Read Aramaic Peshita Lamentations 2 Bible Online

Lamentations 2 - Aramaic Peshita bible

Lamentations 2

¹ܐܲܝܟܲܢܵܐ ܐܲܥܝܼܒ̣ ܡܵܪܝܵܐ ܒܪܘܼܓ̣ܙܹܗ ܠܒܲܪܬ̣ ܨܸܗܝܘܿܢ: ܐܲܪܡܝܼ ܡ̣ܢ ܫܡܲܝܵܐ ܠܐܲܪܥܵܐ ܬܸܫܒ̇ܘܿܚܬܹ̇ܗ ܕܝܼܣܪܵܝܹܠ: ܘܠܵܐ ܐܸܬ̇ܕ̇ܟܲܪ ܟܘܼܒ̣ܫܵܐ ܕܪܸ̈ܓ̣ܠܵܘܗܝ ܒܝܵܘܡܵܐ ܕܚܸܡܬ̣ܵܐ ܕܪܘܼܓ̣ܙܹܗ.

²ܛܲܒܲܥ̣ ܡܵܪܝܵܐ ܘܠܵܐ ܚܵܣ ܠܟ݂ܠܵܗ̇ ܕܲܝܪܹܗ ܕܝܲܥܩܘܿܒ̣: ܣܚܲܦ̣ ܒܚܸܡܬܹܗ ܠܟܲܪܟ݂ܵܐ ܕܒܲܪܬ̣ ܝܑܼܗܘܼܕ݂ܵܐ: ܐܲܪܡܝܼ ܥܲܠ ܐܲܪܥܵܐ ܩܛܝܼ̈ܠܹܝܗ̇ ܡܲܠܟܹ̇ܝ̈ܗ̇ ܘܪܵܘܪ̈ܒ̣ܵܢܹܝܗ̇.

³ܓܕܲܡ ܒܚܸܡܬ̣ܵܐ ܕܪܘܼܓ̣ܙܹܗ ܟܠܵܗ̇ ܩܲܪܢܹܗ ܕܝܼܣܪܵܝܹܠ: ܐܲܗܦܸܟ݂ ܝܲܡܝܼܢܹܗ ܠܒܸܣܬ̇ܪܹܗ ܡ̣ܢ ܩܕ݂ܵܡ ܒܥܸܠܕ̇ܒ̣ܵܒ̣ܵܐ: ܘܲܫܒܲܩ̣ ܢܘܼܪܵܐ ܒܝܲܥܩܘܿܒ̣: ܘܫܲܠܗܹܒ̣ܝܼܬ̣ܵܐ ܐܸܟ݂ܠܲܬ̤ ܐܝܼܕ݂ܵܘܗܝ.

⁴ܡ̣ܠܵܐ ܩܸܫܬܹ̇ܗ ܐܲܝܟ݂ ܐܵܠܘܿܨܵܐ: ܐܲܩܝܼܡ ܝܲܡܝܼܢܹܗ ܐܲܝܟ݂ ܒܥܸܠܕ̇ܒ̣ܵܒ̣ܵܐ: ܘܩܲܛܸܠ ܟܠ ܪܸܓܲܬ̣ ܥܲܝܢܹ̈ܐ ܒܡܲܫܟ̇ܢܵܐ ܕܒܲܪܬ̣ ܨܸܗܝܘܿܢ: ܘܐܸܫܲܕ݂ ܐܲܝܟ݂ ܢܘܼܪܵܐ ܪܘܼܓ̣ܙܹܗ.

⁵ܗܘ̤ܵܐ ܡܵܪܝܵܐ ܒܥܸܠܕ̇ܒ̣ܵܒ̣ܵܐ ܘܛܲܒ̇ܥܹܗ ܠܝܼܣܪܵܝܹܠ: ܘܛܲܒܲܥ̣ ܟܠܗܹܝܢ ܣܵܚܪ̈ܵܬܹܗ ܘܚܲܒܸ̇ܠ̣ ܟܲܪ̈ܟ݂ܵܘ̈ܗܝ. ܘܐܲܣܓ̇ܝܼ ܒܒܲܪܬ̣ ܝܑܼܗܘܼܕ݂ܵܐ ܬܘܼܢܵܝܵܐ ܘܐܘܿܠ̈ܝܵܬ̣ܵܐ.

⁶ܘܲܥ̣ܩܲܪ ܐܲܝܟ݂ ܓܲܢܬ̣ܵܐ ܡܛܲܠܬ̣ܵܗ̇: ܘܚܲܒܸ̇ܠ̣ ܥܲܕ݂ܥܹܕܹܝ̈ܗ̇: ܘܐܲܛܥܝܼ ܡܵܪܝܵܐ ܡ̣ܢ ܨܸܗܝܘܿܢ ܥܲܕ݂ܥܹܕܹ̈ܐ ܘܫܲܒ̇ܬ̣ܵܐ: ܘܐܲܣܠܝܼ ܒܚܸܡܬ̣ܵܐ ܕܪܘܼܓ̣ܙܹܗ ܡܲܠ̈ܟܹ̇ܐ ܘܟ݂ܵܗ̈ܢܹܐ.

⁷ܛ̣ܥܵܐ ܡܵܪܝܵܐ ܡܲܩܕ̇ܫܹܗ: ܘܐܲܣܠܝܼ ܡܲܕ݂ܒ̇ܚܹܗ: ܘܐܲܫܠܸܡ̣ ܒܐܝܼܕ݂ܵܐ ܕܲܒ̣ܥܸܠܕ̇ܒ̣ܵܒܹ̈ܐ ܫܘܼܪܹ̈ܐ ܕܣܵܚܪ̈ܵܬ̣ܵܗ̇: ܩܵܠܵܐ ܝܲܗ̄ܒ̣ܘ ܒܒܲܝܬܹ̇ܗ ܕܡܵܪܝܵܐ ܐܲܝܟ݂ ܕܲܒ̣ܝܵܘܡܵܐ ܕܥܲܕ݂ܥܹܕ݂ܵܐ.

⁸ܐܸܬ̣ܚܲܫܲܒ̣ ܡܵܪܝܵܐ ܠܲܡܚܲܒܵܠܘܼ ܫܘܼܪܹ̈ܐ ܕܒܲܪܬ̣ ܨܸܗܝܘܿܢ: ܐܲܪܡܝܼ ܚܘܼܛܵܐ ܘܠܵܐ ܐܲܗܦܸܟ݂ ܐܝܼܕܹܗ ܡ̣ܢ ܛܘܼܒܵܥܵܗ̇: ܘܐܵܘܬܸ̇ܒ̣ ܒܐܒ̣ܠܵܐ ܚܲܝ̈ܠܹܗ: ܘܫܘܼܪܹ̈ܝܗ̇ ܐܲܟ݂ܚ̄ܕ݂ܵܐ ܨܕ݂ܵܘ.

⁹ܛܲܒܲܥ̣ܘ ܒܐܲܪܥܵܐ ܬܲܪ̈ܥܹܝܗ̇: ܐܵܘܒܸ̇ܕ݂ܘ ܘܬܲܒܲܪܘ ܣܘܼܟ̇ܪܹ̈ܝܗ̇: ܡܲܠ̈ܟܹ̇ܝܗ̇ ܘܪܵܘܪ̈ܒ̣ܵܢܹܝܗ̇ ܒܥܲܡܡܹ̈ܐ: ܠܲܝܬ̇ ܢܵܡܘܿܣܵܐ: ܘܐܵܦ ܢܒ̣ܝܹ̈ܝܗ̇ ܠܵܐ ܐܸܫ̣ܟܲܚܘ ܚܸܙܘܵܐ ܡ̣ܢ ܡܵܪܝܵܐ.

¹⁰ܝܸܬܸܒ̣ܘ ܒܐܲܪܥܵܐ ܘܲܫܬܸܩ̣ܘ ܩܲܫܝܼܫܹ̈ܐ ܕܒܲܪܬ̣ ܨܸܗܝܘܿܢ: ܐܲܪܡܝܼܘ ܥܲܦܪܵܐ ܒܪܹ̈ܫܲܝܗܘܿܢ ܘܐܸܬ̣ܟ̇ܒܸܢܘ ܣܲܩܹ̈ܐ: ܣ̣ܡܲܟ݂ ܠܐܲܪܥܵܐ ܪܹ̈ܫܲܝܗܹܝܢ ܒܬ̣ܘܼ̈ܠܵܬ̣ܵܐ ܕܐܘܿܪܸܫܠܸܡ.

¹¹ܚ̣ܫܸܟ݂ ܒܕܸܡܥܹ̈ܐ ܥܲܝ̈ܢܲܝ ܘܐܸܬ̇ܕܲܠܲܚܘ ܡܥܲܝ̈: ܐܸܬ̣ܗ̱ܦܸܟ݂ ܠܐܲܪܥܵܐ ܐܝܼܩܵܪܝ ܥܲܠ ܬܒ̣ܵܪܵܗ̇ ܕܒܲܪܬ̣ ܥܲܡܝ: ܟܲܕ݂ ܐܸܬ̇ܛܲܪܲܦܘ ܛܠܵܝܹ̈ܐ ܘܝܲܠܘܼ̈ܕܹܐ ܒܫܘܼܩܹܝ̈ܗ̇ ܕܲܩܪܝܼܬ̣ܵܐ.

¹²ܠܐܸܡ̈ܗܵܬ̣ܗܘܿܢ ܐܵܡ̇ܪܝܼܢ: ܐܲܝܟܵܘ ܥܒ̣ܘܼܪܵܐ ܘܚܲܡܪܵܐ ܘܡܸܫܚܵܐ: ܟܲܕ݂ ܐܸܬ̇ܛܲܪܲܦܘ ܐܲܝܟ݂ ܩܛܝܼ̈ܠܹܐ ܒܫܘܼܩܹܝ̈ܗ̇ ܕܲܩܪܝܼܬ̣ܵܐ: ܟܲܕ݂ ܐܸܬ̣ܐ̱ܫܸܕ݂ ܢܲܦ̮̈ܫܵܬ̣ܗܘܿܢ ܒܥܘܼܒܵܐ ܕܐܸܡ̈ܗܵܬ̣ܗܘܿܢ.

¹³ܡܵܢܵܐ ܐܹܣܲܗܕܹܟ݂ܝ ܘܲܠܡܲܢ ܐܹܕܲܡܸܐ ܠܹܟ݂ܝ ܒܲܪܬ̣ ܐܘܿܪܸܫܠܸܡ: ܡ̣ܢ ܐܹܦܲܚܸܡ ܠܹܟ݂ܝ ܘܐܹܒܲܝܐܹܟ݂ܝ ܒܬ̣ܘܼܠܬܵܐ ܒܲܪܬ̣ ܨܸܗܝܘܿܢ: ܕܲܣܓܝܼ ܐܲܝܟ݂ ܝܲܡܵܐ ܬܒ̣ܵܪܹܟ݂ܝ ܡܲܢ̣ܘܼ ܢܸܣܟ̇ܘܿܪ.

¹⁴ܢܒܲܝܲܝ̈ܟ̇ܝ ܚ̣ܙܵܘ ܠܹܟܝ ܕܲܓܵܠܘܼܬ̣ܵܐ ܘܡܲܛܥ̱ܝܵܢܘܼܬ̣ܵܐ: ܘܠܵܐ ܓ̣ܠܵܘ ܠܹܟ݂ܝ ܥܲܠ ܚܛܵܗܲܝ̈ܟ̇ܝ ܕܲܬ̇ܬ̣ܘܼܒ̣ܝܼܢ. ܘܐܲܗܦܸܟ݂ ܫܒ̣ܝܼܬܹܟ݂ܝ: ܘܲܚ̣ܙܵܘ ܠܹܟ݂ܝ ܢܒ̣̈ܝܼܵܘܵܬ̣ܵܐ ܕܲܓܵܠܵـ̈ـܬ̣ܵܐ ܘܡܲܛܥ̱ܝܵܢ̈ܝܵܬ̣ܵܐ.

¹⁵ܛܲܪܸܦ̣ܘ ܥܠܲܝܟ̇ܝ ܐܝܼܕܲܝ̈ܗܘܿܢ ܟܠ ܥܵܒ̣ܪ̈ܲܝ ܐܘܼܪܚܵܐ: ܐܫܪܸܩ̣ܘ ܘܐܲܢܝܼܕ݂ܘ ܪܹ̈ܫܲܝܗܘܿܢ ܥܲܠ ܒܲܪܬ̣ ܐܘܿܪܸܫܠܸܡ: ܘܐܸܡܲܪܘ: ܗܵܕܲܐ ܗ̄ܝܼ ܩܪܝܼܬ̣ܵܐ ܕܐܵܡ̇ܪܝܼܢ ܗ̄ܘܼܵܘ ܓܡܝܼܪܲܬ̤ ܫܘܼܦܪܵܐ ܘܚܲܕ݂ܘܼܬ̣ܵܐ ܕܟ݂ܠܵܗ̇ ܐܲܪܥܵܐ.

¹⁶ܥ̣ܒܲܕ݂ ܡܵܪܝܵܐ ܡܸܕܸ̇ܡ ܕܐܸܬ̣ܚܲܫܲܒ̣: ܘܫܲܡ̣ܠܝܼ ܡܸܠܬܹܗ: ܐܲܝܟ݂ ܕܲܦ̣ܩܲܕ݂ ܡ̣ܢ ܝܵܘ̈ܡܵܬ̣ܵܐ ܩܲܕ݂ܡܵܝܹ̈ܐ: ܣܲܚܦܵܗ̇ ܘܠܵܐ ܚܵܣ: ܘܐܲܚܕ̇ܝܼ ܥܠܲܝܟ̇ܝ ܒܥܸܠܕ̇ܒ̣ܵܒܹ̈ܐ: ܘܐܲܪܝܼܡ ܩܲܪܢܵܐ ܕܐܵܠܘܿܨܲܝ̈ܟ̇ܝ.

¹⁷ܦܬܲܚ̣ܘ ܥܠܲܝܟ̇ܝ ܦܘܼܡܗܘܿܢ ܟܠܗܘܿܢ ܒܥܸܠܕ̇ܒ̣ܵܒܲܝ̈ܟ̇ܝ: ܐܲܫܪܸܩ̣ܘ ܘܚܲܪܸܩ̣ܘ ܫܸܢܲܝ̈ܗܘܿܢ: ܘܐܵܡ̇ܪܝܼܢ ܒܠܲܥܢܵܗ̇: ܒܪܲܡ ܗܵܢܵܘ ܝܵܘܡܵܐ ܕܣܲܟ̇ܝܼܢ: ܐܸܫܟܲܚܢ ܘܲܚܙܲܝܢ.

¹⁸ܓܥ̣ܵܐ ܠܸܒ̇ܗܘܿܢ ܠܘܵܬ̣ ܡܵܪܝܵܐ ܕܫܘܼܪܹ̈ܐ ܕܒܲܪܬ̣ ܨܸܗܝܘܿܢ: ܐܲܪܕܵܝ ܐܲܝܟ݂ ܢܲܚܠܵܐ ܕܸܡ̱ܥܬܹܟ݂ܝ ܒܐܝܼܡܵܡܵܐ ܘܲܒ̣ܠܸܠܝܵܐ: ܠܵܐ ܬܸܬ̇ܠܝܼܢ ܠܹܟܝ ܦܘܼܝܵܓ̣ܵܐ: ܘܠܵܐ ܬܸܫܠܸܐ ܒܵܒܲܬ̤ ܥܲܝܢܹܟ݂ܝ.

¹⁹ܩܘܼܡܝ ܫܲܒܲܚܝ ܒܠܸܠܝܵܐ ܒܪܹܫ ܡܲܛܲܪܬܵܐ: ܐܲܫܘܿܕ݂ܝ ܐܲܝܟ݂ ܡܲـ̈ـܝܵܐ ܠܹܒ̇ܟ݂ܝ ܠܘܼܩܒܲܠ ܐܲܦܲܝ̈ ܡܵܪܝܵܐ: ܐܲܪܝܼܡܝ ܠܘܵܬܹܗ ܐܝܼܕܲܝ̈ܟ̇ܝ ܥܲܠ ܢܲܦ̮̈ܫܵܬ̣ܵܐ ܕܝܲܠܘܼܕܲܝ̈ܟ̇ܝ: ܕܡܸܬ̇ܛܲܪܦܝܼܢ ܠܟܲܦܢܵܐ ܒܪܹܫ ܟܠܗܘܿܢ ܫܘܼܩܹ̈ܐ:

²⁰ܚܙܝܼ ܡܵܪܝܵܐ ܘܚܘܼܪ ܠܡܲܢ ܥ̣ܒܲܕܬ̇ ܗܵܟܲܢܵܐ: ܐܹܝܢ ܢܹܐܟ݂̈ܠܵܢ ܢܸܫܹ̈ܐ ܦܹܐܪ̈ܲܝܗܹܝܢ ܘܝܲܠܘܼ̈ܕܹܐ ܕܡܸܫܬܲܩܦܝܼܢ: ܐܹܝܢ ܢܸܬ̣ܩ̄ܛܸܠ ܒܡܲܫܟ̇ܢܹܗ ܕܡܵܪܝܵܐ ܟܵܗܢܵܐ ܘܲܢܒ̣ܝܼܵܐ.

²¹ܫܟܸܒ̣ܘ ܥܲܠ ܐܲܪܥܵܐ ܒܫܘܼܩܹ̈ܐ ܛܠܵܝܹ̈ܐ ܘܣܵܒܹ̈ܐ: ܒܬܘܼ̈ܠܵܬ̣ܝ ܘܓܲܕ̇ܘܼ̈ܕܲܝ ܢܦܲܠ̣ܘ ܒܚܲܪܒܵܐ: ܩܲܛܸܠܬ̇ ܒܝܵܘܡܵܐ ܕܪܘܼܓ̣ܙܵܟ݂: ܛܲܒܲܚ̣ܬ̇ ܘܠܵܐ ܚܵܣܬ̇.

²²ܩܸܪܲܝܬ̇ ܐܲܝܟ݂ ܝܵܘܡܵܐ ܕܥܲܕ݂ܥܹܕܵܐ ܒܥܸܠܕ̇ܒ̣ܵܒܲܝ̈ ܡ̣ܢ ܚܕ݂ܵܪܲܝ: ܘܠܵܐ ܗܘ̤ܵܐ ܒܝܵܘܡܵܐ ܕܪܘܼܓ̣ܙܹܗ ܕܡܵܪܝܵܐ ܦܠܝܼܛܵܐ ܘܲܣܪܝܼܕ݂ܵܐ: ܕܫܸܩܠܹ̇ܬ̣ ܘܪܲܒ̇ܝܹܬ̣ ܒܥܸܠܕ̇ܒ̣ܵܒܲܝ̈ ܓܲܡܲܪܘ ܐܸܢܘܿܢ.