ݂ܡܵܝܹ̈ܐ: ܟܲܕ݂ ܢܦܲܠ ܥܲܡܵܗ̇ ܒܝܲܕ݂ ܐܵܠܘܿܨܵܐ ܘܠܲܝܬ̇ ܠܵܗ̇ ܡܥܲܕ̇ܪܵܢܵܐ: ܚ̣ܙܵܐܘܼܗ̇ ܐܵܠܘܿܨܹ̈ܝܗ̇ ܘܲܓ̣ܚܸܟ݂ܘ ܥܲܠ ܬܒ̣ܵܪܵܗ̇.

⁸ܚܛܵܗܵܐ ܚܛܵܬ̤ ܐܘܿܪܸܫܠܸܡ: ܡܸܛܠ ܗܵܢܵܐ ܗܘ̤ܵܬ̣ ܢܸܕ̇ܬ̣ܵܐ: ܟܠܗܘܿܢ ܡܝܲܩܪ̈ܵܢܹܝܗ̇ ܨܲܥ̣ܪܘܼܗ̇ ܡܸܛܠ ܕܲܚܙܵܘ ܦܘܼܪܣܵܝܵܗ̇: ܐܵܦ ܗ̤ܝ ܐܸܬ̇ܬܲܢܚܲܬ̤: ܘܗܸܦܟܲܬ̤ ܠܒܸܣܬ̇ܪܵܗ̇.

⁹ܛܲܡܐܘܼܬ̣ܵܗ̇ ܒܲܫܦܘܿܠܹ̈ܝܗ̇ ܘܠܵܐ ܐܸܬ̇ܕܲܟ݂ܪܲܬ̤ ܚܲܪܬ̣ܵܗ̇: ܘܢܸܚܬܲܬ̤ ܬܸܫܒ̇ܘܿܚܬܵܗ̇ ܘܠܲܝܬ̇ ܠܵܗ̇ ܡܒܲܝܐܵܢܵܐ. ܚܙܝܼ ܡܵܪܝܵܐ ܫܘܼܥܒܵܕ݂ܝ ܕܐܸܬ̇ܬ̇ܪܝܼܡ ܒܥܸܠܕ̇ܒ̣ܵܒ̣ܵܐ.

¹⁰ܐܝܼܕ݂ܵܘ̈ܗܝ ܦܪܲܣ̣ ܐܵܠܘܿܨܵܐ ܥܲܠ ܟܠܗܹܝܢ ܪ̈ܓ̣ܝܼܓ̣ܵܬ̣ܵܗ̇: ܘܲܚܙܹ̇ܝܬ̣ ܥܲܡܡܹ̈ܐ ܕܥܲܠ̣ܘ ܠܡܲܩܕ̇ܫܵܟ݂: ܕܦܲܩܸܕ̇ܬ̇ ܕܠܵܐ ܢܸܥܠܘܿܢ ܒܲܟ݂ܢܘܼܫܬܵܟ݂.

¹¹ܟܠܹܗ ܥܲܡܵܐ ܡܸܬ̇ܬܲܢܚܝܼܢ ܘܒ̣ܵܥܹ̇ܝܢ ܠܲܚܡܵܐ: ܝܲܗ̄ܒ̣ܘ ܪܸܓܲܬ̣ܗܘܿܢ ܒܡܹܐܟ݂ܘܼܠܬܵܐ ܠܡܲܦܢܵܝܘܼ ܢܲܦ̮ܫܵܐ: ܚܙܝܼ ܡܵܪܝܵܐ ܘܚܘܼܪ ܕܲܗܘܹ̇ܝܬ̣ ܙܲܠܝܼܠܬܵܐ.

¹²ܠܵܐ ܠܟ݂ܘܿܢ ܟܠ ܥܵܒ̣ܪ̈ܲܝ ܐܘܼܪܚܵܐ: ܐܸܣܬܲܟܲܠܘ ܘܲܚܙܵܘ: ܐܸܢ ܐܝܼܬ̣ ܟܹܐܒܵܐ ܐܲܝܟ݂ ܟܹܐܒ̣ܝ ܕܲܥ̣ܒܲܕ݂ ܠܝܼ ܡܵܪܝܵܐ: ܘܡܲܟ̇ܟܲܢܝ ܡܵܪܝܵܐ ܒܝܵܘܡܵܐ ܕܚܸܡܬ̣ܵܐ ܕܪܘܼܓ̣ܙܹܗ.

¹³ܡ̣ܢ ܡܪܵܘܡܵܐ ܫܲܕܲܪ ܢܘܼܪܵܐ ܒܓܲܪ̈ܡܲܝ ܘܐܲܚ̣ܬܲܢܝ: ܦ̣ܪܲܣ ܡܨܝܼܕ̇ܬܵܐ ܠܪܸ̈ܓ̣ܠܲܝ ܘܐܲܗܦܟܲܝܢܝ ܠܒܸܣܬܲܪܝ: ܘܝܲܗ̄ܒܲܢܝ ܠܚܲܪܒܵܐ ܘܟ݂ܠܝܘܿܡ ܕܵܘܝܵܐ ܐ̄ܢܵܐ.

¹⁴ܐܸܬ̇ܬ̇ܥܝܼܪܘ ܥܠܲܝ ܚܛܵܗܲܝ̈: ܘܒ̣ܐܝܼܕ݂ܵܘ̈ܗܝ ܐܸܣܬ̇ܪܸܓ̣ܘ ܢܝܼܪ̈ܵܘܗܝ ܥܲܠ ܨܵܘܪܝ: ܘܐܸܬ̣ܟ̇ܪܲܗ ܚܲܝܠܝ ܘܐܲܫܠ̱ܡܲܢܝ ܡܵܪܝܵܐ ܒܐܝܼܕ݂ܵܐ ܕܡܲܢ ܕܠܵܐ ܡܲܨܝܵܐ ܐ̄ܢܵܐ ܚܲܝܠܹܗ.

¹⁵ܟܒܲܫ ܟܠܗܘܿܢ ܥܲܫܝܼ̈ܢܲܝ ܡܵܪܝܵܐ ܒܓ̣ܵܘܝ: ܩ̣ܪܵܐ ܥܠܲܝ ܥܲܕ݂ܥܹܕ݂ܵܐ ܠܡܵܘܒܵܕ݂ܘܼ ܓܲܕ̇ܘܼ̈ܕܲܝ: ܡܲܥܨܲܪܬܵܐ ܕܵܫ̣ ܡܵܪܝܵܐ ܠܲܒ̣ܬ̣ܘܼܠܬܵܐ ܒܲܪܬ̣ ܝܑܼܗܘܼܕ݂ܵܐ.

¹⁶ܥܲܠ ܗܵܠܹܝܢ ܒܵܟ݂ܝܵܐ ܐ̄ܢܵܐ ܘܥܲܝ̈ܢܲܝ ܡܲܪ̈ܕ̇ܝܵܢ ܡܲـ̈ـܝܵܐ: ܕܐܲܪܚܸܩ̣ ܡܹܢܝ ܡܒܲܝܐܵܢܵܐ ܡܲܦܢܸܐ ܢܲܦ̮ܫܝ. ܗܘ̤ܵܘ ܒܢܲܝ̈ ܫܲܩܡܝܼܢ: ܡܸܛܠ ܕܲܥܫܸܢ ܒܥܸܠܕ̇ܒ̣ܵܒ̣ܵܐ.

¹⁷ܦܸܪܣܲܬ̤ ܨܸܗܝܘܿܢ ܐܝܼܕܹܝ̈ܗ̇ ܘܠܲܝܬ̇ ܠܵܗ̇ ܡܒܲܝܐܵܢܵܐ: ܦ̣ܩܲܕ݂ ܡܵܪܝܵܐ ܥܲܠ ܝܲܥܩܘܿܒ̣ ܘܚܲܕ݂ܪܘܼܗܝ ܐܵܠܘܿܨܵܘ̈ܗܝ: ܗܘ̤ܵܬ̣ ܐܘܿܪܸܫܠܸܡ ܢܸܕ̇ܬ̣ܵܐ ܒܲܝܢܵܬ̣ܗܘܿܢ.

¹⁸ܙܲܕ̇ܝܼܩ ܗ̄ܘܼ ܡܵܪܝܵܐ ܕܠܹܗ ܡܲܪܡ̇ܪܹܬ̣: ܫܡܲܥܘ ܟܠܟ݂ܘܿܢ ܥܲܡܡܹ̈ܐ ܘܲܚܙܵܘ ܟܹܐܒ̣ܝ: ܒܬ̣ܘܼ̈ܠܵܬ̣ܝ ܘܓܲܕ̇ܘܼ̈ܕܲܝ ܐܸܙܲܠ̣ܘ ܒܫܸܒ̣ܝܵܐ.

¹⁹ܩܪܹܝ̇ܬ̣ ܠܪ̈ܵܚܡܲܝ ܘܗܸܢܘܿܢ ܢܲܟ݂ܠܘܼܢܝ: ܟܵܗ̈ܢܲܝ ܘܩܲܫܝܼ̈ܫܲܝ ܣܵܦ̣ܘ ܒܓ̣ܵܘ: ܕܲܒ̣ܥ̣ܵܘ ܠܗܘܿܢ ܡܹܐܟ݂ܘܼܠܬܵܐ ܕܢܲܦܢܘܿܢ ܢܲܦ̮ܫܗܘܿܢ ܘܠܵܐ ܐܸܫܟ̇ܚ̣ܘ.

²⁰ܚܙܝܼ ܡܵܪܝܵܐ: ܕܥܵܩܲܬ̤ ܠܝܼ: ܘܲܡܥܲܝ̈ ܐܸܬ̇ܕܲܠܲܚܘ ܐܸܬ̣ܗ̱ܦܸܟ݂ ܠܹܒ̇ܝ ܒܓ̣ܵܘܝ: ܡܸܛܠ ܕܲܡܡܲܪܡܵܪܘܼ ܡܲܪܡ̇ܪܹܬ̣ ܡ̣ܢ ܠܒܲܪ ܐܵܘܒ̇ܕܲܬ̤ ܚܲܪܒܵܐ: ܘܕܲܒ̣ܒܲܝܬܵܐ ܡܵܘܬܵܐ.

²¹ܫ̣ܡܲܥ ܕܡܸܬ̇ܬܲܢܚܵܐ ܐ̄ܢܵܐ: ܘܠܲܝܬ̇ ܠܝܼ ܡܒܲܝܐܵܢܵܐ. ܟܠܗܘܿܢ ܒܥܸܠܕ̇ܒ̣ܵܒܲܝ̈ ܫ̣ܡܲܥܘ ܒܒ̣ܝܼܫܬ̇ܝ: ܘܲܚܕ݂ܝܼܘ ܕܐܲܢ̄ܬ̇ ܥ̣ܒܲܕ̇ܬ̇ ܠܝܼ: ܐܝܬܵܐ ܝܵܘܡܵܐ ܕܲܩ̣ܪܲܝܬ̇ ܘܢܸܗܘܘܿܢ ܐܲܟ݂ܘܵܬ̣ܝ.

²²ܬܸܥܘܿܠ ܟܠܵܗ̇ ܒܝܼܫܘܼܬ̣ܗܘܿܢ ܩܕ݂ܵܡܲܝܟ: ܛܲܪܸܦ ܐܸܢܘܿܢ ܐܲܝܟܲܢܵܐ ܕܛܲܪܸܦܬܵܢܝ ܥܲܠ ܟܠܗܘܿܢ ܚܛܵܗܲܝ̈: ܡܸܛܠ ܕܲܣ̈ܓ̣ܝܼ ܬܸܢܚܵܬ̣̈ܝ ܘܠܹܒ̇ܝ ܕܵܘܹܐ. ܕܬܲܪܬܹ̇ܝܢ.